Agħmel Ħiltek fil-​Qari

L-​ANNIMALI ma jistgħux jagħmlu dak li qed tagħmel int bħalissa. Wieħed minn kull sitt bnedmin ma tgħallimx jaqra—spiss minħabba nuqqas taʼ opportunità biex jattendi l-​iskola—u minn dawk li tgħallmu, ħafna ma jagħmlux dan regolarment. Però, l-​abbiltà tiegħek li taqra l-​paġna stampata tippermettilek li b’dan il-​mezz tivvjaġġa lejn pajjiżi oħrajn, tiltaqaʼ maʼ nies li l-​ħajjiet tagħhom jistgħu jsebbħu lil tiegħek, u tikseb għarfien prattiku li se jgħinek tkampa mal-​inkwiet tal-​ħajja.

L-​abbiltà tal-​qari teffettwa kemm jibbenefika żagħżugħ mill-​edukazzjoni tiegħu fl-​iskola. Meta jfittex impjieg, l-​abbiltà tiegħu biex jaqra tistaʼ tinfluwenza t-​tip taʼ xogħol li jistaʼ jsib u l-​ammont taʼ sigħat li jrid jaħdem biex jaqlaʼ l-​għajxien. In-​nisa tad-​dar li jaqraw tajjeb jistgħu jieħdu ħsieb il-​familji tagħhom aħjar fejn jidħlu n-​nutriment xieraq, l-​iġjene, u l-​prevenzjoni tal-​mard. L-​ommijiet li jaqraw tajjeb jistgħu wkoll ikollhom influwenza pożittiva ħafna fuq l-​iżvilupp intellettwali taʼ wliedhom.

M’għandniex xi ngħidu, l-​aqwa benefiċċju li jiġi mill-​qari hu li jippermettilek “issib l-​għarfien t’Alla.” (Prov. 2:5) Ħafna mill-​modi kif naqdu lil Alla jinvolvu l-​abbiltà li naqraw. L-​Iskrittura u l-​pubblikazzjonijiet ibbażati fuq il-​Bibbja jinqraw fil-​laqgħat tal-​kongregazzjoni. L-​effettività tiegħek fil-​ministeru tal-​għalqa tiddependi bil-​kbir mill-​mod kif taqra. U l-​preparazzjoni għal dawn l-​attivitajiet tinvolvi l-​qari. Għal din ir-​raġuni, il-​progress spiritwali tiegħek jiddependi ħafna mid-​drawwiet tal-​qari tiegħek.

Uża Sew l-​Opportunità

Xi wħud li qed jitgħallmu l-​mogħdijiet taʼ Alla għandhom edukazzjoni limitata. Jistaʼ jkollhom il-​bżonn li jiġu mgħallmin jaqraw sabiex itejbu l-​progress spiritwali tagħhom. Jew għandhom mnejn jeħtieġu għajnuna persunali biex itejbu l-​abbiltà tal-​qari tagħhom. Fejn ikun hemm bżonn lokali, il-​kongregazzjonijiet jistinkaw biex jorganizzaw klassijiet għall-​qari u l-​kitba. Ħafna eluf ibbenefikaw bil-​kbir minn dan il-​provvediment. Minħabba l-​importanza li wieħed ikun jaf jaqra sew, xi kongregazzjonijiet jorganizzaw klassijiet biex itejbu l-​qari, u dawn isiru b’konnessjoni mal-​Iskola tal-​Ministeru Teokratiku. Anki fejn klassijiet bħal dawn ma jkunux disponibbli, individwu jistaʼ jagħmel ħafna progress billi jieħu ftit ħin kuljum biex jaqra b’leħen għoli u billi jattendi l-​iskola u jieħu sehem regolarment fiha.

B’sogħba, il-​komiks u t-​televixin, fost affarijiet oħrajn, ġiegħlu lil ħafna nies iwarrbu l-​qari minn ħajjithom. Il-​ħin quddiem it-​televixin u l-​qari limitat jistgħu jfixklu l-​iżvilupp tal-​abbiltà tal-​qari tal-​individwu u l-​abbiltà tiegħu li jaħseb u jirraġuna b’mod ċar u jesprimi ruħu sew.

“L-​ilsir leali u għaqli” jipprovdi pubblikazzjonijiet li jgħinuna nifhmu l-​Bibbja. Dawn jagħmlulna disponibbli abbundanza taʼ informazzjoni dwar kwistjonijiet spiritwali vitali. (Mt. 24:45; 1 Kor. 2:12, 13) Ukoll, iżommuna informati dwar żviluppi dinjin importanti u t-​tifsir tagħhom, jgħinuna nsiru iktar midħla tan-​natura, u jgħallmuna modi kif inkampaw maʼ kwistjonijiet li jikkonċernawna. Fuq kollox, jiffokaw fuq kif nistgħu naqdu lil Alla b’mod aċċettabbli u niksbu l-​approvazzjoni tiegħu. Qari li jibni bħal dan se jgħinek tiżviluppa bħala persuna spiritwali.

M’għandniex xi ngħidu, l-​abbiltà li naqraw sew mhijiex xi virtù fiha nfisha. L-​abbiltà trid tintuża b’mod xieraq. Bħal fil-​każ tal-​ikel, anki fil-​qari trid tkun selettiv. Għala għandek tiekol ikel li ma joffri ebda nutriment jew li saħansitra jistaʼ jivvelenak? Bl-​istess mod, għala għandek taqra materjal, anki bla ħsieb, li jistaʼ jħassarlek moħħok u qalbek? Il-​prinċipji Bibliċi għandhom jipprovdu l-​livell li nużaw biex niddeċiedu jekk għandniex naqraw ċertu materjal. Qabel ma tiddeċiedi x’se taqra, żomm f’moħħok skritturi bħal Ekkleżjasti 12:12, 13; Efesin 4:22-​24; 5:3, 4; Filippin 4:8; Kolossin 2:8; l-​1 Ġwanni 2:15-​17; u t-​2 Ġwanni 10.

Aqra b’Motiv Xieraq

L-​importanza taʼ motiv xieraq fil-​qari tidher b’mod ċar meta jiġu eżaminati r-​rakkonti tal-​Evanġelju. Pereżempju, fl-​Evanġelju taʼ Mattew insibu lil Ġesù jistaqsi lill-​mexxejja reliġjużi li kienu midħla sew tal-​Iskrittura mistoqsijiet bħal “Ma qrajtux?” u “Qatt ma qrajtuh dan?” qabel ma tahom tweġibiet Skritturali għall-​mistoqsijiet makakki tagħhom. (Mt. 12:3, 5; 19:4; 21:16, 42; 22:31) Tagħlima waħda li nieħdu minn dan hi li jekk il-​motiv tagħna għall-​qari ma jkunx xieraq, nistgħu naslu għal konklużjonijiet żbaljati jew ma nifhmux il-​punt għalkollox. Il-​Fariżej kienu qed jaqraw l-​Iskrittura għax ħasbu li permezz tagħha kienu se jiksbu l-​ħajja taʼ dejjem. Dan il-​premju, bħalma wriehom Ġesù, ma jingħatax lil dawk li ma jħobbux lil Alla u li ma jaċċettawx il-​mezz Tiegħu taʼ salvazzjoni. (Ġw. 5:39-​43) L-​intenzjonijiet tal-​Fariżej kienu egoistiċi; għalhekk, ħafna mill-​konklużjonijiet tagħhom kienu żbaljati.

L-​imħabba għal Ġeħova hi l-​iktar motiv pur li jistaʼ jkollna sabiex naqraw il-​Kelma tiegħu. Din l-​imħabba tqanqalna nitgħallmu r-​rieda taʼ Alla, għax l-​imħabba “tithenna bil-​verità.” (1 Kor. 13:6) Anki jekk fil-​passat ma konniex nieħdu gost naqraw, minħabba li nħobbu lil Ġeħova ‘b’moħħna kollu’ niġu mqanqlin nagħmlu ħilitna kollha mentalment biex nieħdu l-​għarfien taʼ Alla. (Mt. 22:37) L-​imħabba tqanqal l-​interess, u l-​interess iqanqalna nitgħallmu.

Ikkunsidra l-​Pass

Il-​qari jmur id f’id mal-​għarfien. Anki bħalissa, int u taqra qed tagħraf il-​kliem u tiftakar it-​tifsir tiegħu. Tistaʼ żżid il-​pass tat-​tagħlim tiegħek jekk tkabbar l-​għarfien tiegħek. Minflok ma tieqaf f’kull kelma, ipprova ħares lejn ammont taʼ kliem kull darba. Hekk kif tiżviluppa din l-​abbiltà, se ssib li tibda tifhem iktar aħjar dak li tkun qed taqra.

Madankollu, meta taqra materjal iktar profond dak li tikseb mill-​isforzi tiegħek jistaʼ jiżdied billi tuża metodu differenti. Meta ta parir lil Ġożwè dwar il-​qari tiegħu tal-​Iskrittura, Ġeħova qal: “Dan il-​ktieb tal-​liġi m’għandux jitbiegħed minn fommok, u trid taqrah u timmedita fuqu [jew, “u trid taqra minn taħt l-​ilsien”].” (Ġoż. 1:8, nota taʼ taħt) Ġeneralment nitkellmu minn taħt l-​ilsien meta nkunu qed nirriflettu. Għalhekk, it-​terminu Ebrajk li jiġi tradott “taqra minn taħt l-​ilsien” jiġi tradott ukoll ‘timmedita.’ (Salm 63:6; 77:12; 143:5) Meta jkun qed jimmedita, individwu jaħseb fil-​fond; ma jgħaġġilx. Jekk noqogħdu nikkontemplaw meta naqraw, inħallu l-​Kelma taʼ Alla jkollha effett iktar qawwi fuq moħħna u qalbna. Il-​Bibbja fiha profeziji, pariri, proverbji, poeżiji, dikjarazzjonijiet taʼ ġudizzju divin, dettalji dwar l-​iskop taʼ Ġeħova, u abbundanza taʼ eżempji reali—ilkoll taʼ valur għal dawk li jridu jimxu fil-​mogħdijiet taʼ Ġeħova. Kemm hu taʼ benefiċċju li naqraw il-​Bibbja b’tali mod li jippermetti li titnaqqax sew f’moħħna u f’qalbna!

Tgħallem Ikkonċentra

Int u taqra, poġġi lilek innifsek f’kull xena li tiġi deskritta. Ipprova ara l-​karattri fl-​immaġinazzjoni tiegħek, u immaġina s-​sentimenti involuti fl-​esperjenzi li jseħħu f’ħajjithom. Dan mhuwiex diffiċli meta taqra xi rakkont bħal dak dwar David u Gulija, imniżżel fl-​1 Samwel kapitlu 17. Imma anki d-​dettalji f’Eżodu u Levitiku dwar il-​bini tat-​tabernaklu jew il-​ħatra tas-​saċerdozju se jsiru iktar reali meta timmaġina l-​qisien u l-​materjali jew timmaġina r-​riħa tal-​inċens, il-​qmuħ inkaljati, u l-​annimali jiġu preżentati bħala offerti tal-​ħruq. Aħseb dwar kemm setaʼ kien tal-​għaġeb li wieħed iwettaq is-​servizzi taʼ qassis! (Lq. 1:8-​10) Jekk tinvolvi s-​sensi u l-​emozzjonijiet tiegħek b’dan il-​mod tiġi megħjun tifhem is-​sinifikat taʼ dak li tkun qed taqra u dan iservi bħala għajnuna għall-​memorja tiegħek.

Imma jekk ma toqgħodx attent, meta tipprova taqra, jistaʼ jkun li tibda taljena rasek. Għajnejk jibdew iħarsu lejn il-​paġna, imma moħħok ikun band’oħra. Hemm il-​mużika? It-​televixin mixgħul? Qed jitkellmu l-​membri tal-​familja? Jekk inhu possibbli, ikun aħjar li taqra f’post għall-​kwiet. Madankollu, jistaʼ jkun li t-​tfixkil toħolqu int stess. Forsi kellek ġurnata mimlija. M’għandniex xi ngħidu, huwa tassew faċli li toqgħod taħseb dwar l-​attivitajiet tal-​ġurnata! Żgur li huwa tajjeb li tirrivedi l-​ġrajjiet tal-​ġurnata—imma mhux meta tkun qed taqra. Forsi tibda billi jkollok moħħok iffokat, jew inkella tistaʼ saħansitra tgħid talba qabel tibda taqra. Imma mbagħad, int u taqra moħħok jibda jmur band’oħra. Erġaʼ pprova. Iddixxiplina lilek innifsek biex iżżomm moħħok iffokat fuq il-​materjal li tkun qed taqra. Bil-​mod il-​mod, se tara li qed titjieb.

X’tagħmel jekk issib kelma li ma tifhimhiex? Xi kliem mhux familjari jistaʼ jkun spjegat jew diskuss fl-​artiklu. Jew forsi tkun tistaʼ tifhem it-​tifsir mill-​kuntest. Jekk le, ħu l-​ħin biex tfittex il-​kelma f’dizzjunarju jekk ikollok wieħed, jew immarka l-​kelma ħalli iktar tard tistaqsi lil xi ħadd xi tfisser. Dan se jkabbar il-​vokabolarju tiegħek u jgħinek tifhem dak li taqra.

Qari fil-​Pubbliku

Meta l-​appostlu Pawlu qal lil Timotju biex ikompli jagħti ruħu għall-​qari, Pawlu kien qed jirreferi b’mod speċifiku għall-​qari għall-​benefiċċju taʼ oħrajn. (1 Tim. 4:13) Qari pubbliku effettiv jinvolvi iktar milli sempliċement taqra l-​kliem minn paġna. Il-​qarrej irid jifhem it-​tifsir tal-​kliem u jagħraf il-​ħsibijiet li jesprimi. Huwa biss meta jagħmel hekk li jistaʼ jwassal il-​ħsibijiet b’mod korrett u jerġaʼ jipproduċi l-​emozzjonijiet b’eżattezza. M’għandniex xi ngħidu, dan jeħtieġ il-​preparazzjoni u l-​prattika. Għalhekk, l-​appostlu Pawlu ħeġġeġ: “Kompli agħti ruħek għall-​qari pubbliku.” Se tirċievi taħriġ taʼ valur f’din l-​abbiltà fl-​Iskola tal-​Ministeru Teokratiku.

Agħmel il-​Ħin għall-​Qari

“Il-​pjanijiet tal-​ħabrieki żgur li jkunu taʼ vantaġġ għalih, imma kulmin jgħaġġel żgur li jiġi fil-​bżonn.” (Prov. 21:5) Kemm hu minnu dan meta niġu għax-​xewqa tagħna li naqraw! Biex ikun taʼ “vantaġġ” għalina, irridu nippjanaw b’mod ħabrieki ħalli attivitajiet oħrajn ma jiħdux post il-​qari tagħna.

Meta taqra? Tibbenefika meta taqra kmieni filgħodu? Jew tkun iżjed attent iktar tard fil-​ġurnata? Anki jekk twarrab 15 jew 20 minuta kuljum biex tagħmel ftit qari, tiskanta kemm jirnexxilek taqra. Huwa importanti li tkun regulari.

Ġeħova għala għażel li l-​iskopijiet grandjużi tiegħu jinkitbu fi ktieb? Ħalli n-​nies ikunu jistgħu jduru għall-​Kelma miktuba tiegħu. Dan jippermettilhom jikkunsidraw l-​għemejjel tal-​għaġeb taʼ Ġeħova, jgħidu lil uliedhom dwarhom, u jibqgħu jiftakru x’għamel Alla. (Salm 78:5-​7) L-​apprezzament tagħna għall-​ġenerożità taʼ Ġeħova f’din il-​kwistjoni jintwera l-​iżjed mill-​mod kif nagħmlu ħilitna biex naqraw il-​Kelma tiegħu li tagħti l-​ħajja.