Kapitlu 5

It-​Twelid taʼ Ġesù—Fejn u Meta?

L-​IMPERATUR tal-​Imperu Ruman, Ċesri Awgustu, ħareġ digriet li kulħadd irid jerġaʼ lura lejn il-​belt fejn twieled biex jiġi rreġistrat. Mela Ġużeppi jivvjaġġa lejn il-​post fejn kien twieled hu, il-​belt taʼ Betlehem.

Hemm ħafna nies f’Betlehem biex jirreġistraw, u l-​uniku post li Ġużeppi u Marija jistgħu jsibu fejn joqogħdu huwa fi stalla. Hawnhekk, fejn jinżammu l-​ħmir u annimali oħra, jitwieled Ġesù. Marija tgeżwru f’biċċiet taʼ drapp u tmiddu f’maxtura, il-​post fejn jitqiegħed l-​ikel għall-​annimali.

Żgur li kien fuq id-​direzzjoni t’Alla li Ċesri Awgustu għadda l-​liġi tiegħu tar-​reġistrazzjoni. Din għamlitha possibbli għal Ġesù li jitwieled f’Betlehem, il-​belt li l-​Iskrittura kienet bassret żmien ilu li kellu jkun il-​post fejn jitwieled il-​ħakkiem imwiegħed.

Kemm hi lejla importanti din! Barra fl-​egħlieqi dawl qawwi jinsab jiddi madwar grupp taʼ ragħajja. Hija l-​glorja taʼ Jehovah! U l-​anġlu taʼ Jehovah igħidilhom: “Tibżgħux, għax, ħares! qed niddikjara lilkom aħbar tajba taʼ ferħ kbir li n-​nies kollha se jkollhom, għaliex kien hemm imwieled għalihom illum Salvatur, li hu Kristu l-​Mulej, fil-​belt taʼ David. U dan huwa sinjal għalikom: intom se ssibu tarbija mfisqija u mimduda f’maxtura.” F’daqqa waħda jidhru iktar anġli u jkantaw: “Glorja lil Alla fil-​għoli fuq, u fuq l-​art paċi fost il-​bnedmin taʼ rieda tajba.”

Meta l-​anġli jitilqu, ir-​ragħajja jgħidu wieħed lill-​ieħor: “Ejjew ċertament immorru dritt lejn Betlehem u naraw din il-​ħaġa li seħħet, li Jehovah għarrfilna.” Imorru bil-​għaġla u jsibu lil Ġesù preċiż fejn l-​anġlu kien qalilhom li jsibuh. Meta r-​ragħajja jirrakkontaw dak li qalilhom l-​anġlu, dawk kollha li jisimgħu jistagħġbu. Marija żżomm u tgħożż dan kollu f’qalbha.

Ħafna nies illum jemmnu li Ġesù twieled fil-​25 taʼ Diċembru. Imma Diċembru huwa staġun kiesaħ u bix-​xita f’Betlehem. Ir-​ragħajja ma kinux ikunu barra fl-​egħlieqi matul il-​lejl bil-​merħliet tagħhom f’dak iż-​żmien tas-​sena. Ukoll, Ċesri taʼ Ruma ma tantx kien se jesiġi min-​nies li diġà kienu lesti li jirvellaw kontra tiegħu biex jagħmlu dak il-​vjaġġ fl-​eqqel tax-​xitwa biex jirreġistraw. Milli jidher Ġesù twieled f’xi żmien fil-​bidu tal-​ħarifa taʼ dik is-​sena. Luqa 2:1-20; Mikea 5:2.

▪ Ġużeppi u Marija għala jivvjaġġaw lejn Betlehem?

▪ Liema ħaġa meraviljuża tiġri fil-​lejla taʼ meta jitwieled Ġesù?

▪ Kif nafu li Ġesù ma twelidx fil-​25 taʼ Diċembru?