Anġlu Jżur lil Marija

DIN il-​mara ħelwa hi Marija. Hi Iżraelija li tgħix fir-​raħal taʼ Nazaret. Alla jaf li hi persuna tassew mill-​aħjar. Dan hu għala bagħat l-​anġlu tiegħu Gabrijel biex ikellimha. Taf x’ġie jgħidilha Gabrijel lil Marija? Ejja naraw.

‘Il-​ġurnata t-​tajba, int li ġejt favorita bil-​kbir,’ jgħidilha Gabrijel. ‘Ġeħova hu miegħek.’ Marija qatt ma rat lil din il-​persuna qabel. Hi tinkwieta, għaliex ma tafx x’ried ifisser. Imma mill-​ewwel Gabrijel iserrħilha rasha.

‘Tibżax Marija,’ jgħidilha hu. ‘Ġeħova ferħan ħafna bik. Għalhekk se jagħmel xi ħaġa tal-​għaġeb għalik. Dalwaqt se jkollok tarbija tifel. U trid issemmih Ġesù.’

Gabrijel ikompli jispjega: ‘Dan it-​tifel se jkun kbir, u se jissejjaħ Bin l-​Alla l-​Iktar Għoli. Ġeħova se jagħmlu Sultan, bħalma kien David. Imma Ġesù se jkun Sultan għal dejjem, u Saltnatu qatt ma se tintemm!’

‘Kif jistaʼ jkun dan kollu?’ tistaqsi Marija. ‘Lanqas biss jien miżżewġa. Qatt m’għext maʼ raġel, allura kif jistaʼ jkolli tarbija?’

‘Il-​qawwa t’Alla se tiġi fuqek,’ iwieġeb Gabrijel. ‘Allura t-​tifel se jkun imsejjaħ l-​Iben t’Alla.’ Imbagħad hu jgħid lil Marija: ‘Ftakar fil-​qariba tiegħek, Eliżabetta. In-​nies qalu li kienet xiħa wisq biex ikollha t-​tfal. Imma dalwaqt se jkollha iben. Allura, m’hemm xejn li Alla ma jistax jagħmel.’

Mill-​ewwel, Marija tgħid: ‘Jien il-​qaddejja taʼ Ġeħova! Ħa jiġri minni eżatt kif għedt.’ L-​anġlu mbagħad jitlaq.

Marija tħaffef biex tmur iżżur lil Eliżabetta. Meta Eliżabetta tismaʼ leħen Marija, it-​tarbija f’Eliżabetta taqbeż bil-​ferħ. Eliżabetta timtela bl-​ispirtu t’Alla u tgħid lil Marija: ‘Int imbierka b’mod speċjali fost in-​nisa.’ Marija tibqaʼ m’Eliżabetta għal xi tliet xhur, u mbagħad tmur lura d-​dar f’Nazaret.

Marija dalwaqt tiżżewweġ raġel jismu Ġużeppi. Imma meta Ġużeppi jsir jaf li Marija se jkollha tarbija, hu ma jaħsibx li għandu jiżżewwiġha. Imbagħad l-​anġlu t’Alla jgħidlu: ‘Tibżax tieħu lil Marija bħala martek. Għaliex hu Alla li taha iben.’ Allura Marija u Ġużeppi jiżżewġu u jistennew it-​twelid taʼ Ġesù.