F’DINJA TAL-BIŻAʼ
4 | Ħares Lejn il-Futur b’Tama
GĦALA HU IMPORTANTI?
L-ansjetà minħabba l-problemi li hawn tistaʼ teffettwa s-saħħa tan-nies u kif iħossuhom. Ħafna nies li jkunu għaddew minn dawn is-sitwazzjonijiet jaħsbu li l-affarijiet qatt mhu se jmorru għall-aħjar. Allura x’jagħmlu?
Ħafna lanqas biss ikunu jridu jaħsbu dwar il-futur.
Oħrajn jixorbu jew jieħdu d-drogi biex ma jaħsbux dwar il-problemi tagħhom.
Xi nies jaħsbu li mhux worth it jibqgħu jgħixu, allura jaħsbu biex jagħmlu suwiċidju.
X’Għandek Tkun Taf?
Xi problemi li qed tiffaċċja forsi mhux se jibqgħu għal dejjem u jistgħu jinbidlu għall-aħjar meta ma tkunx qed tistenna.
Anki jekk ma tkun tistaʼ tagħmel xejn dwar il-problema li għandek, hemm affarijiet li jistgħu jgħinuk tissaporti.
Il-Bibbja twegħedna soluzzjoni għall-problemi kollha li hawn fid-dinja.
X’Tistaʼ Tagħmel minn Issa?
Il-Bibbja tgħid: ‘Qatt tkunu ansjużi dwar l-għada, għax l-għada se jkollu l-ansjetajiet tiegħu. Hu biżżejjed għal kull ġurnata l-inkwiet tagħha.’—Mattew 6:34.
Ħudha ġurnata b’ġurnata. Tinkwetax ħafna dwar il-futur tant li ma tkunx tistaʼ tagħmel l-affarijiet li għandek tagħmel.
Tinkwetax dwar affarijiet li jistgħu ma jiġrux, inkella se jkollok iżjed stress u ma tibqax pożittiv dwar il-futur.
Il-Bibbja Twegħedna Futur Sabiħ
Raġel fi żmien il-Bibbja darba talab lil Alla: “Kelmtek musbieħ għal sieqi, u dawl għal triqti.” (Salm 119:105) Ara kif il-Bibbja hi bħal lampa.
Billejl, lampa tgħinek tara fejn qed timxi. Bl-istess mod, il-Bibbja fiha pariri tajbin li jgħinuna nieħdu deċiżjonijiet diffiċli.
Id-dawl jistaʼ jurina wkoll x’hemm quddiemna. B’mod simili, il-Bibbja tistaʼ turina x’hemm sabiħ fil-futur.