Il-​Ħarsa tal-​Bibbja

Huwa d-​Divorzju s-​Soluzzjoni?

F IL-​BRITANNJA ministru reliġjuż jagħti merħba lil dawk preżenti biex jiċċelebraw okkażjoni solenni. Quddiemu hemm koppja maʼ grupp taʼ ħbieb tal-​qalb u tfal. Jinsabu dawn preżenti għal żwieġ ferrieħi ieħor? Xejn affattu! Din iċ-​ċerimonja se ssir biex tirrikonoxxi t-​tmiem taż-​żwieġ tagħhom. Iva, id-​divorzju tant sar ħaġa komuni li xi knejjes qegħdin jagħmlu ċerimonji tad-​divorzju!

Qed taħseb biex tiddivorzja? Jekk inhu hekk, ċert int li t-​tmiem taż-​żwieġ tiegħek se jġiblek ħajja iktar ferħana? Hemm xi passi prattiċi li tistaʼ tieħu biex tkun ferħan mas-​sieħeb jew is-​sieħba tiegħek?

“Isiru Ġisem Wieħed”

Meta żżewġu l-​ewwel koppja umana, Alla qal li raġel għandu “jingħaqad maʼ martu u jsiru ġisem wieħed.” (Ġenesi 2:​24) Għalhekk, iż-​żwieġ kellu jkun għaqda permanenti. Fil-​fatt, kien għalhekk li iktar tard Ġesù qal li “ż-​żena” hija l-​unika bażi Skritturali għal divorzju bil-​possibbiltà li persuna tkun tistaʼ terġaʼ tiżżewweġ.​—Mattew 19:​3-9, Karm Żammit.a

Dan jenfasizza l-​bżonn li tibqaʼ leali fiż-​żwieġ. Iżda xi ngħidu jekk għandek problemi serji fiż-​żwieġ tiegħek?

Huwa d-​Divorzju l-​Iktar Soluzzjoni Għaqlija?

Ġesù ta prinċipju li permezz tiegħu nistgħu neżaminaw l-​azzjonijiet tagħna. Hu qal: ‘L-​għerf tawh raġun l-​opri tiegħu stess.’ (Mattew 11:19) X’jindika n-​numru kbir taʼ divorzji li qed jittieħdu llum għal xejn b’xejn?

“Il-​benefiċċji tad-​divorzju ġew esaġerati,” tgħid Linda Waite, il-​Professoressa tas-​soċjoloġija mill-​Università taʼ Chicago u l-​kap taʼ tim t’esperti li kienu qegħdin jistudjaw żwiġijiet mhux ferħana. Bl-​istess mod, wara li għamel 11-il sena janalizza r-​respons t’eluf taʼ persuni, il-​Professur Michael Argyle mill-​Università t’Oxford fil-​Britannja sab li “l-​iktar nies imdejqin kienu dawk li kienu divorzjati jew separati.” Għal liema raġuni?

Filwaqt li d-​divorzju għandu mnejn jelimina xi problemi, jistaʼ jħalli ġrajjiet trawmatiċi li forsi ma tantx ikollok kontroll fuqhom. Tabilħaqq, ir-​riċerka turi li ġeneralment id-​divorzju ma jnaqqasx is-​sintomi tad-​dipressjoni u lanqas ma jtejjeb il-​mod kif wieħed iħares lejh innifsu.

Anki jekk m’għandikx “żwieġ perfett,” jekk tibqaʼ miżżewweġ jistaʼ jkun taʼ benefiċċju. Ħafna li huma determinati li jagħmlu dan isibu l-​ferħ. Il-​Professoressa Waite tgħid: “Maż-​żmien, ħafna mill-​problemi jitranġaw u l-​miżżewġin isiru iktar ferħanin.” Fil-​fatt, studju wieħed juri li kważi tmien persuni minn kull għaxra li kienu “mdejqin ħafna” biż-​żwieġ tagħhom iżda evitaw id-​divorzju sabu lilhom infushom fi “żwieġ hieni” ħames snin wara. Anki meta jkun hemm problemi serji, ikun tajjeb li koppja ma tiħux id-​divorzju mill-​ewwel.

Passi Prattiċi

Dawk li qegħdin jaħsbu jekk jiddivorzjawx għandhom jistaqsu lilhom infushom jekk listennijiet tagħhom dwar iż-​żwieġ humiex realistiċi. Il-​mezzi tax-​xandir ippromwovu stampa taʼ relazzjoni romantika li tilħaq il-​quċċata tagħha b’tieġ lussuż li jispiċċa qisu bħal f’xi ħrafa. Wara li jgħaddi t-​tieġ u l-​istennijiet kbar ma jitwettqux, id-​diżappunt li jirriżulta jistaʼ joħloq konflitt. Hekk kif it-​tensjonijiet jiżdiedu, tiżviluppa sitwazzjoni fejn is-​sentimenti mweġġgħin jiddominaw lemozzjonijiet. L-​imħabba tibred u, eventwalment, ir-​rabja u l-​mibegħda jiħdulha postha. F’ċirkustanzi bħal dawn, xi wħud iħossu li l-​unika soluzzjoni hi li jiddivorzjaw.​—Proverbji 13:12.

Minflok ma tħalli s-​sentimenti negattivi jeffettwawlek il-​ħarsa tiegħek, assoċja maʼ dawk li jħarsu lejn iż-​żwieġ bħala rabta serja. Il-​Kristjani huma mħeġġin biex ‘ifarrġu lil xulxin u jibnu lil xulxin, kif qegħdin jagħmlu.’ (1 Tessalonikin 5:​11) Bla dubju, dawk li għandhom l-​inkwiet fiż-​żwieġ għandhom bżonn l-​inkuraġġiment minn sħabhom fit-​twemmin.

L-​Importanza li Turi Kwalitajiet bħal t’Alla

“Ilbsu mela sentimenti taʼ ħniena, tjieba, umiltà, ħlewwa u sabar,” wissa l-​appostlu Pawlu. (Kolossin 3:​12) Il-​kwalitajiet li jogħġbu lil Alla jistgħu jissalvagwardjaw l-​għaqda fiż-​żwieġ meta dan ikun għaddej minn żminijiet imqallbin.

Per eżempju, Pawlu kiteb: “Stabru b’xulxin, u, jekk xi ħadd minnkom ikollu xi jgħid maʼ ħaddieħor, aħfru lil xulxin.” (Kolossin 3:​13) Christopher Peterson, psikologu mill-​Università taʼ Michigan, jgħid: “L-​iktar kwalità marbuta mill-​qrib mal-​ferħ hija l-​maħfra.”

Il-ħlewwa, it-​tenerezza, u l-​maħfra jwasslu għall-​imħabba, ir-​“rabta perfetta li tgħaqqad.” (Kolossin 3:​14, NW) X’aktarx li xi darba kontu tinħabbu. Tistgħu terġgħu tiksbu l-​imħabba li kontu tħossu għal xulxin? Huma kemm huma diffiċli ċ-​ċirkustanzi tagħkom, agħmlu kuraġġ. Hemm tama. Tabilħaqq, jekk tibqgħu magħqudin u tapplikaw il-​prinċipji tal-​Bibbja, dan jistaʼ jirriżulta f’ħafna iktar ferħ minn dak li qatt immaġinajtu. Bla dubju, l-​isforzi tagħkom f’din il-​ħaġa se jagħmlu lil Alla Jehovah, il-​Ħallieq taż-​żwieġ, ferħan.​—Proverbji 15:20.

[Nota taʼ taħt]