Soluzzjoni Realistika-Hija Possibbli?

IL-​KRIMINALITÀ tidher li hi karatteristika permanenti fis-​soċjetà taʼ llum. Minkejja sforzi li jsiru b’intenzjoni tajba mill-​ħaddiema soċjali, mill-​pulizija, u minn dawk li jgħinu b’mod professjonali fir-​riabilitazzjoni tal-​kriminali, id-​dinja qiegħda ssir post iktar perikoluż. Hemm soluzzjoni?

Il-​Bibbja turi li ġejja bidla kbira. Din m’hijiex se ssir permezz taʼ l-​isforzi taʼ gvernijiet umani. Il-​ħakkiema umani kollha huma limitati, huma kemm huma nobbli l-​miri tagħhom. Huma m’għandhomx il-​qawwa jew ir-​riżorsi biex jaqilgħu għal kollox mill-​għeruq il-​kaġun għall-​kriminalità, jew biex jistabbilixxu sistema permanenti fejn ikun hemm is-​sigurtà.

Il-bidla li titkellem dwarha l-​Bibbja se titwettaq mill-​Ħallieq tagħna. Bħala l-​Ħallieq taʼ l-​univers, hu għandu l-​qawwa u d-​dritt legali li jagħmel dak li l-​bnedmin ma jistgħux jagħmlu. Il-​Bibbja tiddeskrivih bħala l-​Wieħed li “jġib fix-​xejn is-​setgħanin, u l-​mexxejja tad-​dinja jagħmilhom xejn . . . , bil-​qawwa taʼ setegħtu.” (Isaija 40:​23-26) X’bidliet qiegħed iwiegħed Alla, u dawn kif jagħtuna tama vera għal dinja aħjar?

Salm 37:10 jinformana dwar il-​wegħda t’Alla: “Ftit ieħor, u l-​ħażin ma jkunx aktar; għad tħares fejn kien u ma ssibux.” Alla jrid li jeħles minn dawk il-​ħżiena li ma jistgħu jiġu kkoreġuti b’xejn u li m’għandhom l-​ebda ħsieb li jinbidlu. Madankollu, hu mhux se jeqred lin-​nies kollha. Lil dawk li jridu jsiru ġwejdin, umli, u paċifiċi, is-​salmista jwiegħed: “Ittama fil-​Mulej u ħares triqtu, hu jerfgħek biex tikseb l-​art; mbagħad tara l-​ħżiena meqruda.” Wara li jitneħħew il-​ħżiena, dawk li jifdal se jkunu jistgħu jgawdu “sliem kotran”—dinja mingħajr l-​ebda tip taʼ kriminalità.—Salm 37:​11, 34.

Bidla tal-​Moħħ u tal-​Qalb

M’huwiex biżżejjed li sempliċement jinqerdu l-​ħżiena u jsalvaw it-​tajbin biex il-​problema tal-​kriminalità tissolva darba għal dejjem. Il-​kriminalità taʼ spiss hi r-​riżultat taʼ trawwim mhux xieraq tal-​moħħ u tal-​qalb tan-​nies. Madankollu, hemmhekk se jidher kemm il-​gvern t’Alla huwa aqwa mill-​oħrajn. Istruzzjoni u edukazzjoni prattika se tkun provduta biex tħarreġ lin-​nies ħalli jsiru jħobbu s-​sewwa. Isaija 54:13 jgħid: “Uliedek ilkoll ikunu mgħallma mill-​Mulej, kbir għad ikun ġid uliedek.”

Ir-riżultati se jkunu tassew sodisfaċenti! Il-​Bibbja tagħti stampa ċara meta titkellem dwar il-​bidliet li se jsiru fin-​nies li xi darba setaʼ kellhom il-​karatteristiċi bħal dawk taʼ l-​annimali. Hi tgħid: “Il-​lupu jibda jgħix mal-​ħaruf, il-​leopard mal-​gidi, u jirgħu flimkien l-​għoġol u ferħ l-​iljun.” Għala? “Għax mimlija [tkun] l-​art bl-​għarfien tal-​Mulej bħalma l-​baħar hu miksi bl-​ilmijiet.” (Isaija 11:​6, 9) Madankollu, inti u l-​familja tiegħek m’għandkomx għalfejn tistennew għall-​futur biex tesperjenzaw bidliet bħal dawn. Kif?

Tistaʼ Tibbenefika Issa

Hemm nies li issa qegħdin jagħmlu l-​bidliet li għandhom bżonn jagħmlu biex jippreparaw għal dinja ħielsa mill-​kriminalità. Diġà qegħdin jilbsu personalità ġdida, it-​tip taʼ personalità li Alla jrid li jkollhom dawk l-​uħud li se jgħixu fid-​dinja l-​ġdida tiegħu. (2 Pietru 3:13) Dan jagħmluh billi japplikaw il-​prinċipji tal-​Bibbja f’ħajjithom. Innota d-​deskrizzjoni interessanti li tagħti l-​Bibbja: “Għandkom tiġġeddu b’tibdila spiritwali tal-​fehma tagħkom u tilbsu l-​bniedem il-​ġdid, maħluq skond Alla, fil-​ġustizzja u l-​qdusija tassew.”—Efesin 4:​23, 24.

Kolossin 3:​12-14 jagħti deskrizzjoni iktar ċara tal-​kwalitajiet pożittivi li ħafna wħud taʼ qalb onesta qegħdin jikkultivaw issa. Dan jgħid: “Intom il-​magħżulin taʼ Alla, il-​qaddisin u l-​maħbubin tiegħu. Ilbsu mela sentimenti taʼ ħniena, tjieba, umiltà, ħlewwa u sabar. Stabru b’xulxin, u, jekk xi ħadd minnkom ikollu xi jgħid maʼ ħaddieħor, aħfru lil xulxin; bħalma l-​Mulej ħafer lilkom, hekk agħmlu intom ukoll. U fuq kollox ilbsu l-​imħabba, li hi l-​qofol tal-​perfezzjoni.”

Tixtieq tirċievi għajnuna biex tilbes il-​personalità ġdida Kristjana? Miljuni taʼ nies madwar id-​dinja diġà qegħdin jagħmlu dan bl-​għajnuna tax-​Xhieda taʼ Jehovah. Fil-​laqgħat li jsiru regolarment fis-​Swali tas-​Saltna, u f’konvenzjonijiet kbar, anki nies li kienu kriminali vjolenti tgħallmu kif jilbsu l-​personalità taʼ paċi.a Jekk tixtieq tibbenefika minn dan il-​programm taʼ edukazzjoni eċċellenti mill-​Bibbja, taħsibhiex darbtejn biex tikkuntattja lill-​pubblikaturi taʼ din ir-​rivista. Se jkunu ferħanin li jgħinuk tkun fost dawk l-​uħud li qegħdin jippreparaw minn issa biex jgħixu fid-​dinja l-​ġdida t’Alla ħielsa mill-​kriminalità.

[Nota taʼ taħt]

[Stampa f’paġna 10]

Miljuni qegħdin jirċievu edukazzjoni għal ħajja f’dinja ħielsa mill-​kriminalità