Kapitlu 5

Kif Nibqgħu Separati mid-​Dinja

“M’intomx parti mid-​dinja.” —ĠWANNI 15:19.

1. Ġesù x’enfasizza matul l-​aħħar lejl tiegħu fuq l-​art bħala bniedem?

MATUL l-​aħħar lejl tiegħu fuq l-​art bħala bniedem, Ġesù esprima interess profond għall-​ġid tas-​segwaċi tiegħu fil-​futur. Saħansitra talab dwar il-​kwistjoni, billi qal lil Missieru: “Ma nitolbokx biex toħroġhom mid-​dinja, imma biex tħarishom minħabba l-​Ħażin. M’humiex parti mid-​dinja, bħalma jien m’iniex parti mid-​dinja.” (Ġwanni 17:15, 16) F’din it-​talba mill-​qalb, Ġesù wera l-​imħabba profonda li kellu għas-​segwaċi tiegħu kif ukoll l-​importanza tal-​kliem li lissen iktar kmieni dak il-​lejl lil xi wħud minnhom: “M’intomx parti mid-​dinja.” (Ġwanni 15:19) B’mod ċar, kien taʼ importanza kbira għal Ġesù li s-​segwaċi tiegħu jibqgħu separati mid-​dinja!

2. X’inhi “d-​dinja” li Ġesù rrefera għaliha?

² “Id-​dinja” li Ġesù semma tirreferi għall-​umanità kollha aljenata minn Alla, maħkuma minn Satana, u mjassra mill-​ispirtu egoistiku u kburi li joriġina minnu. (Ġwanni 14:30; Efesin 2:2; 1 Ġwanni 5:19) Tabilħaqq, “ħbiberija [maʼ din] id-​dinja hi għadwa m’Alla.” (Ġakbu 4:4) Però, kif jistgħu dawk kollha li jixtiequ jibqgħu fl-​imħabba t’Alla jkunu fid-​dinja madankollu jkunu separati minnha? Se nikkunsidraw ħames modi: billi nibqgħu leali lejn is-​Saltna t’Alla taħt Kristu u newtrali fil-​politika tad-​dinja, billi nirreżistu l-​ispirtu tad-​dinja, billi nkunu modesti fl-​ilbies u d-​dehra tagħna, billi nżommu għajna sempliċi, u billi nilbsu l-​armatura spiritwali tagħna.

NIBQGĦU LEALI U NEWTRALI

3. (a) Ġesù kif kien iqis il-​politika taʼ żmienu? (b) Għala jistaʼ jingħad li s-​segwaċi midlukin taʼ Ġesù jaqdu bħala ambaxxaturi? (Inkludi n-​nota taʼ taħt.)

³ Minflok ma ħa sehem fil-​politika taʼ żmienu, Ġesù ffoka fuq li jippriedka dwar is-​Saltna t’Alla, il-​gvern futur tas-​sema li tiegħu hu kien is-​Sultan prospettiv. (Danjel 7:13, 14; Luqa 4:43; 17:20, 21) B’hekk, meta kien quddiem il-​Gvernatur Ruman Ponzju Pilatu, Ġesù setaʼ jgħid: “Is-​saltna tiegħi mhix parti minn din id-​dinja.” (Ġwanni 18:36) Is-​segwaċi leali tiegħu jimitaw l-​eżempju tiegħu billi jagħtu l-​lealtà tagħhom lil Kristu u lis-​Saltna tiegħu u billi jħabbru din is-​Saltna lid-​dinja. (Mattew 24:14) “Għalhekk, aħna ambaxxaturi li jissostitwixxu lil Kristu,” kiteb l-​appostlu Pawlu. “Bħala sostituti għal Kristu nitolbu bil-​ħniena: ‘Erġgħu tħabbu m’Alla.’”a—2 Korintin 5:20.

4. Il-​Kristjani veri kollha kif urew lealtà lejn is-​Saltna t’Alla? (Ara l-​kaxxa f’paġna 52.)

⁴ Minħabba li l-​ambaxxaturi jirrappreżentaw sovran jew pajjiż barrani, ma jindaħlux fl-​affarijiet interni tal-​pajjiżi li jaqdu fihom; huma jibqgħu newtrali. Madankollu, l-​ambaxxaturi jappoġġaw il-​gvern tal-​pajjiż li huma jirrappreżentaw. L-​istess huwa minnu dwar is-​segwaċi midlukin taʼ Kristu, li ‘għandhom iċ-​ċittadinanza tagħhom fis-​smewwiet.’ (Filippin 3:20) Fil-​fatt, grazzi għall-​ippridkar żeluż tagħhom tas-​Saltna, huma għenu lil miljuni taʼ “nagħaġ oħrajn” taʼ Kristu biex ‘jerġgħu jitħabbu m’Alla.’ (Ġwanni 10:16; Mattew 25:31-40) Dawn l-​uħud taʼ l-​aħħar jaqdu bħala l-​mibgħutin taʼ Kristu, biex ngħidu hekk, billi jappoġġaw lil ħut Ġesù, il-​midlukin. Bħala merħla waħda magħquda jappoġġaw is-​Saltna Messjanika, biż-​żewġ gruppi jżommu newtralità stretta fejn jidħlu l-​affarijiet politiċi tad-​dinja.—Isaija 2:2-4.

5. Il-​kongregazzjoni Kristjana kif inhi differenti minn Israel tal-​qedem, u din id-​differenza kif tintwera?

⁵ Il-​lealtà lejn Kristu m’hijiex l-​unika raġuni għala l-​Kristjani veri huma newtrali. Għall-​kuntrarju taʼ Israel tal-​qedem, li kien ngħata art mingħand Alla, aħna parti minn fratellanza internazzjonali. (Mattew 28:19; 1 Pietru 2:9) B’hekk, kieku kellna ningħaqdu maʼ partiti politiċi lokali, kemm il-​libertà tal-​kelma tagħna rigward il-​messaġġ tas-​Saltna u kemm l-​għaqda Kristjana tagħna jkunu f’periklu serju. (1 Korintin 1:10) Iżjed minn hekk, matul żmien taʼ gwerra, inkunu qed niġġieldu kontra sħabna fit-​twemmin, li aħna kmandati biex inħobbu. (Ġwanni 13:34, 35; 1 Ġwanni 3:10-12) Għalhekk, mhux taʼ b’xejn li Ġesù qal lid-​dixxipli tiegħu biex ma jiħdux sehem fi gwerer. U saħansitra qalilhom biex iħobbu lill-​għedewwa tagħhom.—Mattew 5:44; 26:52; ara l-​kaxxa “Jien Qed Nibqaʼ Newtrali?” f’paġna 55.

6. Id-​dedikazzjoni tiegħek lil Alla kif teffettwa r-​relazzjoni tiegħek maʼ Ċesari?

⁶ Bħala Kristjani veri, aħna ddedikajna ħajjitna lil Alla, mhux lil xi bniedem, organizzazzjoni umana, jew nazzjon. L-​1 Korintin 6:19, 20 jgħid: “M’intomx tagħkom infuskom, għax kontu mixtrijin bi prezz.” B’hekk, filwaqt li nagħtu lil “Ċesari” dak li hu tiegħu fejn jidħlu l-​unur, it-​taxxi, u sa ċertu punt is-​sottomissjoni, is-​segwaċi taʼ Ġesù jagħtu “lil Alla dak li hu t’Alla.” (Marku 12:17; Rumani 13:1-7) Dan jinkludi l-​qima tagħhom, l-​imħabba sħiħa tagħhom, u l-​ubbidjenza leali tagħhom. Jekk hemm bżonn, huma lesti li jagħtu ħajjithom għal Alla.—Luqa 4:8; 10:27; Atti 5:29; Rumani 14:8.

NIRREŻISTU “L-​ISPIRTU TAD-​DINJA”

7, 8. X’inhu “l-​ispirtu tad-​dinja,” u dan l-​ispirtu kif “jaħdem” f’individwu?

⁷ Mod ieħor kif il-​Kristjani jibqgħu separati mid-​dinja hu billi jirreżistu l-​ispirtu mill-​agħar tagħha. Pawlu kiteb: “Aħna ma rċivejniex l-​ispirtu tad-​dinja, imma l-​ispirtu li ġej mingħand Alla.” (1 Korintin 2:12) Lill-​Efesin, hu qal: “Darba kontu timxu skond . . . din id-​dinja, skond il-​ħakkiem taʼ l-​awtorità taʼ l-​arja, l-​ispirtu li issa qed jaħdem f’ulied id-​diżubbidjenza.”—Efesin 2:2, 3.

⁸ L-​“arja” tad-​dinja, jew l-​ispirtu, hija forza inviżibbli, li tħajjar, li tqanqal id-​diżubbidjenza lejn Alla, u li tippromwovi “x-​xewqa tal-​laħam u x-​xewqa taʼ l-​għajnejn.” (1 Ġwanni 2:16; 1 Timotju 6:9, 10) L-​“awtorità” taʼ dan l-​ispirtu qiegħda fil-​mod kif tappella għall-​ġisem midneb, fil-​mod kif tidħol fin fin, kif ma tieqaf qatt, u kif tinxtered bħall-​arja maʼ kullimkien. Iżjed minn hekk, din ‘taħdem’ f’individwu billi bil-​mod il-​mod tiżviluppa fih kwalitajiet ħżiena, bħall-​egoiżmu, is-​suppervja, l-​ambizzjoni rgħiba, u l-​ispirtu taʼ indipendenza morali u ribelljoni.b Fi kliem sempliċi, l-​ispirtu tad-​dinja b’mod progressiv iġiegħel lill-​karatteristiki tax-​Xitan jikbru f’qalb il-​bniedem.—Ġwanni 8:44; Atti 13:10; 1 Ġwanni 3:8, 10.

9. L-​ispirtu tad-​dinja b’liema modi jistaʼ jidħol f’moħħna u f’qalbna?

⁹ Jistaʼ l-​ispirtu tad-​dinja jniżżel l-​għeruq f’moħħok u f’qalbek? Iva, imma biss jekk tħallih billi ma tibqax tgħasses kontinwament. (Proverbji 4:23) L-​influwenza tiegħu spiss tibda b’mod sottili, forsi permezz taʼ ħbieb li għandhom mnejn jidhru li huma nies tajbin imma, fil-​fatt, ma jħobbux lil Ġeħova. (Proverbji 13:20; 1 Korintin 15:33) Tistaʼ wkoll tassorbi dan l-​ispirtu mill-​agħar permezz taʼ letteratura oġġezzjonabbli, siti pornografiċi jew apostati fuq l-​Internet, divertiment mhux xieraq, u sport kompetittiv ħafna—fir-​realtà, permezz taʼ kwalunkwe persuna jew kwalunkwe ħaġa li tirrifletti l-​ħsieb taʼ Satana jew tas-​sistema tiegħu.

10. Kif nistgħu nirreżistu l-​ispirtu tad-​dinja?

¹⁰ Kif nistgħu nirreżistu l-​ispirtu perikoluż tad-​dinja u nżommu ruħna fl-​imħabba t’Alla? Biss billi nieħdu vantaġġ sħiħ mill-​provvedimenti spiritwali taʼ Ġeħova u billi nitolbu kontinwament għall-​ispirtu qaddis. Ġeħova hu ħafna akbar mix-​Xitan jew mid-​dinja mill-​agħar fil-​kontroll sataniku. (1 Ġwanni 4:4) Għalhekk, kemm hu importanti li nibqgħu qrib Ġeħova bit-​talb!

INKUNU MODESTI FL-​ILBIES U D-​DEHRA TAGĦNA

11. L-​ispirtu tad-​dinja kif influwenza l-​livelli fl-​ilbies?

¹¹ L-​ilbies, id-​dehra, u l-​indafa taʼ individwu huma turija minn barra taʼ l-​ispirtu li qed jimmotivah. F’ħafna pajjiżi, il-​livelli taʼ l-​ilbies tant niżlu fil-​baxx li wieħed kummentatur fuq it-​televixin qal li dalwaqt mhux se jkun fadlilhom x’jilbsu l-​prostituti. Saħansitra bniet li għadhom m’humiex adoloxxenti ġew influwenzati minn din il-​moda—“ikxef kemm tiflaħ, modestja xejn,” stqarret gazzetta waħda. Moda oħra hi li jilbsu traskurat u dan jirrifletti spirtu taʼ ribelljoni kif ukoll nuqqas taʼ dinjità u rispett lejhom infushom.

12, 13. Maʼ liema prinċipji rridu nimxu rigward l-​ilbies u d-​dehra tagħna?

¹² Bħala qaddejja taʼ Ġeħova, aħna bix-​xieraq inkunu rridu nidhru l-​aħjar li nistgħu. Dan ifisser li nilbsu b’mod pulit, nadif, mhux offensiv, u xieraq għall-​okkażjoni. L-​apparenza tagħna dejjem għandha tirrifletti ‘modestja u moħħ f’loku,’ li flimkien maʼ “għemejjel tajbin” tkun xierqa għal kulħadd—raġel jew mara—‘li jgħid li jqim lil Alla.’ M’għandniex xi ngħidu, it-​tħassib ewlieni tagħna m’huwiex li niġbdu l-​attenzjoni lejna nfusna, imma li ‘nżommu ruħna fl-​imħabba t’Alla.’ (1 Timotju 2:9, 10; Ġuda 21) Iva, aħna rridu li l-​isbaħ tiżjin tagħna jkun “il-​persuna minn ġewwa, fil-​qalb . . . , li hu taʼ valur kbir f’għajnejn Alla.”—1 Pietru 3:3, 4.

¹³ Ukoll, żomm f’moħħok li l-​istil taʼ l-​ilbies u d-​dehra tagħna jistaʼ jinfluwenza kif oħrajn iqisu l-​qima vera. Il-​kelma Griega tradotta “modestja,” meta użata f’sens morali, tagħti l-​ħsieb taʼ riverenza, biżaʼ, u rispett għas-​sentimenti jew l-​opinjoni t’oħrajn. Għalhekk, il-​mira tagħna għandha tkun li nqisu l-​kuxjenza t’oħrajn iktar importanti mid-​drittijiet li forsi nħossu li għandna rigward kif nixtiequ nilbsu. Fuq kollox, aħna rridu nġibu unur lil Ġeħova u lill-​poplu tiegħu u nirrikkmandaw lilna nfusna bħala l-​ministri t’Alla, billi nagħmlu “kollox għall-​glorja t’Alla.”—1 Korintin 4:9; 10:31; 2 Korintin 6:3, 4; 7:1.

14. Rigward l-​apparenza u l-​indafa tagħna, liema mistoqsijiet għandna nistaqsu lilna nfusna?

¹⁴ L-​ilbies, id-​dehra, u l-​indafa tagħna huma saħansitra iktar importanti meta nkunu qed nieħdu sehem fil-​ministeru taʼ l-​għalqa jew nattendu xi laqgħa Kristjana. Staqsi lilek innifsek: ‘L-​apparenza u l-​indafa persunali tiegħi qegħdin jiġbdu attenzjoni żejda lejja? Oħrajn iħossuhom imbarazzati? Inqis id-​drittijiet tiegħi f’dawn l-​oqsma iktar importanti milli nikkwalifika għal privileġġi tas-​servizz fil-​kongregazzjoni?’—Salm 68:6; Filippin 4:5; 1 Pietru 5:6.

15. Il-​Kelma t’Alla għala ma tagħtix lista taʼ regoli dwar l-​ilbies, id-​dehra, u l-​indafa?

¹⁵ Il-​Bibbja ma tispeċifikax lista taʼ regoli għall-​Kristjani dwar l-​ilbies, id-​dehra, u l-​indafa. Ġeħova ma jridx iċaħħadna mil-​libertà taʼ l-​għażla tagħna jew mill-​użu taʼ l-​abbiltà tal-​ħsieb tagħna. Minflok, hu jridna nsiru nies maturi li jirraġunaw fuq prinċipji Bibliċi u li “bl-​użu għandhom is-​sensi tagħhom imħarrġin biex jagħrfu jagħżlu kemm it-​tajjeb u kemm il-​ħażin.” (Ebrej 5:14) Fuq kollox, hu jridna nkunu gwidati mill-​imħabba—imħabba għal Alla u għall-​proxxmu. (Marku 12:30, 31) Meta nqisu dan, hemm il-​potenzjal għal varjetà kbira fl-​ilbies u d-​dehra tagħna. Evidenza taʼ dan tistaʼ tidher fil-​kotriet ferħanin tal-​poplu taʼ Ġeħova lebsin b’mod kulurit, huma fejn huma miġburin fuq l-​art.

INŻOMMU GĦAJNA “SEMPLIĊI”

16. L-​ispirtu tad-​dinja kif jaħdem kontra t-​tagħlim taʼ Ġesù, u liema mistoqsijiet għandna nistaqsu lilna nfusna?

¹⁶ L-​ispirtu tad-​dinja huwa qarrieq u jqanqal lil miljuni biex jirrikorru għall-​flus u l-​affarijiet materjali biex ikunu henjin. Madankollu, Ġesù qal: “Anki meta wieħed ikollu bl-​abbundanza, ħajtu ma tiddependix minn dak li għandu.” (Luqa 12:15) Filwaqt li qatt m’approva l-​axxetiċiżmu, jew li wieħed jiċċaħħad minn kollox, Ġesù għallem li l-​ħajja u l-​hena ġenwin jitgawdew minn dawk li huma “konxji tal-​bżonn spiritwali tagħhom” u minn dawk li jżommu għajn “sempliċi,” uħud li huma sinċieri u ffokati sew fuq affarijiet spiritwali. (Mattew 5:3; 6:22, 23) Staqsi lilek innifsek: ‘Verament nemmen dak li għallem Ġesù, jew qed niġi influwenzat minn “missier il-​gidba”? (Ġwanni 8:44) Il-​kliem, il-​miri, il-​prijoritajiet, u l-​mod taʼ ħajja tiegħi x’jikxfu?’—Luqa 6:45; 21:34-36; 2 Ġwanni 6.

17. Semmi xi benefiċċji li jgawdu dawk li jżommu għajn sempliċi.

¹⁷ Ġesù qal: “L-​għerf jintwera li hu sewwa minn għemilu.” (Mattew 11:19) Ikkunsidra biss ftit mill-​benefiċċji li jgawdu dawk li jżommu għajn sempliċi. Huma jsibu serħan veru fis-​servizz tas-​Saltna. (Mattew 11:29, 30) Huma jevitaw ansjetajiet żejda, u b’hekk jeħilsu lilhom infushom minn ħafna wġigħ mentali u emozzjonali. (1 Timotju 6:9, 10) Minħabba li huma kuntenti bin-​neċessitajiet tal-​ħajja, għandhom iktar ħin għall-​familja tagħhom u għal sħabhom il-​Kristjani. Minħabba f’hekk, għandhom mnejn jorqdu aħjar. (Ekkleżjasti 5:12) Jesperjenzaw l-​akbar ferħ taʼ li jagħtu, billi jagħmlu dan b’kull mod li jistgħu. (Atti 20:35) U ‘joktru fit-​tama’ u għandhom paċi ġewwinija u kuntentizza. (Rumani 15:13; Mattew 6:31, 32) Dawn il-​barkiet tassew huma imprezzabbli!

NIEĦDU “L-​ARMATURA SĦIĦA”

18. Il-​Bibbja kif tiddeskrivi l-​għadu tagħna, il-​metodi tiegħu, u n-​natura tat-​taqbida tagħna?

¹⁸ Dawk li jżommu lilhom infushom fl-​imħabba t’Alla jgawdu wkoll protezzjoni spiritwali kontra Satana, li jixtieq iċaħħad lill-​Kristjani mhux biss mill-​hena, imma wkoll mill-​ħajja taʼ dejjem. (1 Pietru 5:8) Pawlu qal: “Aħna ma nissarawx kontra d-​demm u l-​laħam, imma kontra l-​gvernijiet, kontra l-​awtoritajiet, kontra l-​ħakkiema dinjin taʼ dan id-​dlam, kontra l-​forzi taʼ l-​ispirti mill-​agħar fil-​postijiet tas-​sema.” (Efesin 6:12) Il-​kelma ‘nissaraw’ tagħtina x’nifhmu li l-​ġlieda tagħna m’hijiex minn xi distanza kbira—minn xi kenn taħt l-​art, biex ngħidu hekk—imma mill-​viċin. Iżjed minn hekk, it-​termini “gvernijiet,” “awtoritajiet,” u “ħakkiema dinjin” jindikaw li l-​attakki mill-​qasam taʼ l-​ispirti huma organizzati sew u maħsubin minn qabel.

19. Iddeskrivi l-​armatura spiritwali taʼ Kristjan.

¹⁹ Madankollu, minkejja d-​dgħjufijiet u l-​limitazzjonijiet taʼ bnedmin li aħna, nistgħu noħorġu rebbiħin. Kif? Billi nieħdu “l-​armatura sħiħa mingħand Alla.” (Efesin 6:13) Il-​versi f’Efesin 6:14-18 jiddeskrivu din l-​armatura b’dan il-​mod: “Għalhekk, żommu sod, b’ġenbejkom imħażżmin bil-​verità, u lebsin il-​kurazza tas-​sewwa, u b’saqajkom mixdudin bit-​tagħmir taʼ l-​aħbar tajba tal-​paċi. Fuq kollox, aqbdu f’idejkom it-​tarka kbira tal-​fidi, li biha tkunu tistgħu titfu l-​vleġeġ tan-​nar kollha tal-​Ħażin. Ukoll, aċċettaw l-​elmu [jew, tama] tas-​salvazzjoni, u s-​sejf taʼ l-​ispirtu, jiġifieri, il-​kelma t’Alla, waqt li b’kull xorta taʼ talb u suppliki ibqgħu itolbu f’kull okkażjoni bl-​ispirtu.”

20. Is-​sitwazzjoni tagħna kif inhi differenti minn dik taʼ suldat letterali?

²⁰ Ladarba hija provvediment mingħand Alla, din l-​armatura spiritwali żgur se tipproteġina, dment li nilbsuha l-​ħin kollu. Għall-​kuntrarju taʼ suldati letterali, li għandhom mnejn ikollhom perijodi twal mingħajr ma jiġġieldu, il-​Kristjani huma fi ġlieda kontinwa bejn ħajja u mewt li m’hijiex se tieqaf sakemm Alla jkun qered lid-​dinja taʼ Satana u tefaʼ l-​ispirti kollha mill-​agħar fl-​abbiss. (Rivelazzjoni 12:17; 20:1-3) Għalhekk, taqtax qalbek jekk qed tissielet maʼ xi dgħjufija jew xewqa ħażina, għax ilkoll kemm aħna rridu ‘nsawtu’ lilna nfusna sabiex nibqgħu leali lejn Ġeħova. (1 Korintin 9:27) Tabilħaqq, huwa meta ma nkunux qed nissaraw li għandna nkunu konċernati!

21. Liema hu l-​uniku mod li bih nistgħu noħorġu rebbiħin fil-​ġlieda spiritwali tagħna?

²¹ Iktar minn hekk, ma nistgħux nirbħu din il-​ġlieda bis-​saħħa tagħna. Għalhekk, Pawlu jfakkarna dwar il-​bżonn li nitolbu lil Ġeħova “f’kull okkażjoni bl-​ispirtu.” Fl-​istess ħin, għandna nisimgħu lil Ġeħova billi nistudjaw il-​Kelma tiegħu u nassoċjaw mas-​‘suldati’ sħabna f’kull opportunità, għaliex m’aħniex f’din il-​ġlieda waħedna! (Filemon 2; Ebrej 10:24, 25) Dawk li huma leali f’dawn l-​oqsma kollha mhux talli se joħorġu rebbiħin imma talli jkunu kapaċi jiddefendu b’mod sod il-​fidi tagħhom meta din tiġi sfidata.

KUN LEST LI TIDDEFENDI L-​FIDI TIEGĦEK

22, 23. (a) Għala għandna nkunu dejjem lesti li niddefendu l-​fidi tagħna, u liema mistoqsijiet għandna nistaqsu lilna nfusna? (b) Liema suġġett se jiġi kunsidrat fil-​kapitlu li jmiss?

²² “Għax m’intomx parti mid-​dinja,” qal Ġesù, “tobgħodkom id-​dinja.” (Ġwanni 15:19) Għalhekk, il-​Kristjani dejjem għandhom ikunu lesti li jiddefendu l-​fidi tagħhom u li jagħmlu dan b’rispett u b’temperament ġwejjed. (1 Pietru 3:15) Staqsi lilek innifsek: ‘Nifhem għala x-​Xhieda taʼ Ġeħova kultant jieħdu waqfa li tmur kontra l-​opinjoni popolari? Meta niffaċċja l-​isfida taʼ waqfa bħal din, konvint bis-​sħiħ jien li dak li tgħid il-​Bibbja u l-​klassi taʼ l-​ilsir leali huwa sewwa? (Mattew 24:45; Ġwanni 17:17) U meta jkolli nagħmel dak li hu tajjeb f’għajnejn Ġeħova, inħoss li jien mhux biss lest li nkun differenti imma wkoll kburi għax jien differenti?’—Salm 34:2; Mattew 10:32, 33.

²³ Però, spiss ix-​xewqa tagħna li nibqgħu separati mid-​dinja tiġi testjata b’modi iktar sottili. Per eżempju, kif semmejna qabel, ix-​Xitan jipprova jħajjar lill-​qaddejja taʼ Ġeħova lejn id-​dinja permezz taʼ divertiment dinji. Kif nistgħu nagħżlu divertiment bnin li se jħallina mistriħin u b’kuxjenza nadifa? Dan is-​suġġett se jiġi kunsidrat fil-​kapitlu li jmiss.

[Noti taʼ taħt]

[Kaxxa f’paġna 52]

IN-​NEWTRALITÀ TAL-​KRISTJANI TAL-​BIDU

L-​istorja sekulari tipprovdi biżżejjed evidenza li l-​Kristjani tal-​bidu baqgħu newtrali politikament u ma ħadux sehem fi gwerer. Il-​ktieb The Beginnings of Christianity jgħid: “Il-​fundaturi tal-​Kristjanità għassu b’reqqa kbira kontra xi inklinazzjoni li setgħet tiżviluppa biex ikollhom xi sehem dirett maʼ xi partit politiku stabbilit.” B’mod simili, il-​ktieb On the Road to Civilization jgħid: “Il-​Kristjanità tal-​bidu xi drabi ftit kienet mifhuma u ma kinitx tinżel tajjeb maʼ dawk li ħakmu d-​dinja pagana. . . . Il-​Kristjani rrifjutaw li jieħdu sehem f’ċerti obbligi taċ-​ċittadini Rumani. . . . Ma kinux joħorġu għall-​politika.”

Rigward il-​Kristjani tal-​bidu u s-​servizz militari, it-​teologu Ġermaniż Peter Meinhold qal: “Kien meqjus bħala inkompatibbli li wieħed ikun Kristjan u suldat fl-​istess ħin.” Jonathan Dymond, kittieb dwar ir-​reliġjon, fl-​esej tiegħu, “An Inquiry Into the Accordancy of War With the Principles of Christianity” (Inkjesta Dwar il-​Qbil tal-​Gwerra mal-​Prinċipji tal-​Kristjanità) kiteb li għal xi żmien wara l-​mewt taʼ Ġesù, is-​segwaċi Tiegħu “rrifjutaw li jieħdu sehem fi [gwerer]; kienu x’kienu l-​konsegwenzi, sew jekk kienu tmaqdir, tfigħ il-​ħabs, jew mewt.” Dymond żied jgħid: “Ħadd ma jistaʼ jiċħadhom dawn il-​fatti.” Kittieb ieħor qal, kien biss meta “l-​Kristjanità saret korrotta” li l-​Kristjani saru suldati.

[Kaxxa/​Stampa f’paġna 55]

JIEN QED NIBQAʼ NEWTRALI?

Prinċipju: “Is-​saltna tiegħi mhix parti minn din id-​dinja.”—Ġwanni 18:36.

Xi mistoqsijiet biex tistaqsi lilek innifsek

▪ Kif nistaʼ nispjega għala t-​tislim tal-​bandiera huwa tip taʼ qima taʼ l-​idoli?c—Eżodu 20:4, 5; 1 Ġwanni 5:21.

▪ Meta nispjega għala ma niħux sehem f’ċerti ċerimonji nazzjonali, kif nistaʼ nuri r-​rispett profond tiegħi lejn dawk li m’humiex taʼ l-​istess twemmin tiegħi?—1 Pietru 3:15.

▪ X’inhuma r-​raġunijiet tiegħi għala ma nappoġġa ebda partit politiku jew għala ma nwettaq ebda tip taʼ servizz militari?—Ġwanni 13:34; 1 Ġwanni 3:10-12.

[Nota taʼ taħt]

[Stampa f’paġna 57]

L-​apparenza tiegħi ġġib unur lil Ġeħova?