Iż-​Żgħażagħ Jistaqsu . . .

Kif Jistaʼ Jkolli Relazzjoni Iktar mill-​Qrib man-​Nanniet Tiegħi?

“Iż-​żewġ nanniet irġiel, it-​tnejn li huma jħobbu jirrakkontaw l-​istejjer. L-​istejjer tagħhom jgħinuni nifhem kif inħossni jien stess.”—Joshua.

KIEN hemm żmien meta kien komuni li diversi ġenerazzjonijiet tal-​membri tal-​familja jgħixu ħdejn xulxin—taʼ spiss fl-​istess dar. Kienet ħaġa normali li wieħed jagħmilha ħafna man-​nanniet tiegħu.

Illum il-​ġurnata, id-​distanzi kbar jistgħu jifirdu liż-​żgħażagħ min-​nanniet tagħhom. Iktar minn hekk, numri li dejjem jiżdiedu taʼ familji tkissru bid-​divorzju. Il-​gazzetta The Toronto Star irrapportat li “n-​nanniet jistgħu jkunu wkoll il-​vittmi tad-​divorzju u ma jitħallewx jaraw lin-​neputijiet li tant iħobbu.” F’każi oħrajn, il-​problema hi li ħafna żgħażagħ sempliċement ikollhom ħarsa negattiva dwar ix-​xjuħ, billi jqisuhom bħala maqtugħin mid-​dinja, bħala li għandhom opinjonijiet, valuri, u interessi li huma differenti ħafna minn tagħhom. Xi jkun ir-​riżultat? Ħafna żgħażagħ sempliċement m’għandhomx relazzjoni mill-​qrib man-​nanniet tagħhom daqskemm jistgħu jkollhom.

Din hija ħasra. Bħalma wera artiklu taʼ qabel f’din is-​serje, li wieħed ikollu relazzjoni mill-​qrib man-​nanniet tiegħu—speċjalment jekk ikollhom il-​biżaʼ t’Alla—hija xi ħaġa bnina, taʼ siwi, u pjaċevoli.a Tfajla adolexxenti jisimha Rebekah tgħid dwar in-​nanniet tagħha: “Dejjem jirnexxilna nidħqu flimkien.” Żagħżugħ jismu Peter jgħid xi ħaġa simili: “Ma nibżax ngħidilhom kif inħossni jew xi nkun bi ħsiebni nagħmel. Xi kultant inħossni iktar komdu li nitkellem magħhom milli mal-​ġenituri tiegħi. Inħossni li nistaʼ nitkellem man-​nanniet tiegħi dwar kollox.”

Xi ngħidu dwarek? Forsi meta kont żgħir kellek relazzjoni mill-​qrib man-​nanniet tiegħek. Imma issa li int adolexxenti, jistaʼ jkun li ma tantx ipprovajt tikkultiva r-​relazzjoni tagħkom dan l-​aħħar. Fil-​każ, il-​prinċipju tal-​parir Bibliku li nsibu fit-​2 Korintin 6:​11-13 japplika tajjeb hawn, jiġifieri, li ‘tiftaħ qalbek beraħ’ fl-​affezzjonijiet tiegħek lejhom. Tqum il-​mistoqsija, Kif?

Ħu l-​Inizjattiva

‘Li tiftaħ qalbek beraħ’ jagħtina x’nifhmu li rridu nieħdu l-​inizjattiva. Wara kollox, il-​Bibbja tgħid: “Min ħaqqu l-​ġid tiċħadhulux, meta dan tistaʼ tagħmlu.” (Proverbji 3:27) Meta kont iżgħar, forsi ma ‘stajt’ tagħmel xejn dwar ir-​relazzjoni tiegħek man-​nanniet. Imma issa li kbirt, u forsi int adult ukoll, tistaʼ ssib li hemm għadd taʼ passi xierqa li tistaʼ tieħu.

Per eżempju, jekk in-​nanniet tiegħek joqogħdu viċin tiegħek, tistaʼ tiħodha d-​drawwa li żżurhom regolarment. Se tiddejjaq? Jistaʼ jkun, jekk toqogħdu bil-​qegħda u ma tgħidux kelma. Mela aqbad konversazzjoni! Fuqiex tistaʼ titkellem? Il-​prinċipju Bibliku f’Filippin 2:4 huwa t’għajnuna f’dan. Jgħidilna biex ‘ma nfittxux li jaqblilna, imma li jaqbel lil ħaddieħor.’ Fi kliem ieħor, uri interess fin-​nanniet tiegħek. Ġagħalhom jitkellmu dwar l-​affarijiet li jinteressawhom. Kif iħossuhom? X’qegħdin jagħmlu bħalissa? Forsi jħobbu jitkellmu dwar l-​imgħoddi. Allura staqsihom kif kienet il-​ħajja meta kienu żgħar. Jew kif kienu missierek jew ommok meta kienu żgħar? Jekk in-​nanniet huma Kristjani, staqsihom x’kien li ġibidhom lejn il-​veritajiet tal-​Bibbja.

In-nanniet taʼ spiss ikollhom ħażna kbira taʼ informazzjoni dwar il-​passat tal-​familja, u probabbilment ikunu ħerqanin li joqogħdu jirrakkontawlek ħafna stejjer sbieħ. Fil-​fatt, il-​ħin li tqattaʼ magħhom tistaʼ tbiddlu fi proġett taʼ gost. Ipprova intervista lin-​nanniet tiegħek, forsi billi tieħu n-​noti jew tirrekordjahom fuq it-​tejp jew il-​vidjo. Jekk ma tkunx taf x’se taqbad tistaqsihom, staqsi lill-​ġenituri tiegħek biex jgħinuk taħseb f’mistoqsijiet addattati. X’aktarx li se titgħallem ħafna affarijiet li se jgħinuk tifhem iktar kemm lin-​nanniet tiegħek, kemm lill-​ġenituri, kif ukoll lilek innifsek. “Iż-​żewġ nanniet irġiel, it-​tnejn li huma jħobbu jirrakkontaw l-​istejjer,” jgħid Joshua. “L-​istejjer tagħhom jgħinuni nifhem kif inħossni jien stess.”

Iżda tinsiex li n-​nanniet tiegħek huma interessati wkoll fik u f’dak li tagħmel. Meta tgħidilhom x’qed tagħmel tkun qed tistidinhom ikunu parti minn ħajtek. Dan żgur se jressaqkom eqreb taʼ xulxin. Żagħżugħ fi Franza jismu Igor jgħid: “Jien u nannti nħobbu nieħdu tazza te flimkien f’ħanut tal-​kafè, u noqogħdu nitkellmu dwar xi nkunu għaddejna minnu dan l-​aħħar.”

X’Nistgħu Nagħmlu Flimkien?

Meta tkunu bdejtu titkellmu flimkien, forsi tistaʼ tagħmel pass ieħor ’il quddiem u tibdew tagħmlu xi affarijiet flimkien. Bi ftit ħsieb minn qabel, tistaʼ ssib ħafna tipi t’attivitajiet li tistgħu tieħdu sehem fihom flimkien. Iż-​żagħżugħa Dara tiftakar: “Iż-​żewġ nanniet nisa, it-​tnejn li huma għallmuni nsajjar, nippreserva l-​ikel, naħmi, nikkultiva l-​pjanti, u nieħu ħsieb il-​ġnien.” Amy kienet tmur man-​nanniet tagħha meta l-​membri tal-​familja kienu jiltaqgħu flimkien jew meta kienu jmorru vaganza. Xi nanniet, skond l-​età li jkollhom, ikunu attivi mhux ħażin. Aaron iħobb jilgħab il-​golf maʼ nanntu. Joshua jħobb jistad maʼ nannu wieħed u man-​nannu l-​ieħor jieħu pjaċir jagħmel xi biċċa xogħol fid-​dar.

Jekk in-​nanniet tiegħek iqimu lil Jehovah, tistaʼ tieħu gost b’mod partikulari li tieħu sehem magħhom f’aspetti tal-​qima lil Jehovah, bħal li titkellmu m’oħrajn dwar il-​Bibbja. Igor mar maʼ nanntu għal laqgħa internazzjonali tax-​Xhieda taʼ Jehovah fil-​Polonja. “Kienet esperjenza li qsamna flimkien li ma ninsewha qatt, u għadna nieħdu gost nitkellmu fuqha,” jgħid hu. Veru, mhux għan-​nanniet kollha jkun faċli li jmorru minn post għall-​ieħor. Xorta waħda, jiswa li tqattaʼ l-​ħin magħhom.

Wirt Spiritwali

Fi żminijiet Bibliċi mara jisimha Lojd kellha rwol importanti f’li tgħin lin-​neputi tagħha Timotju, biex isir raġel t’Alla li jispikka. (2 Timotju 1:5) Mhux taʼ b’xejn li ħafna nanniet Kristjani għandhom irwol simili llum. Joshua jgħid dwar in-​nanniet tiegħu: “Ilhom jaqdu lil Jehovah iktar minn kemm ili neżisti jien, u għalhekk għandi rispett profond lejhom, mhux biss għax huma n-​nanniet tiegħi imma għax huma nies taʼ integrità.” Amy tgħid: “In-​nanniet tiegħi dejjem jgħidu kemm iħossuhom inkuraġġiti u ferħanin li jarawni naqdi fedelment lil Jehovah. Madankollu, meta nara l-​eżempju mill-​aqwa u ż-​żelu tagħhom għal Jehovah bħala pijunieri [evanġelizzaturi full-time] ninkuraġġixxi ruħi biex nibqaʼ fis-​servizz tiegħi taʼ pijunier.”

Chris isejjaħ lil nanntu bħala “l-​persuna li l-​iktar li mmotivatni biex nistudja u nagħmel progress.” Hu jżid: “Qatt ma ninsieha meta qalet li ‘għal Jehovah rridu nagħtu l-​aħjar tagħna.’” In-​nanniet taʼ Pedro kellhom irwol kbir b’mod speċjali fl-​iżvilupp spiritwali tiegħu. Hu jgħid: “L-​esperjenza tagħhom għenitni ħafna. In-​nanniet tiegħi dejjem ħaduni nippriedka magħhom, u dan napprezzah ħafna.” Iva, li jkollok relazzjoni mill-​qrib man-​nanniet li għandhom il-​biżaʼ t’Alla jistaʼ jgħinek taqdi lil Alla iktar bis-​sħiħ.

Nanniet li Joqogħdu ’l Bogħod

Xi ngħidu jekk in-​nanniet tiegħek joqogħdu ’l bogħod? Jekk inhu possibbli, ipprova żurhom b’mod regulari. Bejn darba u oħra, agħmel li tistaʼ biex tibqaʼ f’kuntatt magħhom. Hornan jara lin-​nanniet tiegħu tliet darbiet biss fis-​sena, imma hu jgħid: “Kull nhar taʼ Ħadd inċemplilhom.” Dara, li wkoll toqgħod ’il bogħod min-​nanniet tagħha, tgħid: “Jieħdu interess fija, u aħna nċemplu u nibagħtu messaġġi bl-​E-mail lil xulxin kważi kull ġimgħa.” L-​E-mail u t-​telefonati għandhom posthom, imma taħsibx li ittra miktuba minnek stess m’għandhiex effett qawwi. Ħafna żgħażagħ jibqgħu skantati meta jsiru jafu li n-​nanniet tagħhom ikunu żammew kull ittra li bagħtulhom minn meta kienu għadhom tfal. L-​ittri jistgħu jinqraw darba wara l-​oħra, u huma għeżież. Għalhekk kun ċert li tikteb l-​ittri!

In-nanniet taʼ spiss ikollhom imħabba speċjali għan-​neputijiet tagħhom. (Proverbji 17:6) Hemm ħafna modi kif tistaʼ tibni u żżomm relazzjoni mill-​qrib man-​nanniet tiegħek, sew jekk jgħixu viċin u sew jekk jgħixu ’l bogħod. Jekk jogħġbok, ipprova agħmel l-​isforz kollu li tistaʼ.

[Nota taʼ taħt]