Iż-​Żgħażagħ Jistaqsu . . .

Li Tinvolvi Ftit Ruħek fl-​Okkult​—X’Hemm Ħażin f’Dan?

HUMA l-​adolexxenti tassew interessati fl-​okkult? Grupp taʼ riċerkaturi pprovaw isibu t-​tweġiba għal dan permezz taʼ stħarriġ li għamlu fost l-​istudenti f’115-il klassi primarja u sekondarja. L-​istħarriġ kixef dawn l-​istatistiċi informattivi: Iktar min-​nofs taʼ dawk li ġew intervistati (54 fil-​mija) qalu li huma interessati fl-​okkult u fis-​soprannaturali, filwaqt li kwart minnhom (26 fil-​mija) qalu li huma “interessati ħafna.”

Riċerkaturi għall-​Università taʼ l-​Alaska f’Anchorage kitbu: “Stejjer fil-​gazzetti u r-​rivisti dwar iż-​żjieda kbira f’daqqa li suppost kien hemm fl-​attività tal-​kulti sataniċi . . . kotru f’dawn l-​aħħar ftit snin.” L-​esperti jgħidu li hemm ftit li xejn evidenza solida li tikkonferma li dak li qed jingħad, jiġifieri li s-​Sataniżmu qed jinfirex fost iż-​żgħażagħ, huwa minnu. Madankollu, m’hemmx dubju li ħafna żgħażagħ huma interessati f’xi aspetti tas-​Sataniżmu u l-​okkult, anki jekk dan it-​tip taʼ interess huwa taʼ darba kultant.

Għalhekk, xi żgħażagħ għandhom mnejn jistaqsu, ‘X’hemm ħażin f’li tinvolvi ftit ruħek fl-​okkult?’ Bħala tweġiba, ejja naraw għala xi żgħażagħ jibdew jinvolvu ruħhom fl-​okkult.

Xi Jħajjarhom għall-​Okkult

Artiklu fil-​U.S.News & World Report osserva li “llum it-​tfal u l-​adolexxenti għandhom aċċess u huma esposti għal ammont kbir taʼ stampi u informazzjoni li jħawduk​—ħafna drabi li jdejquk​—li saħansitra 20 sena ilu ma kontx toħlom bihom.” Il-​kurżità ġġiegħel lil ħafna żgħażagħ jaqraw kotba u rivisti, jaraw vidjos, jew ifittxu fuq Web sites taʼ l-​Internet li juru affarijiet li għandhom x’jaqsmu maʼ l-​okkult.

Skond l-​aħbarijiet tal-​BBC Online, programmi popolari fuq it-​TV li juru s-​seħer u l-​vampiriżmu “jingħad li jinkuraġġixxu interess lejn is-​seħer fost it-​tfal.” Bl-​istess mod, xi mużika heavy metal tittratta dwar temi vjolenti jew demoniċi. Tom Harpur, kittieb f’gazzetta, kiteb hekk fil-​gazzetta taʼ Toronto The Sunday Star: “Nixtieq nagħti kemm jistaʼ jkun l-​akbar twissija dwar dak li qed jiġri [fil-mużika]. . . . Qatt ma rajt xi ħaġa daqshekk imħassra moralment. Id-​diski huma ossessjonati bil-​ġenn, pussess, demonji, demm, saħtiet, vjolenza taʼ kull tip, inkluż l-​istupru, tferi lilek innifsek, qtil, u suwiċidju. Il-​mewt u l-​qerda, profeziji taʼ kundanna, iċ-​ċaħda taʼ kulma hu tajjeb u t-​tħaddin taʼ dak kollu li hu waħxi u ħażin​—dawn huma t-​temi.”

Veru li jekk tismaʼ mużika bħal din jistaʼ jwassal għal aġir distruttiv? Evidentement, dan sar għall-​inqas f’każ wieħed​—dak taʼ żagħżugħ taʼ 14-il sena fl-​Istati Uniti li l-​ewwel qatel lil ommu b’daqqiet taʼ sikkina, imbagħad qatel lilu nnifsu. Il-​ħitan tal-​kamra tiegħu kienu miksijin b’posters taʼ mużiċisti tal-​heavy metal. Wara dan kollu missieru talab bil-​ħniena: “Għidu lill-​ġenituri biex joqogħdu attenti x’tip taʼ mużika qed jisimgħu t-​tfal tagħhom.” Qal ukoll li ġimgħa qabel ma ibnu qatel lil ommu, it-​tifel qagħad ikanta kanzunetta rock “dwar id-​demm u l-​qtil taʼ ommok.”

Imbagħad hemm ċertu tip taʼ logħob, li ftit minnu jippermetti lil min ikun qed jilgħab biex jieħu l-​irwol taʼ saħħâr jew taʼ xi ħadd li għandu x’jaqsam maʼ l-​okkult. Ħafna minn dan il-​logħob juri vjolenza demonika.a

Madankollu, l-​organizzazzjoni taʼ riċerka Mediascope tirrapporta: “Xi studji juru li l-​preferenza għall-​mużika heavy metal tistaʼ tkun indikazzjoni sinifikanti taʼ iżolament, abbuż taʼ sustanzi, problemi psikjatriċi, riskju taʼ suwiċidju . . . jew imġiba riskjuża waqt l-​adolexxenza, imma l-​mużika m’hijiex il-​kaġun għal din l-​imġiba. Huwa [maħsub] li l-​adolexxenti li jkunu diġà qegħdin jitħabtu maʼ dawk il-​problemi jistgħu jinġibdu lejn il-​mużika heavy metal, minħabba li l-​lirika tesprimi s-​sentimenti taʼ dwejjaq tagħhom.”

Forsi veru li mhux ir-​riċerkaturi kollha jaqblu mal-​perikli li hemm meta tismaʼ l-​mużika satanika. Imma jistaʼ jkun li ma ġġarrab ebda ħsara jekk tkun tħobb tara vidjos, tismaʼ mużika, jew tilgħab logħob li jinkuraġġixxu l-​vjolenza jew li tweġġaʼ lilek innifsek? Madankollu, jerġaʼ hemm periklu akbar għall-​Kristjani jekk jinvolvu ftit ruħhom fl-​okkult.

Il-​Ħarsa t’Alla Lejn l-​Okkult

Fl-​iskrittura taʼ l-​1 Korintin 10:20, l-​appostlu Pawlu wissa lill-​Kristjani: “Jien ma rridx li intom tidħlu f’għaqda mad-​demonji.” Min huma d-​demonji, u għala huwa daqshekk taʼ periklu li tinvolvi ruħek magħhom? Fi ftit kliem, għax id-​demonji kienu anġli li ddeċidew li jmorru wara Satana x-​Xitan. Satana jfisser “Avversarju” u Xitan ifisser “Kalunnjatur.” Skond il-​Bibbja, dan li qabel kien iben anġeliku t’Alla għamel lilu nnifsu avversarju u kalunnjatur billi għażel li jirribella kontra Alla. Maż-​żmien, ħajjar lil anġli oħra biex jingħaqdu fil-​korsa ribelluża tiegħu. B’hekk, dawn l-​alleati saru demonji.​—Ġenesi 3:​1-15; 6:​1-4; Ġuda 6.

Ġesù sejjaħ lil Satana bħala “l-​ħakkiem taʼ din id-​dinja.” (Ġwanni 12:31, NW) Satana u d-​demonji tiegħu għandhom “korla kbira” minħabba l-​qerda li ġejja fuqhom dalwaqt. (Apokalissi 12:9-12) Mela mhux taʼ sorpriża li dawk li involvew ruħhom mad-​demonji sabu li dawn huma brutali. Waħda mara fis-​Surinam, li kibret fost familja li kienet tipprattika l-​ispiritiżmu, esperjenzat personalment kif id-​demonji “jieħdu gost jittorturaw lill-​vittmi innoċenti tagħhom.”b Li tinvolvi ruħek b’xi mod maʼ dawn il-​ħlejjaq spirti krudili huwa tassew taʼ periklu kbir ferm!

Għal din ir-​raġuni, Alla kkmanda lin-​nies tiegħu tal-​qedem, l-​Iżraelin, biex jevitaw il-​prattiċi kollha taʼ l-​okkult. Dewteronomju 18:10-12 iwissi: “Mistkerrah quddiem il-​Mulej kull min jagħmel dawn il-​ħwejjeġ.” Il-​Kristjani kienu wkoll imwissijin li dawk li jipprattikaw l-​ispiritiżmu kellhom jinqerdu minn Alla. (Apokalissi 21:8) Anki li tinvolvi ruħek ftit fl-​okkult huwa kundannat minn Alla. “La tmissux l-​imniġġes,” tikkmanda l-​Bibbja.​—2 Korintin 6:​17.

Il-​Ħelsien mill-​Prattiċi taʼ l-​Okkult

Għamilt int l-​iżball li involvejt ftit ruħek fl-​okkult? Jekk inhu hekk, ikkunsidra x’ġara fl-​ewwel seklu fil-​belt taʼ Efesu. Kien hemm ħafna li kienu “jagħmlu s-​sħarijiet.” Imma xi wħud tqanqlu bix-​xogħlijiet taʼ qawwa li għamel l-​appostlu Pawlu bl-​għajnuna taʼ l-​ispirtu qaddis. Ir-​riżultati x’kienu? “Bosta minn dawk li qabel kienu jagħmlu s-​sħarijiet ġiebu l-​kotba tagħhom u ħarquhom quddiem kulħadd. Meta għamlu l-​istima tagħhom, sabu li kienu jiswew ħamsin elf biċċa tal-​fidda. Hekk il-​kelma tal-​Mulej baqgħet tikber u tissaħħaħ bil-​qawwa kollha.”​—Atti 19:11-20.

X’jgħidilna dan kollu? Li jekk xi persuna tixtieq teħles mill-​qabda tad-​demonji, hu jew hi għandha teqred l-​affarijiet kollha li għandhom x’jaqsmu mal-​qima satanika! Dan jinkludi kull ktieb, poster, ktieb tal-​comics, vidjo, amulet (oġġett li jintlibes biex “jipproteġi” lil dak li jkun), u materjal demoniku misjub minn fuq l-​Internet. (Dewteronomju 7:​25, 26) Armi kull ħaġa li tistaʼ tiġi użata għad-​divinazzjoni, bħalma huma l-​boċċa tal-​kristall jew il-​Ouija boards. Ukoll, eħles mill-​mużika jew vidjos li għandhom tema satanika.

Jinħtieġu qlubija u determinazzjoni biex jittieħdu dawn il-​passi kuraġġużi. Imma l-​benefiċċji jistgħu jkunu kbar. Waħda mara Kristjana jisimha Jeanc, xtrat logħba tal-​kompjuter li għall-​ewwel ma kien jidher li fiha xejn ħażin. Imma, waqt li kompliet tilgħabha, skopriet ċertu aspetti li kienu jidħlu fin fin fl-​ispiritiżmu. Fi żmien qasir, beda jkollha ħolm estremament ikrah! Jean tgħid: “Darba qomt f’nofs taʼ lejl, u rmejt il-​compact discs tal-​logħba.” X’kien ir-​riżultat? “Minn dak in-​nhar ’l hemm ma kellix iktar dan it-​tip taʼ ħolm.”

Jekk turi li int verament determinat li teħles minn dawn l-​affarijiet, se jkollok suċċess. Ftakar fid-​determinazzjoni li wera Ġesù meta x-​Xitan ipprova jħajru biex jaqdih. “Qallu Ġesù: ‘Itlaq, Xitan! Għax hemm miktub, “Lill-​Mulej, Alla tiegħek, għandek tadura, u lilu biss taqdi.”’ Mbagħad ix-​Xitan ħallieh.”​—Mattew 4:​8-11.

Tiġġilidx Waħdek

L-​appostlu Pawlu jfakkarna li l-​Kristjani kollha għandhom “ġlieda. . . kontra l-​ispirti ħżiena li jgħammru fil-​wisaʼ tas-​smewwiet.” (Efesin 6:12) Imma tipprovax tiġġieled lil Satana u lid-​demonji tiegħu waħdek. Ikseb għajnuna mill-​ġenituri tiegħek li għandhom il-​biżaʼ minn t’Alla u mingħand l-​anzjani fil-​kongregazzjoni Kristjana lokali tiegħek. Jistaʼ jkun taʼ mistħija li tistqarr l-​involviment tiegħek f’dawn l-​affarijiet, imma dan jistaʼ jwassal għal li tirċievi dik l-​għajnuna li tant għandek bżonn.​—Ġakbu 5:​14, 15.

Ftakar, ukoll, li l-​Bibbja tgħid: “Ieqfu lix-​xitan, u hu jaħrab minnkom. Ersqu lejn Alla, u hu jersaq lejkom.” (Ġakbu 4:7, 8) Iva għandek l-​għajnuna taʼ Alla Jehovah! Hu se jgħinek teħles min-​nassa taʼ l-​okkult.

[Footnotes]

[Stampa f’paġna 26]

Eħles mill-​affarijiet kollha li għandhom x’jaqsmu maʼ qima satanika

[Stampa f’paġna 26]

Oqgħod attent mill-​Web sites li jippromwovu l-​ispiritiżmu