Isem Alla f’Kastell Medjevali

MINN KITTIEB GĦAL STENBAĦ! FIS-​SLOVAKJA

IS-​SLOVAKJA huwa pajjiż żgħir kollu xenarji taʼ kampanja mill-​isbaħ fil-​qalba taʼ l-​Ewropa. Il-​kampanja pittoreska hi mimlija kastelli li huma bħal monumenti taʼ l-​istorja twila u importanti tar-​reġjun. Fost l-​iktar kastelli rimarkevoli nsibu lil dak taʼ Orava, mibni fuq irdum tal-​ħaġar għoli 112-il metru li jinsab wieqaf fuq ir-​raħal taʼ maġenbu.

L-ewwel referenza għall-​Kastell t’Orava fl-​istorja tmur lura għall-​1267. Minn dakinhar, il-​kastell kellu ħafna sidien differenti. Fl-​1556 il-​kastell kien f’idejn il-​familja Thurzó li kienet familja għanja. Il-​membri tal-​familja Thurzó bnew il-​kappella tal-​kastell fost l-​affarijiet l-​oħra li żidulu biex isebbħuh.

Kull sena l-​Kastell Orava u l-​wirjiet tiegħu jattiraw għaxriet taʼ eluf taʼ viżitaturi minn ħafna pajjiżi. Fil-​bitħa, il-​viżitaturi jistgħu jaraw xi ħaġa li hi speċjalment interessanti u li tinsab preservata fl-​emblema tal-​familja Thurzó f’kitba mqabbża fil-​ġebel ramli. Il-​kitba fiha l-​isem t’Alla li jinsab fil-​Bibbja—Jehovah—bil-​Latin.