Kapitlu 32

X’Inhu Legali f’Jum is-​Sibt?

HUWA f’jum ieħor tas-​Sibt li Ġesù jżur sinagoga ħdejn il-​Baħar tal-​Galilija. Preżenti hemm raġel b’idu l-​leminija ċċongata. L-​iskribi u l-​Fariżej qegħdin iħarsu bir-​reqqa biex jaraw jekk Ġesù kienx se jfejqu. Fl-​aħħar jistaqsuh: “Huwa legali li tfejjaq f’jum is-​sibt?”

Il-mexxejja reliġjużi Lhud jemmnu li l-​fejqan f’jum is-​Sibt huwa legali biss jekk hemm il-​ħajja fil-​periklu. Huma jgħallmu, per eżempju, li mhux legali li tpoġġi għadma f’lokha jew li tinfaxxa xi tbenġila. Mela l-​iskribi u l-​Fariżej qed jinterrogaw lil Ġesù fi sforz biex isibu fiex jakkużawh.

Ġesù, madankollu, jaf l-​irraġunar tagħhom. Fl-​istess ħin, hu jirrealizza li huma adottaw fehma estrema u li mhix Skritturali rigward x’jikkostitwixxi ksur tal-​ħtieġa li wieħed jieqaf mix-​xogħol f’jum is-​Sibt. B’hekk Ġesù jlesti x-​xena għal konfrontazzjoni drammatika billi jgħid lir-​raġel b’idu ċċongata: “Qum u ejja fin-​nofs.”

Issa, waqt li jdur lejn l-​iskribi u l-​Fariżej, Ġesù jgħid: “Min se jkun il-​bniedem fostkom li għandu nagħġa waħda u, jekk din taqaʼ ġewwa ħofra f’jum is-​sibt, mhux se jaqbadha u jerfagħha ’l barra?” Peress li n-​ngħaġ jirrappreżentaw investiment finanzjarju, ma kinux se jħalluha fil-​ħofra sal-​għada, li ma tmurx timrad u huma jġarrbu telfa. Minbarra hekk, l-​Iskrittura tgħid: “It-​twajjeb qed jieħu ħsieb ruħ l-​annimal domestiku tiegħu.”

Biex jagħmel paragun, Ġesù jissokta: “Meta tqis kollox, kemm iktar jiswa bniedem minn nagħġa! Mela huwa legali li tagħmel xi ħaġa mill-​aħjar f’jum is-​sibt.” Il-​mexxejja reliġjużi ma jistgħux jiċħdu raġunar loġiku u ħanin bħal dan, u jibqgħu siekta.

B’għadab taʼ stmerrija, u fl-​istess ħin imnikket bl-​istupidaġni stinata tagħhom, Ġesù jħares ħarsa madwaru. Imbagħad igħid lir-​raġel: “Iġbed idek ’il barra.” U hu jġebbidha u idu tfiq.

Minflok ma jifirħu li id ir-​raġel fiqitlu, il-​Fariżej joħorġu u immedjatament jibdew jikkonfoffaw mal-​partitarji taʼ Erodi biex joqtlu lil Ġesù. Dan il-​partit politiku mid-​dehra jinkludi lil xi membri tas-​Sadduċej reliġjużi. Is-​soltu, dan il-​partit politiku u l-​Fariżej ma jarawx għajn m’għajn, imma jinsabu magħqudin fis-​sod fl-​oppożizzjoni tagħhom lejn Ġesù. Mattew 12:​9-14; Mark 3:​1-6; Luqa 6:​6-11; Proverbji 12:10; Eżodu 20:​8-10.

▪ X’inhi x-​xena għal konfrontazzjoni drammatika bejn Ġesù u l-​mexxejja reliġjużi Lhud?

▪ Dawn il-​mexxejja reliġjużi Lhud x’jemmnu rigward il-​fejqan f’jum is-​Sibt?

▪ Liema tixbieha juża Ġesù biex jargumenta kontra l-​fehmiet ħżiena tagħhom?