Isalva lill-​Art Minn Rovina

DARBA, ilu fl-​istorja umana, Alla salva lill-​art minn rovina minn idejn il-​bniedem. Hu għamel dan permezz taʼ dulluvju globali fi żmien Noè. Ma għandna l-​ebda rekord li l-​bniedem kien qed jirrovina l-​ambjent fiżiku f’dak iż-​żmien. Imma l-​art kienet irrovinata b’mod ieħor sal-​punt li Alla ħass li kien jinħtieġ jaġixxi bl-​akbar severità.

Il-Bibbja tirrapporta: “L-​art ġiet li hi rrovinata fil-​ħarsa tal-​veru Alla u l-​art saret mimlija bil-​vjolenza. Mela Alla ra l-​art u, ħares! kienet irrovinata, għaliex il-​laħam kollu kien irrovina l-​mogħdija tiegħu fuq l-​art.” (Ġenesi 6:4, 11, 12) Iva, fi żmien Noè Alla ħares lejn l-​art bħala li kienet irrovinata minħabba l-​vjolenza u l-​ħażen tal-​bniedem.

Bl-istess mod, meta Iżrael tal-​qedem beda jieħu pussess tal-​Art Imwiegħda, Alla wissa: “Ma tridux tniġġsu l-​art li fiha qegħdin; għaliex hu d-​demm li jniġġes lill-​art . . . U ma tridux tħammġu l-​art.” (Numri 35:33, 34) B’hekk, Kangħan kienet irrovinata minħabba l-​ħtija tad-​demm tal-​abitanti tagħha. Eżempju orribbli taʼ dan kien il-​prattika tagħhom taʼ li jissagrifikaw tfal żgħar lill-​allat tagħhom.

Il-Kangħaniti kienu wkoll immorali ħafna, u dan ukoll effettwa l-​ħarsa t’Alla lejn l-​art. Hu wissa lil Iżrael: “Tagħmlux lilkom infuskom mhux nodfa b’xi [prattiċi immorali] bħal dawn, għaliex b’dawn l-​affarijiet kollha l-​ġnus li qed inkeċċi minn quddiemkom għamlu lilhom infushom mhux nodfa. Għaldaqstant l-​art hija mhux nadifa, u . . . l-​art se tirriġetta ’l barra lill-​abitanti tagħha.” (Levitiku 18:24, 25) L-​immoralità u t-​tixrid tad-​demm irrovinaw lil Kangħan sal-​punt li Alla qered lill-​ġnus Kangħaniti.

L-​Irrovinar tal-​Art

Xi ngħidu għal-​lum? M’aħniex aħna ngħixu f’era taʼ vjolenza bla kontroll, tixrid taʼ demm, u immoralità? Jagħmel x’jagħmel il-​bniedem biex jipprova jirranġa l-​ħsara li huwa għamel lill-​art fiżika, qatt ma jistaʼ jirrestawra l-​ħajja taʼ dawk il-​mitt miljun li huma stmati li mietu bil-​gwerer tiegħu matul dan is-​seklu; lanqas ma jistaʼ jġib lura l-​miljuni maqtulin minn kriminali jew l-​uħud imnikktin bla għadd li mietu bil-​ġuħ. Ċertament, hu ma jistax jirrestawra lil dawk it-​trabi li l-​ħajjiet tagħhom jiġu mqassra b’aborti u li huma stmati li huma minn 40 sa 60 miljun kull sena. Nistgħu aħna niddubitaw li l-​art qed tiġi rrovinata f’għajnejn Alla b’affarijiet bħal dawn—biex ma nsemmux l-​immoralità li tant qed tiżdied illum?

Ir-raġuni tgħidilna li Alla jrid jaġixxi dalwaqt biex isalva lill-​art mill-​attivitajiet qerrieda tal-​bniedem, u l-​profezija tal-​Bibbja tikkonfermah dan. Imma x’se jagħmel? Il-​Bibbja tgħid li hu se ‘jġib f’rovina lil dawk li qed jirrovinaw l-​art.’ (Rivelazzjoni 11:18; qabbel Mattew 24:3-14.) Bħalma sid il-​kera jitfaʼ ’l barra lil kerrej distruttiv, hekk ukoll Alla se ”jitfaʼ ’l barra” lil dawk li jirrovinaw il-​ħolqien sabiħ tiegħu, l-​art.

Il-Bibbja tistqarr: “Inkwantu għall-​ħżiena, huma se jinqatgħu mill-​istess art; u inkwantu għall-​qarrieqa, huma se jiġu mqaċċtin minnha.” (Proverbji 2:22) Din l-​azzjoni divina li ġejja l-​Bibbja ssejħilha Armageddon. (Rivelazzjoni 16:16) Ġesù wkoll sejħilha t-​“tribulazzjoni kbira li bħalha ma ġratx sa mill-​bidu tad-​dinja s’issa, le, lanqas ma se terġaʼ tiġri.” (Mattew 24:21) Se tkun saħansitra akbar mid-​Dulluvju.

Hija din soluzzjoni estrema jew inġusta? Le, Alla, bħala l-​Ħallieq tal-​art, għandu d-​dritt li jiddeċiedi min se jabita fiha. Hu għandu d-​dritt ukoll li jżomm lill-​bniedem responsabbli taʼ għemilu. Iktar minn hekk, jekk Alla jippermetti lill-​bniedem ikompli l-​korsa tiegħu bla ma jiġi kkorreġut, l-​art se tkun irrovinata għal kulħadd, u l-​ħajja se ssir impossibbli. Mill-​banda l-​oħra, billi ‘jġib f’rovina lil dawk li qed jirrovinaw l-​art,’ Alla jippreserva l-​wirt tal-​art tagħna għal uħud li japprezzaw. Il-​Bibbja twiegħed: “Għax id-​dritti huma dawk li se jgħammru fuq l-​art, u taʼ bla ħtija huma dawk li se jibqgħu fiha.”−Proverbji 2:21.

Bil-għajnuna t’Alla, miljuni sabu l-​qawwa biex juru lilhom infushom bla ħtija għaliex iridu jibqgħu fiha biex igawdu l-​ħolqien t’Alla. Huma jsegwu wkoll il-​livelli morali għolja t’Alla u jevitaw il-​vjolenza u l-​ħtija tad-​demm saħansitra indirettament. B’hekk, huma m’humiex dawk li qed jirrovinaw l-​art f’dan is-​sens tant importanti.

Art Salvata Minn Rovina

Uħud bħal dawn issa għandhom il-​prospett ferrieħi taʼ li jaraw l-​art mibdula mill-​istat irrovinat tal-​preżent għal ġenna b’saħħitha. Mela, saħansitra l-​iġsma tagħhom se jiġu mnaddfa, ippurifikati mill-​effetti taʼ rovina tad-​dnub. L-​aħħar ktieb tal-​Bibbja jiddeskrivi l-​provvediment t’Alla f’li jagħmel dan kollu possibbli bħala “xmara taʼ ilma tal-​ħajja” simbolika. Fuq kull naħa taʼ din ix-​xmara, “kien hemm siġar tal-​ħajja li jipproduċu tnax-il qatgħa taʼ frott, billi jagħtu l-​frott tagħhom kull xahar, u l-​weraq tas-​siġar kienu għall-​fejqan tal-​ġnus.”−Rivelazzjoni 22:1, 2.

Din il-​viżjoni mnebbħa hija garanzija li Alla se jsalva l-​art u lill-​umanità taʼ fuqha minn rovina. Profeziji oħra jagħtu titwila bil-​quddiem taʼ dik l-​art restawrata. Ikkunsidra, per eżempju, l-​ħarsa bil-​quddiem poetika taʼ Isaija: “Ix-​xagħri u r-​reġjun bla ilma se jeżaltaw, u l-​pjanura tad-​deżert se tkun ferħana u tiżgħar bħaż-​żafran. Mhix se tonqos li tiżgħar, u tassew se tkun ferħana bi tferrieħ u b’għajjat taʼ ferħ.” (Isaija 35:1, 2) F’dak iż-​żmien mhux se jkun hemm ibħra mniġġsin, ħamrija rrovinata, jew atmosfera tossika.

Iktar importanti, l-​art mhix se tkun irrovinata bi vjolenza, tixrid taʼ demm, jew immoralità. Dawk biss li jirrispettaw lil Alla, lil-​livelli tiegħu, u lill-​ħolqien tiegħu se jkunu hemm. (Rivelazzjoni 21:7, 8) Ismaʼ naqra issa r-​riżultati glorjużi taʼ dawn l-​affarijiet kollha: “[Alla] se jimsaħ kull demgħa minn għajnejhom, u l-​mewt ma tkunx iżjed, u la l-​għali u la l-​biki u lanqas l-​uġigħ ma jkunu iżjed. L-​affarijiet taʼ qabel għaddew. . . . ‘Ħares! Qed nagħmel l-​affarijiet kollha ġodda.’”—Rivelazzjoni 21:4, 5.

X’riżultat hieni! Kemm aħna ferħanin li Alla dalwaqt se ‘jġib f’rovina lil dawk li qed jirrovinaw l-​art’! U kemm iqanqluna dawn il-​wegħdi mnebbħin biex inkunu rridu naqdu lil Alla li se jsalva l-​art minn rovina u jagħmilha dar ġenna għall-​umanità taʼ qalb tajba!

[Kumment f’paġna 6]

Il-​Bibbja tgħid li Alla se ‘jġib f’rovina lil dawk li qed jirrovinaw l-​art.’—Rivelazzjoni 11:18