Naqdu lil Jehovah bil-​Ferħ

“Aqdi lil Jehovah bil-​ferħ. ldħol quddiemu b’għajta taʼ ferħ.”−SALM 100:2.

1, 2. (a) Ir-​razziżmu kif twieled f’Berlin, il-​Ġermanja, imma l-​kruċjata għal “Reich taʼ Elf Sena” x’sar minnha? (b) Liema kuntrast għall-​1936 kien osservat fl-​Istadju Olympia f’Lulju l990 u f’liema ħaġa huwa ankrat il-​ferħ tal-​grupp internazzjonali li nġemgħu f’assemblea hemmhekk?

IX-​XENA hi l-​istadju Olympia, Berlin. Erbaʼ u ħamsin sena qabel, dan l-​istadju mill-​aħjar sar ċentru taʼ kontroversja meta d-​dittatur Nażista Adolf Hitler ġie rrapportat li injora b’insult lil wieħed ġerrej iswed Amerikan li kien rebaħ erbaʼ medalji tad-​deheb. Daqqa, tabilħaqq, għall-​istqarrija razzista taʼ Hitler dwar “superjorità Arjana”!a Imma issa, fis-​26 taʼ Lulju, 1990, suwed, bojod, sofor—poplu magħqud minn 64 gruppi nazzjonali, 44,532 b’kollox—jinsabu miġburin hawnhekk għall-​Konvenzjoni Distrettwali “Lingwa Pura” tagħhom bħala Xhieda taʼ Jehovah. Liema ferħ ifur f’jum il-​Ħamis wara nofs in-​nhar! Wara t-​taħdida tal-​magħmudija, 1,018-il kandidat igħajtu, “Ja!” u mill-​ġdid, “Ja!” biex jaffermaw id-​dedikazzjoni tagħhom lil Alla Jehovah, biex jagħmlu r-​rieda tiegħu.

² Jieħdu 19-il minuta dawn ix-​Xhieda ġodda biex joħorġu mill-​istadju fi triqithom lejn il-​pixxina għall-​magħmudija. U matul dawk il-​minuti kollha, applaws li jriegħed jinstamaʼ madwar dik l-​arena vasta. Rebbieħa fil-​Logħob Olimpiku qatt ma kellhom applaws bħal dan li issa jilqaʼ lil dawn il-​mijiet, minn bosta gruppi nazzjonali, li qed juru l-​fidi li tikkonkwista lid-​dinja. (1 Ġwann 5:3, 4) Il-​ferħ tagħhom hu ankrat fis-​sod fil-​fiduċja li l-​ħakma tas-​Saltna t’Alla permezz taʼ Kristu se ġġib tabilħaqq elf sena taʼ barkiet glorjużi għall-​bnedmin.—Ebrej 6:17, 18; Rivelazzjoni 20:6; 21:4, 5.

3. Liema verità hija enfasizzata mill-​fiduċja taʼ dawk li attendew il-​konvenzjoni, u kif?

³ Ma hawn ebda mibgħeda razzjali jew nazzjonalistika hawnhekk, għax kollha qed jitkellmu l-​lingwa pura tal-​Kelma t’Alla, billi b’hekk jenfasizzaw il-​verità tal-​kliem taʼ Pietru: “Ċertament qiegħed nara li Alla mhux parzjali, imma f’kull ġens il-​bniedem li jibżaʼ minnu u jaħdem it-​tjieba hu milqugħ minnu.”—Atti 10:34, 35; Sofonija 3:9.

4. Il-​maġġoranza taʼ dawk li attendew il-​konvenzjoni taħt liema kundizzjonijiet saru wħud li jemmnu, u t-​talb tagħhom kif ġie mwieġeb?

⁴ Parti kbira minn dawn li qed jattendu l-​konvenzjoni f’Berlin saru wħud li jemmnu matul snin twal taʼ oppressjoni, minn żmien l-​era tan-​Nażi (1933-45) u l-​era soċjalistika li ġiet wara fil-​Ġermanja tal-​Lvant, fejn il-​projbizzjoni fuq ix-​Xhieda taʼ Jehovah għadha kif tneħħiet legalment fl-​14 taʼ Marzu, 1990. B’hekk, ħafna minnhom ‘aċċettaw il-​kelma taħt ħafna tribulazzjoni fil-​ferħ tal-​ispirtu qaddis.’ (1 Tessalonkin 1:6) Issa għandhom ħelsien akbar biex jaqdu lil Jehovah, u l-​ferħ tagħhom bla qies.—Qabbel Isaija 51:11.

Okkażjonijiet għal Ferħ

5. Iżrael kif iċċelebra l-​ħelsien taʼ Jehovah fil-​Baħar l-​Aħmar?

⁵ Il-​ħelsien taʼ ħutna fl-​Ewropa tal-​Lvant, u bħalissa f’partijiet tal-​Afrika u l-​Asja, jfakkarna fl-​atti taʼ ħelsien mill-​jasar li wettaq Jehovah fi żminijiet imgħoddija. Niftakru l-​att setgħani taʼ Jehovah mal-​Baħar l-​Aħmar, u kif il-​għanja taʼ radd il-​ħajr minn Iżrael laħqet quċċata bil-​kelmiet: “Min fost l-​allat hu bħalek, O Jehovah? Min hu bħalek, juri li hu setgħan fil-​qdusija? Il-​Wieħed li għandhom jibżgħu minnu b’għanjiet taʼ tifħir, il-​Wieħed li qed jagħmel meravilji.” (Eżodu 15:11) Illum, ma nkomplux aħna nifirħu bl-​affarijiet meraviljużi li Jehovah qed jagħmel għall-​poplu tiegħu? Ċertament li hekk nagħmlu!

6.X’nistgħu nitgħallmu mill-​għajta taʼ ferħ taʼ Iżrael fis-​sena 537 Q.E.K.?

⁶ Il-​ferħ far fis-​sena 537 Q.E.K. meta Iżrael ġie restawrat lejn artu wara l-​jasar f’Babilonja. Il-​ġens taʼ Jehovah setaʼ issa jiddikjara, bħalma kien ipprofetizza Isaija: “Ħares! Alla hu s-​salvazzjoni tiegħi. Jien se nafda u ma nkun f’ebda tkexkix; għax Jah Jehovah hu s-​saħħa tiegħi u s-​setgħa tiegħi, u ġie biex ikun is-​salvazzjoni tiegħi.” X’tifħir dak! U l-​ġens kif setaʼ jesprimi dak il-​ferħ? Isaija jkompli: “F’dak il-​jum ċertament li se tgħidu: ‘Iżżu ħajr lil Jehovah! Sejħu lil ismu. Agħmluhom magħrufin fost il-​popli l-​aġiri tiegħu. Semmu li ismu tqiegħed fil-​għoli. Agħmlu melodija lil Jehovah, għax hu għamel iktar minn mistenni.’” Issa setgħu ‘jgħajtu bil-​ferħ’ f’li jagħmlu l-​atti setgħana tiegħu “magħrufin fl-​art kollha,” sewwa sew bħalma jagħmlu l-​qaddejja meħlusin taʼ Jehovah illum.—Isaija 12:1-6.

Ferħ fix-​Xogħol taʼ Jehovah

7. Liema ħelsien irrikjeda eżaltazzjoni fl-​1919?

⁷ Fi żminijiet moderni l-​qaddejja taʼ Jehovah bdew igħajtu bil-​ferħ meta tahom ħelsien meraviljuż fl-​1919. Fis-​26 taʼ Marzu taʼ dik is-​sena, membri tal-​Ġemgħa li Tiggverna nħelsu mill-​ħabs fl-​Istati Uniti fejn kienu nqaflu għal disaʼ xhur fuq akkużi foloz taʼ sedizzjoni. X’ċelebrazzjoni grandjuża saret b’merħba lura għalihom fil-​Betel taʼ Brooklyn! Iktar minn hekk, dawk kollha tal-​fdal midluk setgħu issa jifirħu billi kienu nħelsu spiritwalment minn Babilonja l-​Kbira, is-​sistema taʼ reliġjon li fiha Satana għaġen lid-​dinja kollha.—Rivelazzjoni 17:3-6; 18:2-5.

8. Liema ħarġa sorprendenti kienet imħabbra fil-​Konvenzjoni taʼ Cedar Point fl-​1919, u liema sejħa għall-​azzjoni ngħatat?

⁸ L-​iżviluppi storiċi tal-​1919 ġew inkurunati bil-​konvenzjoni tal-​poplu t’Alla li saret f’Cedar Point, Ohio, U.S.A., mill-​1 sat-​8 taʼ Settembru. Fil-​ħames jum taʼ dik l-​assemblea, “Jum il-​Ħaddiema Mseħbin,” il-​president tal-​Watch Tower Society, J. F. Rutherford, indirizza lil 6,000 f’taħdida mqanqla intitolata “Inħabbru s-​Saltna.” Wara li ddiskuta Rivelazzjoni 15:2 u Isaija 52:7, hu qal lis-​semmiegħa tiegħu li rivista ġdida, The Golden Age (li hi issa magħrufa bħala Awake!), kienet se tiġi ppubblikata kull gimgħatejn, b’mod speċjali għal tqassim fil-​għalqa. Bħala konklużjoni hu qal: “Dawk li huma devoti għalkollox lejn il-​Mulej; dawk li ma jibżgħux, li qlubhom huma puri, li jħobbu lil Alla u lill-​Mulej Ġesù b’moħħhom kollu, b’saħħithom kollha, b’ruħhom kollha u bl-​esseri kollu tagħhom, se jifirħu, skond l-​opportunità li jkollhom, biex jieħdu sehem f’dan ix-​xogħol. Itlob lill-​Mulej għall-​gwida u d-​direzzjoni tiegħu biex jistaʼ jagħmlek ambaxxatur veru, leali, u effiċjenti. Imbagħad, b’għanja taʼ ferħ ġewwa qalbek, mur ’il quddiem biex taqdih.”

9, 10. Jehovah kif ġab ir-​riżq fuq il-​pubblikazzjoni tar-​rivisti Watchtower u Awake!?

⁹ Dik il-​“għanja taʼ ferħ” instemgħet mal-​art kollha! Ħafna mill-​qarrejja tagħna ħadu sehem, bla dubju, f’li jkabbru ċ-​ċirkolazzjoni tar-​rivista Awake! għat-​12,980,000 kopja preżenti taʼ kull ħarġa f’64 lingwa. Bħala għodda qawwija f’li twassal lil persuni interessati lejn il-​verità, ir-​rivista Awake! isservi bħala sieħba għal The Watchtower. F’pajjiż Orjentali, oħt li hija pijuniera, u li għandha ‘magazine route’ regulari, issorprendiet ruħha meta sabet li kull darba li wasslet l-​aħħar rivisti, l-​inkwilin ta donazzjoni ekwivalenti għal 7 dollari Amerikani għax-​xogħol mad-​dinja kollha tax-​Xhieda taʼ Jehovah—u b’hekk ċertament li wera apprezzament mill-​aħjar lejn ix-​xogħol tas-​Saltna!

¹⁰ Billi issa bdiet il-​112-il sena taʼ pubblikazzjoni tagħha, ir-​rivista Watchtower għandha ċirkolazzjoni taʼ 15,290,000 f’111-il lingwa, u 59 minn dawn l-​edizzjonijiet jidhru simultanjament mad-​dinja kollha bl-​istess kontenut. Bħala prokuratur leali, il-​fdal midluk ikompli jagħti lil qarrejja li japprezzaw “il-​kejl tagħhom taʼ provisti taʼ ikel [spiritwali] fi żmien xieraq.” (Luqa 12:42) Matul l-​1990, ix-​Xhieda taʼ Jehovah irrapportaw li ħallew man-​nies 2,968,309 abbonamenti ġodda għaż-​żewġ rivisti, żjieda taʼ 22.7 fil-​mija fuq l-​1989.

Il-​Ferħ Huwa Kotran

11. (a) Liema sejħa kienet mogħtija lin-​nies t’Alla f’Cedar Point fl-​1922? (b) Il-​għajta taʼ ferħ kif ġiet imkabbra?

¹¹ Il-​ferħ kien kotran ukoll hekk kif in-​nies t’Alla, issa 10,000 fil-​għadd, inġemgħu għat-​tieni konvenzjoni f’Cedar Point, f’Settembru tal-​1922, bi 361 jiġu mgħammdin. Fit-​taħdida tiegħu “Is-​Saltna tas-​Sema Hi Fil-​Qrib,” ibbażata fuq Mattew 4:17, Ħuna Rutherford wasal għall-​quċċata li tqanqal: “Id-​dinja trid tkun taf li Jehovah hu Alla u li Ġesù Kristu hu Sultan tas-​slaten u Sid tas-​sidien. Dan hu l-​jum fuq il-​jiem kollha. Araw, is-​Sultan jirrenja! Intom l-​aġenti tal-​pubbliċità tiegħu. Għalhekk irriklamaw, irriklamaw, irriklamaw, is-​Sultan u s-​saltna tiegħu.” Dawk li ħadu sehem fil-​għajta taʼ ferħ li nstemgħet f’dik il-​konvenzjoni kibru fin-​numru sakemm fl-​1989 iktar minn 6,600,000 nġabru f’1,210 konvenzjonijiet tax-​Xhieda taʼ Jehovah madwar id-​dinja, fejn 123,688 kienu mgħammdin.

12. (a) In-​nies t’Alla f’liema ferħ li ma jistax jiġi kkalkulat jieħdu sehem illum? (b) Aħna kif nibbilanċjaw is-​servizz tagħna lejn Jehovah mal-​ubbidjenza lejn “l-​awtoritajiet superjuri”?

¹² Ix-​Xhieda taʼ Jehovah igħożżu l-​libertà tagħhom. Fuq kollox, huma jifirħu fit-​twettieq modern tal-​kliem taʼ Ġesù: “U se tkunu tafu l-​verità, u l-​verità se teħliskom.” X’ferħ hu li niġu meħlusin mill-​misteri u s-​superstizzjonijiet tar-​reliġjon falza! X’ferħ li ma jistax jiġi kkalkulat hu li nafu lil Jehovah u lil Ibnu u li nsiru ħaddiema bi sħab magħhom, bil-​prospett taʼ ħajja taʼ dejjem! (Ġwann 8:32; 17:3; 1 Korintin 3:9-11) Il-​qaddejja t’Alla japprezzawh ukoll meta l-​“awtoritajiet superjuri” taʼ din id-​dinja, li taħthom huma jgħixu, jonoraw il-​libertà tagħhom biex ixandru t-​tama glorjuża tas-​Saltna taʼ Jehovah taħt Kristu. Huma minn jeddhom ‘iħallsu lura l-​affarijiet taʼ Ċesri lil Ċesri,’ waqt li fl-​istess ħin iħallsu “l-​affarijiet t’Alla lil Alla.”—Rumani 13:1-7; Luqa 20:25.

13. Ix-​Xhieda taʼ Jehovah kif esprimew il-​ferħ tagħhom meta nħelsu mill-​oppressjoni?

¹³ Madankollu, jekk l-​awtoritajiet umani jippruvaw jillimitaw dan l-​obbligu lil Alla ix-​Xhieda taʼ Jehovah iwieġbu bħalma wieġbu l-​appostli: “Aħna rridu nobdu ’l Alla bħala ħakem iktar milli lill-​bniedem.” F’dik l-​okkażjoni, wara li l-​ħakkiema ħelsu lill-​appostli, dawn “telqu għal triqthom . . . jifirħu.” Kif esprimewh dak il-​ferħ? “Kuljum fit-​tempju u minn dar għal dar komplew bla heda jgħallmu u jiddikjaraw l-​aħbar tajba dwar il-​Kristu, Ġesù.” (Atti 5:27-32, 41, 42) Bl-​istess mod, ix-​Xhieda taʼ Jehovah illum jifirħu meta jiksbu libertà akbar biex iwettqu l-​ministeru tagħhom. F’ħafna pajjiżi fejn Jehovah fetaħ it-​triq, huma jesprimu ferħ kbir billi jagħtu xiehda bir-​reqqa favur l-​isem taʼ Jehovah u s-​Saltna li ġejja tiegħu bi Kristu Ġesù.—Qabbel Atti 20:20, 21, 24; 23:11; 28:16, 23.

Nissaportu Bil-​Ferħ

14. Dan il-​ferħ li hu frotta tal-​ispirtu kif jisboq lil dak li dizzjunarju jgħid li hu?

¹⁴ X’inhu dan il-​ferħ kbir li l-​veri Kristjani jġarrbu? Huwa ferm iktar profond u iktar permanenti mill-​ferħ tal-​mument taʼ xi rebbieħ fil-​Logħbiet Olimpiċi. Huwa frotta tal-​ispirtu qaddis t’Alla, li Alla jagħti lil dawk ‘li qed jobdu lilu bħala ħakem.’ (Atti 5:32) Id-​dizzjunarju taʼ Webster igħid li l-​ferħ huwa ‘iktar profond mill-​għaxqa, iktar radjanti jew dimostrattiv mill-​hena.’ Għall-​Kristjan, il-​ferħ għandu saħansitra tifsir iktar penetranti. Billi huwa ankrat fil-​fidi tagħna, huwa kwalità qawwija, li ssaħħaħ. “Il-​ferħ taʼ Jehovah huwa l-​fortizza tagħkom.” (Neħemija 8:10) Il-​ferħ taʼ Jehovah, li n-​nies t’Alla jikkultivaw, jisboq bil-​wisq lill-​eċċitament superfiċjali li n-​nies jieħdu mill-​pjaċiri tal-​laħam, tad-​dinja.—Galatin 5:19-23.

15. (a) Fl-​esperjenza taʼ Kristjani leali, is-​sabar kif kien imsieħeb mal-​ferħ? (b) Iċċita xi skritturi li jagħtu assigurazzjoni li ssaħħaħ rigward li wieħed iżomm il-​ferħ.

¹⁵ Ikkunsidra lil ħutna fl-​Ukranja. Meta l-​‘awtorità superjuri’ bagħtet lil eluf minn dawn ġewwa s-​Siberja fil-​bidu tas-​snin 50, huma sofrew tbatijiet kbar. Iktar tard, meta l-​awtorità tathom amnestija, huma esprimew ringrazzjament, imma mhux kollha marru lura lejn art twelidhom. Għala? It-​tbatijiet tagħhom fil-​Lvant kienu fakkruhom f’Ġakbu 1:2-4: “Qisuh kollu ferħ, ħuti, meta tiltaqgħu maʼ diversi provi, billi tafu bħalma tagħmlu li din il-​kwalità ppruvata tal-​fidi tagħkom tipproduċi s-​sabar.” Huma riedu jkomplu jistabru f’dak il-​ħsad ferrieħi, u x’ferħ kien hemm f’konvenzjonijiet riċenti tax-​Xhieda taʼ Jehovah fil-​Polonja meta tajna merħba lil Xhieda li ġew mil-​Lvant imbiegħed daqs il-​komunitajiet tax-​xatt tal-​Paċifiku. Is-​sabar u l-​ferħ imxew id f’id biex jipproduċu dan il-​frott. Tabilħaqq, ilkoll kemm aħna li nistabru bil-​ferħ fis-​servizz taʼ Jehovah nistgħu ngħidu: “Iżda, inkwantu għalija, jien se neżalta f’Jehovah innifsu; jien se nkun ferħan f’dak Alla tas-​salvazzjoni tiegħi. Jehovah il-​Mulej Sovran hu l-​enerġija vitali tiegħi.”—Ħabakkuk 3:18, 19; Mattew 5:11, 12.

16. L-​eżempji mill-​aħjar taʼ Ġeremija u Ġob kif għandhom jinkuraġġuna fix-​xogħol tagħna tal-​għalqa?

¹⁶ Kif, iżda, nistgħu aħna nżommu l-​ferħ tagħna meta nagħtu xiehda fost opponenti taʼ rashom iebsa? Ftakar li l-​profeti t’Alla żammew attitudni ferrieħa f’ċirkustanzi simili. Ġeremija stqarr meta kien taħt prova: “Il-​kelmiet tiegħek instabu, u jien issoktajt nikolhom; u l-​kelma tiegħek issir għalija l-​eżaltazzjoni u l-​ferħ taʼ qalbi; għax ismek ġie msejjaħ fuqi, O Jehovah Alla tal-​armati.” (Ġeremija 15:16) Xi privileġġ li tiġi msejjaħ bl-​isem taʼ Jehovah u li tagħti xiehda għal dak l-​isem! L-​istudju persunali bil-​għaqal u l-​parteċipazzjoni sħiħa tagħna fil-​laqgħat Kristjani jibnuna biex inkomplu nifirħu fil-​verità. Il-​ferħ tagħna se jidher fl-​imġieba tagħna fil-​għalqa u fit-​tbissima tagħna tas-​Saltna. Saħansitra taħt provi ħorox, Ġob setaʼ jgħid dwar l-​egħdewwa tiegħu: “Jien kont nitbissmilhom—ma kinux jemmnuh—u d-​dawl taʼ wiċċi ma kinux iwaqqgħuh.” (Ġob 29:24) Bħal Ġob li kien leali, m’għandniex għalfejn insewdu qalbna meta dawk li jopponuna jwaqqgħuna għaċ-​ċajt. Ibqgħu tbissmu! Id-​dehra tagħna tistaʼ tirrifletti l-​ferħ tagħna u b’hekk niksbu widnejn li jisimgħu.

17. Is-​sabar bil-​ferħ kif jistaʼ jagħti l-​frott?

¹⁷ Hekk kif inżuru territorju darba wara l-​oħra, is-​sabar u l-​ferħ tagħna jistgħu jimpressjonaw lil nies ġwejdin u jinkuraġġuhom biex jeżaminaw it-​tama glorjuża li aħna noffru. X’ferħ ikun li nikkonduċu studji tal-​Bibbja magħhom fuq bażi regulari! U hekk kif idaħħlu fi qlubhom il-​veritajiet prezzjużi tal-​Kelma t’Alla, x’ferħ inħossu meta huma fl-​aħħar isiru sħabna fis-​servizz taʼ Jehovah! Imbagħad inkunu nistgħu ngħidu, bħalma l-​appostlu Pawlu qal lill-​ġodda li emmnu fi żmienu: “Għax x’inhi t-​tama tagħna jew il-​ferħ jew il-​kuruna taʼ eżaltazzjoni—mhix fil-​fatt intom?—quddiem il-​Mulej tagħna Ġesù fil-​preżenza tiegħu? Intom żgur li intom il-​glorja u l-​ferħ tagħna.” (1 Tessalonkin 2:19, 20) Verament, ferħ sodisfaċenti jistaʼ jinstab f’li nwasslu lil uħud ġodda lejn il-​verità tal-​Kelma t’Alla u f’li ngħinuhom biex isiru Xhieda ddedikati u mgħammdin.

Ferħ Li Jwieżen

18. Liema ħaġa se tgħinna biex inlaħħqu maʼ diversi provi tal-​lum?

¹⁸ Fil-​ħajja tagħna taʼ kuljum, ħafna sitwazzjonijiet jistgħu jirrikjedu sabar. Il-​mard fiżiku, id-​dipressjoni, u t-​tbatija ekonomika huma biss ftit. Kif jistaʼ l-​Kristjan iżomm il-​ferħ tiegħu sabiex ilaħħaq maʼ provi bħal dawn? Dan jistaʼ jsir billi jmur fil-​Kelma t’Alla għal faraġ u gwida. Li taqra jew li tismaʼ l-​qari tas-​salmi jistaʼ jipprovdi ħafna serħan il-​moħħ fi żmien taʼ prova. U nnota l-​parir għaqli taʼ David: “Itfaʼ t-​tagħbija tiegħek fuq Jehovah innifsu, u hu nnifsu se jsostnik. Hu qatt ma se jħalli lill-​wieħed twajjeb jixxengel.” (Salm 55:22) Jehovah huwa tabilħaqq “Semmiegħ it-​talb.”—Salm 65:2.

19. Bħal David u Pawlu, liema fiduċja jistaʼ jkollna?

¹⁹ L-​organizzazzjoni taʼ Jehovah, permezz tal-​pubblikazzjonijet tagħha u tal-​anzjani tagħha fil-​kongregazzjonijiet, hija dejjem lesta li tgħinna, peress li aħna bnedmin fraġli, biex nitqabdu mal-​problemi tagħna. David jagħti parir b’mod kordjali: “Gerbeb fuq Jehovah il-​mogħdija tiegħek, u oqgħod fuqu, u hu nnifsu se jaġixxi.” Hu setaʼ jgħid ukoll: “Raġel żagħżugħ jien kont, jien ukoll xjaħt, u madankollu ma rajt lil ħadd twajjeb mitluq għalkollox, lanqas lin-​nisel tiegħu jfittex il-​ħobż.” Fi sħubija mal-​kongregazzjoni Kristjana, aħna se nirrealizzaw li “s-​salvazzjoni tat-​twajbin hi minn Jehovah; hu l-​fortizza tagħhom fi żmien taʼ nkwiet.” (Salm 37:5, 25, 39) Dejjem ejjew insegwu l-​parir taʼ Pawlu: “Għalhekk ma nċedux, . . . waqt li nżommu għajnejna, mhux fuq l-​affarijiet li jidhru, imma fuq l-​affarijiet li ma jidhrux. Għax l-​affarijiet li jidhru huma temporanji, imma l-​affarijiet li ma jidhrux huma għal dejjem.”—2 Korintin 4:16-18.

20. X’naraw bil-​għajn tal-​fidi, u dan kif iqanqalna?

²⁰ Bil-​għajnejn tal-​fidi tagħna, aħna nistgħu naraw is-​sistema ġdida taʼ Jehovah fil-​viċin. X’ferħ u x’barkiet li m’hawnx bħalhom se jkunu hemm! (Salm 37:34; 72:1, 7; 145:16) Bi tħejjija għal dak iż-​żmien glorjuż, ejjew nagħtu kas il-​kliem taʼ Salm 100:2: “Aqdi lil Jehovah bil-​ferħ. Idħol quddiemu b’għajta taʼ ferħ.”

[Nota taʼ taħt]

B’Reviżjoni:

◻ Liema konkwista taʼ ferħ taʼ razziżmu tidher illum?

◻ X’kien li ġiegħel lin-​nies t’Alla tal-​qedem ikantaw u jgħajtu bil-​ferħ?

◻ Il-​ferħ veru kif żdied fi żminijiet moderni?

◻ Is-​sabar u l-​ferħ kif imorru id f’id?

◻ B’liema mezzi nistgħu aħna nwieżnu l-​ferħ tagħna?