Kapitlu 118

Tradiment u Arrest

NOFS il-​lejl għadda sewwa hekk kif Ġuda jieħu warajh folla kbira taʼ suldati, qassisin ewlenin, Fariżej, u oħrajn ġewwa l-​ġnien taʼ Ġetsemani. Il-​qassisin qablu li jħallsu 30 biċċa tal-​fidda lil Ġuda biex jittradixxi lil Ġesù.

Iktar kmieni, meta Ġuda ġie mibgħut mill-​ikla tal-​Qbiż, hu jidher li mar dritt għand il-​qassisin ewlenin. Dawn minnufih ġemgħu lill-​uffiċjali tagħhom stess, kif ukoll ġemgħa taʼ suldati. Ġuda forsi kien ħadhom l-​ewwel lejn fejn Ġesù u l-​appostli tiegħu kienu ċċelebraw il-​Qbiż. Billi skoprew li kienu telqu minn hemm, il-​folla kbira li kienet qed iġġorr armi u lampi u torċi segwiet lil Ġuda ’l barra minn Ġerusalemm u qasmet il-​Wied taʼ Kidron.

Hekk kif Ġuda jmexxi l-​purċissjoni ’l fuq mal-​Muntanja taż-​Żebbuġ, hu jħossu ċert li jaf fejn isib lil Ġesù. Matul l-​aħħar ġimgħa, hekk kif Ġesù u l-​appostli vvjaġġaw ’il quddiem u lura bejn Betanja u Ġerusalemm, huma spiss waqfu fil-​ġnien taʼ Ġetsemani biex jistrieħu u joqogħdu jitkellmu. Imma, issa, b’Ġesù x’aktarx moħbi fid-​dlam taħt is-​siġar taż-​żebbuġ, is-​suldati kif se jidentifikawh? Huma forsi qatt ma kienu rawh qabel. Għalhekk Ġuda jipprovdi sinjal, billi jgħid: “Hu min hu li jien inbus, dan hu; arrestawh u ħuduh ’il hemm mingħajr inkwiet.”

Ġuda jieħu lill-​folla kbira ġewwa l-​ġnien, jara lil Ġesù mal-​appostli tiegħu, u jmur dritt fuqu. “Il-​jum it-​tajjeb, Rabbi!” hu jgħid u jbusu b’mod teneru ferm.

“Sieħeb, għal liema għan tinsab preżenti?” jistaqsi Ġesù. Imbagħad, billi jwieġeb il-​mistoqsija tiegħu stess, hu jgħid: “Ġuda, int tittradixxi lil Bin il-​bniedem b’bewsa?” Imma biżżejjed dwar it-​traditur tiegħu! Ġesù jagħmel pass ’il quddiem u jiġi fid-​dawl tat-​torċi u l-​lampi mixgħulin u jistaqsi: “Lil min qegħdin tfittxu?”

“Lil Ġesù n-​Nazzarenu,” tiġi t-​tweġiba.

“Jien hu,” Ġesù jwieġeb, hekk kif jieqaf bil-​kuraġġ quddiemhom ilkoll. Imbellhin bil-​qlubija tiegħu u billi ma jafux x’jistennew, l-​irġiel jirtiraw lura u jaqgħu fl-​art.

“Għedtilkom li jien hu,” Ġesù jkompli bil-​kalma. “Jekk, għalhekk, huwa lili li qegħdin tfittxu, ħallu lil dawn imorru.” Ftit qabel fil-​kamra taʼ fuq, Ġesù kien qal lil Missieru fit-​talb li hu kien żamm lill-​appostli lejali tiegħu u lanqas wieħed minnhom ma kien mitluf “ħlief bin il-​qerda.” Mela, sabiex il-​kelma tiegħu tistaʼ tiġi mwettqa, hu jitlob li s-​segwaċi tiegħu jitħallew imorru.

Hekk kif is-​suldati jerġgħu jiġu f’tagħhom, iqumu bil-​wieqfa, u jibdew jorbtu lil Ġesù, l-​appostli jindunaw x’se jiġri dalwaqt. “Mulej, se nagħtu bis-​sejf?” jistaqsu huma. Qabel ma jwieġeb Ġesù, Pietru, billi jxejjer wieħed miż-​żewġt isjuf li l-​appostli ġabu, jattakka lil Malkus, irsir tal-​qassis il-​kbir. Id-​daqqa taʼ Pietru ma tolqotx ras l-​irsir imma taqtaʼ l-​widna tal-​lemin tiegħu.

“Ħa tasal s’hawn,” igħid Ġesù hekk kif jintervjeni. Billi jmiss il-​widna taʼ Malkus, hu jfejjaq il-​ferita. Imbagħad igħallem lezzjoni importanti, billi jikkmanda lil Pietru: “Reġġaʼ lura s-​sejf tiegħek f’postu, għax dawk kollha li jieħdu s-​sejf se jgħibu bis-​sejf. Jew taħseb int li ma nistax nappella lil Missieri biex ifornini f’dan il-​mument b’iktar minn tnax-il leġjun taʼ anġli?”

Ġesù lest li jiġi arrestat, għax hu jispjega: “Kif isseħħ l-​Iskrittura li għandu jiġri b’dan il-​mod?” U jżid: “Il-​kies li tani l-​Missier, m’għandix jien tabilħaqq nixorbu?” Hu qiegħed fi qbil sħiħ mar-​rieda t’Alla għalih!

Imbagħad Ġesù jindirizza lill-​folla. “Ħriġtu intom bis-​sjuf u l-​lembubi bħal li kieku kontra xi ħalliel biex tarrestawni?” jistaqsi hu. “Jum wara jum kont noqgħod bil-​qiegħda fit-​tempju ngħallem, u b’dan kollu ma ħadtunix taħt idejkom. Imma dan kollu ġara għall-​iskritturi tal-​profeti biex jitwettqu.”

Għal dan, il-​ġemgħa taʼ suldati u l-​kmandant militari u l-​uffiċjali tal-​Lhud jaħtfu lil Ġesù u jorbtuh. Malli jaraw dan, l-​appostli jabbandunaw lil Ġesù u jaħarbu. Madankollu, raġel żagħżugħ​—forsi hu d-​dixxiplu Mark​—jibqaʼ qalb il-​folla. Forsi kien fid-​dar fejn Ġesù ċċelebra l-​Qbiż u wara segwa lill-​folla minn hemmhekk. Issa, madankollu, jagħrfuh, u jsir attentat biex jaħtfuh. Imma hu jħalli warajh il-​libsa tal-​għażel tiegħu u jaħrab. Mattew 26:​47-56; Mark 14:​43-52; Luqa 22:​47-53; Ġwann 17:12; 18:​3-12.

▪ Ġuda għala jħossu ċert li se jsib lil Ġesù fil-​ġnien taʼ Ġetsemani?

▪ Ġesù kif juri tħassib għall-​appostli tiegħu?

▪ Pietru x’azzjoni jieħu biex jiddefendi lil Ġesù, imma Ġesù x’igħidlu lil Pietru dwar dan?

▪ Ġesù kif jirrivela li hu fi qbil sħiħ mar-​rieda t’Alla għalih?

▪ Meta l-​appostli jabbandunaw lil Ġesù, min jibqaʼ, u x’jiġrilu?