Kapitlu 2
Onorat Qabel Ma Twieled
WARA li l-anġlu Gabrijel igħid lill-mara żagħżugħa Marija li se twelled tarbija tifel li se jsir sultan għal dejjem, Marija tistaqsi: “Kif se jsir dan, ladarba mhux qed ikolli x’naqsam maʼ raġel?”
“Spirtu qaddis se jiġi fuqek,” jispjega Gabrijel, “u qawwa tal-Iktar Għoli se titfaʼ d-dell tagħha fuqek. Għal dik ir-raġuni wkoll dak li jitwieled se jkun jissejjaħ qaddis, l-Iben t’Alla.”
Biex igħin lil Marija temmen il-messaġġ tiegħu, Gabrijel ikompli: “U, ħares! Eliżabetta l-qariba tiegħek hi nfisha wkoll nisslet iben, fi xjuħitha, u dan hu s-sitt xahar għaliha, l-hekk imsejħa mara ħawlija; għaliex maʼ Alla ebda dikjarazzjoni ma se tkun ħaġa impossibbli.”
Marija taċċetta l-kliem taʼ Gabrijel. U x’inhi t-tweġiba tagħha? “Ħares! L-irsira taʼ Jehovah!” tesklama hi. “Ħa jsir minni skond id-dikjarazzjoni tiegħek.”
Ftit wara li jitlaq Gabrijel, Marija tlesti u tmur iżżur lil Eliżabetta, li tgħix flimkien maʼ żewġha, Żakkarija, fil-pajjiż muntanjuż tal-Ġudea. Mid-dar taʼ Marija f’Nazzaret, dan huwa vjaġġ twil taʼ madwar tlieta jew erbat ijiem.
Meta Marija sa fl-aħħar tasal fid-dar taʼ Żakkarija, hi tidħol u toffri tislima. F’dak il-waqt, Eliżabetta timtela bl-ispirtu qaddis, u tgħid lil Marija: “Imbierka int fost in-nisa, u mbierek il-frott tal-ġuf tiegħek! Mela kif inhu li dan il-privileġġ huwa tiegħi, li jkolli omm il-Mulej tiegħi tiġi għandi? Għax, ħares! malli l-ħoss tat-tislima tiegħek waqaʼ fuq widnejja, it-tarbija fil-ġuf tiegħi qabżet b’hena kbir.”
Malli tismaʼ dan, Marija twieġeb bi gratitudni mill-qalb: “Ruħi tkabbar lil Jehovah, u l-ispirtu tiegħi ma jistax ma jifraħx ħafna f’Alla s-Salvatur tiegħi; għaliex hu ħares lejn il-pożizzjoni baxxa tal-irsira tiegħu. Għax, ħares! minn issa ’l quddiem il-ġenerazzjonijiet kollha se jgħiduli hienja; għaliex il-Wieħed taʼ qawwa għamel egħmejjel kbar għalija.” Iżda, minkejja l-favur li hi murija, Marija tidderieġi l-unur kollu lejn Alla. “Qaddis hu ismu,” hi tgħid, “u għal ġenerazzjonijiet wara ġenerazzjonijiet il-ħniena tiegħu hi fuq dawk li jibżgħu minnu.”
Marija tkompli tfaħħar lil Alla b’għanja profetika mnebbħa, billi tipproklama: “Hu wettaq affarijiet setgħana bi driegħu, hu xerred barra l-pajjiż lil dawk li huma mkabbrin fl-intenzjoni taʼ qlubhom. Hu niżżel lil irġiel taʼ qawwa minn tronijiet u eżalta lil uħud baxxi; hu xabbaʼ bis-sħiħ lil uħud bil-ġuħ b’affarijiet tajbin u bagħat b’idhom vojta lil dawk li kellhom il-ġid. Hu ġie għall-għajnuna taʼ Iżrael il-qaddej tiegħu, biex ifakkar il-ħniena, sewwa sew bħalma qal lil missirijietna tal-qedem, lil Abraham u liż-żerriegħa tiegħu, għal dejjem.”
Marija tibqaʼ maʼ Eliżabetta għal madwar tliet xhur, u bla dubju hi taʼ għajnuna kbira matul dawn l-aħħar ġimgħat tat-tqala taʼ Eliżabetta. Hi tassew ħaġa sabiħa li dawn iż-żewġ nisa leali, li t-tnejn qegħdin iġorru tarbija bil-għajnuna t’Alla, jistgħu jkunu flimkien waqt dan iż-żmien imbierek f’ħajjithom!
Innotajt int l-unur li ngħata lil Ġesù saħansitra qabel ma twieled? Eliżabetta sejħitlu “l-Mulej tiegħi,” u t-tfajjel f’ġufha qabeż bil-ferħ hekk kif Marija dehret għall-ewwel darba. Mill-banda l-oħra, oħrajn iktar tard ma tantx trattaw b’rispett lil Marija u lit-tfajjel tagħha li kien għad irid jitwieled, bħalma se naraw. Luqa 1:26-56.
▪ X’igħid Gabrijel biex igħin lil Marija tifhem kif kellha ssir tqila?
▪ Ġesù kif kien onorat qabel ma twieled?
▪ X’tgħid Marija f’għanja profetika b’tifħir lil Alla?
▪ Marija kemm iddum maʼ Eliżabetta, u għala hi ħaġa xierqa li Marija toqgħod maʼ Eliżabetta matul dan iż-żmien?