Kapitlu 113

Umiltà fl-​Aħħar Qbiż

PIETRU u Ġwanni, taħt struzzjonijiet mingħand Ġesù, diġà waslu f’Ġerusalemm biex iħejju għall-​Festa tal-​Qbiż. Mid-​dehra, Ġesù flimkien mal-​għaxar appostli oħra, jasal iżjed tard wara nofs in-​nhar. Ix-​xemx qed tinħeba wara x-​xefaq hekk kif Ġesù u l-​ġemgħa tiegħu jinżlu mill-​Muntanja taż-​Żebbuġ. Din hi l-​aħħar darba li Ġesù se jara l-​belt fid-​dawl tax-​xemx minn din il-​muntanja sa wara l-​irxoxt tiegħu.

Malajr Ġesù u l-​ġemgħa tiegħu jaslu fil-​belt u jerħulha lejn id-​dar fejn se jiċċelebraw il-​Qbiż. Jitilgħu t-​taraġ għall-​kamra kbira taʼ fuq, fejn isibu kollox imħejji għaċ-​ċelebrazzjoni privata tagħhom tal-​Qbiż. Ġesù ħares ’il quddiem lejn din l-​​okkażjoni, bħalma jgħid hu: “Kelli xewqa kbira li niekol dan il-​qbiż magħkom qabel ma nsofri.”

Bi tradizzjoni, erbaʼ kisijiet inbid jinxtorbu mill-​parteċipanti tal-​Qbiż. Wara li jaċċetta dak li milli jidher hu t-​tielet kies, Ġesù jiżżi ħajr u jgħid: “Ħudu dan u għadduh minn wieħed għall-​ieħor bejnietkom; għax ingħidilkom, Minn issa ’l quddiem mhux se nerġaʼ nixrob mill-​prodott tad-​dielja sakemm tasal is-​saltna t’Alla.”

F’xi ħin meta l-​ikla kienet għadha għaddejja, Ġesù jqum, ineħħi ħwejġu taʼ fuq, jieħu xugaman, u jimla friskatur bl-​ilma. Ordinarjament, dak li jkun stieden kien jara li riġlejn il-​mistieden jiġu maħsulin. Imma minħabba li f’din l-​okkażjoni m’hemmx dak li jistieden, Ġesù jieħu ħsieb dan is-​servizz persunali. Kwalunkwe wieħed mill-​appostli setaʼ jaħtaf l-​opportunità biex jagħmel dan; iżda, mid-​dehra għax għad fadal xi pika bejniethom, ħadd ma jagħmel dan. Issa jinsabu mbarazzati hekk kif Ġesù jibda jaħslilhom riġlejhom.

Meta Ġesù jiġi għandu, Pietru jipprotesta: “Żgur li qatt ma se taħsilli saqajja.”

“Jekk ma naħslekx, int ma għandek l-​ebda parti miegħi,” jgħid Ġesù.

“Mulej,” iwieġeb Pietru, “mhux saqajja biss, imma wkoll idejja u rasi.”

“Min inħasel,” iwieġeb Ġesù, “m’hemmx għalfejn jinħasillu ħlief saqajh, imma hu nadif kollu kemm hu. U intom indaf, imma mhux ilkoll.” Hu jgħid dan għax jaf li Ġuda l-​Iskarjota qed iħejji biex jittradih.

Meta Ġesù jkun ħasel riġlejn it-​12 li kienu, inkluż riġlejn dak li kien se jittradih, Ġuda, hu jerġaʼ jilbes ħwejġu taʼ fuq u jerġaʼ jmil mal-​mejda. Imbagħad jistaqsi: “Tafu x’għamiltilkom? Intom tindirizzawni, ‘Għalliem,’ u, ‘Mulej,’ u sewwa tgħidu, għax hekk jien. Għalhekk, jekk jien, għalkemm Mulej u Għalliem, ħsilt saqajkom, intom ukoll għandkom taħslu saqajn xulxin. Għax qigħedtilkom ix-​xempju, biex, bħalma għamiltilkom jien, intom għandkom tagħmlu wkoll. Verissmu ngħidilkom, Irsir mhux akbar minn sidu, lanqas ma hu wieħed mibgħut akbar minn dak li bagħtu. Jekk tafu dawn l-​affarijiet, henjin intom jekk tagħmluhom.”

X’tagħlima sabiħa taʼ servizz umli! L-​appostli m’għandhomx joqogħdu jfittxu l-​ewwel post, jaħsbu li tant huma importanti li oħrajn għandhom dejjem jaqdu lilhom. Jeħtiġilhom jimxu wara x-​xempju mwaqqaf minn Ġesù. Dan mhux wieħed taʼ ħasil ir-​riġlejn ritwali. Le, imma wieħed taʼ rieda li taqdi bla parzjalità, hi kemm hi umli jew spjaċevoli l-​biċċa xogħol. Mattew 26:​20, 21; Mark 14:​17, 18; Luqa 22:​14-18; 7:44; Ġwann 13:​1-17.

▪ X’inhu uniku dwar id-​dehra li Ġesù għandu taʼ Ġerusalemm hekk kif jidħol fil-​belt biex jiċċelebra l-​Qbiż?

▪ Matul il-​Qbiż, b’mod evidenti liema kies igħaddi Ġesù lit-​12-il appostlu wara li jgħid talba?

▪ Liema servizz persunali kien jiġi pprovdut bħala drawwa lill-​mistednin meta Ġesù kien fuq l-​art, u għala ma kienx ġie pprovdut matul il-​Qbiż iċċelebrat minn Ġesù u l-​appostli?

▪ X’kien il-​għan taʼ Ġesù f’li jwettaq is-​servizz baxx taʼ li jaħsel saqajn l-​appostli tiegħu?