Is-​Sħana Tnaqqas ir-​Riskju taʼ Infezzjoni

IR-​RISKJU TAʼ INFEZZJONI FIL-​FERITA WARA OPERAZZJONI hija problema dejjem preżenti. Madankollu, “meta l-​ġisem tal-​pazjent jiġi msaħħan qabel l-​operazzjonijiet taʼ rutina, dan jistaʼ jnaqqas ir-​riskju taʼ infezzjoni b’iktar minn 60 fil-​mija,” tirrapporta The Times taʼ Londra.

Riċerkaturi fl-​Università taʼ North Tees, fl-​Ingilterra, qassmu fi tliet gruppi lil iktar minn 400 pazjent li kienu se jagħmlu operazzjonijiet tas-​sider, tal-​vini varikużi, jew tal-​ftuq. Wieħed mill-​gruppi ġisimhom ma ġiex imsaħħan, ieħor saħħnulhom il-​parti fejn kienu se joperawlhom u l-​ieħor saħħnulhom ġisimhom kollu minn taʼ l-​inqas nofs siegħa qabel l-​operazzjoni. X’kien ir-​riżultat?

Wara l-​operazzjoni, mill-​pazjenti kollha li ġisimhom ġie msaħħan, kienu biss 5 fil-​mija dawk li kellhom infezzjoni fil-​ferita, meta mqabbla maʼ l-​14 fil-​mija minn dawk li ġisimhom ma ġiex imsaħħan. Taʼ min jinnota li dan il-​proċess diġà kien effettiv f’li jnaqqas ir-​rata taʼ infezzjoni fil-​pazjenti li għamlu operazzjonijiet fil-​musrana l-​ħoxna jew id-​dritta.