Il-​Ħarsa tal-​Bibbja

Huwa Xieraq li Nużaw Titli li Juru Rispett?

HEKK kif il-​Kristjani taʼ l-​ewwel seklu kienu jagħmlu l-​attivitajiet taʼ kuljum u jippridkaw l-​aħbar tajba tas-​Saltna t’Alla, kienu jiġu f’kuntatt m’għadd t’uffiċjali tal-​gvern—xi wħud taʼ grad għoli u xi wħud taʼ grad inqas għoli. Is-​segwaċi taʼ Ġesù ma kinux jużaw titli bejniethom biex jiddistingwu l-​pożizzjoni, jew il-​klassi, tagħhom. Madankollu, dak iż-​żmien kien komuni li individwi li jkollhom poter fuq bnedmin oħrajn jiġu indirizzati b’titli. L-​imperatur Ruman kienu jirreferu għalih bħala “l-​Awgustu.”—Atti 25:21.

Allura, meta d-​dixxipli taʼ Ġesù kienu jidhru quddiem l-​uffiċjali tal-​gvern, kif kienu jqisuh l-​użu tat-​titli li juru rispett? U aħna kif għandna nqisuh?

Ir-​Rispett Ma Jfissirx Approvazzjoni

L-​appostlu Pawlu wissa lil sħabu fit-​twemmin biex ‘jagħtu lil kulħadd dak li għandu jieħu, lil min jirrikjedi l-​unur, l-​unur.’ (Rumani 13:7) Dan kien jinkludi li jindirizzaw lill-​uffiċjali bit-​titli tagħhom. Illum, titli bħall-​Eċċellenza Tiegħek jew Onorevoli normalment jintużaw biex jiġu indirizzati l-​uffiċjali pubbliċi. Imma xi wħud għandhom mnejn jistaqsu, ‘Kif nistaʼ nindirizza lil xi ħadd b’dan il-​mod meta nissuspetta li l-​kondotta tiegħu la hija waħda onorabbli u lanqas eċċellenti?’

Ħafna uffiċjali pubbliċi jieħdu ħsieb id-​doveri tagħhom kif jixraq, madankollu mhux kollha kemm huma tħoss li tistaʼ tafdahom. Xorta waħda, il-​Bibbja tħeġġiġna biex nissottomettu ruħna lejn is-​slaten u l-​gvernaturi “minħabba l-​Mulej.” (1 Pietru 2:13, 14) Għalhekk, meta nirrikonoxxu li Alla ppermetta li uffiċjal ikollu pożizzjoni t’awtorità, se niġu mqanqlin biex nuru r-​rispett u l-​unur meħtieġ.—Rumani 13:1.

Il-kondotta persunali t’uffiċjal m’għandhiex teffettwa l-​ħarsa tagħna lejh f’dan il-​kuntest. Din m’hijiex ir-​raġuni għala nagħtuh unur. Meta nindirizzaw uffiċjal bit-​titlu tiegħu li jurih rispett ma jfissirx li qed napprovaw il-​kondotta tiegħu. Dan jidher fi ġrajja li seħħet fil-​ħajja taʼ l-​appostlu Pawlu.

Kif Pawlu Uża t-​Titli

L-​appostlu Pawlu ġie arrestat f’Ġerusalemm fuq akkużi foloz u ttieħed quddiem Feliċ, li kien gvernatur tal-​Lhudija. Feliċ ma tantx kien eżemplari bħala uffiċjal pubbliku. Taċitu, l-​istudjuż Ruman taʼ l-​istorja, kiteb li Feliċ “ħaseb li setaʼ jagħmel kwalunkwe att ħażin mingħajr ma jiġi kastigat.” Hu kien iktar moħħu biex jixxaħħam milli biex jagħmel ġustizzja. Minkejja dan, matul is-​sentejn li dam arrestat, Pawlu wera rispett lejn il-​gvernatur, u ż-​żewġt irġiel kienu jitkellmu spiss—Feliċ bit-​tama li jingħata xi flus, li qatt ma waslu, u Pawlu uża l-​opportunità biex jippriedka.—Atti 24:26.

Meta Festu, il-​gvernatur il-​ġdid, laħaq minflok Feliċ hu semaʼ l-​każ taʼ Pawlu f’Ċesarija. Sabiex jingħoġob mill-​mexxejja Lhud, Festu ssuġġerixxa li Pawlu jgħaddi ġuri f’Ġerusalemm. Imma Pawlu kien jaf li hemmhekk il-​każ ma kienx se jiġi trattat b’ġustizzja, għalhekk ħa vantaġġ miċ-​ċittadinanza Rumana tiegħu u ddikjara: “Nappella għal quddiem Ċesari!”—Atti 25:11.

Festu ma kienx ċert kif setaʼ jispjega lil Ċesari l-​akkużi kontra Pawlu, imma ġietu l-​għajnuna meta s-​Sultan Agrippa II għamel żjara taʼ korteżija lil Festu u esprima interess fil-​każ. L-​għada, b’pompa kbira, kmandanti militari u rġiel prominenti tal-​belt akkumpanjaw lis-​sultan fis-​sala taʼ l-​udjenza.—Atti 25:13-23.

Meta ġie mistieden jitkellem, Pawlu uża t-​titlu “Sultan” fil-​kummenti tiegħu tal-​ftuħ u rrikonoxxa li Agrippa kien espert fid-​drawwiet u l-​kontroversji tal-​Lhud. (Atti 26:2, 3) F’dak iż-​żmien kienet ħaġa magħrufa sew li Agrippa kien involut f’relazzjoni sesswali u skandaluża m’oħtu. Żgur li Pawlu kien jaf bir-​reputazzjoni mħassra t’Agrippa minħabba li kien qed jgħix ħajja immorali. Xorta waħda, Pawlu tah l-​unur li jistħoqq lil sultan.

Waqt id-​difiża taʼ Pawlu, Festu esklama: “Pawlu, int qed tiġġennen!” Minflok ma rrabja, Pawlu wieġeb bil-​kalma billi indirizza lill-​gvernatur bil-​kliem “Wisq Eċċellenti.” (Atti 26:24, 25) Pawlu wrieh ir-​rispett li kien jistħoqqlu fil-​pożizzjoni tiegħu. Però, dawn l-​eżempji jqajmu l-​mistoqsija, Hemm xi limitu fl-​unur li għandna nagħtu lill-​uffiċjali?

Rispett b’Limitu

L-​awtorità governattiva hija limitata, bħalma huwa indikat f’Rumani 13:1, li jgħid: “L-​awtoritajiet li jeżistu tqiegħdu fil-​pożizzjonijiet relattivi tagħhom minn Alla.” Għalhekk, anki l-​unur mistħoqq lir-​rappreżentanti tal-​gvern huwa limitat. Ġesù stabbilixxa l-​limitu dwar l-​unur li għandu jingħata lil oħrajn meta qal lid-​dixxipli tiegħu: “Tissejħux Rabbi, għax wieħed hu l-​għalliem tagħkom, filwaqt li intom ilkoll aħwa. Barra minn hekk, issejħu lil ħadd missierkom fuq l-​art, għax wieħed hu Missierkom, Dak tas-​sema. U tissejħux ‘mexxejja,’ għax wieħed hu l-​Mexxej tagħkom, il-​Kristu.”—Mattew 23:8-10.

Għalhekk, hija d-​differenza bejn jekk it-​titli jkunux reliġjużi jew sekulari li tpoġġi l-​limitu meta jiġi biex jingħata unur xieraq. Meta uffiċjali sekulari jużaw titli reliġjużi, il-​parir li ta Pawlu biex jingħatalhom unur ma japplikax għal titli bħal dawn. Individwu li jsegwi l-​pariri Skritturali se jittratta bir-​rispett lil uffiċjali bħal dawn. Madankollu, il-​kuxjenza tiegħu mħarrġa fuq il-​Bibbja timmotivah biex iżomm lura milli juża kwalunkwe titlu reliġjuż, ladarba huwa obbligat li ‘jagħti lura lil Alla dak li hu t’Alla.’—Mattew 22:21.

QATT ĦSIBT DWAR DAN?

◼ Is-​segwaċi taʼ Ġesù kif kienu jħarsu lejn l-​awtoritajiet sekulari?—Rumani 13:7.

◼ Uża l-​appostlu Pawlu titli li juru rispett lejn uffiċjali tal-​gvern? —Atti 25:11; 26:2, 25.

◼ Liema tip taʼ titli m’approvax Ġesù?—Mattew 23:8-10.

[Stampa f’paġna 20, 21]

Pawlu kif indirizza lil Agrippa?