Qari Eżatt

L-​ISKRITTURA tgħid li hija r-​rieda taʼ Alla li nies taʼ kull xorta “jaslu għall-​għarfien eżatt dwar il-​verità.” (1 Tim. 2:4) Fi qbil maʼ dan, meta naqraw b’leħen għoli mill-​Bibbja, ix-​xewqa tagħna li nwasslu għarfien eżatt għandha teffettwa l-​mod kif naqraw.

L-​abbiltà li naqraw b’leħen għoli mill-​Bibbja u minn pubblikazzjonijiet li jispjegaw il-​Bibbja hija importanti kemm għaż-​żgħażagħ u kemm għall-​uħud akbar fl-​età. Bħala Xhieda taʼ Ġeħova, għandna r-​responsabbiltà li naqsmu maʼ oħrajn l-​għarfien dwar Ġeħova u dwar il-​mogħdijiet tiegħu. Dan spiss jinvolvi qari lil persuna oħra jew lil grupp żgħir taʼ nies. Aħna nagħmlu qari bħal dan mal-​familja wkoll. Fl-​Iskola tal-​Ministeru Teokratiku hemm opportunitajiet adattati għall-​aħwa rġiel u nisa, żgħar u kbar, biex jirċievu pariri bl-​iskop li jitjiebu fil-​qari b’leħen għoli.

Il-​qari tal-​Bibbja fil-​pubbliku, sew jekk lil ftit nies u sew jekk lil kongregazzjoni, għandu jittieħed bis-​serjetà. Il-​Bibbja hi mnebbħa minn Alla. Ukoll, “il-​kelma t’Alla hi ħajja u qawwija . . . u tistaʼ tagħraf il-​ħsibijiet u l-​intenzjonijiet tal-​qalb.” (Ebr. 4:12) Fil-​Kelma taʼ Alla nsibu għarfien imprezzabbli li ma jinstab f’ebda sors ieħor. Din tistaʼ tgħin persuna ssir taf lill-​uniku Alla veru, tikkultiva relazzjoni tajba miegħu, u tkampa mal-​problemi tal-​ħajja b’suċċess. Din tispjega t-​triq li twassal għall-​ħajja taʼ dejjem fid-​dinja l-​ġdida taʼ Alla. Il-​mira tagħna għandha tkun li naqraw il-​Bibbja bl-​aħjar mod li nistgħu.—Salm 119:140; Ġer. 26:2.

Kif Taqra b’Eżattezza. Hemm bosta aspetti biex qari jkun effettiv, iżda l-​ewwel pass hu li tiżviluppa l-​eżattezza. Dan ifisser li tistinka biex taqra eżatt dak li hemm fil-​paġna stampata. Oqgħod attent li ma taqbiżx kliem, li ma twaqqax l-​aħħar ittra jew ittri mill-​kelma, jew taqra kliem ħażin minħabba li jkun simili għal kliem ieħor.

Sabiex taqra l-​kliem b’mod korrett, jeħtieġ li tifhem il-​kuntest. Dan jirrikjedi preparazzjoni bir-​reqqa. Maż-​żmien, hekk kif titgħallem tantiċipa u tikkunsidra kif qed jiżvolġi l-​ħsieb, l-​eżattezza fil-​qari tiegħek se titjieb.

Il-​punteġġatura u l-​aċċenti huma elementi importanti fil-​lingwa miktuba. Il-​punteġġatura tistaʼ tindika fejn għandek tieħu pawsa, kemm għandha ddum il-​pawsa, u forsi l-​bżonn li tibdel it-​ton. F’xi lingwi, jekk tonqos li tibdel it-​ton meta l-​punteġġatura titlob dan, mistoqsija tistaʼ tinbidel fi stqarrija jew it-​tifsira tistaʼ tinbidel għalkollox. M’għandniex xi ngħidu, xi drabi l-​funzjoni tal-​punteġġatura tkun fil-​biċċa l-​kbira marbuta mal-​grammatika. F’ħafna lingwi mhuwiex possibbli li taqra b’eżattezza mingħajr ma tagħti attenzjoni bir-​reqqa għall-​aċċenti—kemm dawk miktubin u kemm dawk li jiġu mifhumin mill-​kuntest. Dawn jeffettwaw il-​ħoss tal-​ittri li huma marbutin magħhom. Kun żgur li ssir midħla tal-​mod kif jintużaw il-​punteġġatura u l-​aċċenti fil-​lingwa tiegħek. Dan hu fundamentali biex taqra bis-​sens. Ftakar li l-​mira tiegħek għandha tkun li tgħaddi l-​ħsibijiet, mhux li sempliċement tgħid il-​kliem.

Jeħtieġ il-​prattika sabiex tikkultiva l-​abbiltà li taqra b’eżattezza. Aqra biss paragrafu wieħed, imbagħad erġaʼ aqrah diversi drabi, sakemm tkun tistaʼ taqrah mingħajr żbalji. Imbagħad għaddi għall-​paragrafu li jmiss. Fl-​aħħar, stinka biex taqra diversi paġni tal-​materjal mingħajr ma taqbeż, tirripeti, jew taqra xi kliem b’mod ħażin. Wara li tkun għamilt dawn il-​passi, itlob lil xi ħadd joqgħodlok għassa għall-​qari u jiġbidlek l-​attenzjoni għal xi żbalji li tistaʼ tagħmel.

F’xi nħawi tad-​dinja, vista batuta u dawl baxx jikkontribwixxu għal diffikultà fil-​qari. Jekk inhu possibbli li tirranġa dawn il-​kundizzjonijiet, żgur li jkun hemm titjib fil-​qari.

Maż-​żmien, l-​aħwa rġiel li jaqraw tajjeb jistgħu jiġu mistidnin jieħdu sehem fil-​qari pubbliku tal-​materjal tal-​Istudju tal-​Bibbja tal-​Kongregazzjoni u l-​Istudju tat-​Torri tal-​Għassa. Iżda biex twettaq bis-​sħiħ privileġġ bħal dan, jeħtieġ iktar milli sempliċement tgħid il-​kliem b’mod korrett. Sabiex issir qarrej pubbliku effettiv fil-​kongregazzjoni, għandek bżonn tiżviluppa drawwiet tajbin fil-​qari persunali. Dan jinvolvi li tkun konxju li kull kelma f’sentenza għandha l-​irwol tagħha. Ma tistax tinjora xi kliem u xorta tifhem biċ-​ċar dak li qed jintqal. Jekk xi kliem jinqara ħażin, anki meta taqra għalik innifsek, it-​tifsir tas-​sentenza mhux se jkun korrett. Jekk tinjora l-​aċċenti jew il-​kuntest li fih qed jintuża l-​kliem tistaʼ tasal biex taqra ħażin. Stinka biex tifhem xi tfisser kull kelma fis-​sitwazzjoni li tidher fiha. Ikkunsidra wkoll kif il-​punteġġatura teffettwa t-​tifsir tas-​sentenza. Ftakar li l-​ħsibijiet ġeneralment jitwasslu minn ġabriet taʼ kliem. Oqgħod attent għalihom sabiex meta tkun qed taqra b’leħen għoli taqra ġabriet taʼ kliem—frażijiet u klawsoli—minflok sempliċement kliem. Pass importanti biex tkun kapaċi twassal għarfien eżatt lil oħrajn permezz tal-​qari pubbliku hu li tifhem b’mod ċar dak li taqra.

L-​appostlu Pawlu kiteb hekk lil anzjan Kristjan tal-​esperjenza: “Kompli agħti ruħek għall-​qari pubbliku.” (1 Tim. 4:13) Ovvjament, dan hu aspett li fih ilkoll kemm aħna għandna fejn nagħmlu titjib.