Ħarsa Lejn id-Dinja
Għala Tħossok Tajjeb Meta Tidħaq
Għala tħossok daqshekk tajjeb meta tidħaq? Ir-riċerka turi li l-umoriżmu ma jħaddimx biss il-moħħ fir-reġjuni li huma marbutin mal-perċezzjoni u l-lingwa imma wkoll fin-nucleus accumbens, reġjun li ġie assoċjat mal-kuntentizza u l-ewforja, tirrapporta The Vancouver Sun. Skond it-Tabib Allan Reiss taʼ l-Università taʼ Stanford, dan ir-reġjun tas-sistema nervuża hu “parti qawwija minn sistema li hi marbuta mal-moħħ.” Reiss jemmen li l-istudju taʼ l-umoriżmu jistaʼ jgħin lit-tobba jifhmu aħjar l-imġiba soċjali. “Is-sens umoristiku tagħna bħala individwi spiss jikkontrolla jekk, kif, u maʼ min nistabbilixxu ħbiberiji u saħansitra relazzjonijiet romantiċi dejjiema,” jgħid it-Tabib Reiss. ‘L-umoriżmu hu wkoll mekkaniżmu universali li jgħin lin-nies ikampaw meta jkollhom jiffaċċjaw kull xorta taʼ stress.’
‘Il-Marda Ġdida tas-Seklu 21’
Dan hu l-mod kif xi psikjatri ddeskrivew il-“fissazzjoni” ġdida fuq it-telefons ċellulari. Skond studju miċ-Ċentru Speċjali għall-Kura u r-Riabilitazzjoni minn Vizzji Soċjali (CETRAS), l-iktar vulnerabbli huma “xebbiet taʼ bejn is-16 u l-25 sena li huma mistħijin, immaturi, u frustrati,” tirrapporta l-gazzetta Spanjola El País. Din il-“fissazzjoni” twassalhom għal “leblieba bla xabaʼ biex jużaw it-telefons ċellulari u jibagħtu l-messaġġi,” jgħid il-psikjatra Blas Bombín. Meta ma jkunux jistgħu jużaw it-telefon ċellulari tagħhom, taqbadhom “ansjetà u frustrazzjoni.” Il-“fissazzjoni” fuq it-telefons ċellulari ma teffettwax biss ir-relazzjonijiet m’oħrajn imma teffettwa wkoll il-but. CETRAS tikkwota każi taʼ pazjenti li għandhom tmien telefons ċellulari differenti u li jħallsu “sa 800€ [Lm339] fix-xahar f’kontijiet tat-telefon.”
Il-Problema tal-Parking fiċ-Ċina
Ir-rata mgħaġġla taʼ żvilupp ekonomiku fiċ-Ċina għamlitha possibbli li miljuni taʼ nies ikollhom il-karozza tagħhom. Iżda dawn għandhom problema—isibu fejn jipparkjaw. Ħafna binjiet residenzjali li telgħu dawn l-aħħar 25 sena m’għandhomx parking, għax meta nbnew kienu ftit dawk in-nies li kellhom il-karozza tagħhom. Akkwati residenzjali iktar antiki għandhom sqaqien dojoq u mgħawġin li impossibbli tipparkja fihom. Sadattant, “l-għadd taʼ karozzi f’Beijing qabeż iż-żewġ miljuni, u l-għadd taʼ postijiet għall-parking hu biss 600,000,” tirrapporta China Today. Fiċ-Ċina kollha, madwar 20 fil-mija biss mis-sidien tal-karozzi għandhom post legali fejn jipparkjaw. Indikazzjoni oħra taż-żjieda fl-għadd taʼ karozzi hi d-domanda li dejjem qed tiżdied għaż-żejt. Skond China Today, “Iċ-Ċina dalwaqt tieħu post il-Ġappun bħala t-tieni pajjiż li jikkonsma l-iktar pitrolju.”
Żgħażagħ Iweġġgħu Minħabba Strapazz Ripetut
Għadd li dejjem jiżdied taʼ żgħażagħ qed ifittxu kura għax iweġġgħu minħabba strapazz ripetut (repetitive strain injuries [RSI]), tirrapporta The Globe and Mail tal-Kanada. “Tobba u fiżjoterapisti jgħidu li l-pazjenti tagħhom qed ikunu ħafna iżgħar minn qabel, hekk kif tfal inattivi jqattgħu iktar ħin fuq il-kompjuter id-dar u l-iskola,” tgħid il-gazzetta. Skond il-Globe, ittajpjar u taħbit kontinwu fuq il-kaxxa li tikkontrolla l-logħba tal-kompjuter jistgħu jwasslu għall-uġigħ u nefħa bħalma jkollhom nies li jbatu bl-RSI. Il-ġenituri huma mwissijin biex joqogħdu attenti għall-pożizzjoni taʼ kif ipoġġu bil-qiegħda wliedhom u biex jagħtu kas taʼ xi sintomi taʼ RSI—xi ħadd mit-tfal jogħrok minkbejh jew il-polzijiet jew jilmenta għax iħoss subgħajh imtarrxin jew inemmlu.
Iskrizzjoni Antika mill-Evanġelju
Għall-ewwel darba, studjużi fil-Palestina sabu vers mill-Iskrittura Griega Kristjana mnaqqax fuq qabar antik, tirrapporta l-Frankfurter Allgemeine Zeitung tal-Ġermanja. B’kumbinazzjoni, instabet iskrizzjoni fuq dak li sar magħruf bħala l-Qabar taʼ Absalom. Mir-ritratt li kien meħud fid-dawl baxx taʼ fil-għaxija, l-antropologu Joe Zias setaʼ jara xi ħaġa li kienet qisha iskrizzjoni mittiekla. Kulma kien hemm bżonn kien li titpoġġa biċċa karta pesta fuq il-parti fejn kien hemm l-iskrizzjoni, u ġie deċifrat il-vers mill-Bibbja. L-iskrizzjoni hi minn Luqa 2:25 u taqbel mal-Manuskritt Sinajtiku tar-rabaʼ seklu. Is-sejba hija sinifikanti minħabba l-fatt li, b’mod ġenerali, it-tinqix taʼ versi mill-Bibbja fuq l-oqbra kien sar popolari għall-ħabta tas-sena 1000 E.K.
Iż-Żgħażagħ u l-Użu tal-Kompjuter
Skond rapport mid-Dipartiment taʼ l-Edukazzjoni fl-Istati Uniti, f’dak il-pajjiż “madwar 90 fil-mija miż-żgħażagħ bejn il-ħamsa u s-sbatax-il sena jużaw il-kompjuter u 59 fil-mija minnhom jużaw l-Internet—rati li fiż-żewġ każi huma ogħla minn dawk taʼ l-adulti,” tispjega The Wall Street Journal. L-użu tal-kompjuter jibda kmieni. “Madwar tliet kwarti mit-tfal ikunu diġà qed jużaw il-kompjuter meta jkollhom ħames snin, u sa disaʼ snin il-maġġuranza minnhom jużaw l-Internet,” juri r-rapport. Filwaqt li iktar minn nofs iż-żgħażagħ jużaw l-Internet biex jikkomunikaw maʼ ħbiebhom jew biex jilagħbu l-logħob, “kważi tlieta minn kull erbgħa jużawh biex jgħinhom fil-proġetti taʼ l-iskola,” tikkummenta l-Journal. “Il-bniet, li ftit ilu kienu jużaw il-kompjuter u l-Internet inqas mis-subien, issa qed iqattgħu l-istess ammont taʼ ħin daqs is-subien.”
Dieta Griega taʼ Benefiċċju għas-Saħħa
“Għal kważi erbaʼ snin, xjenzati mill-Iskola Medika taʼ lUniversità taʼ Harvard u l-Università t’Ateni osservaw x’kienu mdorrijin jieklu 22,043 Grieg u sabu li dieta Mediterranja tnaqqas ir-riskju tal-mewt mill-kanċer u mill-mard tal-qalb bi kważi 25 fil-mija jew iktar,” jirrapporta r-Readers Digest. “Il-Griegi jieklu ħafna ġewż, frott, ħaxix, ful, ċereali u żejt taż-żebbuġa, ammont abbundanti taʼ ħut, ħalib u alkoħol bil-moderazzjoni, u xi ftit laħam.” Spiss ġew notati l-benefiċċji għas-saħħa li jiġu minn dieta Mediterranja tradizzjonali.
In-Nisa Jfittxu l-Pornografija
“Fi snin reċenti, il-fatt li ħafna nies jaffordjaw li jkollhom aċċess għall-Internet u meta jużawh jibqgħu anonimi, bla dubju ħajjar lil miljuni taʼ nisa għall-pornografija,” tgħid il-gazzetta Plain Dealer li toħroġ fi Cleveland, Ohio, lIstati Uniti. “Kważi persuna minn kull tlieta li jidħlu f’Web sites għall-adulti hija mara.” Omm taʼ 42 sena bdiet tara l-pornografija “biex tipprova tifhem x’kien li attira lill-ex raġel tagħha. Ma damitx ma bdiet tqattaʼ mat-30 siegħa fil-ġimgħa tfittex fuq l-Internet biex titqanqal sesswalment.”