Il-​Bnedmin Isalvaw mid-​Dilluvju

HEKK kif il-​bnedmin bdew joktru, id-​dnub u l-​ħażen inxterdu malajr fuq l-​art. Enok, li kien waħdu bħala profeta, wissa li Alla xi darba kien se jeqred lin-​nies mill-​agħar. Xorta waħda, il-​ħażen baqaʼ jeżisti u saħansitra żdied. Xi anġli rribellaw kontra Ġeħova billi telqu l-​post li tahom Alla fis-​sema, ħadu forma taʼ bnedmin fuq l-​art, u b’regħba ħadu lil xi nisa b’marthom. Din l-​għaqda mhux naturali pproduċiet ulied li kellhom saħħa taʼ barra minn hawn—ġganti li kienu jgħakksu lil oħrajn u li kienu msejħin Nefilim. Minħabba fihom, il-​vjolenza u t-​tixrid taʼ demm żdiedu ferm fid-​dinja. Alla ħassu mweġġaʼ ħafna li jara l-​ħolqien tiegħu fuq l-​art jiġi rovinat.

Wara li miet Enok, kien hemm raġel wieħed li kien jispikka f’dik id-​dinja mill-​agħar. Kien jismu Noè. Hu u familtu pprovaw jagħmlu dak li hu sewwa f’għajnejn Alla. Meta Alla ddeċieda li jeqred lin-​nies mill-​agħar taʼ dik id-​dinja, hu ried jipproteġi lil Noè u lill-​annimali. Għalhekk, Alla qallu biex jibni arka—bastiment enormi forma taʼ kaxxa rettangolari. Fiha, Noè u familtu, flimkien maʼ ħafna speċi t’annimali, kienu se jinżammu ħajjin waqt dilluvju li kien ġej mad-​dinja kollha. Noè obda lil Alla. Matul l-​għaxriet taʼ snin li Noè qattaʼ jibni din l-​arka, hu kien ukoll “predikatur tal-​ġustizzja.” (2 Pietru 2:5) Hu wissa lin-​nies dwar id-​Dilluvju li kien ġej, imma dawn ma tawx kasu. Imbagħad wasal iż-​żmien biex Noè u familtu jidħlu fl-​arka mal-​annimali. Alla għalaq il-​bieb tal-​arka warajhom u bdiet nieżla x-​xita.

Ix-​xita niżlet bil-​qliel għal 40 jum u 40 lejl sakemm l-​art kollha kienet mgħarrqa. In-​nies mill-​agħar inqerdu. Xhur wara, hekk kif l-​ilmijiet bdew jonqsu, l-​arka straħet fuq muntanja. Kienu ilhom sena sħiħa fl-​arka meta sa fl-​aħħar il-​passiġġieri setgħu joħorġu minnha qawwijin u sħaħ. B’ringrazzjament, Noè ppreżenta offerta lil Ġeħova. Alla wieġbu billi aċċerta lil Noè u lil familtu li Hu qatt ma kien se jerġaʼ jġib dilluvju biex jeqred lill-​ħajja kollha minn fuq wiċċ l-​art. Ġeħova pprovda l-​qawsalla bħala garanzija viżibbli, tfakkira taʼ din il-​wegħda taʼ faraġ.

Wara d-​Dilluvju, Alla ta wkoll lill-​bnedmin xi kmandi ġodda. Hu tahom permess li jieklu mil-​laħam tal-​annimali. Madankollu, ipprojbixxa li jittiekel id-​demm. Hu kkmanda wkoll lid-​dixxendenti taʼ Noè biex jinxterdu mal-​art kollha, imma xi wħud m’obdewx. In-​nies ngħaqdu flimkien taħt mexxej imsejjaħ Nimrod u bdew jibnu torri kbir fil-​belt taʼ Babel, iktar tard imsejħa Babilonja. Il-​mira tagħhom kienet li jisfidaw il-​kmand t’Alla biex jinxterdu mal-​art kollha. Imma Alla fixkel lir-​ribelli billi ħawdilhom l-​unika lingwa li kellhom u ġegħelhom jitkellmu b’ilsna differenti. Peress li ma setgħux jikkomunikaw bejniethom, huma abbandunaw il-​proġett u tferrxu maʼ kullimkien.

—Ibbażat fuq Ġenesi kapitli 6 sa 11; Ġuda 14, 15.