Iż-​Żgħażagħ Jistaqsu . . .

X’Nistaʼ Nagħmel biex Inkun Iktar Attraenti?

“Ma kontx inħossni kalm jew komdu biex inkompli konversazzjoni mat-​tfajliet. Ma kelli l-​ebda idea taʼ x’kienu qed jaħsbu, kif kienu jħossuhom, jew x’kienet il-​ħarsa tagħhom lejn l-​affarijiet.”​—Tyler.

IT-​TFAJLIET liema kwalitajiet jogħġbuhom l-​iktar fil-​ġuvintur? “Li jkunu kunfidenti,” tgħid waħda adolexxenti jisimha Emily. Għal adolexxenti oħra jisimha Robyn, l-​iktar kwalità importanti hi li wieħed ikun ċajtier. U l-​ġuvintur xi jfittxu l-​iktar fit-​tfajliet? Kif tistaʼ timmaġina, stħarriġ wieħed wera li d-​dehra sabiħa kienet fil-​quċċata tal-​lista tagħhom. Il-​fatt li jkollhom interessi u valuri simili għal tagħhom kien imniżżel fis-​sitt post.

Artikli u studji li jitkellmu dwar ir-​relazzjonijiet bejn ġuvni u tfajla taʼ spiss jistgħu jinstabu f’rivisti mfasslin għaż-​żgħażagħ. B’mod ċar, ħafna żgħażagħ jaħsbu ħafna dwar—jew forsi jinkwetaw ukoll dwar—il-​mod kif iħares lejhom is-​sess oppost. Forsi xi drabi anki int stess tinkwieta dwar dan. Ma jfissirx li lest biex tiżżewweġ dalwaqt. Il-​fatt hu li ħadd ma jrid ikun meqjus ikrah jew ma jintgħoġobx! Tyler josserva: “Meta tkun adolexxent, tkun tixtieq li kulħadd jarak attraenti. Tixtieq tkun aċċettat minn sħabek, subien u bniet.” Ukoll, forsi tħoss li għad jiġi ż-​żmien meta tkun tixtieq issib lil xi ħadd xieraq lil min tiżżewweġ. Meta jasal dak iż-​żmien, naturalment se tkun trid li dik il-​persuna tarak attraenti.

Madankollu, bħala żagħżugħ Kristjan, forsi ma kellekx ħafna esperjenza kif tittratta mas-​sess oppost. Flimkien maʼ dan, hemm il-​pressjoni li għandek mnejn tħoss minn dawk taʼ mparek biex tkun attraenti fiżikament. B’dawk il-​mudelli sbieħ u atturi muskolati kollha li jidhru fuq it-​TV u r-​rivisti, mhux taʼ b’xejn li tistaʼ tħossok li m’intix kunfidenti fik innifsek u li ma tistax tilħaq il-​livell mistenni! Allura, x’hemm bżonn biex togħġob lil oħrajn—inkluż dawk tas-​sess oppost—b’mod bilanċjat, f’loku, u pożittiv?

Il-​Bluha li Tittama li Jkollok il-​Ġisem “Perfett”

Il-​psikologu kliniku William S. Pollack josserva li taħt l-​influwenza taʼ l-​industrija tad-​divertiment, ħafna żgħażagħ “qed iqattgħu ħafna ħin jagħmlu d-​dieta, jerfgħu l-​piżijiet, u jagħmlu eżerċizzju erobiku, dan kollu bl-​isforz biex jibdlu d-​daqs u l-​figura taʼ ġisimhom.” Xi wħud saħansitra qed imorru f’estremi perikolużi, bħal li kważi jħallu lilhom infushom imutu bil-​ġuħ, sabiex ikollhom dak il-​ġisem “perfett.” Madankollu, iċ-​Ċentru tar-​Riċerka dwar Kwistjonijiet Soċjali jgħid: “Il-​livell taʼ sbuħija li l-​mezzi tax-​xandir bħalissa jqisuh bħala ideali għan-​nisa, jistaʼ jintlaħaq biss minn inqas minn 5% tal-​popolazzjoni tan-​nisa—u dan biss fejn jidħlu l-​piż u d-​daqs. Jekk trid il-​figura, il-​wiċċ eċċ. ideali, huwa iktar probabbli li jintlaħaq minn 1%.”

B’hekk, il-​parir tal-​Bibbja f’Rumani 12:2 huwa prattiku: “Tħallux lid-​dinja taʼ madwarkom trosskom fil-​forma tagħha.” (Phillips) Iżda dan ma jfissirx li m’għandekx tagħti kas tad-​dehra tiegħek. Bla dubju, jagħmel sens li tieħu ħsieb taʼ ġismek permezz taʼ eżerċizzju moderat u dieta bilanċjata. (Rumani 12:1; 1 Timotju 4:8) Mistrieħ u rqad biżżejjed ukoll jistgħu jgħinuk tidher u tħossok tajjeb ħafna. Fl-​istess ħin, oqgħod attent għall-​indafa u l-​apparenza persunali tiegħek. Żagħżugħ mill-​Britannja jismu David josserva: “Hemm tfajla li hi ħelwa, imma l-​problema tagħha hi r-​riħa tinten. In-​nies jevitawha minħabba dan.” Għalhekk inħasel taʼ spiss. Idejn, xagħar, u dwiefer nodfa jistgħu jsebbħu d-​dehra tiegħek.

Għalkemm il-​Bibbja tiskuraġġixxi l-​enfasi żejda fuq l-​ilbies, din tagħti parir lill-​Kristjani biex “jiżżejjnu bi lbies xieraq, bil-​modestja u bl-​għaqal.” (1 Timotju 2:9) Ilbes ħwejjeġ li jsebbħu d-​dehra tiegħek iżda li m’humiex stravaganti jew immodesti.a Jekk toqgħod attent b’mod raġunevoli għad-​dehra tiegħek tistaʼ żżid il-​kunfidenza fik innifsek. Żagħżugħ jismu Paul jgħid hekk dwar dan: “Għandek mnejn m’intix wieħed mill-​iktar persuni sbieħ, imma tistaʼ ssebbaħ dak li għandek.”

Kwalitajiet Ġewwinija

Filwaqt li wiċċ u ġisem sabiħ jistgħu jiġbdu l-​attenzjoni, fl-​aħħar mill-​aħħar “is-​sbuħija hi bħal bużżieqa.” (Proverbji 31:​30, Byington) Dehra sabiħa ġeneralment tkun għomorha qasir, u żgur li ma tistax tieħu post kwalitajiet sbieħ fil-​personalità. (Proverbji 11:22) Ftakar, ukoll, li ‘l-​bniedem jara biss dak li jidher fl-​għajn, imma l-​Mulej jara l-​qalb.’ (1 Samwel 16:7) Għalhekk, minflok ma tiffoka l-​attenzjoni kollha tiegħek fuq qaddek jew il-​muskoli, aħdem fuq is-​sbuħija “moħbija f’[qalbek], mlibbsa b’tiżjin li ma jitħassarx; [li] hi l-​qalb ħelwa u twajba [tiegħek]; dan hu li Alla jgħożż ħafna.” (1 Pietru 3:​3, 4; Efesin 4:24) Veru, fid-​dinja taʼ llum ħafna żgħażagħ għandhom mnejn ftit li xejn ikollhom rispett lejn karatteristiċi taʼ min jammirahom fil-​personalità—bil-​wisq inqas lejn kwalitajiet spiritwali.b Imma dawk li għandhom valuri li jogħġbu lil Alla tassew japprezzawhom u jarawhom sbieħ!

Mela, l-​aħjar mod kif tidher attraenti għall-​irġiel u n-​nisa Kristjani spiritwali hu li tkun spiritwali int stess. Ikkultiva l-​ispiritwalità tiegħek permezz tat-​talb, l-​istudju persunali tal-​Bibbja, u l-​attendenza għal-​laqgħat Kristjani. (Salm 1:​1-3) Minkejja dan, hemm iktar abbiltajiet u karatteristiċi utli li tistaʼ tiżviluppa. M’għandekx għalfejn toħroġ maʼ xi ħadd jew tkun f’relazzjoni romantika biex tikkultiva dawn il-​karatteristiċi. Minflok, tistaʼ tipprattikahom bil-​mod kif taġixxi m’oħrajn fil-​ħajja taʼ kuljum.

Per eżempju, tħossok imferfex u mistħi meta tkun mas-​sess oppost? Żagħżugħ jismu Paul jammetti: “Kultant inħossni skomdu—minħabba li huma bniet, u jien lill-​bniet ma nifhimhomx daqskemm nifhem lis-​subien. U ma rridx nimbarazza ruħi.” Kif tistaʼ tiżviluppa kunfidenza fik innifsek u żżomm ruħek kontrollat sabiex ħaddieħor iħossu komdu fil-​kumpanija tiegħek? Mod wieħed hu li tieħu vantaġġ mill-​assoċjazzjoni vasta ħafna li tistaʼ ssib fil-​kongregazzjoni Kristjana. Fil-​laqgħat ħu interess persunali f’oħrajn—mhux biss żgħażagħ tas-​sess oppost taʼ l-​età tiegħek imma wkoll tfal, adulti, u dawk imdaħħlin fiż-​żmien. (Filippin 2:4) Jekk titgħallem taġixxi tajjeb maʼ din il-​varjetà taʼ nies se tkun tistaʼ tiżviluppa l-​kunfidenza fik innifsek.

Iżda, oqgħod attent. Tabilħaqq, Ġesù qal: “Ħobb lil għajrek bħalek innifsek.” (Mattew 19:19; korsiv tagħna.) Jekk tħossok pożittiv dwarek innifsek, x’aktarx li se tkun inqas goff u mferfex meta tkun m’oħrajn.c Madankollu, filwaqt li huwa neċessarju li jkollok ċertu ammont taʼ rispett lejk innifsek, tmurx fl-​estrem. “Jiena ngħidilkom ilkoll,” qal l-​appostlu Pawlu, “tippretendux li intom xi ħaġa aktar milli intom kif għandu jkun!”—Rumani 12:3.

Barra minn hekk, eżamina b’sinċerità l-​manjieri tiegħek u kemm taf tinġieb m’oħrajn. Tfajla mill-​Britannja jisimha Lydia tosserva: “Hemm tifel fl-​iskola tiegħi li huwa popolari maʼ ħafna mit-​tfajliet. Imma wara li jsiru jafuh, ma jibqax jogħġobhom għax huwa maledukat u bla tattika.” In-​nies jinġibdu lejn xi ħadd li jitkellem bil-​ħlewwa u bit-​tattika, u li juri konsiderazzjoni lejn oħrajn. (Efesin 4:​29, 32; 5:​3, 4) “Manjieri [tajbin] huma bħal passaport, billi jagħtu ħelsien u aċċess lin-​nies,” josserva t-​Tabib T. Berry Brazelton. Il-​manjieri “huma essenzjali biex tiġi aċċettat minn oħrajn.”

Użanzi u regoli taʼ l-​etikett ivarjaw madwar id-​dinja. Għalhekk, forsi tkun trid tosserva kif irġiel u nisa Kristjani maturi jittrattaw lil xulxin. Per eżempju, f’pajjiżek hija d-​drawwa li raġel iżomm il-​bieb miftuħ għal mara? Allura, li titgħallem turi din il-​korteżija se jtejjeb ir-​reputazzjoni tiegħek bħala persuna li taf iżżomm ruħek kontrollat u li għandek manjieri tajbin.

Fl-aħħarnett, tistaʼ ssibha t’għajnuna li tikkultiva sens bilanċjat t’umoriżmu. Il-​Bibbja tgħid li hemm “żmien li tidħak,” u bniedem b’sens t’umoriżmu taʼ spiss jagħmel ħbieb malajr.—Koħèlet 3:​1, 4.

Id-​Differenza bejn li Tkun Dħuli u li Titkessaħ

Ċertu rivista li sejħet lilha nfisha bħala “gwida għas-​suċċess meta toħroġ maʼ xi ħadd” tat il-​parir li s-​sigriet biex tiġbed lis-​sess oppost hu li titkessaħ miegħu. Lill-​qarrejja qaltilhom biex joqogħdu jipprattikaw kif jitbissmu u jagħmlu kuntatt bl-​għajnejn u kif jipperfezzjonaw ‘il-​kummenti tal-​ftuħ.’ Pariri bħal dawn imorru kontra l-​ispirtu tal-​parir li Pawlu ta lil Timotju biex jittratta lil membri tas-​sess oppost “bis-​safa kollu.”—1 Timotju 5:2.

Għalkemm wieħed jistaʼ jħossu importanti meta jitkessaħ maʼ xi ħadd tas-​sess oppost, din ma tkunx imġiba sinċiera u onesta. M’għandekx għalfejn tagħti attenzjoni mhux f’lokha jew tilgħabha tal-​mistħi biex tkompli konversazzjoni interessanti. Jew m’għandekx għalfejn tistaqsi mistoqsijiet imbarazzanti jew mhux xierqa biex issir taf kif iħossu u jaħseb is-​sess oppost. Tkellem biss fuq affarijiet li huma ‘ġusti, safja, u jiġbdu l-​imħabba,’ u b’hekk turi li tassew qed tiżviluppa f’raġel jew mara matura, u spiritwali. (Filippin 4:8) L-​ubbidjenza tiegħek lejn il-​prinċipji divini se tagħmlek attraenti mhux biss għas-​sess oppost imma wkoll għal Alla nnifsu.d—Proverbji 1:​7-9.

[Noti taʼ taħt]

[Stampi f’paġna 15]

Minflok ma tiffoka fuq id-​dehra tiegħek, aħdem fuq li tiżviluppa kwalitajiet spiritwali

[Stampi f’paġna 15]

Tgħallem kun komdu maʼ varjetà kbira taʼ nies