Kapitlu 6

It-​Tfajjel tal-​Wegħda

MINFLOK ma jerġgħu lura lejn Nazzaret, Ġużeppi u Marija jibqgħu f’Betlehem. U meta Ġesù jkollu tmint ijiem, hu jiġi ċirkonċiż, skond ma tikkmanda l-​Liġi t’Alla lil Mosè. Jidher li hi wkoll id-​drawwa li tarbija tifel jingħata ismu fit-​tmien jum. Mela jsemmu lit-​tfajjel tagħhom Ġesù, bħalma kien qalilhom l-​anġlu Gabrijel iktar kmieni.

Igħaddi iktar minn xahar, u Ġesù ilu li twieled 40 jum. Fejn jeħduh issa l-​ġenituri tiegħu? Lejn it-​tempju f’Ġerusalemm, li qiegħed biss ftit mili ’l bogħod minn fejn qed joqogħdu. Skond il-​Liġi t’Alla lil Mosè, 40 jum wara li tkun welldet tifel, omm hija meħtieġa li tippreżenta offerta taʼ purifikazzjoni fit-​tempju.

Hekk tagħmel Marija. Bħala l-​offerta tagħha, hi ġġib żewġ agħsafar żgħar. Dan jikxef xi ħaġa dwar il-​qagħda ekonomika taʼ Ġużeppi u Marija. Il-​Liġi taʼ Mosè tindika li għoġol żgħir, li jiswa ħafna iktar mill-​agħsafar, għandu jiġi offrut. Imma jekk l-​omm ma tkunx tiflaħ tħallas għal dan, żewġ ħamimiet jew gamimiet kienu jkunu biżżejjed.

Fit-tempju raġel xiħ jieħu lil Ġesù fi driegħu. Dan jismu Xmun. Alla tgħarraflu li mhux se jmut qabel ikun ra lil Kristu, jew il-​Messija, imwiegħed taʼ Jehovah. Meta Xmun jiġi fit-​tempju f’dan il-​jum, hu jiġi mmexxi mill-​ispirtu qaddis lejn it-​tfajjel li ġabu Ġużeppi u Marija.

Hekk kif Xmun iżomm f’idu lil Ġesù hu jirringrazzja ’l Alla, billi jgħid: “Issa, Mulej Sovran, int qed tħalli lill-​irsir tiegħek imur ħieles fil-​paċi skond id-​dikjarazzjoni tiegħek; għaliex għajnejja raw il-​mezz tiegħek taʼ salvazzjoni li int lestejt quddiem wiċċ il-​popli kollha, dawl biex jitneħħa l-​velu mill-​ġnus u glorja tal-​poplu tiegħek Iżrael.”

Ġużeppi u Marija jistagħġbu meta jisimgħu dan. Imbagħad Xmun iberikhom u jgħid lil Marija li binha “huwa mqiegħed għall-​waqgħa u għall-​qawmien mill-​ġdid taʼ ħafna f’Iżrael” u li n-​niket, bħal sejf jaqtaʼ, se jinfed lil ruħha.

Preżenti f’din l-​okkażjoni hawn il-​profetessa taʼ 84 sena li jisimha Anna. Fil-​fatt, hi qatt ma tkun nieqsa mit-​tempju. F’dik l-​istess siegħa hi tersaq fil-​qrib u tibda tiżżi ħajr lil Alla u titkellem dwar Ġesù maʼ dawk kollha li jridu jisimgħu.

Kemm għamluhom ferħanin lil Ġużeppi u Marija dawn il-​ġrajjiet fit-​tempju! Żgur li dan kollu jikkonfermalhom li t-​tfajjel hu l-​Wieħed Imwiegħed t’Alla. Luqa 2:​21-38; Levitiku 12:​1-8.

▪ Milli jidher meta kienet id-​drawwa li jingħata isem lil tarbija tifel Iżraelit?

▪ X’kien meħtieġ minn omm Iżraelita meta binha jkollu 40 jum, u t-​twettieq taʼ din il-​ħtieġa kif juri l-​qagħda ekonomika taʼ Marija?

▪ Min jagħraf l-​identità taʼ Ġesù f’din l-​okkażjoni, u kif juru dan?