“Mitfugħin il-​Ħabs għall-​Fidi Tagħhom”

MINN KITTIEB GĦAL STENBAĦ! FIL-​POLONJA

IL-​KLIEM Arbeit Macht Frei (Ix-Xogħol Jagħmlek Ħieles) għadu sa llum il-​ġurnata miktub fuq il-​bibien tal-​ħadid tal-​kamp tal-​konċentrament f’Auschwitz fin-​nofsinhar tal-​Polonja, xi 60 kilometru mill-​fruntiera Ċeka.a Madankollu, dan il-​kliem jikkontradixxi dak li seħħ mill-​maġġuranza taʼ dawk li daħlu minn dawk il-​bibien bejn l-​1940 u l-​1945. Matul dawn is-​snin, iktar minn miljun ruħ mietu f’Auschwitz taħt idejn in-​Nazi. Però, individwi taʼ grupp minnhom setgħu ngħataw il-​libertà tagħhom x’ħin riedu.

X’riedu jagħmlu dawn l-​uħud biex jiksbu l-​libertà tagħhom? Kwalunkwe ħabsi li kien wieħed mix-​Xhieda taʼ Ġeħova setaʼ jinħeles jekk jiffirma karta li kienet tistqarr li hu, jew hi, ma kienx se jibqaʼ jaqdi bħala Xhud. Ħafna xi ddeċidew? L-​istorjografu István Deák jgħid li x-​Xhieda “kienu simili għall-​Kristjani tal-​bidu li kienu jippreferu jinqatlu mill-​iljuni milli jagħmlu offerta żgħira fuq l-​artal taʼ xi imperatur Ruman.” Waqfa bħal din żgur jistħoqqilha li tiġi mfakkra, u hekk ġara.

Mill-21 taʼ Settembru, 2004, għal xahrejn, is-​sala prinċipali tal-​Mużew taʼ l-​Istat t’Auschwitz-Birkenau ppreżentat esibizzjoni dedikata biss għax-​Xhieda. L-​esibizzjoni kellha t-​tema xierqa “Mitfugħin il-​Ħabs għall-​Fidi Tagħhom​—Ix-​Xhieda taʼ Ġeħova u r-​Reġim Nazist.” Din kien fiha wirja taʼ 27 tabella storika li wrew id-​determinazzjoni soda tax-​Xhieda biex iżommu n-​newtralità Kristjana matul l-​era Nazista.

Ħafna mill-​viżitaturi tqanqlu meta qraw kopja taʼ ittra li ntbagħtet mill-​ħabs minn Deliana Rademakers, li kienet mill-​Olanda. Hi kitbet lill-​familja tagħha: “Jien wegħedt li se nagħmel ir-​rieda taʼ Ġeħova. . . . Kunu qalbiena u tibżgħux. Ġeħova hu magħna.” Fl-​1942, Deliana ġiet deportata lejn Auschwitz, fejn mietet inqas minn tliet ġimgħat wara.

B’kollox kien hemm xi 400 Xhud f’Auschwitz. Tlieta minn dawk li salvaw kienu preżenti għall-​inawgurazzjoni taʼ lesibizzjoni, fejn irrakkontaw l-​esperjenzi tagħhom u wieġbu l-​mistoqsijiet tal-​ġurnalisti. Huma wrew l-​istess kuraġġ li għenhom isalvaw mill-​kundizzjonijiet fil-​kamp.

Fil-​ktieb tagħha Imprisoned for Their Faith​—Jehovah’s Witnesses in Auschwitz Concentration Camp, ir-​riċerkatriċi Teresa WontorCichy li taħdem fil-​Mużew taʼ l-​Istat kitbet: “Il-​waqfa taʼ dan il-​grupp żgħir influwenzat lill-​ħabsin l-​oħra b’mod pożittiv, u d-​determinazzjoni tagħhom li wrew kuljum biex jibqgħu sodi saħħaħ lill-​oħrajn biex ikunu konvinti li fi kwalunkwe kundizzjoni n-​nies jistgħu jżommu lealment mal-​prinċipji tagħhom.”

Il-fatt hu li l-​ħabs u l-​mewt m’humiex ġodda għas-​segwaċi taʼ Ġesù Kristu, li hu stess kien ġie arrestat u maqtul għall-​fidi tiegħu. (Luqa 22:54; 23:​32, 33) Ġakbu, l-​appostlu taʼ Ġesù, ukoll ġie maqtul. L-​appostlu Pietru ntefaʼ l-​ħabs, u l-​appostlu Pawlu ġie msawwat u mitfugħ il-​ħabs diversi drabi.​—Atti 12:​2, 5; 16:​22-25; 2 Korintin 11:23.

B’mod simili, ix-​Xhieda taʼ Ġeħova fl-​Ewropa taw eżempju mill-​aqwa taʼ fidi f’Alla matul is-​snin 30 u 40. Hija xi ħaġa sabiħa li l-​fidi taʼ dawn l-​uħud saret rikonoxxuta f’Auschwitz.

[Nota taʼ taħt]

[Stampa f’paġna 10]

Tlett irġiel li salvaw minn Auschwitz b’tabella li fiha t-​titlu taʼ l-​esibizzjoni

[Stampi f’paġna 11]

Deliana Rademakers, u ittra li kitbet meta kienet il-​ħabs

[Sors]

Ritratti taʼ ġewwa: Zdjęcie: Archiwum Państwowego Muzeum Auschwitz-Birkenau

[Sors taʼ l-​Istampa f’paġna 10]

It-​Torri: Dzięki uprzejmości Państwowego Muzeum Auschwitz-Birkenau