Għallem lil Dawk li Ma Tantx Jafu Jaqraw

1. Liema sfida jistaʼ jkollna fil-​ministeru?

¹ Waqt li nieħdu sehem fil-​ministeru tagħna, aħna kultant ikollna l-​isfida li ngħallmu l-​verità lil nies li jsibuha diffiċli biex jaqraw. X’nistgħu nagħmlu?

2. Kif u għala nuru rispett lejn min ma tantx jaf jaqra?

² Irrispetta d-​Dinjità Tagħhom: Għal Ġeħova hija importanti l-​kundizzjoni tal-​qalb taʼ l-​individwu, mhux l-​edukazzjoni sekulari tiegħu. (1 Sam. 16:7; Prov. 21:2) Għalhekk, lil dawk li ma tantx jafu jaqraw ma nqisuhomx bħala li huma inferjuri. Uħud bħal dawn x’aktarx li se jkunu iktar lesti li jaċċettaw l-​għajnuna tagħna meta nuruhom rispett u paċenzja. (1 Pt. 3:15) Dan jistaʼ jinvolvi li ma ninsistux li l-​individwu jaqra xi vers jew paragrafu. Hekk kif individwu jagħmel progress f’li jitgħallem veritajiet Bibliċi prezzjużi, hu għandu mnejn isir iktar ħerqan biex itejjeb l-​abbiltà tiegħu tal-​qari ħalli jesperjenza l-​ferħ li jiġi mill-​qari tal-​Kelma t’Alla u ‘l-​meditazzjoni [jew, il-​qari minn taħt l-​ilsien] lejl u nhar.’—Salm 1:2, 3.

3. Liema metodi taʼ tagħlim jistgħu jintużaw biex ngħallmu lil dawk li ma tantx jafu jaqraw?

³ Metodi taʼ Tagħlim fuq Studji tal-​Bibbja: L-​istampi huma għodda eċċellenti għat-​tagħlim u l-​memorja. Għandek mnejn tistaqsi lill-​istudent x’josserva hu dwar xi stampa fil-​pubblikazzjoni li tkun qed tuża. Imbagħad uża mistoqsijiet speċifiċi biex tgħinu jifhem x’tgħallem l-​istampa. Uża l-​iskritturi li jgħallmu ċerti punti li trid tenfasizza mill-​istampa. L-​istampi jistgħu jintużaw ukoll biex tiġi riveduta l-​lezzjoni. Tgħaddix wisq materjal f’daqqa. Enfasizza t-​tema u l-​punti prinċipali tal-​lezzjoni, u evita li tiddiskuti punti li m’humiex fil-​materjal. Aqra l-​iskritturi direttament mill-​Bibbja, u uża mistoqsijiet biex tkun ċert li l-​istudent jifhem dak li jkun inqara. Dan jistaʼ jżid ix-​xewqa tiegħu biex jitjieb fil-​qari ħalli jfittex iktar veritajiet Bibliċi waħdu.

4. Kif nistgħu ngħinu lill-​istudent tagħna jitjieb fl-​abbiltà tiegħu tal-​qari?

⁴ Għajnuniet Għal Titjib fil-​Qari: Nies li ma tantx jafu jaqraw jew li ma tantx kellhom opportunità biex jitgħallmu jaqraw b’mod fluwenti għandhom mnejn jifhmu u jiftakru l-​informazzjoni tajjeb ħafna. Forsi tistaʼ tinkuraġġixxi lil uħud bħal dawn biex jużaw rekordings fuq l-​awdjo tal-​pubblikazzjonijiet tagħna jekk huma disponibbli bil-​lingwa tagħhom. Jekk jisimgħu bir-​reqqa lill-​qarrej waqt li jsegwu fil-​kopja stampata, saħansitra jirripetu l-​kliem minn taħt l-​ilsien, se jiġu megħjunin jitjiebu fil-​qari. Jistgħu jsibu t’għajnuna wkoll il-​browxer Apply Yourself to Reading and Writing. F’xi nħawi, l-​anzjani jistgħu wkoll jirranġaw biex ikun hemm klassijiet tal-​qari fil-​kongregazzjoni. Dawn is-​suġġerimenti prattiċi jistgħu jgħinuna ngħinu lil dawk li ma tantx jafu jaqraw biex jifhmu “l-​kitba qaddisa,” li tistaʼ tagħmilhom għorrief għas-​salvazzjoni.—2 Tim. 3:15.