Kapitlu 10

Vjaġġi Lejn Ġerusalemm

WASLET ir-​rebbiegħa. U dan hu ż-​żmien għall-​familja taʼ Ġużeppi, flimkien mal-​ħbieb u l-​qraba, li jagħmlu l-​vjaġġ tagħhom taʼ kull sena fi żmien ir-​rebbiegħa lejn Ġerusalemm biex jiċċelebraw il-​Qbiż. Hekk kif jitilqu fuq dan il-​vjaġġ taʼ madwar 65 mil, hemm l-​eċċitament tas-​soltu. Ġesù issa għandu 12-il sena, u qed iħares ’il quddiem b’interess speċjali lejn din il-​festa.

Għal Ġesù u għall-​familja tiegħu, il-​Qbiż mhux xi affari taʼ ġurnata. Huma jibqgħu hemm għall-​Festa tal-​Ftajjar li ssir matul is-​sebat ijiem taʼ wara u li huma jqisuha bħala parti mill-​istaġun tal-​Qbiż. Bħala riżultat, il-​mawra kollha mid-​dar tagħhom ġewwa Nazzaret, li tinkludi ż-​żmien li jqattgħu f’Ġerusalemm, tieħu madwar ġimgħatejn. Imma din is-​sena, minħabba xi ħaġa li tinvolvi lil Ġesù, din tieħu iktar.

Il-problema jindunaw biha waqt li jkunu fi triqithom lura minn Ġerusalemm. Ġużeppi u Marija jaħsbu li Ġesù qiegħed mal-​grupp taʼ qraba u ħbieb li qed jivvjaġġaw flimkien. Iżda ma jsibuh imkien meta jieqfu għal-​lejl, u jmorru jfittxuh fost sħabhom tal-​vjaġġ. Ma jinstab imkien. Mela Ġużeppi u Marija jerġgħu lura t-​triq kollha lejn Ġerusalemm biex ifittxuh.

Idumu jfittxuh ġurnata sħiħa, imma mingħajr suċċess. Fit-​tieni jum jibqgħu ma jsibuhx. Sa fl-​aħħar, fit-​tielet jum, imorru sat-​tempju. Hemm, f’waħda mis-​swali, jaraw lil Ġesù bil-​qiegħda qalb il-​għalliema Lhud, jismagħhom u jistaqsihom mistoqsijiet.

“Tfajjel, għala ttrattajtna b’dan il-​mod?” tistaqsi Marija. “Hawnhekk missierek u jien b’niket mentali konna qed infittxuk.”

Ġesù jistagħġeb kif ma kinux jafu fejn isibuh. “Għala kellkom tmorru tfittxuni?” jistaqsi hu. “Ma kontux tafu li jien irrid inkun fid-​dar taʼ Missieri?”

Ġesù ma jistax jifhem għala l-​ġenituri tiegħu ma kinux jafuh dan. Imbagħad, Ġesù jerġaʼ lura d-​dar mal-​ġenituri tiegħu u jkompli jkun sottomess lejhom. Hu jkompli jikber fil-​għerf u fid-​daqs u fil-​favur t’Alla u tan-​nies. Iva, minn ċkunitu, Ġesù ħalla eżempju mill-​aħjar mhux biss f’li jfittex interessi spiritwali imma wkoll f’li juri rispett lejn il-​ġenituri tiegħu. Luqa 2:​40-52, 22:7.

▪ Ġesù liema vjaġġ taʼ żmien ir-​rebbiegħa jagħmel regolarment flimkien mal-​familja tiegħu, u kemm hu twil?

▪ X’jiġri matul il-​vjaġġ meta Ġesù għandu 12-il sena?

▪ Liema eżempju jħalli Ġesù għaż-​żgħażagħ tal-​lum?