Twissija mill-Passat

Jehovah mhux se jippermetti li n-​nies il-​ħżiena jirrovinaw il-​Ġenna ta’ l-​art. Il-​ħbieb tiegħu biss se jgħixu hemmhekk. X’se jiġrilhom in-​nies il-​ħżiena? Biex tkun taf it-​tweġiba, ikkunsidra l-​istorja vera ta’ Noè. Noè għex eluf ta’ snin ilu. Kien raġel tajjeb li dejjem stinka biex jagħmel ir-​rieda ta’ Jehovah. Imma n-​nies l-​oħra fuq l-​art kienu jagħmlu affarijiet ħżiena. Għalhekk, Jehovah qal lil Noè li Hu kien se jġib dilluvju biex jeqred lin-​nies mill-​agħar kollha. Qal lil Noè biex jibni arka sabiex hu u l-​familja tiegħu ma jmutux meta jiġi d-​Dilluvju.—Ġenesi 6:9-18.

Noè u l-​familja tiegħu bnew l-​arka. Noè wissa lin-​nies li kien ġej id-​Dilluvju, imma dawn ma tawhx widen. Huma baqgħu jagħmlu affarijiet ħżiena. Wara li l-​arka tlestiet, Noè daħħal l-​annimali fiha, u hu u l-​familja tiegħu daħlu wkoll. Imbagħad Jehovah ġab maltempata kbira. Ix-​xita damet nieżla għal 40 jum u 40 lejl. L-​ilma għarraq l-​art kollha.—Ġenesi 7:7-12.

In-​nies mill-​agħar tilfu ħajjithom, imma Noè u l-​familja tiegħu salvaw. Jehovah salvahom mid-​Dilluvju biex jgħixu f’art imnaddfa mill-​ħażen. (Ġenesi 7:22, 23) Il-​Bibbja tgħid li għal darb’oħra se jiġi ż-​żmien meta Jehovah se jeqred lil dawk li jirrifjutaw li jagħmlu t-​tajjeb. In-​nies tajbin mhux se jinqerdu. Se jgħixu għal dejjem fuq l-​art magħmula Ġenna.—2 Pietru 2:5, 6, 9.

Illum ħafna nies jagħmlu affarijiet ħżiena. Id-​dinja mimlija inkwiet. Jehovah jibgħat lix-​Xhieda tiegħu darba wara l-​oħra biex iwissu lin-​nies, iżda l-​biċċa l-​kbira minnhom ma jridux jagħtu widen għall-​kliem tiegħu. Ma jridux ibiddlu l-​mogħdijiet tagħhom. Ma jridux jaċċettaw dak li jgħid Alla dwar it-​tajjeb u l-​ħażin. X’se jiġrilhom dawn in-​nies? Se jinbidlu xi darba? Ħafna minnhom qatt ma se jinbidlu. Ġej iż-​żmien meta n-​nies mill-​agħar se jinqerdu u qatt ma se jerġgħu jgħixu.—Salm 92:8 [92:7, NW].

L-​art mhux se tinqered; se tintgħamel ġenna. Il-​ħbieb t’Alla se jgħixu għal dejjem fil-​Ġenna ta’ l-​art.—Salm 37:29.