X’SE JIĠRI MID-DINJA?
L-ILMA LI NIXORBU
XEJN ma jistaʼ jibqaʼ ħaj fid-dinja mingħajr l-ilma. Fil-fatt, l-ilma hu essenzjali għal kull ħaġa ħajja. L-ilma li jinġabar fl-għadajjar, fix-xmajjar, u taħt il-blat jintuża biex nixorbu, għall-annimali, u għall-ħxejjex u l-pjanti.
L-Ilma tax-Xorb Hu fil-Periklu
Il-biċċa l-kbira tad-dinja miksija bl-ilma. Però, skont l-Organizzazzjoni Meteoroloġika Dinjija, “minn dan l-ilma persentaġġ żgħir taʼ 0.5 fil-mija biss nistgħu nużawh għax-xorb.” Għalkemm dan l-ammont żgħir taʼ ilma hu biżżejjed biex ngħixu, ħafna minnu qed jitniġġes jew qed isir diffiċli biex ikollna aċċess għalih minħabba d-domanda kbira u l-bidla fil-klima. Esperti qed jgħidu li fi żmien 30 sena, ħames biljun ruħ jaf ma jkollhomx biżżejjed ilma biex jixorbu.
Id-Dinja—Iddisinjata b’Mod li Ma Tinqeridx
Id-dinja ġiet iddisinjata b’mod li dejjem ikun hemm biżżejjed ilma fiha. Barra minn hekk, il-ħamrija, il-pjanti u l-ħut tal-baħar, kif ukoll id-dawl tax-xemx iżommu l-ilma nadif. Ara l-evidenza li turi li d-dinja tagħna hi ddisinjata b’mod li ma tinqeridx.
Il-ħamrija tistaʼ tgħin biex tneħħi ħafna affarijiet li jniġġsu l-ilma. F’artijiet fejn hemm ħafna ilma sabu li ċertu pjanti jneħħu n-nitroġenu, il-fosfru, u l-pestiċidi.
Ix-xjentisti skoprew kif l-ilma jibqaʼ nadif fin-natura. Meta sustanzi perikolużi jitħalltu mal-ilma li ma jkunx qiegħed, il-batterji jistgħu jippurifikaw l-ilma.
Il-gandoffli (clams) u l-mussels tal-ilma ħelu jistgħu jneħħu ċertu kimiki taʼ ħsara li jkun hemm fl-ilma fi ftit ġranet. Dawn kapaċi jagħmlu xogħol aħjar mis-sistema tal-impjant tal-ilma.
Il-pjaneta tagħna terfaʼ l-ilma permezz taċ-ċiklu tal-ilma. Dan iċ-ċiklu flimkien maʼ proċessi oħra fin-natura ma jħallux l-ilma joħroġ mill-atmosfera jew jisparixxi.
X’Qed Isir Biex Tissolva l-Problema
Meta xi ħaġa tibda tagħmel iż-żejt, tajjeb li nsewwuha mill-ewwel u narmu kimiki perikolużi kif suppost. B’hekk inkunu qed ngħinu biex ikollna ilma tajjeb għax-xorb.
L-esperti jgħidulna biex noqogħdu attenti ħalli ma naħlux ilma. Biex innaqqsu t-tinġis fl-ilma huma jissuġġerixxu li jekk karozza tkun qed tagħmel iż-żejt insewwuha mill-ewwel, u ma narmux mediċina jew kimiki perikolużi fis-sistema tad-dranaġġ.
L-inġiniera sabu modi ġodda kif ineħħu l-melħ mill-ilma baħar. Il-mira tagħhom hi li jkun hawn iktar ilma tajjeb biex jintuża.
Imma dan mhux biżżejjed. Biex ineħħu l-melħ mill-ilma baħar, jiswa ħafna flus u hemm bżonn ammont kbir taʼ enerġija. Fl-2021, il-Ġnus Magħquda ħarġet rapport dwar kif nistgħu nipproteġu l-ilma tax-xorb u qalet: “Madwar id-dinja sar progress dwar dan imma għad fadal ħafna iktar xi jsir.”
Raġunijiet li Jagħtuna Tama—Dak li Tgħid il-Bibbja
“Alla . . . itellaʼ l-qtar tal-ilma; imbagħad dan isir xita u nida. Wara, dawn jinżlu mis-sħab u jagħtu l-ilma lil kulħadd.”—Ġob 36:26-28.
Alla ħalaq ċikli naturali biex jipproteġu l-ilma li hawn fid-dinja.—Ekkleżjasti 1:7.
Aħseb ftit: Jekk Alla ħalaq id-dinja u ddisinjaha b’mod li żżomm l-ilma nadif, ma jagħmilx sens li hu jixtieq u kapaċi jsolvi l-problemi li ġab il-bniedem? Ara l-artiklu “Alla Jwiegħed li d-Dinja Mhux Se Tinqered” f’paġna 15.