Jistgħu l-​Ħabsin Tassew Jirranġaw Ħajjithom?

“Ħadd ma jistaʼ jġiegħel lil esseri uman ieħor biex jiġi riabilitat. Il-​bidla trid isseħħ fl-​individwu minn ġewwau jrid ikun hemm ir-​rieda.”—​VIVIEN STERN, A SIN AGAINST THE FUTURE—IMPRISONMENT IN THE WORLD.

FATTUR vitali biex il-​ħabsin tassew jirranġaw ħajjithom jiffoka fuq l-​edukazzjoni u l-​bidla fil-​valuri u l-​ħarsa taʼ dak li jkun. M’hemm l-​ebda dubju li jeżistu individwi sinċieri li qed jagħmlu sforzi biex jedukaw u jgħinu lill-​priġunieri. Ix-​xogħol altruist u mill-​aħjar taʼ dawn in-​nies huwa tabilħaqq apprezzat minn ħafna priġunieri.

Xi nies iġibu l-​argument li s-​sistema tal-​ħabsijiet b’mod ġenerali m’għandha l-​ebda tama li titranġa u li l-​priġunieri ma tantx jistgħu jagħmlu bidla f’ambjent bħal dan. Filwaqt li jistaʼ jkun minnu li l-​ħabs waħdu ma jnissilx valuri ġodda, it-​tagħlim tal-​Bibbja għen lil xi wħud biex ibiddlu ħajjithom. Dan juri li huwa possibbli li n-​nies jirranġaw ħajjithom fuq bażi individwali.

Illum, permezz t’għajnuna mill-​Bibbja, xi ħabsin qed jagħmlu l-​bidliet li jipproduċu raġunar u kondotta xierqa. Kif? Billi jagħtu kas il-​parir tal-​Bibbja: “Timxux max-​xejra taʼ din id-​dinja, iżda nbidlu skond it-​tiġdid taʼ fehmietkom, biex iseħħilkom tagħrfu x’inhi r-​rieda taʼ Alla, x’inhu t-​tajjeb li jogħġbu, x’inhu perfett.” (Rumani 12:2) Dan kif isir?

L-​Irwol tal-​Bibbja

Ħafna nies iħossu li r-​reliġjon tistaʼ tilgħab parti importanti f’li tgħin lill-​priġunieri biex jindmu minn dak li kienu jagħmlu qabel. M’għandniex xi ngħidu, problema bażika tistaʼ tkun li kwalunkwe bidla fil-​karattru li sseħħ fil-​ħabs tistaʼ tgħib fix-​xejn ladarba l-​ħabsi jinħeles. Wieħed ħabsi esprima ruħu b’dan il-​mod: “Ħafna nies isibu lil Kristu f’dan il-​post—imma meta joħorġu minn hawn, iħallu lil Kristu warajhom!”

L-esperjenza wriet li bidla ġenwina trid isseħħ minn ġewwa—fil-​moħħ u l-​qalb tal-​kriminal—u li l-​bażi trid tkun indiema sinċiera għall-​ħażen tal-​passat. Programm taʼ edukazzjoni mill-​Bibbja jistaʼ jgħin lil individwu jsir jaf kif Alla jħossu dwar il-​ħażen u għala huwa żbaljat. B’hekk, jistaʼ jkollu raġunijiet sodi għala ma jkunx irid jibqaʼ għaddej f’dik il-​ħajja.

Ix-Xhieda taʼ Jehovah qed jikkonduċu dan it-​tip taʼ programm taʼ edukazzjoni mill-​Bibbja f’diversi ħabsijiet madwar id-​dinja, u qed ikollhom riżultati sbieħ ħafna. (Ara paġna 10.) Wieħed priġunier ikkummenta: “Aħna ġejna megħjunin niskopru x’tgħid il-​Bibbja dwar l-​iskop tal-​ħajja u x’barkiet hemm għall-​bnedmin fil-​futur.” Hu kompla jgħid: “Din hija edukazzjoni taʼ l-​għaġeb!” Ħabsi ieħor qal: “Qed nieħdu deċiżjonijiet ibbażati fuq il-​pariri t’Alla. . . . Qed naraw bidliet iseħħu fina. Issa nafu x’inhuma l-​prijoritajiet tal-​ħajja.”

M’għandniex xi ngħidu, il-​bidla ma tinkludix il-​ħabsijiet u daqshekk. Is-​soluzzjoni vera għall-​kriżi tal-​ħabsijiet qegħda f’li jitneħħa l-​bżonn taʼ ħabsijiet. Waħda mill-​veritajiet glorjużi tal-​Bibbja li messet il-​qlub taʼ ħafna ħabsin tinsab f’din il-​wegħda mingħand Alla: “Il-​ħżiena jitqaċċtu ’l barra . . . Il-​ġusti jirtu l-​art, u jgħammru fiha għal dejjem.”—Salm 37:9, 29.

Meta dan iseħħ, se jkun hemm gvern bla korruzzjoni li juri mħabba kif ukoll huwa sod, illi se jara li l-​livelli għoljin t’Alla jinżammu. Dan il-​gvern huwa s-​Saltna t’Alla fis-​sema mmexxija minn Kristu—il-​gvern li l-​Kristjani tgħallmu jitolbu għaliha. (Mattew 6:10) F’dik id-​dinja l-​ġdida, kull abitant se jirranġa ħajtu billi jitgħallem il-​liġijiet superjuri t’Alla. Imbagħad tassew bħal qatt qabel se jseħħ il-​kliem li ‘l-​art se tkun mimlija bl-​għarfien tal-​Mulej bħalma l-​baħar hu miksi bl-​ilmijiet.’ (Isaija 11:9) B’liema riżultat? L-​abitanti ubbidjenti fid-​dinja l-​ġdida ‘se jitgħaxxqu bi sliem kotran.’—Salm 37:11.

[Kaxxa/Stampi f’paġna 10]

Tama għall-​Priġunieri

Għal iktar minn 20 sena, ministri volontiera tax-​Xhieda taʼ Jehovah mexxew b’suċċess programm edukattiv ibbażat fuq il-​Bibbja fil-​penitenzjarju federali f’Atlanta, Ġeorġja, fl-​Istati Uniti. Matul dawn l-​għoxrin sena, iktar minn 40 ħabsi ġew megħjunin biex isiru ministri mgħammdin tax-​Xhieda taʼ Jehovah, u iktar minn 90 ħabsi ieħor ibbenefikaw ukoll minn studji regulari tal-​Bibbja.

Dan l-​aħħar Stenbaħ! tkellem maʼ diversi għalliema tal-​Bibbja li ħadmu bla egoiżmu f’dan il-​ħabs.

▪ Għala hija l-​edukazzjoni Biblika tant effettiva biex tqanqal lil ċerti ħabsin ibiddlu ħajjithom?

David: Ħafna priġunieri jkunu nies li ma ġewx murijin imħabba, anki fi tfulithom. Allura meta jsiru jafu li Alla jħobbhom u meta jiftħu qalbhom miegħu permezz tat-​talb u mbagħad hu jwieġeb it-​talb tagħhom, Alla jsir reali għalihom. Ir-​riżultat ikun li qalbhom tqanqalhom biex iħobbuh lura.

Ray: Wieħed mill-​ħabsin li studjajt miegħu kien jiġi abbużat meta kien għadu tifel. Meta staqsejtu x’kien li ġibdu lejn Jehovah, hu qalli li meta titgħallem il-​verità tal-​Bibbja, issir taf li Jehovah tassew jifhmek. Dan ġagħlu jrid jitgħallem iktar dwar il-​personalità t’Alla li tant jaf iħobb.

▪ Xi wħud jgħidu li l-​priġunieri jaqbdu mar-​reliġjon għal motivi ulterjuri—biex titnaqqsilhom is-​sentenza jew sempliċement biex jimlew il-​ħin. L-​esperjenza x’urietek?

Fred: Meta l-​ħabsin jiġu għall-​istudji tagħna, aħna ma nistudjawx magħhom b’mod li nipprovaw inqanqlulhom l-​emozzjonijiet tagħhom. Kulma nagħmlu huwa li nistudjaw il-​Bibbja magħhom. Huma malajr isiru jafu li se jiġu mgħallmin dwar il-​Bibbja u xejn iktar. Ġieli ġew fuqi u talbuni ngħinhom fuq il-​każ tagħhom fil-​qorti. Jien ma nitkellimx fuq dawn l-​affarijiet magħhom. Ir-​riżultat huwa li dawk li jattendu l-​grupp taʼ l-​istudju u jibqgħu jiġu għal perijodu taʼ żmien ikunu jridu verament jitgħallmu dak li tgħid il-​Bibbja.

Nick: Ħaġa li ninnota hija l-​bidliet li xi ħabsin jagħmlu waqt li jkunu fil-​ħabs. Xi wħud minnhom saru ministri mgħammdin u batew ħafna minħabba dak li jagħmlulhom ħabsin oħra. Din hija xi ħaġa iebsa ħafna għalihom. Li kieku l-​Bibbja ma missitilhomx qalbhom, ma kienx jirnexxilhom jibqgħu leali taħt dawk iċ-​ċirkustanzi.

Israel: Ġeneralment, dawn huma nies b’xewqa kbira li jitgħallmu dwar Jehovah, u dan jesprimuh b’mod li jqanqlek. Tistaʼ tara kif dan ikun ġej minn qalbhom.

Joe: Dawk li jsiru Kristjani veri jifhmu għala l-​affarijiet marru ħażin f’ħajjithom. Jifhmu wkoll li għandhom opportunità li jinbidlu—li issa għandhom tama quddiemhom. Issa jistgħu tassew jantiċipaw it-​twettiq tal-​wegħdi taʼ Jehovah għall-​futur.

▪ Is-​sistema tal-​ħabs waħedha għala m’hijiex biżżejjed biex tbiddel il-​kriminali?

Joe: L-​iskop tas-​sistema penali hija, mhux li tirriabilita, imma li żżomm il-​kriminali ’l bogħod mill-​bqija tas-​soċjetà. Din hija l-​qalba tal-​problema—il-​mentalità li għandha s-​sistema tal-​ħabsijiet lejn dawn l-​irġiel.

Henry: Is-​sistema tal-​ħabsijiet m’hijiex kapaċi tbiddel il-​qalb taʼ min jiżbalja. Il-​biċċa l-​kbira minn dawn in-​nies se jerġgħu jikkommettu l-​istess reati malli joħorġu.

[Stampa f’paġna 8, 9]

Għadd taʼ ħabsin ġew megħjunin jitgħallmu l-​verità tal-​Bibbja