Żgħażagħ—Kif Se Tużaw Ħajjitkom?

“IRRID dak kollu li hu l-​aħjar mill-​ħajja.” Hekk tgħid tfajla adolexxenti. Bla dubju int ukoll trid l-​istess ħaġa. Imma kif tistaʼ tikseb “l-​aħjar” mill-​ħajja? Il-​mezzi tax-​xandir u sħabek, forsi saħansitra l-​għalliema tiegħek, għandhom mnejn jgħidu li dan jiġi billi taqlaʼ ħafna flus u jkollok karriera prestiġjuża—billi tkun persuna taʼ suċċess!

Madankollu, il-​Bibbja twissi liż-​żgħażagħ li l-​ġiri wara s-​suċċess materjali m’huwa xejn għajr “ġiri wara r-​riħ.” (Koħèlet 4:4) Waħda mir-​raġunijiet hi li ftit huma ż-​żgħażagħ li fil-​fatt jirnexxilhom isiru sinjuri jew famużi. Dawk li jirnexxilhom, taʼ spiss jispiċċaw diżappuntati bl-​ikrah. “Huwa bħallikieku għandek kaxxa vojta,” jgħid wieħed żagħżugħ mill-​Britannja li stinka biex ikollu karriera akkademika prestiġjuża. “Meta tħares ġewwa, ma ssib xejn.” Huwa veru li kultant ix-​xogħol jistaʼ jġiblek għana u rispett. Imma dan ma jistax jimla “l-​bżonn spiritwali” tiegħek. (Mattew 5:3, New World Translation) Barra minn hekk, l-​1 Ġwann 2:17 iwissi li ‘d-​dinja qiegħda tgħaddi.’ Anki jekk tirnexxi u jkollok suċċess f’din id-​dinja, dan se jkun għomru qasir.

Għal din ir-​raġuni, Koħèlet 12:1 iħeġġeġ liż-​żgħażagħ: “Ftakar f’min ħalqek f’jiem żgħożitek.” Iva, l-​aqwa mod kif tistaʼ tuża ħajtek huwa fis-​servizz t’Alla Jehovah. Imma qabel xejn trid tikkwalifika biex tkun fis-​servizz t’Alla. Kif tistaʼ tagħmel dan? U x’tinvolvi ħajja taʼ servizz lil Alla?

Kif Tikkwalifika biex Tkun Xhud taʼ Jehovah

L-​ewwelnett, trid tikkultiva xewqa li taqdi lil Alla—u dik ix-​xewqa ma tiġix waħedha, anki jekk il-​ġenituri tiegħek huma Kristjani. Int trid taħdem biex tiżviluppa relazzjoni persunali ma’ Jehovah. “It-​talb jgħinek biex ikollok relazzjoni ma’ Jehovah,” tgħid tfajla adolexxenti.—Salm 62:9 (62:8, NW); Ġakbu 4:8.

Rumani 12:2 jenfasizza pass ieħor li trid tagħmel. Dan jgħid: “[Agħrfu] x’inhi r-​rieda taʼ Alla, x’inhu t-​tajjeb li jogħġbu, x’inhu perfett.” Qatt kellek dubju dwar xi affarijiet li tgħallimt? Mela agħmel bħalma tħeġġeġ il-​Bibbja, u ‘agħraf’ li dawn l-​affarijiet huma veri! Agħmel riċerka persunali. Aqra l-​Bibbja u l-​letteratura Biblika. Iżda li titgħallem dwar Alla m’huwiex sempliċement xi ħaġa tal-​moħħ. Ħu l-​ħin biex timmedita fuq dak li taqra ħalli b’hekk dan ikun jistaʼ jinżel fil-​qalb figurattiva tiegħek. B’dan il-​mod, l-​imħabba tiegħek lejn Alla se tikber iżjed.—Salm 1:2, 3.

Imbagħad, ipprova tkellem b’mod informali dwar dak li qed titgħallem ma’ oħrajn, forsi ma’ sħabek taʼ l-​iskola. Wara dan, il-​pass li jkun imiss huwa l-​ippridkar minn dar għal dar. Minn żmien għal żmien, waqt li tkun qed tippriedka tistaʼ tiltaqaʼ ma’ xi ħadd li jkun l-​iskola miegħek, u għall-​ewwel din is-​sitwazzjoni tistaʼ ddejqek xi ftit. Imma l-​Bibbja tħeġġiġna biex ma ‘nistħux mill-​Evanġelju.’ (Rumani 1:16) Il-​messaġġ li qed ixxandar huwa wieħed taʼ ħajja u tama! Għala għandek tistħi?

Jekk il-​ġenituri tiegħek huma Kristjani, forsi diġà tmur magħhom fuq dan ix-​xogħol. Imma kapaċi tagħmel iktar milli sempliċement toqgħod ma titkellimx jew inkella milli toffri r-​rivisti u l-​fuljetti biss? Kapaċi tkun f’bieb u tagħmel konversazzjoni waħdek, filwaqt li tuża l-​Bibbja biex tgħallem lill-​inkwilin? Jekk le, allura itlob l-​għajnuna tal-​ġenituri tiegħek jew taʼ xi ħadd matur fil-​kongregazzjoni. Agħmilha l-​mira tiegħek li tikkwalifika bħala pubblikatur mhux mgħammed taʼ l-​aħbar tajba!

Maż-​żmien, se titqanqal biex tiddedika lilek innifsek—twiegħed lil Alla li minn dak in-​nhar ’il quddiem se taqdih. (Rumani 12:1) Madankollu, id-​dedikazzjoni m’hijiex sempliċement kwistjoni privata. Alla jitlob li kull wieħed u waħda minna “jistqarr b’xufftejh biex ikollu s-​salvazzjoni.” (Rumani 10:10) Meta titgħammed, l-​ewwel tagħmel dikjarazzjoni tal-​fidi tiegħek b’mod verbali. Imbagħad ikun hemm il-​magħmudija fl-​ilma. (Mattew 28:19, 20) Huwa veru li l-​magħmudija hija pass serju. Iżda żżommx lura għax tibżaʼ li se tonqos b’xi mod. Jekk tistrieħ fuq Alla għas-​saħħa, hu se jagħtik qawwa iżjed min-​normal biex jgħinek tibqaʼ sod.—2 Korintin 4:7; 1 Pietru 5:10.

Meta titgħammed issir wieħed mix-​Xhieda taʼ Jehovah. (Isaija 43:10) Dan għandu jkollu effett qawwi fuq kif se tuża ħajtek. Id-​dedikazzjoni tinvolvi li ‘tiċħad lilek innifsek.’ (Mattew 16:24) Forsi tħalli xi miri jew ambizzjonijiet persunali u ‘tfittex l-​ewwel is-​Saltna taʼ Alla.’ (Mattew 6:33) Għalhekk, id-​dedikazzjoni u l-​magħmudija jippreżentawlek ħafna opportunitajiet biex tagħmel dan. Ejja nikkunsidraw ftit minnhom.

Opportunitajiet biex Taqdi lil Alla Full-​Time

● Ix-​xogħol taʼ pijunier huwa opportunità waħda. Il-​pijunier huwa pubblikatur Kristjan mgħammed u eżemplari li jqattaʼ minn taʼ l-​inqas 70 siegħa fix-​xahar jippriedka l-​aħbar tajba. Il-​fatt li tqattaʼ iktar ħin fis-​servizz taʼ l-​għalqa se jgħinek tiżviluppa l-​abbiltajiet tiegħek taʼ li tippriedka u tgħallem. Ħafna pijunieri kellhom il-​ferħ li jgħinu ’l-​istudenti tal-​Bibbja tagħhom isiru Xhieda mgħammdin. Liema xogħol sekulari jistaʼ jkun daqstant eċċitanti u jagħtik daqshekk sodisfazzjon?

Sabiex jgħinhom ilaħħqu ma’ l-​ispejjeż tagħhom, il-​biċċa l-​kbira mill-​pijunieri jkollhom xogħol sekulari part-​time. Ħafna jippreparaw minn qabel għal din ir-​responsabbiltà billi jitgħallmu xi sengħa mill-​iskola jew mingħand il-​ġenituri tagħhom. Jekk int u l-​ġenituri tiegħek tħossu li jkun aħjar li tieħu xi taħriġ ieħor wara li tkun spiċċajt l-​iskola sekondarja, kun ċert li l-​motiv tiegħek ma jkunx li tagħmel il-​flus imma li tappoġġa l-​ministeru tiegħek u forsi taqdi bħala ministru full-​time.

Madankollu, il-​qofol tal-​ħajja taʼ pijunier m’huwiex l-​impjieg sekulari tiegħu, imma l-​ministeru tiegħu—li jgħin lil oħrajn jiksbu l-​ħajja! Għala ma tagħmilhiex il-​mira persunali tiegħek li taqdi bħala pijunier? Taʼ spiss, ix-​xogħol taʼ pijunier jiftaħ it-​triq għal privileġġi oħra. Per eżempju, xi pijunieri jmorru joqogħdu f’postijiet fejn hemm ħtieġa akbar għal pubblikaturi tas-​Saltna. Oħrajn jitgħallmu lingwa barranija u jaqdu f’xi kongregazzjoni taʼ lingwa barranija lokali jew saħansitra f’pajjiż ieħor. Iva, li tagħmel ix-​xogħol taʼ pijunier huwa mod taʼ ħajja premjanti!

● L-​Iskola tal-​Bibbja Għal Koppji Kristjani hija opportunità oħra. Din l-​iskola tagħti lil koppji miżżewġin taħriġ speċjalizzat biex hekk ikunu jistgħu jintużaw iktar bis-​sħiħ minn Jehovah u l-​organizzazzjoni tiegħu. Ħafna gradwati jiġu mitlubin jaqdu fejn hemm iktar bżonn f’pajjiżhom. Oħrajn jingħataw inkarigu biex jaqdu bħala predikaturi full-​time f’pajjiżi barranin jekk iċ-​ċirkustanzi tagħhom jippermettu. Xi gradwati għandhom mnejn jaqdu bħala pijunieri speċjali temporanji biex jiftħu u jkabbru x-​xogħol f’postijiet imwarrbin u iżolati.

● L-​Iskola tal-​Bibbja Għal Aħwa Rġiel Mħux Miżżewġin ġiet stabbilita biex tħarreġ dawk l-​anzjani u l-​qaddejja ministerjali li jkunu kwalifikati u li ma jkunux miżżewġin. Il-​kors intensiv li jdum tmien ġimgħat ikopri suġġetti bħalma huma r-​responsabbiltajiet ta’ l-​anzjani u l-​qaddejja ministerjali, l-​organizzazzjoni, u d-​diskors fil-​pubbliku. Xi wħud jiġu assenjati biex jaqdu f’pajjiżhom stess. Oħrajn jintalbu jaqdu f’pajjiżi barranin.

● Is-​servizz f’Betel ifisser li taqdi bħala volontier f’waħda mill-​fergħat tax-​Xhieda ta’ Jehovah. Xi membri tal-​familja ta’ Betel jaħdmu direttament fil-​produzzjoni tal-​letteratura bbażata fuq il-​Bibbja. Oħrajn jingħataw xogħol ieħor li jgħin fil-​produzzjoni tal-​letteratura Biblika, bħall-​manutenzjoni tal-​bini u l-​apparat jew inkella jieħdu ħsieb il-​bżonnijiet fiżiċi tal-​familja ta’ Betel. Kull inkarigu huwa privileġġ sagru ta’ servizz lil Jehovah. Iżjed minn hekk, dawk f’Betel għandhom il-​ferħ li jafu li jagħmlu x’jagħmlu, dan huwa għall-​benefiċċju ta’ ħuthom madwar id-​dinja.

Kultant, aħwa b’xi snajja’ speċjali jiġu mistiedna biex jaqdu f’Betel. Madankollu, il-​biċċa l-​kbira jiġu mħarrġin wara li jidħlu. Dawk li jaqdu f’Betel ma jagħmlux dan għal xi gwadann materjali imma huma sodisfatti bl-​arranġamenti provduti għall-​ikel, akkomodazzjoni, u bix-​xi ħaġa żgħira tal-​flus li jingħataw biex ikopru l-​ispejjeż persunali. Wieħed mill-​membri żgħażagħ tal-​familja ta’ Betel jiddeskrivi s-​servizz tiegħu b’dan il-​mod: “Huwa xi ħaġa meraviljuża! M’huwiex faċli li tidra r-​ruti­na, imma kemm ilni naqdi hawnhekk irċivejt ħaf­na barkiet.”

● Is-​servizz internazzjonali jippermetti lil dak li jkun biex jieħu sehem fil-​bini ta’ fergħat u Swali tas-​Saltna. Il-​qaddejja internazzjonali, bħalma huma msejħin, imorru f’pajjiżi oħra biex jgħinu f’xogħol ta’ bini bħal dan. Dan huwa forma ta’ servizz sagru, simili għax-​xogħol li għamlu dawk li bnew it-​tempju ta’ Salamun. (1 Slaten 8:​13-​18) Il-​qaddejja internazzjonali jgawdu arranġamenti simili għal dawk tal-​familja ta’ Betel. Xi privileġġ għandhom dawn l-​aħwa li jaqdu f’dan il-​qasam t’attività li jġib tifħir lil Jehovah!

Aqdi lil Jehovah b’Qalb Sħiħa

Li taqdi lil Jehovah huwa l-​aħjar mod kif tuża ħajtek. Għala ma tikkunsidrax l-​idea li tagħmel mira persunali biex taqdi lil Alla full-​time? Iddiskuti s-​servizz full-​time mal-​ġenituri tiegħek, ma’ l-​anzjani tal-​lokal tiegħek, u ma’ l-​indokratur tas-​cir­cuit. Jekk int interessat f’Betel, l-​Iskola tal-​Bibbja Għal Aħwa Rġiel Mħux Miżżewġin, jew l-​Iskola tal-​Bibbja Għal Koppji Kristjani, attendi xi waħda mil-​laqgħat organizzati li jsiru matul l-​assemblea tas-​circuit u l-​konvenzjoni distrettwali għal dawk li jkunu jixtiequ japplikaw.

Veru, mhux kulħadd jista’ jikkwalifika jew jaqdi full-​time. Kultant il-​problemi ta’ saħħa, is-​sitwazzjoni finanzjarja, u l-​obbligazzjonijiet tal-​familja jistgħu jillimitaw dak li jista’ jagħmel individwu. Madankollu, il-​Kristjani dedikati kollha jridu jagħtu kas il-​kmand tal-​Bibbja: “Ħobb lill-​Mulej, Alla tiegħek, b’qalbek kollha, b’ruħek kollha, u b’moħħok kollu.” (Mattew 22:37) Jehovah jirrikjedi li int tagħmel l-​aħjar li tista’ fiċ-​ċirkustanzi tiegħek. Għalhekk, hi x’inhi s-​sitwazzjoni tiegħek, iċċentra ħajtek fuq li taqdi lil Jehovah. Agħmel miri teokratiċi u realistiċi. Iva, “ftakar f’min ħalqek f’jiem żgħożitek”—⁠u tkun imbierek għall-​eternità talli tkun għamilt dan!

Jekk mhux indikat mod ieħor, il-kwotazzjonijiet Skritturali huma meħudin mill-Bibbja taʼ l-Għaqda Biblika Maltija, it-Tieni Edizzjoni (1996).