Iż-​Żgħażagħ Jistaqsu

Fiċ-​ċerimonja tal-​premjijiet iqum ferħ taʼ ġenn meta żewġ attriċi popolari jilqgħu lil xulxin b’bewsa passjonali! Dawk li qed jaraw, għall-​ewwel iħossuhom ixxokkjati, u mbagħad jifirħu biex juru li jappoġġawhom. L-​omosesswali jsejħulha rebħa. Xi wħud jemmnu li kienet biss xi ħaġa biex jiġbdu l-​għajn. Hi x’inhi, vidjos tal-​bewsa se jintwerew darba wara l-​oħra fuq it-​televixin—u se jkunu popolari ferm fuq l-​Internet—għal diversi ġranet.

BĦALMA hu deskritt fix-​xena t’hawn fuq, ftit hemm ġrajjiet li joħolqu eċċitament fil-​mezzi tax-​xandir daqskemm meta xi ċelebrità tistqarr li hi omosesswali jew bisesswali.a Xi wħud ifaħħru lil uħud bħal dawn għall-​kuraġġ tagħhom; oħrajn jikkundannawhom għall-​ħajja żienja tagħhom. Bejn iż-​żewġ estremi, ħafna jqisu l-​omosesswalità bħala xejn iktar minn mod taʼ ħajja alternattiva. “Meta kont l-​iskola,” jgħid Daniel li għandu 21 sena, “anki tfal li ma kinux omosesswali ħassew li jekk kellek xi problema bl-​idea tal-​omosesswalità, kont qed turi preġudizzju u tiġġudika.”b

Attitudnijiet dwar l-​omosesswalità għandhom mnejn ikunu differenti minn ġenerazzjoni għal oħra jew minn pajjiż għal ieħor. Imma l-​Kristjani mhumiex “imtajrin minn kull riħ taʼ tagħlim.” (Efesin 4:14) Minflok, iżommu mal-​ħarsa tal-​Bibbja.

X’inhi l-​ħarsa tal-​Bibbja lejn l-​omosesswalità? Jekk tgħix fi qbil mal-​liġijiet morali tal-​Bibbja, kif tistaʼ twieġeb lil dawk li jgħidu li int turi preġudizzju, tiġġudika, jew saħansitra tobgħod lill-​omosesswali? Ikkunsidra l-​mistoqsijiet li ġejjin u xi risposti li jistgħu jkunu t’għajnuna.

Il-​Bibbja x’tgħid dwar l-​omosesswalità? Il-​Bibbja tagħmilha ċara li Alla ddisinja s-​sess biex jitgawda biss bejn raġel u mara u fl-​arranġament taż-​żwieġ biss. (Ġenesi 1:27, 28; Levitiku 18:22; Proverbji 5:18, 19) Meta l-​Bibbja tikkundanna ż-​żína, tkun qed tirreferi kemm għal kondotta omosesswali kif ukoll għal kondotta eterosesswali (bejn raġel u mara).c—Galatin 5:19-​21.

Jekk xi ħadd jistaqsik: “X’inhi l-​ħarsa tiegħek lejn l-​omosesswalità?”

Forsi twieġeb: “Ma nobgħodx lill-​omosesswali, imma ma nistax napprova l-​kondotta tagħhom.”

✔ Ftakar: Jekk tħalli l-​liġijiet morali tal-​Bibbja jiggwidawk, mela dan hu l-​mod li int għażilt kif tgħix ħajtek, u għandek kull dritt tagħmel dan. (Ġożwè 24:15) Tħossokx imbarazzat minħabba l-​ħarsa tiegħek.—Salm 119:46.

M’għandhomx il-​Kristjani jittrattaw lin-​nies kollha b’rispett, hi x’inhi l-​orjentazzjoni sesswali tagħhom? Dażgur. Il-​Bibbja tgħid: “Onoraw lil kull xorta taʼ bnedmin.” (1 Pietru 2:17) Għalhekk, il-​Kristjani ma jobogħdux lill-​omosesswali. Huma juru qalb tajba mal-​bnedmin kollha, inkluż maʼ dawn in-​nies.—Mattew 7:12.

Jekk xi ħadd jistaqsik: “Il-​ħarsa tiegħek lejn l-​omosesswalità ma tqanqalx il-​preġudizzju kontra l-​omosesswali?”

Forsi twieġeb: “Lanqas xejn. Jien niċħad il-​kondotta omosesswali, mhux lin-​nies.”

✔ Forsi tistaʼ żżid tgħid: “Biex nagħtik eżempju, jien nagħżel ukoll biex ma npejjipx. Infatti, anki l-​idea stess li npejjep tqażżiżni. Imma ejja ngħidu li int tpejjep u tħossok differenti. Jien ma nkunx preġudikat minħabba l-​ħarsa tiegħek, sewwasew bħalma jien ċert li int ma tkunx preġudikat minħabba l-​ħarsa tiegħi—sewwa qed ngħid? L-​istess prinċipju japplika għall-​ħarsa differenti tagħna lejn l-​omosesswalità.”

Ma ppritkax Ġesù li għandna naċċettaw lil oħrajn? Jekk inhu hekk, m’għandhomx il-​Kristjani jkollhom ħarsa tolleranti lejn l-​omosesswalità? Ġesù ma inkuraġġiex lis-​segwaċi tiegħu biex jaċċettaw kwalunkwe stil taʼ ħajja jkun xi jkun. Minflok, hu għallem li t-​triq għas-​salvazzjoni hi miftuħa għal “kulmin jeżerċita l-​fidi fih.” (Ġwanni 3:16) Li wieħed jeżerċita l-​fidi f’Ġesù jinkludi li jgħix fi qbil mal-​liġijiet morali t’Alla, li jipprojbixxu ċerti tipi taʼ kondotta—inkluż l-​omosesswalità.—Rumani 1:26, 27.

Jekk xi ħadd jgħidlek: “L-​omosesswali ma jistgħux ibiddlu l-​orjentazzjoni tagħhom; huma hekk jitwieldu.”

Forsi twieġeb: “Il-​Bibbja ma tikkummentax dwar il-​bijoloġija tal-​omosesswali, għalkemm tirrikonoxxi li xi tendenzi huma stabbiliti fis-​sod. (2 Korintin 10:4, 5) Anki jekk xi wħud huma miġbudin lejn l-​istess sess, il-​Bibbja tgħid lill-​Kristjani biex iwarrbu atti omosesswali.”

✔ Suġġeriment: Minflok ma tinqabad f’dibattitu dwar il-​kaġun taʼ xewqat omosesswali, enfasizza li l-​Bibbja tipprojbixxi l-​kondotta omosesswali. Biex tagħmel paragun, tistaʼ tgħid: “Bħalma taf, ħafna jistqarru li l-​imġiba vjolenti jistaʼ jkollha għeruq ġenetiċi, u minħabba f’hekk xi nies huma inklinati lejn din l-​imġiba. (Proverbji 29:22) Xi ngħidu jekk dan hu minnu? Bħalma forsi taf, il-​Bibbja tikkundanna r-​rabja. (Salm 37:8; Efesin 4:31) Huwa dan il-​livell inġust sempliċement għax xi wħud huma inklinati lejn il-​vjolenza?”

Alla kif jistaʼ jgħid lil xi ħadd li hu miġbud lejn l-​istess sess biex iwarrab l-​omosesswalità? Dan jinstemaʼ kattiv. Irraġunar bħal dan hu bbażat fuq l-​idea żbaljata li l-​bnedmin għandhom jaġixxu fuq ix-​xewqat sesswali tagħhom. Il-​Bibbja tagħti lill-​bnedmin id-​dinjità billi tassigurahom li jistgħu jagħżlu li ma jaġixxux fuq it-​tqanqil sesswali mhux xieraq tagħhom jekk verament iridu.—Kolossin 3:5.

Jekk xi ħadd jgħidlek: “Anki jekk m’intix omosesswali, għandek tbiddel il-​ħarsa tiegħek lejn l-​omosesswalità.”

Forsi twieġeb: “Ejja ngħidu li jien ma napprovax il-​logħob tal-​ażżard filwaqt li int tapprovah. Ikun raġunevoli li int tinsisti li jien inbiddel il-​ħarsa tiegħi, sempliċement minħabba li miljuni taʼ nies jagħżlu li jilagħbu l-​logħob tal-​ażżard?”

✔ Ftakar dan: Il-​biċċa l-​kbira min-​nies (inkluż l-​omosesswali) għandhom ċerti prinċipji morali li jġegħluhom jistkerrhu ċerti affarijiet—forsi l-​frodi, l-​inġustizzja, jew il-​gwerra. Il-​Bibbja tipprojbixxi dawn l-​affarijiet; tikkundanna wkoll ċerti tipi taʼ kondotta sesswali, inkluż l-​omosesswalità.—1 Korintin 6:9-​11.

Il-​Bibbja hija raġunevoli u ma tqanqalx il-​preġudizzju. Sempliċement tidderieġi lil dawk li jinġibdu lejn dawk tal-​istess sess biex jagħmlu l-​istess ħaġa li hi meħtieġa minn dawk li jinġibdu lejn dawk tas-​sess oppost—li ‘jaħarbu miż-​żína.’—1 Korintin 6:18.

Il-​fatt hu li miljuni taʼ eterosesswali li jixtiequ jgħixu fi qbil mal-​livelli tal-​Bibbja jrażżnu lilhom infushom minkejja kwalunkwe tentazzjoni li għandhom mnejn jiffaċċjaw. L-​għadd tagħhom jinkludi ħafna li huma waħedhom u li ma tantx għandhom prospett li jiżżewġu; jinkludi wkoll ħafna li huma miżżewġin lil xi ħadd diżabilitat li ma jistax jiffunzjona sesswalment. Huma kapaċi jgħixu ferħanin mingħajr ma jissodisfaw it-​tqanqil sesswali tagħhom. Dawk li għandhom tendenzi omosesswali jistgħu jagħmlu l-​istess jekk verament jixtiequ jogħġbu lil Alla.—Dewteronomju 30:⁠19.

Iktar artikli mis-​sensiela “Iż-​Żgħażagħ Jistaqsu” jistgħu jinstabu fuq il-​Websajt www.watchtower.org/ype

[Noti taʼ taħt]

AĦSEB DWAR DAN

● Alla għala jimponi liġijiet morali fuq il-​bnedmin?

● Int kif tibbenefika meta żżomm mal-​liġijiet morali tal-​Bibbja?

[Kaxxa f’paġna 24]

XI NGĦIDU GĦALL-​BISESSWALITÀ?

Għalkemm tistaʼ tinsab fost iż-​żewġ sessi, jidher li l-​bisesswalità qed issir iktar u iktar komuni fost it-​tfajliet. Ikkunsidra ftit raġunijiet.

● L-​Attenzjoni

“Is-​subien jammettu bil-​miftuħ li jaħsbu li l-​lesbjani huma attraenti. Tfajliet li mhumiex kunfidenti fihom infushom huma lesti li jagħmlu kważi kollox biex ġuvni jieħu grazzja magħhom.”—Jessica, 16.

● Il-​Kurżità

“Meta juru xi ħaġa f’films, fuq it-​televixin, u fil-​mużika li tippromwovi tfajliet ibusu lit-​tfajliet, l-​adoloxxenti se jkunu mħajrin biex jipprovawha—speċjalment meta ma jqisuhiex bħala xi ħaġa ħażina.”—Lisa, 26.

● Il-​Ġibda

“Iltqajt maʼ żewġ tfajliet bisesswali f’“party”, u iktar tard sirt naf mingħand ħabibti li ħadu grazzja miegħi. Eventwalment bdejt nibgħat messaġġi lil waħda mit-​tfajliet, u bdejt niżviluppa sentimenti lejha.”—Vicky, 13.

Jekk trid togħġob lil Alla, għandek tevita li tesperimenta b’kondotta li l-​Bibbja tiddeskriviha bħala li mhijiex nadifa. (Efesin 4:19; 5:11) Imma xi ngħidu jekk verament tħossok miġbud lejn iż-​żewġ sessi? Ħafna kieku jħeġġuk biex sempliċement taċċetta s-​sesswalità tiegħek u tgħid fil-​beraħ li int bisesswali. Madankollu, għandek tkun taf li l-​ġibda lejn l-​istess sess spiss hija fażi li tgħaddi malajr. Lisette, li għandha 16-​il sena, irrikonoxxietu dan. Hi tgħid: “Ħassejtni aħjar xħin kellimt lill-​ġenituri tiegħi dwar kif kont qed inħossni. Ukoll, permezz tal-​lezzjonijiet tal-​bijoloġija fl-​iskola sirt naf li matul is-​snin tal-​adoloxxenza, il-​livelli tal-​ormoni jistgħu jinbidlu ħafna. Verament nemmen li jekk iktar żgħażagħ ikunu jafu iżjed dwar ġisimhom stess, isiru jafu li l-​ġibda lejn l-​istess sess tistaʼ tkun temporanja u ma jħossux il-​pressjoni biex ikunu omosesswali.”

Anki jekk is-​sentimenti tiegħek huma iktar minn fażi temporanja li tgħaddi minnha fl-​adoloxxenza, hemm bżonn li tirrealizza li l-​Bibbja tagħtik mira li tistaʼ tilħaqha: Tistaʼ tagħżel li ma taġixxix fuq kwalunkwe xewqa ħażina.d

[Nota taʼ taħt]

[Stampa f’paġna 23]

Fejn tidħol l-​opinjoni popolari, il-​Kristjani għandhom il-​kuraġġ biex jimxu kontra l-​kurrent