“Obdi, Jekk Jogħġbok, Minn Leħen Ġeħova”

1, 2. Dawk li jsegwu ‘t-​triq popolari,’ spiss x’attitudni jkollhom, u int għaliex għandek tkun differenti?

L-​UBBIDJENZA mhijiex popolari fid-​dinja tal-​lum. Ħafna lanqas ma jieħdu deċiżjonijiet skont gwida ġenerali, bħal ‘Agħmel dak li hu tajjeb.’ Anzi fil-​qosor tistaʼ tgħid li r-​raġunar tagħhom hu ‘Agħmel li trid’ jew ‘L-​aqwa li ma tinqabadx.’ Int tistaʼ tara dan meta sewwieqa ma jobdux il-​liġijiet tat-​traffiku, investituri jiksru l-​istatuti finanzjarji, u uffiċjali għoljin jiksru l-​liġijiet li huma stess forsi għenu biex jintgħamlu. Anki fi żmien Ġeremija, kien komuni li n-​nies jiġru fit-​“triq l-​iktar popolari,” avolja dan hu ħażin u taʼ ħsara.—Ġer. 8:6.

² Int tirrealizza li dawk li jixtiequ l-​approvazzjoni t’Alla li Jistaʼ Kollox ma jistgħux jaqbdu u jsegwu ‘t-​triq popolari.’ B’mod sinifikanti, Ġeremija għamel kuntrast bejn dawk li ‘m’obdewx leħen Ġeħova’ u dawk li riedu Jobduh. (Ġer. 3:25; 7:28; 26:13; 38:20; 43:4, 7) Aħna għandna nanalizzaw individwalment il-​waqfa tagħna f’dan ir-​rigward. Għala? L-​attakki taʼ Satana fuq l-​integrità tal-​aduraturi veri saru tassew ħorox. Hu qisu serp li jissajja għall-​priża u ħabta u sabta jattakka b’gidma li tistaʼ toqtol. Id-​determinazzjoni tagħna biex nobdu leħen Ġeħova tgħinna nitbiegħdu mis-​snien velenużi taʼ dak is-​serp. Imma kif nistgħu nsaħħu d-​determinazzjoni tagħna biex nobdu ’l Ġeħova? Il-​kitbiet taʼ Ġeremija jistgħu jgħinuna.

Il-​WIEĦED LI GĦANDNA D-​DMIR NOBDU

3. Ġeħova għala jistħoqqlu l-​ubbidjenza tagħna?

³ Ġeħova għala jistħoqqlu l-​ubbidjenza sħiħa tagħna? Ġeremija juri raġuni waħda billi jsejjaħlu “Dak li għamel l-​art bil-​qawwa tiegħu, li b’għerfu waqqaf l-​art produttiva fis-​sod.” (Ġer. 10:12) Ġeħova hu s-​Sovran tal-​univers. Għandu jkollna l-​biżaʼ tiegħu, iktar milli jkollna lejn kull ħakkiem ieħor. Hu għandu d-​dritt assolut jistenna minna li naġixxu fi qbil mal-​kmandi għaqlin tiegħu, li fil-​fatt huma fl-​aħjar interessi dejjiema tagħna.—Ġer. 10:6, 7.

4, 5. (a) X’verità tgħallmu l-​Lhud matul żminijiet taʼ nixfa? (b) L-​abitanti taʼ Ġuda kif ħlew “l-​ilma ħaj” mingħand Ġeħova? (ċ) Kif tistaʼ tixrob “l-​ilma ħaj” li jipprovdi Alla?

⁴ Iżda Ġeħova, minbarra li hu l-​Ħakkiem Universali, hu wkoll is-​Sostenitur tal-​ħajja—il-​ħajja tagħna. Dan intgħamel ċar b’mod drammatiku lil-​Lhud taʼ żmien Ġeremija. L-​art tal-​Eġittu ddependiet ħafna mill-​ilmijiet taʼ xmara, in-​Nil, imma s-​sitwazzjoni kienet differenti fl-​Art Imwiegħda. Fil-​biċċa l-​kbira, il-​poplu t’Alla ddependa minn xita tal-​istaġuni, u spiss ħażen l-​ilmijiet żejda fi ġwiebi taħt l-​art. (Dt. 11:13-​17) Ġeħova biss setaʼ jibgħat ix-​xita biex din ixxarrab il-​ħamrija ħalli tipproduċi. Mill-​banda l-​oħra, setaʼ wkoll iżomm lura x-​xita meħtieġa. B’hekk, fi żmien Ġeremija, il-​Lhud diżubbidjenti esperjenzaw nixfa devastanti waħda wara l-​oħra u dawn ħallew l-​għelieqi u d-​dwieli xotti għall-​aħħar u l-​bjar u l-​ġwiebi tagħhom vojta.—Ġer. 3:3; 5:24; 12:4; 14:1-​4, 22; 23:10.

⁵ Waqt li dawk il-​Lhud apprezzaw l-​ilma letterali, huma rrifjutaw “l-​ilma ħaj” li Ġeħova offrielhom b’mod ġeneruż. Huma għamlu dan billi minn jeddhom m’obdewx il-​Liġi t’Alla u billi straħu fuq alleanzi mal-​ġnus taʼ madwarhom. Bħal dawk li meta jiskarsa l-​ilma jferrgħuh f’ġiebja mxaqqa li ma tistax iżżomm l-​ilma fiha, il-​Lhud batew il-​konsegwenzi. (Aqra Ġeremija 2:13; 17:13.) Aħna żgur li għandna raġun li ma nġibux gwaj kbir fuqna stess billi naġixxu bħalhom. Ġeħova jibqaʼ jipprovdilna abbundanza taʼ gwida bbażata fuq il-​Kelma mnebbħa tiegħu. Ovvjament, dak “l-​ilma ħaj” hu taʼ benefiċċju għalina jekk biss nistudjawh regolarment u nħabirku biex ngħixu fi qbil miegħu.

6. (a) Iddeskrivi l-​attitudni tas-​Sultan Sedekija lejn li jobdi lil Ġeħova. (b) Għaliex taħseb li s-​sultan ma kienx għaqli?

⁶ Hekk kif qorob jum ir-​rendikont t’Alla maʼ Ġuda, l-​ubbidjenza saret iktar u iktar importanti. Jekk Lhud individwali riedu jirċievu l-​approvazzjoni u l-​protezzjoni taʼ Ġeħova, kellhom jindmu u jibdew jobduh. Is-​Sultan Sedekija ffaċċja din l-​għażla. Hu ma kienx sod għal dak li hu tajjeb. Meta dawk taʼ taħtu qalulu li riedu joqtlu lil Ġeremija, hu ma kellux il-​ħila jiqfilhom. Bħalma rajna fil-​kapitlu taʼ qabel, il-​profeta salva minn dan l-​attentat fuq ħajtu bl-​għajnuna t’Għebed-​melek u iktar tard hu ħeġġeġ lil Sedekija: “Obdi, jekk jogħġbok, minn leħen Ġeħova.” (Aqra Ġeremija 38:4-​6, 20.) Jidher ċar li għall-​ġid tiegħu stess, is-​sultan kellu jiddeċiedi: Se nobdi jien lil Alla?

L-​UBBIDJENZA LEJN ĠEĦOVA HIJA KWISTJONI URĠENTI

7. X’inhuma xi sitwazzjonijiet fejn tistaʼ tiġi mġarrba l-​ubbidjenza tiegħek?

⁷ L-​ubbidjenza hija importanti llum daqskemm kienet fi żmien Ġeremija. Kemm hi b’saħħitha d-​determinazzjoni tiegħek biex tobdi lil Ġeħova? Jekk bi żball tara websajt pornografiku fuq l-​Internet, se tibqaʼ tħares lejh jew se tiġġieled kontra kwalunkwe tentazzjoni u toħroġ minnu? Xi ngħidu jekk xi ħadd li ma jemminx fuq ix-​xogħol jew fl-​iskola jistaqsik toħroġ miegħu? Kapaċi tirrifjutah? Letteratura jew siti fuq l-​Internet li huma apostati kieku jħajruk jew jimbottawk? F’dawn is-​sitwazzjonijiet u f’oħrajn, żomm f’moħħok il-​kliem taʼ Ġeremija 38:20.

8, 9. (a) Għaliex hu għaqli li tagħti widen meta l-​anzjani jipprovaw jgħinuk? (b) Kif għandek tħares lejn il-​parir li tingħata iktar minn darba mill-​anzjani?

⁸ Ġeħova spiss bagħat lil Ġeremija għand il-​poplu Tiegħu bi tħeġġiġ bħal: “Duru lura, jekk jogħġobkom, kull wieħed minnkom minn triqtu l-​ħażina, u rranġaw triqatkom u l-​għemejjel tagħkom.” (Ġer. 7:3; 18:11; 25:5; aqra Ġeremija 35:15.) B’mod simili, l-​anzjani Kristjani llum jagħmlu l-​almu tagħhom biex jgħinu lill-​aduraturi sħabhom li jkunu f’periklu spiritwali. Jekk xi darba l-​anzjani jagħtuk parir biex tevita li taġixxi b’nuqqas t’għaqal jew b’mod żbaljat, agħtihom widen. Il-​mira tagħhom hi bħal dik taʼ Ġeremija.

⁹ L-​anzjani jafu jfakkruk fi prinċipji Skritturali li diġà wrewk. Ifhem li qatt mhu faċli li tirripeti l-​istess parir, imma dan isir jerġaʼ iktar diffiċli jekk dak li jeħtieġ l-​għajnuna juri attitudni bħal dik taʼ ħafna mil-​Lhud li semgħu lil Ġeremija. Ipprova ħares lejn l-​isforzi ripetuti tal-​anzjani bħala turijiet tal-​imħabba taʼ Ġeħova. Agħraf ukoll li Ġeremija ma kienx ikollu għalfejn jirripeti t-​twissijiet tiegħu kieku l-​Lhud laqgħu kliemu. Iva, tistaʼ tevita li terġaʼ tingħata l-​istess parir billi tapplika l-​parir fil-​pront.

IL-​MAĦFRA TAʼ ĠEĦOVA—MOGĦTIJA B’ĠENEROŻITÀ IMMA MHIX AWTOMATIKA

10. Ġeħova għala ma jaħfirx id-​dnubiet kif ġieb u laħaq?

¹⁰ Ma nistgħux nobdu lil Ġeħova b’mod perfett f’din is-​sistema, nipprovaw kemm nipprovaw. Għalhekk, nirringrazzjawh talli hu lest li jaħfer in-​nuqqasijiet tagħna. Xorta waħda hu ma jiskużaniex kif ġieb u laħaq. Għala le? Għax id-​dnub hu xi ħaġa li Ġeħova ma jġerragħx. (Is. 59:2) Minħabba dan, hu jrid ikun ċert li aħna jistħoqqilna l-​maħfra tiegħu.

11. Għala hu impossibbli li tgħaddiha lixxa fejn jidħlu dnubiet bil-​moħbi?

¹¹ Bħalma semmejna, ħafna Lhud fi żmien Ġeremija ħaduha drawwa li ma jobdux lil Alla, u b’hekk abbużaw mill-​paċenzja u l-​ħniena tiegħu. Jistaʼ qaddej t’Alla llum jiżviluppa tendenza simili? Iva, jekk hu jew hi tinjora t-​tfakkiriet taʼ Ġeħova u tibda tidneb. F’xi każi, dan ġara fil-​beraħ, bħal meta xi ħadd jidħol fi żwieġ fejn wieħed mill-​imseħbin, jew it-​tnejn li huma, mhuwiex ħieles skritturalment biex jerġaʼ jiżżewweġ. Imma anki jekk dnub isir bil-​moħbi, dak li mhux qed jobdi lil Ġeħova qiegħed fi triq perikoluża. Individwu li jgħix ħajja doppja għandu mnejn jaħseb, ‘Mhux se ninqabad.’ Però, ir-​realtà hi li Alla jgħarrex fl-​imħuħ u fil-​qlub u jistaʼ jara x’jiġri bejn erbaʼ ħitan. (Aqra Ġeremija 32:19.) X’għandu jsir jekk xi ħadd tassew m’obdiex lil Alla?

12. L-​anzjani kultant xi jkollhom jagħmlu biex jipproteġu l-​kongregazzjoni?

¹² Ħafna Lhud ħarsu b’disprezz lejn l-​għajnuna li offra Ġeħova darba wara l-​oħra permezz taʼ Ġeremija. Bl-​istess mod, wieħed li jkun ħati taʼ dnub serju llum għandu mnejn ma jindimx u jiċħad l-​għajnuna tal-​anzjani. F’dan il-​każ, l-​anzjani jkollhom isegwu d-​direzzjoni Skritturali biex jipproteġu l-​kongregazzjoni billi jaqtgħu lill-​midneb mis-​sħubija. (1 Kor. 5:11-​13; ara l-​kaxxa “Ħajja Mingħajr Liġi,” f’paġna 73.) Imma jfisser dan li m’hemmx tama għalih u li qatt ma jistaʼ jerġaʼ jikseb il-​favur taʼ Ġeħova? Le. L-​Iżraelin kienu ilhom ribellużi; xorta waħda Alla qal: “Erġgħu lura, ulied ribelli. Jien infejjaqkom mill-​qagħda ribelluża li tinsabu fiha.” (Ġer. 3:22)a Ġeħova jistieden lill-​midinbin biex jerġgħu lura għandu. Tabilħaqq, hu jidderiġihom biex jagħmlu dan.

OBDI LIL ĠEĦOVA BILLI TERĠAʼ LURA GĦANDU

13. Jekk xi ħadd irid jerġaʼ lura għand Ġeħova, xi jrid jirrikonoxxi?

¹³ Sabiex jerġaʼ lura għand Alla, kif qal Ġeremija, hemm bżonn li dak li jkun jistaqsi lilu nnifsu, ‘X’għamilt?’ Imbagħad, fid-​dawl tal-​livelli Skritturali għandu jaċċetta t-​tweġiba onesta. Il-​Lhud fi żmien Ġeremija li ma nidmux evitaw din il-​mistoqsija. Huma rrifjutaw li jagħrfu sa liema punt kienu dinbu, allura Ġeħova ma ħafrilhomx għax ma setax jaħfrilhom. (Aqra Ġeremija 8:6.) B’kuntrast, midneb niedem jirrikonoxxi li billi m’obdiex lil Ġeħova, hu ġab tkażbir fuq isem Alla u fuq il-​kongregazzjoni Kristjana. Dak li tassew ikun niedem ikun ukoll imnikket għall-​aħħar minħabba l-​ħsara li setaʼ għamel lil nies innoċenti. Għandu jagħraf li t-​talba tiegħu għall-​maħfra se tkun biss taʼ valur għal Ġeħova meta jirrikonoxxi l-​effett sħiħ tal-​għemejjel ħżiena tiegħu. Xorta waħda, li wieħed jerġaʼ jkun approvat minn Alla jinvolvi iktar minn hekk.

14. Persuna kif ‘terġaʼ lura għand Ġeħova’? (Inkludi l-​kaxxa “X’Inhi l-​Indiema?”)

¹⁴ Bniedem tassew niedem jifli l-​motivi, ix-​xewqat, u d-​drawwiet tiegħu. (Aqra Lamentazzjonijiet 3:40, 41.) Hu se jeżamina aspetti f’ħajtu fejn juri dgħufija, bħal pereżempju, il-​ħbiberija tiegħu maʼ tas-​sess oppost, l-​użu tiegħu tal-​alkoħol jew it-​tabakk, l-​użu tal-​Internet, jew l-​attivitajiet tan-​negozju. L-​istess bħalma mara tad-​dar togħrok anke l-​irkejjen moħbijin fil-​kċina biex iżżomm darha nadifa u sanitarja, bniedem niedem għandu jaħdem iebes biex inaddaf ħsiebu u l-​azzjonijiet persunali tiegħu. Għandu ‘jerġaʼ lura għand Ġeħova’ billi jagħmel dak li jistenna minnu Alla u jġib ħajtu fi qbil mal-​livelli Tiegħu. Xi Lhud fi żmien Ġeremija reġgħu lura għand Ġeħova “b’mod falz.” Huma għamlu tabirruħhom li kien iddispjaċiehom imma qatt ma biddlu qalbhom jew ħajjithom. (Ġer. 3:10) Kuntrarju għalihom, dak li ġenwinament jitlob għall-​maħfra ma jipprovax jidħaq b’Ġeħova jew bil-​kongregazzjoni Tiegħu. Minflok ma sempliċement ikun irid jiġbor ġieħu jew jerġaʼ jikseb is-​sħubija tal-​qraba jew oħrajn fil-​verità, hu jrid jagħti dahru kompletament għall-​affarijiet ħżiena li għamel u juri li jistħoqqlu l-​maħfra u l-​favur t’Alla.

15. X’tip taʼ talb joffri lil Alla bniedem li tassew ikun niedem?

¹⁵ It-​talb huwa parti vitali mill-​indiema. Fil-​qedem, kien komuni li n-​nies jgħollu jdejhom lejn is-​sema meta jitolbu. Illum, meta xi ħadd li tassew ikun niedem jitlob, hu ‘jgħolli qalbu flimkien maʼ jdejh fit-​talb lil Alla,’ kif esprimieha Ġeremija. (Lam. 3:41, 42) Il-​fatt li l-​midneb niedem iħossu dispjaċut jimmotivah biex iġib il-​kondotta tiegħu fi qbil mat-​talba għall-​maħfra. It-​talb tiegħu hu sinċier għax ġej mill-​fond taʼ qalbu.

16. Għala hu raġunevoli li terġaʼ lura għand Alla?

¹⁶ Bla dubju, int tirrealizza li midneb li verament jammetti l-​iżbalji tiegħu jistaʼ jkollu jegħleb il-​kburija tiegħu. Imma din hi xi ħaġa importanti: Ġeħova jrid lill-​midinbin jerġgħu lura għandu. Meta Alla jara sogħba ġenwina f’qalb il-​bniedem, qalbu stess tintmess. Hu ‘jitqanqal’ b’sentimenti teneri għax irid jaħfer lil kull min jindem minn dnubietu, l-​istess kif għamel lill-​Iżraelin li reġgħu lura mill-​eżilju. (Ġer. 31:20) Kemm hu rassiguranti li nkunu nafu li Alla joffri paċi u tama lil dawk li jobduh! (Ġer. 29:11-​14) Huma jistgħu għal darb’oħra jkollhom post fost il-​qaddejja devoti t’Alla.

L-​UBBIDJENZA TISTAʼ TIPPROTEĠIK

17, 18. (a) Min kienu r-​Rekabin? (b) Kif jidher f’paġna 77, għal xiex huma magħrufin?

¹⁷ L-​ubbidjenza sħiħa lejn Ġeħova hija l-​iktar ħaġa għaqlija. Nistgħu naraw dan mill-​eżempju tar-​Rekabin fi żmien Ġeremija. Iktar minn żewġ sekli qabel, l-​antenat Keni tagħhom Ġeħonadab, li lealment ħa waqfa favur Ġeħu, kien tahom għadd taʼ kmandi restrittivi. Wieħed minnhom kien biex ma jixorbux inbid. Ġeħonadab kien ilu mejjet, imma r-​Rekabin baqgħu jobduh. Biex jipprovahom, Ġeremija ħadhom f’kamra tal-​ikel fit-​tempju, poġġa l-​inbid quddiemhom, u ħeġġiġhom jixorbu. Huma qalulu: “M’aħniex se nixorbu nbid.”—Ġer. 35:1-​10.

¹⁸ Għar-​Rekabin kien importanti li jobdu lill-​antenat tagħhom li kien ilu mejjet. B’diliġenza saħansitra akbar, l-​aduraturi veri għandhom jobdu l-​kmandi tal-​Alla l-​ħaj. Id-​determinazzjoni tar-​Rekabin biex jobdu impressjonat lil Ġeħova, u għamlithom jispikkaw bħala differenti ħafna mil-​Lhud diżubbidjenti. Alla wiegħed lir-​Rekabin li jipproteġihom mill-​gwaj li kien riesaq. Jekk napplikaw din il-​lezzjoni llum, mhuwiex raġunevoli li dawk li jobdu lil Ġeħova bis-​sħiħ huma assigurati mill-​protezzjoni tiegħu matul it-​tribulazzjoni l-​kbira?—Aqra Ġeremija 35:19.

DAWK LI JOBDU LIL ĠEĦOVA MHUMIEX WAĦEDHOM

19. Alla xi protezzjoni jistaʼ jagħtik jekk tobdih?

¹⁹ Il-​ħarsien protettiv t’Alla għall-​poplu tiegħu m’għandux jitqies bħala xi ħaġa tal-​passat. Anke issa, Ġeħova jipproteġi lil dawk ubbidjenti minn periklu spiritwali. Bħalma sur għoli pproteġa lill-​bliet tal-​qedem minn attakk, hekk il-​liġi t’Alla tipproteġi ’l dawk li jistudjawha u jibqgħu japplikawha. Se tibqaʼ int wara s-​sur protettiv tal-​liġijiet morali t’Alla? Tistaʼ tkun ċert li jaħbatlek tajjeb jekk tagħmel hekk. (Ġer. 7:23) Ħafna esperjenzi jagħtu prova taʼ dan.—Ara l-​kaxxa “L-​Ubbidjenza Lejn Ġeħova Ġġib il-​Protezzjoni.”

20, 21. (a) Minn xiex tistaʼ tkun ċert hekk kif taqdi lil Ġeħova? (b) Is-​Sultan Ġeħojakim kif irreaġixxa għall-​messaġġ t’Alla permezz taʼ Ġeremija?

²⁰ L-​opponenti jagħmluha taʼ sfida li taqdi lil Alla, kemm jekk huma fil-​familja, kemm fuq il-​post tax-​xogħol jew tal-​iskola, kif ukoll fost l-​awtoritajiet fejn tgħix. Iżda, tistaʼ tkun ċert li jekk dejjem tobdi bis-​sħiħ lil Ġeħova, hu se jappoġġak anke fl-​iktar sitwazzjonijiet diffiċli. Tinsiex—Alla wiegħed li jappoġġa lil Ġeremija matul l-​oppożizzjoni ħarxa li kien se jiffaċċja, u Ġeħova proprju hekk għamel. (Aqra Ġeremija 1:17-​19.) Waħda mid-​drabi li l-​appoġġ t’Alla deher ċar kien fi żmien is-​Sultan Ġeħojakim.

²¹ Ftit kien hemm ħakkiema t’Iżrael li opponew il-​kelliema t’Alla daqskemm opponiehom b’qilla Ġeħojakim. Nistgħu naraw dan fil-​każ tal-​profeta Urija, li kien jgħix fi żmien Ġeremija. Is-​sultan mill-​agħar Ġeħojakim kien lest li jaqsam fruntieri internazzjonali biex jaqbdu. Meta l-​profeta taʼ Ġeħova, Urija, inġieb lura, is-​sultan qatlu. (Ġer. 26:20-​23) Fir-​rabaʼ sena tal-​ħakma taʼ Ġeħojakim, Ġeħova kkmanda lil Ġeremija biex iniżżel bil-​miktub il-​kliem kollu li Hu kien qal sa dak iż-​żmien u biex imbagħad jaqrah b’leħen għoli fit-​tempju. Ġeħojakim akkwista r-​romblu taʼ Ġeremija u qabbad lil uffiċjal tas-​sultan jaqrahulu. Waqt il-​qari, is-​sultan qattaʼ d-​dokument u xeħtu biċċa biċċa fin-​nar, avolja xi prinċpijiet ħeġġewh biex ma jagħmilx dan. Imbagħad, bagħat xi rġiel biex jarrestaw lil Ġeremija u lil Baruk. X’ġara? “Ġeħova żammhom moħbijin.” (Ġer. 36:1-​6; aqra Ġeremija 36:21-​26.) Ġeħova ma ħalliex lil Ġeħojakim jagħmel ħsara lil dawk iż-​żewġt irġiel leali.

22, 23. X’titgħallem dwar l-​appoġġ t’Alla mill-​esperjenza taʼ Xhud fl-​Asja ċentrali?

²² Jekk jidhirlu li hu xieraq, Ġeħova jistaʼ jaħbi wkoll lill-​qaddejja tiegħu llum mill-​periklu. Imma iktar spiss, hu jagħtihom il-​kuraġġ u l-​għerf biex jobduh u jibqgħu jippritkaw l-​aħbar tajba. Omm waħedha li se nsejħulha Gulistan għandha erbat itfal. Hi kellha l-​appoġġ taʼ Ġeħova. Għal xi żmien, kienet l-​unika Xhud f’territorju kbir fl-​Asja ċentrali fejn l-​awtoritajiet jopponu l-​ippritkar tas-​Saltna. L-​iktar kongregazzjoni fil-​viċin hi iktar minn 400 kilometru ’l bogħod, u għalhekk Gulistan rari jkollha s-​sħubija taʼ Kristjani maturi. Minkejja l-​oppożizzjoni u problemi oħrajn, hi tipprietka minn dar għal dar u ssib ħafna wħud interessati. Skont rapport reċenti, kienet qed tikkonduċi studji tal-​Bibbja maʼ xi 20 persuna u tieħu ħsieb grupp taʼ nagħaġ li dejjem jikber taʼ Ġeħova.

²³ L-​istess bħalma għen lil Ġeremija u lil Xhieda bħal Gulistan, Alla lest li jgħin lilek u lill-​qaddejja ubbidjenti oħrajn tiegħu. Kun determinat li tobdi lilu bħala Ħakkiem u mhux lill-​bnedmin. Imbagħad, l-​oppożizzjoni u ostakli oħrajn mhumiex se jżommuk lura milli tfaħħar pubblikament lill-​uniku Alla veru quddiem dawk fit-​territorju tiegħek.—Ġer. 15:20, 21.

24. Kif tistaʼ tibbenefika issa jekk tobdi?

²⁴ Il-​ferħ u s-​sodisfazzjon veru fil-​ħajja ma jistgħux jinkisbu jekk ngħixu ħajja indipendenti mill-​Ħallieq tagħna. (Ġer. 10:23) Wara li studjajt dak li kiteb Ġeremija dwar l-​ubbidjenza, qed tara xi modi kif tistaʼ tħalli lil Ġeħova jidderieġi l-​passi tiegħek iktar bis-​sħiħ? Il-​kmandi tiegħu jifformaw l-​unika gwida għall-​għajxien li twassal għal ferħ u suċċess taʼ veru. “Obdu minn leħni,” iħeġġeġ Ġeħova, “sabiex jaħbtilkom tajjeb.”—Ġer. 7:23.