Iż-​Żgħażagħ Jistaqsu . . .

Kif Nistaʼ Nkampa maʼ l-​Isfidi taʼ li Nkun Adottat?

“Ma naf xejn dwar il-​ġenituri naturali tiegħi, u dan inikkitni ħafna.”​—Barbara, 16-il sena.

“M’għandi l-​ebda idea fejn twelidt jew min kienu l-​ġenituri tiegħi. Xi drabi, fuq hekk noqgħod naħseb bil-​lejl.”​—Matt, 9 snin.

“Meta nargumenta mal-​ġenituri tiegħi naħseb li l-​ġenituri ‘propja’ tiegħi forsi kienu jifhmuni iktar. M’hijiex xi ħaġa sabiħa li naħseb hekk, u qatt m’għedt xejn dwarha.”​—Quintana, 16-il sena.

BLA ebda dubju​—il-​ħajja bħala tifel jew tifla adottata għandha l-​isfidi tagħha. Numru kbir taʼ żagħżagħ jissieltu maʼ sentimenti bħal dawn deskritti hawn fuq. Ħafna jiddubitaw jekk għandhomx ifittxu min huma l-​ġenituri naturali tagħhom, jew jitħassbu jekk il-​ħajja magħhom kinitx tkun waħda iktar hienja. U dawn m’humiex l-​uniċi sfidi.

Fl-artiklu taʼ qabel f’din is-​serje, iddiskutejna ftit ħsibijiet negattivi li jistaʼ jkollhom dwarhom infushom xi żgħażagħ li jkunu ġew adottati.a Biex ikunu jistgħu jsibu l-​ferħ f’ħajjithom bħala tfal adottati, dawn għandhom bżonn jikkumbattu dawn il-​ħsibijiet skuraġġanti. Iżda x’inhuma xi sfidi oħrajn li jistgħu jqumu, u kif tistaʼ tieħu passi prattiċi biex tkampa magħhom?

Huma Dawn il-​Ġenituri “Propja” Tiegħi?

Jake, li għandu 13-il sena, jgħid li kien joqgħod jaħseb ħafna dwar ommu naturali. Dan ħoloqlu xi problemi mal-​ġenituri li adottawh. Hu jgħid: “Kulmeta kont nirrabja kont ngħid, ‘U int, m’intix ommi propja—ma tistax tikkastigani hekk!’”

Bħalma tistaʼ tinnota, Jake kellu jifhem u jiffaċċja mistoqsija serja: Min kienet ommu “propja”? Jekk int adottat, tistaʼ tkun qed tħabbat wiċċek maʼ l-​istess sitwazzjoni, speċjalment jekk toqgħod taħseb dwar jekk il-​ġenituri naturali tiegħek kinux se jittrattawk aħjar mill-​ġenituri adottivi tiegħek. Imma hija sempliċement il-​bijoloġija​—il-​proċess tat-​twelid​—li jagħmel żewġ persuni l-​ġenituri “propja”?

L-omm adottiva taʼ Jake ma kinitx taħseb hekk. Hu jgħid: “Ommi kienet tgħid, ‘Iva jien ommok propja. Anki jekk kellek omm li wilditek, issa jien ommok propja.’” Meta l-​adulti jieħdu tifel jew tifla ġewwa darhom u jaqblu li jsiru responsabbli għalihom billi jieħdu ħsieb il-​bżonnijiet tagħhom, jipprovdulhom saqaf, ikel, u trobbija, huma fil-​fatt isiru l-​ġenituri “propja”. (1 Timotju 5:8) Wisq probabbli, dan huwa minnu mill-​ħarsa taʼ l-​awtoritajiet legali fejn tgħix int. Xi ngħidu dwar il-​ħarsa t’Alla?

Ikkunsidra dak li jistaʼ jkun l-​iktar każ famuż t’adozzjoni fl-​istorja—dak taʼ Ġesù Kristu. Ġesù ma kienx it-​tifel naturali taʼ Ġużeppi l-​mastrudaxxa, madankollu Ġużeppi adottah bħala ibnu. (Mattew 1:​24, 25) Hekk kif kien qed jikber, irribella Ġesù kontra l-​awtorità taʼ Ġużeppi? Għall-​kuntrarju, Ġesù fehem li kienet ir-​rieda t’Alla li jobdi lil missieru adottiv. Ġesù kien familjari sew mal-​liġi li Jehovah kien ta lit-​tfal taʼ Iżrael. X’liġi kienet din?

Weġġaħ lil Missierek u lil Ommok

L-​Iskrittura tgħid lit-​tfal: “Weġġaħ lil missierek u ’l ommok.” (Dewteronomju 5:16) Il-​kelma “weġġaħ” hija taʼ spiss użata fil-​Bibbja biex tindika rispett, stima, u konsiderazzjoni. Lill-​ġenituri adottivi tiegħek tistaʼ turihom unur bħal dan billi tkun qalbek tajba magħhom, tirrispetta d-​dinjità tagħhom, tqis il-​ħarsa tagħhom, u tkun lest li tobdi l-​ħtiġijiet raġunevoli li jistgħu jitolbu minnek.

Madankollu, xi ngħidu dwar dawk id-​drabi meta l-​ġenituri adottivi tiegħek jidhru li ma jkunux raġunevoli? Veru, dan se jiġri. Il-​ġenituri kollha huma imperfetti, kemm jekk huma adottivi u kemm jekk le. In-​nuqqasijiet tagħhom jistgħu jagħmluha taʼ sfida biex tobdi. U m’hijiex sorpriża jekk xi drabi tispiċċa taħseb ħafna dwar il-​fatt li int adottat u jekk dan inaqqasx l-​obbligu tiegħek li tobdi. Iżda huwa dan minnu?

Tistaʼ ssibha t’għajnuna li taħseb dwar is-​sitwazzjoni taʼ Ġesù. Ftakar, hu kien perfett. (Lhud 4:​15; 1 Pietru 2:​22) Iżda missieru li adottah ma kienx, u lanqas ommu naturali. Għalhekk, wisq probabbli li kien hemm okkażjonijiet meta Ġesù setaʼ jara li l-​ġenituri tiegħu kienu qed jiżbaljaw. Irribella hu kontra l-​istat taʼ kap imperfett taʼ Ġużeppi jew kontra l-​gwida li tatu Marija bħala omm imperfetta? Le. Il-​Bibbja tgħidilna li hu u jikber, Ġesù “kien jobdihom.”—Luqa 2:51.

Jistaʼ jiġri, li meta int u l-​ġenituri adottivi tiegħek ikollkom ħarsa differenti, forsi tistaʼ taħseb li huma qed jirraġunaw ħażin. Madankollu, għandek tammetti li int imperfett ukoll. Għalhekk, dejjem hemm iċ-​ċans li int tkun sejjer ħażin. Hu x’inhu l-​każ, ma taħsibx li l-​aħjar ħaġa tkun li ssegwi l-​eżempju taʼ Ġesù? (1 Pietru 2:21) Jekk tagħmel hekk se jkun iktar faċli għalik biex tobdi. Iżda hemm raġuni akbar għala għandek tobdi lill-​ġenituri tiegħek.

Il-Bibbja tgħid: “Intom, tfal, isimgħu mill-​ġenituri tagħkom f’kollox, għax dan hu li jogħġob lill-​Mulej.” (Kolossin 3:20) Iva, meta tobdi se tferraħ lil Missierek tas-​sema. (Proverbji 27:11) Hu jridek titgħallem tobdi għax jixtieqek tkun ferħan ukoll. Il-​Kelma tiegħu tinkuraġġixxi lil uħud żgħar biex jobdu, billi żżid, “sabiex ikollok ir-​riżq u tul għomrok fuq l-​art.”​—Efesin 6:3.

Saħħaħ ir-​Relazzjoni mal-​Ġenituri Adottivi Tiegħek

Il-​fatt li jkollok relazzjoni tajba mal-​ġenituri adottivi tiegħek jinvolvi iktar milli tweġġaħ u tobdi. Wisq probabbli tixtieq li fid-​dar ikun hemm atmosfera sabiħa u taʼ mħabba. Il-​ġenituri adottivi tiegħek għandhom ir-​responsabbiltà li joħolqu atmosfera bħal din. Iżda int ukoll għandek irwol importanti. Kif?

L-ewwel, fittex modi kif tistaʼ tersaq iktar qrib tal-​ġenituri tiegħek. Staqsihom dwar it-​trobbija, il-​ħajja, u l-​interessi tagħhom. Fittex il-​parir tagħhom dwar xi problema li qed tinkwetak billi tagħżel ħin meta jkunu rilassati u lesti li jisimgħuk. (Proverbji 20:5) It-​tieni, fittex modi biex tagħti sehmek fid-​dar, forsi billi tgħin fil-​faċendi u f’affarijiet oħra mingħajr ma jistaqsuk biex tagħmilhom.

Iżda xi ngħidu dwar il-​ġenituri naturali tiegħek? Jekk tiddeċiedi li tfittixhom, jew jiddeċiedu li jfittxuk huma, ikun dan qiegħed jipperikola r-​rabta li hemm bejnek u bejn il-​ġenituri adottivi tiegħek? Fil-​passat, l-​aġenziji taʼ l-​adozzjoni kienu taʼ spiss jirrifjutaw li jagħtu informazzjoni biex jgħinu lill-​ġenituri naturali jsibu lit-​tifel jew tifla tagħhom jew viċi versa. Illum il-​ġurnata, ir-​regoli f’xi pajjiżi m’humiex daqshekk riġidi, u ħafna tfal adottati li ma jiftakrux lill-​ġenituri naturali tagħhom irnexxielhom jiltaqgħu magħhom personalment. M’għandniex xi ngħidu, ir-​regoli taʼ l-​adozzjoni jistgħu jkunu differenti fejn toqgħod int.

Fi kwalunkwe każ, jekk tkunx trid tfittex il-​ġenituri naturali tiegħek jew le hija deċiżjoni persunali, u forsi ma tkunx waħda faċli. Żgħażagħ li ġew adottati jħossuhom imħawdin ħafna dwar din il-​kwistjoni. Xi ftit minnhom ikunu jixtiequ li jiltaqgħu mal-​ġenituri naturali tagħhom; oħrajn huma determinati li ma jiltaqgħux magħhom. Madankollu, tistaʼ tibqaʼ ċert li ħafna żgħażagħ adottati ġew f’kuntatt mal-​ġenituri naturali tagħhom mingħajr ma tilfu r-​relazzjoni stabbli li għandhom mal-​ġenituri adottivi tagħhom.

Ħu parir mill-​ġenituri adottivi tiegħek u forsi anki minn ħbieb maturi ġewwa l-​kongregazzjoni Kristjana. (Proverbji 15:22) Qis sewwa l-​għażliet li għandek, u ħu l-​ħin qabel ma tieħu kwalunkwe deċiżjoni. Bħalma jgħid Qwiel 14:​15 (Saydon) “min jilħaqlu jqis il-​mixi tiegħu.”

Jekk tiddeċiedi li jkollok relazzjoni mal-​ġenituri naturali tiegħek, agħmel ħiltek biex taċċerta lill-​ġenituri adottivi tiegħek mill-​imħabba u r-​rispett kontinwu tiegħek. B’dan il-​mod, hekk kif bil-​mod il-​mod issir taf lil dawk li ġabuk fid-​dinja u li tawk għall-​adozzjoni ħafna żmien ilu, se tkun tistaʼ żżomm rabta stabbli mal-​ġenituri li rabbewk u li ħarrġuk.

Saħħaħ ir-​Rabta Tiegħek maʼ Missierek tas-​Sema

Ħafna żgħażagħ adottati jitħabtu mal-​biżaʼ li jiġu abbandunati. Jibżgħu li jistgħu jitilfu l-​ġenituri adottivi tagħhom bħalma darba tilfu l-​ġenituri naturali tagħhom. Biżgħat bħal dawn huma raġunevoli. Madankollu, żomm f’moħħok dan il-​kliem: “Fl-​imħabba ma hemmx biżaʼ; l-​imħabba sħiħa tkeċċi l-​biżaʼ ’l barra.” (1 Ġwanni 4:18) Tħallix il-​biżaʼ ikrah taʼ li titlef lil xi ħadd għażiż għalik jiddominak. Minflok, żviluppa mħabba għal oħrajn, u inkludi lil dawk kollha fil-​familja tiegħek. Fuq kollox, saħħaħ imħabbtek għal Missierek tas-​sema, Alla Jehovah. Hu taʼ min iserraħ fuqu b’mod perfett, għax qatt ma jabbanduna lil ulied leali tiegħu. Hu jistaʼ jtaffi l-​biżaʼ li għandek.—Filippin 4:​6, 7.

Catrina, li ġiet adottata meta kienet żgħira, tgħid li l-​qari tal-​Bibbja jgħinha biex tersaq iktar qrib t’Alla u biex tgħix ħajja ferħana, u produttiva. Hi tgħid li relazzjoni mill-​qrib maʼ Jehovah “hija verament importanti għax Missierna tas-​sema jaf kif inħossuna.” L-​iskrittura favorita taʼ Catrina hija Salm 27:​10, li tgħid: “Għalkemm telquni missieri u ommi, il-​Mulej jilqagħni għandu.”

[Nota taʼ taħt]

[Stampa f’paġna 26]

Fittex modi biex tersaq iktar qrib tal-​ġenituri adottivi tiegħek