Iż-​Żgħażagħ Jistaqsu . . .

Ħbiberiji fl-​Iskola​—Safejn Għandek Tasal?

“Sħabi taʼ l-​iskola kienu jitkellmu dwar kemm ikunu ħadu pjaċir flimkien is-​Sibt u l-​Ħadd. Jien ħassejtni maqtugħa għalkollox minn dan.”​ —Michelle.a

“Xi kultant kont nara xi grupp taʼ ħbieb u kont naħseb, ‘Dawk vera jidhru ħbieb sew! Jien irrid inkun parti minn dak il-​grupp.’”—Joe.

“Ma kellix problema biex nagħmel ħbieb l-​iskola, anzi kien faċli. Din kienet il-​problema tiegħi.”​—Maria.

INT tkun maʼ sħabek taʼ l-​iskola għall-​parti l-​kbira mill-​ġurnata. Bħalhom tiffaċċja ħafna mill-​istess sfidi, frustrazzjonijiet, u trid twettaq l-​istess affarijiet. B’xi modi, tistaʼ tħoss li taqbel iktar magħhom milli mal-​ġenituri, maʼ ħutek, jew mal-​Kristjani sħabek. Nistgħu nifhmu li forsi tħossok miġbud lejn ċerta ħbiberija. Hija din xi ħaġa ħażina? Hemm xi perikli? Meta tiġi għal ħbiberiji fl-​iskola, safejn għandek tasal? Kif tistaʼ tiddetermina x’inhu aċċettabbli?

Int Għandek Bżonn il-​Ħbieb

Kulħadd għandu bżonn il-​ħbieb​—nies li magħhom nistgħu nirrilassaw fi żminijiet tajbin u li nistgħu nistrieħu fuqhom fi żminijiet diffiċli. Ġesù kellu ħbieb, u kien jieħu gost jissieħeb magħhom. (Ġwanni 15:15) Imbagħad, meta ffaċċja l-​mewt fuq zokk tat-​tortura, il-​ħabib tal-​qalb taʼ Ġesù, Ġwanni, “id-​dixxiplu li [speċjalment] kien iħobb,” kien viċin tiegħu. (Ġwanni 19:​25-27; 21:20) Int għandek bżonn ħbieb taʼ dan it-​tip​—nies li jibqgħu miegħek kemm fil-​maltemp kif ukoll fil-​bnazzi. Proverbju Bibliku jgħid: “Il-​ħabib iħobbok kull ħin, bħal ħuk imwieled għal żmien l-​hemm.”​—Proverbji 17:17.

Forsi tħoss li sibt lil xi ħadd bħal dan fl-​iskola, wieħed minn sħabek taʼ l-​iskola li tingwalaha sew miegħu. Jinteressawkom xi affarijiet simili u tieħdu pjaċir titkellmu flimkien. Veru, dan it-​tali m’huwiex sieħeb fit-​twemmin; imma mill-​ħarsa tiegħek, lanqas ma jidher li jidħol fil-​kategorija taʼ “kumpanija ħażina.” (1 Korintin 15:33) M’għandniex xi ngħidu, hemm xi żgħażagħ li m’għandhomx l-​istess twemmin Bibliku bħalek imma li jżommu maʼ prinċipji tajbin. (Rumani 2:​14, 15) Allura jfisser dan li għandek issir ħabib tal-​qalb tagħhom?

Il-​Kristjani M’Humiex Anti-soċjali

Ovvjament il-​Kristjani veri ma jevitawx għalkollox lil uħud li ma jemmnux. Sabiex iwettqu l-​inkarigu tagħhom li jagħmlu “dixxipli mill-​ġnus kollha,” il-​Kristjani jitkellmu maʼ nisa u rġiel minn kull razza, reliġjon, u kultura. (Mattew 28:19) Huma ma joqogħdux lura milli jinvolvu ruħhom mal-​ġirien, il-​ħbieb tax-​xogħol, jew sħabhom taʼ l-​iskola, u lanqas ma huma anti-soċjali. Anzi, il-​Kristjani juru interess sinċier f’oħrajn.

L-appostlu Pawlu ħallielna eżempju mill-​aqwa f’dan ir-​rigward. Hu kien jaf jitħaddet maʼ “nies taʼ kull xorta,” avolja ma kellhomx l-​istess twemmin tiegħu. Ovvjament, l-​iskop taʼ Pawlu ma kienx biex jissoċjalizza magħhom. Anzi, hu qal: “Nagħmel kollox minħabba l-​aħbar tajba, biex naqsam dan il-​messaġġ m’oħrajn.”​—1 Korintin 9:​22, 23.

Int tistaʼ ssegwi l-​eżempju taʼ Pawlu. Kun kordjali maʼ dawk taʼ mparek. Tgħallem kif tikkomunika sew magħhom. Forsi xi wħud minn sħabek taʼ l-​iskola qed ifittxu t-​tama li għandek int ibbażata mill-​Bibbja. Ikkunsidra l-​każ taʼ tfajla Kristjana jisimha Janet. Hi u sħabha tal-​klassi ġew inkarigati jiktbu kumment qasir dwar kull student, u mbagħad l-​istudenti kollha setgħu jaqraw il-​kummenti miktubin dwarhom. Wieħed mill-​kummenti li rċiviet Janet kien jgħid: “Int dejjem tidher ferħana ħafna. Jekk jogħġbok għidilna għala!”

Bħalma turi din l-​esperjenza, xi wħud minn sħabek taʼ l-​iskola forsi huma lesti jisimgħu dwar it-​twemmin tiegħek. Żgur li jkun taʼ vantaġġ għalik li tkun dħuli maʼ wħud bħal dawn. Bla ebda dubju, dan se jipprovdilek opportunità biex tispjega t-​twemmin tiegħek. Ħalli lil sħabek tal-​klassi jesprimu l-​ħarsa tagħhom ukoll, u ismaʼ b’mod ġenwin meta jagħmlu dan. L-​esperjenza li tikseb meta tikkomunika maʼ dawk taʼ mparek se tkun taʼ valur kbir jekk int xi darba jkollok xogħol sekulari u tiffaċċja sitwazzjonijiet simili. Fl-​iskola u fuq il-​post tax-​xogħol, imġiba dħulija se tgħinek ‘issebbaħ f’kollox it-​tagħlim t’Alla, is-​Salvatur tagħna.’—Titu 2:10.

Ħbiberiji “Taħt Madmad Mhux Indaqs”

Ovvjament hemm differenza bejn li tkun dħuli maʼ sieħeb tal-​klassi u li tkun il-​ħabib intimu tiegħu. Pawlu kiteb: “Tintrabtux taħt madmad li mhux indaqs maʼ dawk li ma jemmnux.” (2 Korintin 6:14) Biex tkun ħabib tal-​qalb taʼ xi ħadd, irid ikollok l-​istess valuri u miri. Dan sempliċement m’huwiex possibbli maʼ persuna li m’għandhiex l-​istess twemmin u livelli Skritturali li għandek int. Jekk tintrabat taħt madmad mhux indaqs maʼ wieħed tal-​klassi li ma jemminx x’aktarx li se jħajrek tinvolvi ruħek fi prattiki ħżiena jew iħassarlek id-​drawwiet tajbin li għandek.

Maria tgħallmet dan permezz t’esperjenza qarsa. In-​natural soċjevoli tagħha għamilhielha faċli biex tiġbed il-​ħbieb lejha, imma kien diffiċli għaliha biex tkun taf safejn għandha tasal. “Kont nieħu pjaċir bil-​fatt li kulħadd, kemm is-​subien u kemm il-​bniet, kien jieħu gost fil-​kumpanija tiegħi,” tammetti hi. “B’hekk, sibt ruħi qed nogħdos iktar u iktar fil-​fond fit-​tajn taʼ din id-​dinja.”

Forsi int, bħal Maria, issibha diffiċli biex tinduna meta ħbiberija maʼ xi ħadd li m’għandux it-​twemmin bħalek tkun saret intima wisq. Minkejja dan, tistaʼ tipproteġi lilek innifsek mill-​uġigħ tal-​qalb billi tqiegħed limiti ċari dwar lil min se tqisu bħala sempliċement xi ħadd li taf u lil min se tagħżlu bħala ħabib tal-​qalb. Kif tistaʼ tagħmel dan?

Kif Tagħżel Ħbieb Tajbin

Bħalma ssemma qabel, Ġesù għamel ħbieb tal-​qalb waqt li kien fuq l-​art. Ġesù għamel dan billi għex ħajja onesta u tkellem dwar affarijiet spiritwali. Jekk in-​nies kienu jaċċettaw it-​tagħlim u l-​mod taʼ ħajja tiegħu, huma kienu jersqu qrib tiegħu. (Ġwanni 15:14) Per eżempju, wara li semgħu lil Ġesù jitkellem, erbat irġiel tant tqanqlu li “abbandunaw kollox u marru warajh.” Dawn l-​irġiel​—Pietru, Xmun, Ġakbu, u Ġwanni​—saru l-​ħbieb tal-​qalb taʼ Ġesù.​—Luqa 5:​1-11; Mattew 4:​18-22.

Il-kliem u l-​azzjonijiet taʼ Ġesù għamluha ċara li hu kien serju dwar dak li kien jemmen fih u ma kien se jagħmel ebda kompromess. Dawk li ma ridux jaċċettaw lilu u lit-​twemmin tiegħu telqu, u Ġesù ħalliehom jitilqu.​—Ġwanni 6:​60-66.

Per eżempju, is-​sinċerità taʼ wieħed żagħżugħ verament qanqlet lil Ġesù. Il-​Bibbja tgħid: “Ġesù ħares lejh, ħass imħabba għalih.” Imma meta dan ir-​raġel sar jaf x’kien jistenna Ġesù mill-​ħbieb tiegħu, hu “telaq.” Ir-​raġel deher li kien persuna tajba​—tabilħaqq, Ġesù “ħass imħabba għalih.” Madankollu, Ġesù rrikjeda iktar mill-​ħbieb tiegħu. (Marku 10:​17-22; Mattew 19:​16-22) Xi ngħidu għalik?

Forsi tingwalaha maʼ sieħeb partikulari taʼ l-​iskola. Imma, staqsi lilek innifsek: ‘Dan l-​individwu lest biex jagħmel dak li Ġesù jikkmanda? Jixtieq jitgħallem dwar Ġeħova, il-​wieħed li Ġesù qalilna biex inqimuh?’ (Mattew 4:​10) Hekk kif titkellem maʼ sħabek tal-​klassi u tgħix fi qbil mal-​livelli tal-​Bibbja, it-​tweġibiet għal dawn il-​mistoqsijiet se jidhru biċ-​ċar.

Huwa tajjeb li tkun dħuli maʼ dawk tal-​klassi, l-​istess bħalma Ġesù kien dħuli maʼ kull tip taʼ nies. Imma Ġesù għamel ċert li l-​ħbieb tal-​qalb tiegħu kienu jħobbu lil Missieru tas-​sema, Ġeħova. Int tistaʼ tagħmel l-​istess. ‘Żomm kondotta tajba’ fl-​iskola, u bit-​tattika tkellem m’oħrajn dwar it-​twemmin tiegħek. Fuq kollox, kun ċert li tagħżel l-​aħjar tip taʼ ħbieb.​—1 Pietru 2:12.

AĦSEB DWAR DAN

◼ Liema perikli hemm f’li tqattaʼ r-​rikreazzjoni wara l-​ħin taʼ l-​iskola maʼ sieħeb tal-​klassi li ma jemminx? Hija din deċiżjoni għaqlija?

◼ Wara li qrajt dan l-​artiklu, tħoss li r-​relazzjoni li għandek maʼ xi sieħeb jew sieħba tal-​klassi saret intima wisq? Jekk iva, x’tistaʼ tagħmel dwar dan?

[Noti taʼ taħt]

[Kaxxa/Stampi f’paġna 26]

KIF JISTAʼ JKOLLI ĦBIEB VERI?

Dan il-​vidjo maħruġ mix-​Xhieda taʼ Ġeħova fih intervisti onesti maʼ żgħażagħ mill-​Istati Uniti, l-​Italja, Franza, u Spanja. Huwa disponibbli b’36 lingwa.

[Stampa f’paġna 26]

Xi wħud minn sħabek tal-​klassi jistgħu jkunu kurjużi dwar it-​twemmin tiegħek