Il-​Ħarsa Tal-​Bibbja

Marie u Theresa kienu jqisu lilhom infushom bħala “Kattoliċi tajbin.” It-​tnejn li huma kienu jemmnu fil-​“qaddisin.” Marie kienet temmen li setgħet titlobhom għall-​għajnuna. Theresa kienet titlob b’mod regulari lill-​“qaddis” patrun tar-​raħal tagħha. Kienet titlob ukoll lill-​“qaddisa” li għaliha kienet imsemmija.

L-​ISTESS bħal Marie u Theresa, miljuni taʼ nies madwar id-​dinja jitolbu lill-​“qaddisin” tagħhom biex jaqilgħu xi grazzja. Skont in-​New Catholic Encyclopedia, “il-​qaddisin jaqdu bħala interċessuri [jew medjaturi] għall-​bnedmin,” u “hu ‘tajjeb u taʼ benefiċċju’ li nitolbuhom sabiex niksbu . . . grazzji mingħand Alla.”

Madankollu, Alla kif iħares lejn il-​kwistjoni? Hu aċċettabbli għalih li nitolbu lill-​“qaddisin” biex jaqdu bħala interċessuri għalina? Ikkunsidra dak li tgħid il-​Bibbja.

Għandna Nitolbu lill-​“Qaddisin” għall-​Għajnuna?

Il-​Bibbja mkien ma ssemmi li xi aduratur leali lejn Alla xi darba talab lil xi “qaddis.” Għala? In-​New Catholic Encyclopedia tistqarr li kien biss “fit-​tielet seklu [li] ġie rikonoxxut biċ-​ċar li hu effettiv li titlob lill-​qaddisin għall-​għajnuna.” Dan kien xi 200 sena wara l-​mewt taʼ Kristu. Mela, it-​tagħlim ma bediex minn Ġesù u l-​kittieba ispirati tal-​Bibbja li ddokumentaw il-​ministeru tiegħu. Għala?

Il-​Bibbja tgħallem b’mod konsistenti li għandna nitolbu lil Alla biss u nagħmlu dan f’isem Ġesù Kristu. “Jiena hu t-​Triq, il-​Verità u l-​Ħajja,” qal Ġesù. “Ħadd ma jmur għand il-​Missier jekk mhux permezz tiegħi.” (Ġwanni 14:6, Għaqda Biblika Maltija) Dan il-​kliem ċar hu fi qbil mat-​tagħlim taʼ Ġesù dokumentat f’Mattew 6:9-​13. Waqt li Ġesù spjega s-​suġġett tat-​talb, hu qal lis-​segwaċi tiegħu: “Hekk, mela, itolbu: Missierna fis-​smewwiet, ħa jitqaddes ismek. . . . ” (Mattew 6:9) Biċ-​ċar, Missierna tas-​sema hu l-​uniku wieħed li lilu għandna nitolbu. Din il-​verità hija skont prinċipju fundamentali tal-​Bibbja.

It-​Talb—Att taʼ Qima

“It-​talb,” tgħid The World Book Encyclopedia, “jirreferi għal kliem u ħsibijiet b’riverenza diretti lejn Alla, allat irġiel u nisa, jew bnedmin u oġġetti taʼ qima oħrajn. . . . It-​talb huwa forma taʼ qima importanti fi kważi r-​reliġjonijiet kollha tad-​dinja.” (Korsiv tagħna.) Staqsi lilek innifsek: ‘Huwa xieraq li ninżlu għarkopptejna u nitolbu bil-​qima lil xi ħadd ieħor ħlief lill-​Ħallieq u d-​Donatur tal-​Ħajja tagħna?ʼ (Salm 36:9) “L-​aduraturi veri,” qal Ġesù, “iqimu lill-​Missier bl-​ispirtu u l-​verità, għax, tabilħaqq, il-​Missier qed ifittex nies bħal dawn biex iqimuh.” (Ġwanni 4:23) Il-​Bibbja tistqarr ukoll li l-​Ħallieq tagħna jirrikjedi d-​“devozzjoni esklużiva” tagħna.—Dewteronomju 4:24; 6:15.

Ikkunsidra l-​eżempju tal-​appostlu Kristjan Ġwanni. Wara li ngħata l-​viżjonijiet spettakolari dokumentati fil-​ktieb Bibliku tar-​Rivelazzjoni, l-​appostlu miblugħ ‘inxteħet iqim f’riġlejn l-​anġlu’ li wrieh dawn l-​affarijiet. Kif wieġeb l-​anġlu? “Oqgħod attent!” qal hu. “Tagħmilx hekk! Jien sempliċement ilsir bħalek u bħal ħutek . . . Qim lil Alla.” (Rivelazzjoni 22:8, 9) Iva, għal darb’oħra l-​Bibbja tenfasizza li għandna nqimu biss lil Alla Ġeħova.

Fi qbil maʼ dan li għedna, Alla biss jissejjaħ “Semmiegħ it-​talb.” (Salm 65:2) Iktar minn hekk, bħala Dak li Jistaʼ Kollox, hu biss għandu l-​awtorità, l-​għarfien, u l-​qawwa biex iwieġeb kwalunkwe rikjesta xierqa li tkun saret fit-​talb. (Ġob 33:4) Anki Ġesù Kristu, kif ammetta hu stess, għandu l-​limitazzjonijiet tiegħu. (Mattew 20:23; 24:36) Madankollu, minkejja dan, Ġesù Kristu ngħata awtorità kbira, inkluż ir-​responsabbiltà li jaqdi bħala l-​Interċessur tal-​umanità.

Interċessur li Jifhimna

Il-​Bibbja tgħid dwar Ġesù: “Jistaʼ wkoll isalva għalkollox lil dawk li qed jersqu lejn Alla permezz tiegħu, għax hu dejjem ħaj biex jitlob bil-​ħniena għalihom.” (Ebrej 7:25) Fi kliem ieħor, Ġesù jistaʼ jaqdi bħala l-​Interċessur li jifhem għan-​nom taʼ dawk li “jersqu lejn Alla permezz tiegħu.” Dan ma jfissirx li għandna nitolbu lil Ġesù u bħallikieku kien se jressaq talbna quddiem Alla. Minflok, ifisser li nitolbu lil Alla f’isem Ġesù, u b’hekk nirrikonoxxu l-​awtorità tiegħu. Għala Ġesù huwa l-​Interċessur ideali?

Raġuni waħda hi li Ġesù esperjenza l-​ħajja bħala bniedem u dan għenu biex jifhem iżjed bis-​sħiħ it-​tbatijiet t’oħrajn. (Ġwanni 11:32-​35) Raġuni oħra hi li hu wera mħabbtu għall-​bnedmin billi fejjaq lill-​morda, qajjem lill-​mejtin, u għen lil kull min ġie għandu biex isir jaf lil Alla. (Mattew 15:29, 30; Luqa 9:11-​17) Hu anki ħafer id-​dnubiet. (Luqa 5:24) Dan inisslilna l-​fiduċja li jekk aħna nidinbu “għandna ajjutant mal-​Missier, lil Ġesù Kristu, li hu ġust.”—1 Ġwanni 2:1.

L-​imħabba u l-​mogħdrija taʼ Ġesù huma kwalitajiet li għandna nipprovaw nimitaw. Veru, m’għandniex l-​awtorità li naqdu bħala interċessuri. Imma nistgħu nitolbu għal oħrajn. Fil-​fatt, l-​imħabba għandha ġġegħelna nagħmlu dan. “Itolbu għal xulxin,” kiteb Ġakbu. “It-​talb bil-​ħerqa tal-​ġust għandu qawwa kbira f’dak li jistaʼ jwettaq.”—Ġakbu 5:16.

Marie u Theresa tgħallmu dawn il-​veritajiet prezzjużi billi eżaminaw il-​Bibbja huma stess. Ix-​Xhieda taʼ Ġeħova jistidnuk tagħmel l-​istess. Bħalma qal Ġesù, “dawk li jqimuh [lil Alla] iridu jqimu bl-​ispirtu u l-​verità.”—Ġwanni 4:24.

QATT ĦSIBT DWAR DAN?

● Ġesù lil min biss qal li għandna nitolbu?—Mattew 6:9.

● F’liema xogħol jaqdi Ġesù? —Ebrej 7:25.

● Għandna nitolbu lil Alla għall-​benesseri t’oħrajn?—Ġakbu 5:16.