Ġesù Jitwieled fi Stalla

TAF min hu dan it-​tifel ċkejken? Iva, hu Ġesù. Għadu kif twieled ġo stalla. Stalla hija post fejn jinżammu l-​annimali. Marija qed tpoġġi lil Ġesù fil-​maxtura li hija l-​post fejn ikun hemm l-​ikel għall-​ħmir u annimali oħrajn biex jieklu minnha. Imma Marija u Ġużeppi għala jinsabu hawn mal-​annimali? Dan ma tantx hu post fejn titwieled tarbija, hux veru?

Le, mhuwiex. Imma huma jinsabu hawn għal din ir-​raġuni: Il-​ħakkiem taʼ Ruma, Ċesari Awgustu, għadda liġi biex kulħadd imur lura fil-​belt fejn twieled ħalli ismu jinkiteb fi ktieb. Ġużeppi twieled hawn f’Betlehem. Imma meta jaslu hu u Marija, imkien ma kien hemm kamra għalihom. Allura kellhom jiġu hawn mal-​annimali. U f’din il-​ġurnata stess Marija wildet lil Ġesù! Imma bħalma tistaʼ tara, hu jinsab tajjeb.

Qed tarahom lir-​rgħajja ġejjin biex jaraw lil Ġesù? Huma kienu fl-​għelieqi bil-​lejl jieħdu ħsieb in-​nagħaġ tagħhom, u dawl qawwi beda jiddi madwarhom. Kien anġlu! Ir-​rgħajja beżgħu ħafna. Imma l-​anġlu qalilhom: ‘Tibżgħux! Għandi aħbar tajba għalikom. Illum, f’Betlehem, twieled Kristu l-​Mulej. Hu se jeħles lin-​nies! Se ssibuh imgeżwer fid-​drapp u mimdud f’maxtura.’ F’daqqa waħda ġew ħafna anġli u bdew ifaħħru lil Alla. Għalhekk, mill-​ewwel dawn ir-​rgħajja marru jħaffu biex isibu lil Ġesù, u issa sabuh.

Taf għala Ġesù hu daqshekk speċjali? Taf min hu verament? Ftakar li fl-​ewwel storja f’dan il-​ktieb qrajna dwar l-​ewwel Iben t’Alla. Dan l-​Iben ħadem maʼ Ġeħova f’li jagħmlu s-​smewwiet u l-​art u kull ħaġa oħra. Mela, dan hu Ġesù!

Iva, Ġeħova ħa l-​ħajja t’Ibnu mis-​sema u poġġieha f’Marija. Minnufih tarbija bdiet tikber ġo fiha sewwasew bħalma jikbru trabi oħrajn ġewwa ommhom. Imma din it-​tarbija kienet Bin Alla. Fl-​aħħar Ġesù twieled hawnhekk fi stalla f’Betlehem. Tistaʼ tifhem issa għala l-​anġli kienu daqshekk ferħanin li setgħu jgħidu lin-​nies li Ġesù kien twieled?