Mingħand il-​Qarrejja

Kuraġġ Waqt Diżastru Grazzi għas-​serje t’artikli “Kuraġġ fi Żmien taʼ Diżastru​—Dak in-​Nhar li Ġġarrfu t-​Twin Towers.” (8 taʼ Jannar, 2002) Dawn l-​artikli qanqluni profondament, u ġagħluni nirrealizza kemm iż-​żmien u ċ-​ċirkustanzi mhux mistennijin jistgħu jeffettwaw lil kwalunkwe wieħed u waħda minna. Nitnikket meta naħseb dwar il-​ħafna ħajjiet li ntilfu.

S.B.R., Danimarka

Grazzi talli ppubblikajtu “It-​Talba taʼ Tatiana.” Kont diġà qed nibki meta bdejt naqra s-​serje t’artikli, imma x’ħin qrajt din il-​kaxxa, bdejt nolfoq. Irrid nitlob għat-​tfal li tilfu xi ġenitur fl-​attakki terroristiċi biex jikbru spiritwalment ħalli jerġgħu jiltaqgħu mal-​ġenitur tagħhom fid-​dinja l-​ġdida. Ukoll, permezz taʼ dan l-​artiklu, stajt inkabbar l-​apprezzament tiegħi li, bħala Xhud taʼ Jehovah, għandi tama sabiħa għall-​futur.

T. A., Ġappun

Għalkemm noqgħod il-​Ġermanja, il-​ġrajjiet tal-​11 taʼ Settembru xxokkjaw lili u lill-​familja tiegħi. Tliet xhur wara, it-​tifla tiegħi, li għandha disaʼ snin, kienet għadha tpinġi stampi t’ajruplan dieħel ġo bini għoli ħafna. Aħna qed inħarsu ’l quddiem lejn il-​ġurnata meta traġedji bħal dawn ikunu xi ħaġa tal-​passat.

E. G., Ġermanja

Meta rajt dak li ġara fi New York, tlabt lil Jehovah biex jagħti s-​saħħa lil dawk li salvaw u tama lill-​familji tal-​vittmi. X’ħin qrajt dawn l-​artikli, rajt kif it-​talb tiegħi u dak taʼ ħafna oħrajn ġie mismugħ. Il-​fatt li naf li tistaʼ tolqotni xi traġedja fi kwalunkwe ħin ġagħalni neżamina ħajti mill-​ġdid.

M. V., Italja

Ħadna verament pjaċir naqraw il-​ħsibijiet taʼ dawk li personalment esperjenzaw dak li ġara. Il-​kummenti taʼ dawk li salvaw qabbżulna d-​dmugħ. Aħna nitolbu lil Jehovah biex jgħin lil dawk milquta u nitolbu li permezz taʼ Stenbaħ! isibu l-​faraġ. Minħabba li għadna żgħar, aħna ġejna inkuraġġiti bil-​mistoqsijiet li jġagħluna naħsbu fuq il-​mod kif qed ngħixu ħajjitna u fuq il-​prijoritajiet tagħna. Ix-​xewqa tagħna hi li qatt ma tieqfu tippubblikaw din ir-​rivista.

T. M. u A. P., Slovenja

Jien studenta t’14-il sena u qiegħda fit-​tielet sena taʼ l-​iskola sekondarja. Meta qrajt din is-​serje, fhimt il-​biżaʼ assoċjat maʼ l-​inċident. Rajt kif uħud taw ħajjithom biex isalvaw lil ħaddieħor. Mill-​aħbarijiet li smajt sirt naf li ħafna pompiera kienu tilfu ħajjithom, imma qatt ma ħassejtha daqshekk persunali qabel. Bkejt meta qrajt il-​kaxxa “It-​Talba taʼ Tatiana.” Fl-​ewwel sena tiegħi fl-​iskola sekondarja, jien ukoll tlift lil missieri, minħabba li kien marid. Din il-​kaxxa ġagħlitni naħseb, ‘Hija d-​dinja l-​ġdida reali għalija bħalma hi għal Tatiana?’ Irrid nagħti din ir-​rivista lill-​għalliema taʼ l-​iskola tiegħi u lil ħafna minn sħabi. Jekk jogħġobkom komplu stampaw dawn ir-​rivisti taʼ l-​għaġeb!

H. T., Ġappun

Dehra Ġdida Huwa taʼ pjaċir li nara kemm tjiebet l-​apparenza taʼ Stenbaħ! minn mindu bdejt naqra din ir-​rivista għall-​ewwel darba fl-​1978. Meta eżaminajt il-​ħarġa tat-​8 taʼ Jannar, 2002, il-​paġni veru laqtuni. It-​titli taʼ l-​artikli jispikkaw, u t-​tixbihat huma taʼ l-​għaġeb. Il-​mod kif inhu mqassam jagħmel il-​qari saħansitra iktar pjaċevoli. Jien ċert li din id-​dehra ġdida se tiġbed lil ħafna uħud sinċieri oħrajn lejn Jehovah.

V.P.L., Brażil