Kont Lesta “Nimxi Kilometru Ieħor”

KIF RAKKONTATA MINN CLAIRE VAVY

IL-​GŻIRA taʼ Madagaskar li tinsab xi 400 kilometru ’l bogħod mill-​Możambik, pajjiż fil-​Lvant taʼ l-​Afrika, fiha ħafna muntanji u foresti tropikali kbar. Jien twilidt fin-​naħa tal-​lvant tal-​gżira fir-​raħal żgħir taʼ Betoko II. Fl-​1987, meta kelli 15-il sena, mort ngħix fil-​belt taʼ Mahanoro, li tinsab ħdejn il-​baħar, biex nattendi l-​iskola.

Kont ngħix f’Mahanoro maʼ ħija Celestin li hu akbar minni u li kien qed jistudja l-​Bibbja max-​Xhieda taʼ Ġeħova. Sentejn wara jien sirt Xhud. Kont determinata li naqdi lil Alla Ġeħova bl-​aħjar mod possibbli.

Nistinka biex Nilħaq il-​Miri Tiegħi

Waħda mill-​ewwel miri tiegħi kienet li ngħin lill-​familja tiegħi lura f’Betoko II, u kont nitlob spiss lil Ġeħova dwar ix-​xewqa tiegħi. Madankollu, stajt nirritorna hemmhekk biss matul il-​vaganzi taʼ l-​iskola. Kien vjaġġ diffiċli taʼ 100 kilometru. L-​ewwel 40 kilometru stajt nivvjaġġa permezz taʼ vettura, imma s-​60 kilometru li kien fadal kelli ngħaddi minn passaġġ dejjaq ħafna fuq il-​muntanji li bil-​mixi biss stajt tgħaddi minnu.

Ridt nitlaʼ ħafna għoljiet weqfin, u partijiet mill-​passaġġ imħarbat kienu dojoq ħafna, kemm toqgħod sieqi. Jekk kont nitlaq kmieni fil-​għodu u nimxi sakemm tinżel ix-​xemx, ġeneralment kont nagħmel madwar 40 kilometru. Kont inġorr iktar minn 15-il kilo taʼ provvisti​—ftit fuq rasi, ftit fuq dari, u l-​kumplament f’idejja. L-​iktar li kont inġorr kienet letteratura Biblika, li kont inqassam lill-​qraba u oħrajn li kienu interessati. Minfejn kont ngħaddi sirt magħrufa bħala “dik li jkollha ħafna xi ġġorr.”

Għall-ewwel, il-​familja tiegħi ma riditx tismaʼ dwar dak li kelli xi ngħid rigward it-​twemmin ġdid tiegħi, minkejja l-​entużjażmu li kelli. Però, ma damux ma bidlu fehmithom u tant bdew jistaqsuni mistoqsijiet li xi drabi konna nispiċċaw immorru norqdu f’xi s-​sagħtejn taʼ fil-​għodu.

Żjara Memorabbli

Fl-​24 taʼ Diċembru, 1990, wasalt lura d-​dar f’Betoko II għall-​vaganzi. Il-​membri tal-​familja tiegħi tgħidx kemm ferħu meta rawni, għax ħasbu li kont mort biex niċċelebra l-​Milied magħhom. Il-​ferħ tagħhom inbidel f’diżappunt meta spjegajtilhom għala ma stajtx ningħaqad magħhom fiċ-​ċelebrazzjonijiet tal-​Milied. Huma ħassewhom imbarazzati biex jispjegaw dan lill-​oħrajn fir-​raħal, peress li kienet komunità magħquda ħafna. Għalhekk, ħassejt il-​bżonn li nieħu l-​inizjattiva biex nispjegalhom jien. Imma kif kont se nagħmel dan?

Ma kontx ċerta, speċjalment minħabba li kont għadni żgħira. Ħsibt dwar jekk ikunx xieraq li nispjega t-​twemmin tiegħi l-​għada meta r-​raħal kollu jiltaqaʼ flimkien fil-​knisja. Jien tlabt lil Ġeħova bil-​ħrara għad-​direzzjoni tiegħu. Wara dan staqsejt lil Paul, ħija l-​kbir, li kien jgħallem fil-​knisja, “Taħseb li għada nkun nistaʼ nispjega lil dawk fil-​knisja dwar il-​għala ma niċċelebrax il-​Milied?” Hu ċċekkja m’oħrajn, u huma qablu mal-​proposta.

L-għada bagħtu għalija x’ħin spiċċat il-​funzjoni fil-​knisja. Wara li rġajt tlabt lil Ġeħova, ħadt miegħi xi letteratura Biblika. Wara li introduċejt ruħi, irringrazzjajt lil kulħadd għall-​għajnuna tagħhom li tawni biex ikolli rispett profond għall-​Bibbja. Spjegajtilhom li kont bqajt nistudja l-​Bibbja wara li tlaqt mir-​raħal. Għedtilhom li skoprejt ħafna veritajiet Bibliċi li ma konniex ġejna mgħallmin qabel.

Ħadt l-​okkażjoni biex nispjega t-​tama tal-​Bibbja li ngħixu għal dejjem f’art magħmula ġenna (Salm 37:29; Rivelazzjoni 21:​3, 4), ir-​raġuni għala ftit uħud leali mill-​art kienu se jitilgħu fis-​sema (Ġwanni 14:​2, 3; Rivelazzjoni 5:​9, 10; 14:​1, 3), u t-​tagħlim Bibliku li l-​mejtin m’huma konxji taʼ xejn iżda huma f’kundizzjoni bħallikieku reqdin, u għalhekk ma kinux qed isofru (Koħèlet 9:​5, 10; Ġwanni 11:​11-14, 38-44). Urejthom ukoll li l-​Kristjani bikrin ma kinux jiċċelebraw il-​Milied u li ċ-​ċelebrazzjoni kienet taʼ oriġini pagana.

Wara li spiċċajt il-​preżentazzjoni, ħafna mill-​grupp irrikonoxxew il-​verità taʼ dak li kont għedt. Xi wħud saħansitra staqsewni mistoqsijiet oħra. Wara wrejthom il-​pubblikazzjonijiet li kont ħadt miegħi u spjegajtilhom li kienu għajnuniet għall-​istudju tal-​Bibbja maħruġin mix-​Xhieda taʼ Ġeħova. Għedtilhom ukoll li kont lesta ngħin lil kulmin xtaq jistudja l-​Bibbja. Ħafna aċċettaw kopji tal-​letteratura Biblika.

Skoperta Mhix Mistennija

Mara li qatt ma kont iltqajt magħha qabel ġiet fuqi u qaltli, “Oħti, li tgħix f’raħal ieħor, hija membru tar-​reliġjon tiegħek.” Jien bqajt mistagħġba u staqsejtha, “Fejn?”

“F’Andranomafana,” qaltli hi. Ir-​raħal jinsab xi 30 kilometru minn Betoko II.

Għedt lill-​mara li oħtha x’aktarx kienet membru taʼ xi reliġjon oħra, ladarba x-​Xhieda fil-​lokalità kollha kienu jafu lil xulxin. Però, il-​mara insistiet li oħtha kienet għallmitha l-​istess affarijiet li jien kont spjegajt fit-​taħdita tiegħi fil-​knisja. Staqsejtha l-​isem u l-​indirizz t’oħtha, għax kont ħerqana biex nibda mill-​ewwel il-​vjaġġ lejn dan ir-​raħal. Madankollu, ommi ħeġġitni nistenna ġurnata jew tnejn, għax kien vjaġġ iebes li kollu ried isir bil-​mixi. Jumejn wara, jien u ħija Charles bdejna l-​vjaġġ lejn Andranomafana.

Malli wasalna, staqsejna lil xi nies mir-​raħal, “Hawnhekk hawn xi Xhieda taʼ Ġeħova?” Kont diżappuntata meta qalu, “F’dan ir-​raħal hawn biss knejjes Kattoliċi, Pentekostali, u Indipendenti.”

Imbagħad kien hemm mara li qalet, “Jekk qed tfittxu lix-​Xhieda taʼ Ġeħova, probabbilment tridu lil Marceline u l-​familja tagħha.” Dan kien l-​istess isem li kienu qaluli biex infittex!

Xi ħadd mar isejjaħ lil Marceline. Hi malajr ġiet imma kienet qisha qed tibżaʼ xi ftit. Ir-​raħal kollu nġabar, għax huma ħasbu li konna xi uffiċjali li ġejna ninterrogawha. Wara sirt naf li hi u l-​familja tagħha kienu ġew persegwitati fir-​raħal minħabba li kienu jipprattikaw ‘reliġjon differenti mill-​oħrajn.’

Marceline ħaditna ftit ’il bogħod mill-​folla, fejn stajna nitkellmu. Meta staqsejtha jekk kinitx waħda mix-​Xhieda taʼ Ġeħova, hi qalet iva. Wara dan, marret u ġabet il-​ktieb Il-​Verità li Twassal għall-​Ħajja Eterna, pubblikazzjoni li x-​Xhieda taʼ Ġeħova kienu jużaw bħala għajnuna għall-​istudju tal-​Bibbja, kif ukoll xi ħarġiet taʼ qabel tat-​Torri taʼ l-​Għassa. Kollha kienu qodma u mqattgħin. Jien staqsejtha, “Liema rivista studjajtu l-​Ħadd li għadda?”

“Dawn huma l-​uniċi ħarġiet li għandna,” qalet hi, “u nistudjawhom għal darba wara l-​oħra.” Imbagħad għedt lil Marceline li jien ukoll kont Xhud. Riedet ittir bil-​ferħ! Meta għedtilha li xtaqt niltaqaʼ mar-​raġel li kien jikkonduċi l-​laqgħat, hi qaltli li hu kien jgħix f’post ieħor, terġaʼ iktar ’il bogħod.

Skoperta Sabiħa Oħra

L-​għada jien u Marceline tlaqna flimkien biex inżur lil dan ir-​raġel. X’ħin wasalna, hu kien sorpriż u ferħan li jarana. Fil-​fatt, inzerta li kien Xhud li ġie minn Toamasina, belt ħdejn il-​baħar, iktar minn 200 kilometru lejn il-​grigal. Snin ilu, hu u l-​familja tiegħu kellhom jirritornaw hawnhekk wara li tilef ix-​xogħol tiegħu ħabta u sabta. Meta rritorna, hu beda jippriedka, jikkonduċi studji tal-​Bibbja, u jagħmel il-​laqgħat.

Ix-Xhud u l-​familja tiegħu kienu ferħanin ħafna li jaraw il-​ħarġiet reċenti tat-​Torri taʼ lGħassa li kelli miegħi. Urejtu wkoll il-​ktieb Int Tistaʼ Tgħix Għal Dejjem Fil-​Ġenna Fuq L-​Art, li dak iż-​żmien konna qed nużaw bħala l-​għajnuna prinċipali għall-​istudji tal-​Bibbja. Din kienet l-​ewwel darba li kienu qed jarawh. Il-​Ħadd taʼ wara rġajt mort Andranomafana biex nattendi l-​laqgħat magħhom. Inkuraġġejthom biex jikkuntattjaw l-​uffiċċju tal-​fergħa tax-​Xhieda f’Antananarivo, il-​belt kapitali, minħabba li l-​uffiċċju ma kienx jaf dwar l-​eżistenza taʼ dan il-​grupp żgħir.

Minn Jannar tas-​sena 1991, jien bdejt nivvjaġġa minn Mahanoro għal Andranomafana kważi kull xahar, u kont niħdilhom kopji reċenti tat-​Torri taʼ l-​Għassa u pubblikazzjonijiet oħra. Kien vjaġġ taʼ xi 130 kilometru ’l hemm u 130 kilometru lura, li minnhom kont irrid nimxi iktar minn 90 kilometru​—tielgħa u nieżla għoljiet weqfin u mħarbtin, kelli ngħaddi minn foresti mimlijin siġar u, meta kienet tagħmel ix-​xita, kien ikolli ngħaddi minn ġo tajn magħqud u jiżloq.

Hekk kif żdied in-​numru taʼ dawk li riedu l-​letteratura u r-​rivisti, kelli nibda nġorr iktar affarijiet. Madankollu, wara kull vjaġġ sens taʼ sodisfazzjon u ferħ kbir kienu jikkumpensaw bil-​kbir għall-​għeja u l-​uġigħ li kien ikolli fil-​muskoli. X’ferħ kien għalija li nara l-​grupp daqshekk ferħan li jirċievi kull pubblikazzjoni ġdida u nara b’għajnejja stess ir-​reazzjoni tagħhom għall-​veritajiet Bibliċi!

Bdejt fil-​Ministeru Full-Time

Fl-​1 taʼ Settembru, 1992, ġejt aċċettata bħala pijuniera, terminu li x-​Xhieda jużaw għall-​ministri tagħhom li jaqdu full-time. Jien għamilt ix-​xogħol taʼ pijuniera f’Mahanoro imma żammejt kuntatt mal-​qraba tiegħi f’Betoko II permezz taʼ l-​ittri. Maż-​żmien, huma bdew jistudjaw miegħi permezz taʼ l-​ittri, u staqsewni biex nirritorna fir-​raħal biex ngħinhom. Kont lesta nagħmel dan, imma l-​ewwel ridt inkun ċerta li kienu se jieħdu d-​deċiżjoni tagħhom li jistudjaw il-​Bibbja u li jagħmlu progress spiritwali bis-​serjetà. Għalhekk, għal ftit taż-​żmien, bqajt naqdi bħala pijuniera f’Mahanoro.

Lejn l-​aħħar tas-​sena 1993, kelli l-​privileġġ li nattendi kors taʼ ħmistax għall-​pijunieri f’Antananarivo. Wara, ġejt mistiedna biex napplika sabiex nibda naqdi bħala pijuniera speċjali, li kien ifisser li stajt nintbagħat fi kwalunkwe post fil-​pajjiż. Però, żammejt lura milli naċċetta l-​istedina ladarba ridt ngħin lill-​qraba tiegħi lura f’Betoko II, li kienu jgħixu ’l bogħod mill-​eqreb kongregazzjoni. Għalhekk, irritornajt għall-​inkarigu tiegħi bħala pijuniera f’Mahanoro.

Eventwalment, meta l-​indokratur li jivvjaġġa tax-​Xhieda taʼ Ġeħova ġie jagħmel iż-​żjara tiegħu, jien staqsejtu dwar jekk nistax nirritorna biex ngħin lill-​qraba tiegħi. Sadanittant kienet ġiet ifformata kongregazzjoni f’Andranomafana, u hu ssuġġerixxa li mmur hemmhekk sabiex inkun mal-​kongregazzjoni u nippriedka fit-​territorju taʼ Betoko II. Jien bdejt l-​inkarigu fl-​1 taʼ Settembru, 1994. Fl-​istess xahar, ħija Paul, li kien għalliem reliġjuż, attenda konvenzjoni distrettwali miegħi. Wara ftit taż-​żmien, 30 ruħ kienu qed jieħdu sehem fix-​xogħol taʼ l-​ippridkar f’Andranomafana, u nhar taʼ Ħadd kien hemm medja taʼ 65 li attendew għal-​laqgħat tagħna.

Il-​Mixi Ma Waqafx

Ftit wara li rritornajt lura Betoko II, erbgħa minn ħuti kkwalifikaw biex jibdew jieħdu sehem fil-​ministeru bħala Xhieda taʼ Ġeħova, u ftit wara tgħammdu. Wara li rġajt mort ngħix f’Betoko II, kont nivvjaġġa regolarment lejn Anosibe An’ala għal-​letteratura u r-​rivisti, mixja taʼ xi 50 kilometru kull naħa. Filwaqt li kien vjaġġ diffiċli ħafna, kont naf li ma kienx għalxejn għaliex gawdejt il-​ferħ li nara t-​tkabbir spiritwali f’dan il-​post.

Illum hemm kongregazzjoni li qed tiffjorixxi f’Betoko II, b’attendenza medja taʼ madwar 45 ruħ għal-​laqgħa taʼ nhar taʼ Ħadd. Issa ommi u ħuti li jgħixu fil-​viċin huma kollha Xhieda, u l-​maġġuranza huma pijunieri regulari. Wieħed minn ħuti ż-​żgħar jaqdi bħala pijunier speċjali. Fl-​1 taʼ Novembru, 2001, jien ukoll ngħatajt l-​inkarigu taʼ pijuniera speċjali, u ġejt inkarigata biex naqdi fir-​raħal taʼ Antanambao-Manampotsy. Imma tlaqt minn Betoko II b’qalb mimlija ferħ.

Meta bdejt nitgħallem il-​veritajiet Bibliċi fl-​1987, kien hemm inqas minn 3,000 Xhud f’Madagaskar. Issa hemm iktar minn 14,000. Bħal ħafna minn dawn, jien ferħana għall-​privileġġ li nistaʼ nuża l-​enerġija tiegħi biex “nimxi kilometru ieħor” biex ngħin lil oħrajn. U nirringrazzja lil Ġeħova li bierek l-​isforzi tiegħi f’dan ir-​rigward.

[Stampi f’paġna 24, 25]

Spiss ġarrejt iktar minn 15-il kilo taʼ provvisti għal distanza taʼ 60 kilometru biex immur fir-​raħal fejn kont ngħix

[Stampa f’paġna 25]

Paul, ħija akbar minni

[Stampa f’paġna 26]

Ħija Charles

[Stampa f’paġna 26]

Maʼ xi ftit mill-​membri tal-​familja tiegħi. Dawn issa huma kollha Xhieda taʼ Ġeħova