Il-ġewnaħ tal-farfett li jassorbi d-dawl

SABIEX inaqqsu d-​dipendenza tal-​umanità fuq il-​faħam u ż-​żejt, ix-​xjentisti huma ħerqanin biex itejbu l-​effiċjenza li biha l-​pannelli solari jassorbu d-​dawl. “Is-​soluzzjoni taʼ din il-​problema,” qal wieħed xjentist, “setgħet kienet qed . . . tittajjar quddiem għajnejna.”

Ikkunsidra: Biex iżommu lilhom infushom sħan f’temp kiesaħ, il-​friefet jiftħu ġwinħajhom fix-​xemx. Il-​ġwienaħ taʼ xi speċi taʼ friefet tal-​bużbież huma effiċjenti b’mod straordinarju f’li jaqbdu u jassorbu d-​dawl tax-​xemx. Is-​sigriet tal-​insett qiegħed mhux biss fil-​kulur skur li għandu imma wkoll fl-​istruttura tal-​qxur mikroskopiku mrikkeb fuq xulxin li jiksi ġwinħajh. Il-​qxur fih ringieli taʼ toqob f’għamla taʼ xehda tal-​għasel separati bi xfar forma taʼ V bil-​maqlub li jidderieġu d-​dawl għal ġot-​toqob. Din l-​istruttura magħmula bis-​sengħa taqbad id-​dawl tax-​xemx li jidħol fiha. Dan jagħmel lill-​ġwienaħ suwed skuri, u b’hekk il-​farfett jisħon b’effiċjenza liema bħalha.

“Il-​ġwienaħ tal-​friefet huma fost l-​iktar strutturi delikati fin-​natura,” jgħid Science Daily, “imma taw lir-​riċerkaturi ispirazzjoni qawwija għal teknoloġija ġdida li tirdoppja l-​produzzjoni tal-​gass idroġenu—fjuwil li ma jagħmilx ħsara lill-​ambjent—mill-​ilma u d-​dawl tax-​xemx.” Użu promettenti ieħor jinkludi strumenti tal-​ottika u apparat li jipproduċi l-​elettriku mir-​raġġi tax-​xemx.

Int x’taħseb? Id-​disinn li jassorbi d-​dawl tal-​ġewnaħ tal-​farfett ġie bl-​evoluzzjoni? Jew ġie disinjat?