L-​Aħħar tad-​Dinja—Iqanqal Interess Kbir

IBEŻŻGĦEK il-​futur? Jekk iva, m’intix waħdek. Sa minn żmien il-​qedem in-​nies spekulaw dwar x’se jkun il-​futur tal-​umanità, u ħafna waslu għall-​konklużjoni li l-​futur mhux se jkun kollu ward u żahar. Il-​possibbiltà li d-​dinja se tintemm kienet taʼ interess għan-​nies għal millennji sħaħ.

Pereżempju, ikkunsidra stejjer li ħarġu dan l-​aħħar. Komiks, programmi tat-​televixin, mijiet taʼ films, u eluf taʼ kotba jirrakkontaw stejjer dwar kif id-​dinja se tintemm. Dawn l-​istejjer huma dwar kull tip taʼ viljakk li jattakka u jeqred lill-​bnedmin kollha—robots qattiela, mostri taʼ kull xorta, aljeni, zombies, fatati, draguni, xadini kbar, għasafar, ġrieden sfigurati, u żnażan ġganteski. Ħadd ma jemmen verament li l-​bnedmin se jinqerdu b’dan il-​mod!

M’għandniex xi ngħidu, stejjer u teoriji oħrajn ibeżżgħu lil ċerti wħud ferm iktar. Xi wħud minn dawn it-​teoriji jsostnu li huma xjentifiċi. Waħda minnhom tbassar li l-​qoxra tad-​dinja kollha kemm hi se tiċċaqlaq f’daqqa u tipproduċi tsunamijiet, terremoti, u vulkani enormi. Teorija oħra ssostni li l-​pjaneti kollha se jifformaw linja dritta fl-​ispazju u li dan se jikkaġuna lill-​irjieħ solari tax-​xemx jitqawwew u jagħmlu straġi fuq l-​art. Terġaʼ oħra tgħid li l-​poli manjetiċi tad-​dinja f’daqqa waħda se jieħdu post xulxin, u minħabba f’hekk ir-​radjazzjoni tax-​xemx toqtolna lkoll. Tinkwetax. Dawn l-​affarijiet mhux se jiġru. Però, sitwazzjonijiet immaġinarji bħal dawn xorta jkomplu jimlew l-​imħuħ taʼ ħafna nies.

Xi ngħidu għan-​numru bla għadd taʼ kotba u Websajts dedikati għall-​aħħar tad-​dinja li jbassru li d-​dinja se tintemm fil-​21 taʼ Diċembru taʼ din is-​sena? Jingħad li hemm pjaneta jisimha Nibiru (jew Pjaneta X) riesqa lejn id-​dinja u se taħbat mal-​art f’Diċembru tal-​2012. Din u teoriji oħrajn li mhumiex appoġġati mill-​fatti huma bbażati fuq interpretazzjonijiet taʼ kalendarju tal-​qedem tal-​Maja li, skont xi wħud, jispiċċa fis-​solstizju tax-​xitwa tal-​2012.a

Ipperswaduti minn tbassir simili taʼ diżastru, xi wħud bnew xeltrijiet fuq wara tad-​dar tagħhom jew nefqu flejjes kbar biex jirriservaw xeltrijiet taħt l-​art. Oħrajn marru jgħixu fil-​muntanji u tgħallmu jfendu għal rashom, indipendenti mis-​servizzi pubbliċi, bħall-​ilma, il-​gass, jew id-​dawl.

M’għandniex xi ngħidu, hemm dawk li ma jemmnu xejn minn dan. Huma jidħqu bl-​idea li d-​dinja dalwaqt se tispiċċa. Pereżempju, xi xjenzati tan-​NASA jsostnu: “L-​Art mhu se jiġrilha xejn ħażin fl-​2012. Il-​pjaneta tagħna ilha 4 biljun sena għaddejja tajjeb, u xjenzati kredibbli mad-​dinja kollha ma jafu bl-​ebda theddida konnessa mal-​2012.”

Madankollu, ikun żball jekk nikkonkludu li l-​umanità mhijiex fil-​periklu jew li dawk li jibilgħu kollox biss jemmnu li l-​aħħar tad-​dinja hu iktar minn sempliċi ħrafa. Verament se tispiċċa d-​dinja? Jekk iva, kif u meta?

[Nota ta’ taħt]