Il-​Kenn Tagħhom—Gidba

“Għamilna gidba l-​kenn tagħna u fil-​qerq inħbejna.”—ISAIJA 28:15.

1, 2 (a) Liema organizzazzjoni llum għandha tieħu nota taʼ dak li ġara lis-​saltna antika taʼ Ġuda? (b) Ġuda kellu liema fiduċja spostata?

JAPPLIKAW dawk il-​kelmiet għall-​Kristjaneżmu tal-​lum bħalma applikaw għas-​saltna tal-​qedem taż-​żewg tribujiet taʼ Ġuda? Żgur li japplikaw! U dak ix-​xebh huwa sinjal ħażin għall-​Kristjaneżmu modern. Ifisser li katastrofi dalwaqt se tiġi fuq dik l-​organizzazzjoni reliġjuża apostata.

² Lejn it-​Tramuntana taʼ Ġuda kien hemm is-​saltna tal-​għaxar tribujiet taʼ Iżrael. Meta s-​saltna taʼ Iżrael uriet li ma kellhiex fidi, Jehovah ippermetta li tiġi mirbuħa mill-​Assirja fis-​sena 740 Q.E.K. Oħtha s-​saltna taʼ Ġuda rat b’għajnejha lil din il-​ġrajja traġika imma jidher ċar li hi ħasset li ħaġa bħal din qatt ma kellha tiġri lilha. ‘Mur ara,’ ftaħru l-​mexxejja tagħha, ‘it-​tempju taʼ Jehovah m’għadux jopera f’Ġerusalemm? M’aħniex aħna l-​poplu favorit t’Alla? Il-​qassisin u l-​profeti tagħna mhux f’isem Jehovah qed jitkellmu?’ (Qabbel Ġeremija 7:4, 8-11.) Dawk il-​mexxejja reliġjużi kienu kunfidenti li kellhom jiġu protetti. Imma kienu żballjati! Huma kienu neqsin mill-​fidi daqs ħuthom tat-​Tramuntana. Mela, dak li ġara lis-​Samarija kellu jiġri wkoll lil Ġerusalemm.

3. Il-​Kristjaneżmu għala jħossu fiduċjuż dwar il-​futur, imma hemm raġuni tajba għall-​fiduċja tiegħu?

³ B’mod simili, il-​Kristjaneżmu jippretendi li għandu relazzjoni speċjali m’Alla. ‘Mur ara,’ jiftaħar hu, ‘għandna għaxriet taʼ eluf taʼ knejjes u kleru professjonali, kif ukoll mijiet taʼ miljuni taʼ membri. Għandna wkoll il-​Bibbja, u nużaw l-​isem taʼ Ġesù fil-​qima tagħna. Żgur li aħna ffavoriti minn Alla!’ Imma dak li ġara lil Ġerusalemm tal-​qedem jikkostitwixxi twissija serja. Minkejja l-​iżviluppi politiċi straordinarji taʼ dan l-​aħħar, nafu li Jehovah dalwaqt se jaġixxi b’mod deċiżiv kontra l-​Kristjaneżmu u r-​reliġjonijiet foloz l-​oħra kollha.

“Patt mal-​Mewt”

4. Ġuda ħaseb li kien għamel liema patt?

⁴ Fi żmien l-​antik, Ġerusalemm mhix leali rċeviet ħafna twissijiet permezz tal-​profeti veri t’Alla, imma hi m’emmnithomx. Minflok, hi ftaħret li l-​mewt qatt ma kienet se tniżżilha ġo Xeol, il-​qabar, bħalma kienet ħadet lis-​saltna tat-​Tramuntana taʼ Iżrael. Isaija l-​profeta kien imnebbaħ biex igħid lil Ġuda: “Għalhekk isimgħu l-​kelma taʼ Jehovah, intom li żżebilħu, intom il-​ħakkiema taʼ dal-poplu li qegħdin f’Ġerusalemm: Għaliex intom għedtu: ‘Ikkonkludejna patt mal-​Mewt; u maʼ Xeol għamilna viżjoni; il-​għarqa ħesrem li tfur, f’każ li tgħaddi minn hawn, ma tiġix għalina, għax għamilna gidba l-​kenn tagħna u fil-​qerq inħbejna.”’—Isaija 28:14, 15.

5. (a) X’kien it-​taparsi patt taʼ Ġuda mal-​mewt? (b) Ġuda kien nesa liema twissija mogħtija lis-​Sultan Asa?

⁵ Iva, il-​mexxejja taʼ Ġerusalemm ħasbu li kellhom ftehim, bħal li kieku, mal-​mewt u Xeol biex il-​belt tagħhom tiġi ppreservata. Imma kien it-​taparsi patt taʼ Ġerusalemm mal-​mewt ifisser li kienet nidmet minn dnubietha u li issa kienet tafda f’Jehovah għal salvazzjoni? (Ġeremija 8:6,7) Lanqas xejn! Minflok, hi daret lejn mexxejja politiċi umani għall-​għajnuna. Imma s-​serħan tagħha fuq l-​alleanzi dinjin kien fieragħ, gidba. Il-​ħbieb dinjin li lilhom fdat ma setgħux isalvawha. U peress li hi abbandunat lil Jehovah, Jehovah abbanduna lil Ġerusalemm. Ġara sewwa sew bħalma l-​profeta Ażarija kien wissa lis-​Sultan Asa: “Jehovah qiegħed magħkom sakemm turu li qegħdin miegħu; u jekk tfittxuh, hu se jħalli lilu nnifsu jinstab minnkom, imma jekk titilquh hu se jitlaqkom.”−2 Kronaki 15:2.

6, 7. Ġuda liema passi ħa biex jassigura s-​sigurtà tiegħu, imma b’liema riżultat finali?

⁶ Kunfidenti fl-​alleanzi politiċi tagħhom, il-​mexxejja taʼ Ġerusalemm kienu ċerti li l-​ebda “għarqa ħesrem li tfur” taʼ armati li jinvadu ma kellha tiġi qrib tagħhom biex tiddisturba l-​paċi u s-​sigurtà tagħhom. Meta ġie mhedded minn alleanza taʼ Iżrael u s-​Sirja, Ġuda dar lejn l-​Assirja għall-​għajnuna. (2 Slaten 16:5-9) Iktar tard, meta l-​forzi militari taʼ Babilonja ġew kontra tagħha, hu talab lill-​Eġittu għal appoġġ u Farawni wieġeb, billi bagħat armata biex tgħin.—Ġeremija 37:5-8; Eżekjel 17:11-15.

⁷ Imma l-​armati taʼ Babilonja kienu b’saħħithom wisq, u t-​truppi tal-​Eġittu kellhom jirtiraw. Il-​fiduċja taʼ Ġerusalemm fl-​Eġittu wriet li kienet żball, u fis-​sena 607 Q.E.K., Jehovah abbandunaha għall-​qerda li kien bassar. Mela l-​mexxejja u l-​qassisin taʼ Ġerusalemm kienu żballjati! Il-​fiduċja tagħhom f’alleanzi dinjin għal paċi u sigurtà kienet “gidba” li ġiet imgħarrqa ħesrem mill-​armati taʼ Babilonja.

Jiċħdu lill-​“Ġebla Pprovata”

8. Il-​Kristjaneżmu kif ħa pożizzjoni li tixbah ferm lil dik taʼ Ġuda tal-​qedem?

⁸ Hemm xi sitwazzjoni bħal din illum? Iva, hemm! Il-​kleru tal-​Kristjaneżmu wkoll iħoss li l-​ebda gwaj ma se jiġi fuqhom. Fil-​fatt, huma jgħidu bħalma bassar Isaija: “Ikkonkludejna patt mal-​Mewt; u maʼ Xeol għamilna viżjoni; il-​għarqa ħesrem li tfur, f’każ li tgħaddi minn hawn, ma tiġix għalina, għax għamilna gidba l-​kenn tagħna u fil-​qerq inħbejna.” (Isaija 28:15) Bhal Ġerusalemm tal-​qedem, il-​Kristjaneżmu jdur lejn alleanzi dinjin għal sigurtà, u l-​kleru tiegħu jirrifjuta li jieħu l-​kenn f’Jehovah. Heqq, huma lanqas biss iridu jużaw ismu, u jwaqqgħu għaċ-​ċajt u jippersegwitaw lil dawk li jonoraw lil dak l-​isem. Il-​kleru tal-​Kristjaneżmu għamlu sewwa sew bħalma għamlu l-​qassisin ewlenin Lhud fl-​ewwel seklu meta ċaħdu lil Kristu. Huma qalu, effettivament: “M’għandna l-​ebda sultan ħlief lil Ċesri.”—Ġwann 19:15.

9. (a) Min qed iwissi lill-​Kristjaneżmu llum bl-​istess mod kif Isaija wissa lil Ġuda? (b) Il-​Kristjaneżmu għandu jdur lejn min?

⁹ Illum, ix-​Xhieda taʼ Jehovah iwissu li dulluvju taʼ armati ezekuzzjonali dalwaqt se jgħarrqu lill-​Kristjaneżmu. Iktar minn hekk, huma jippuntaw lejn il-​post veru taʼ kenn minn dak id-​dulluvju. Huma jikkwotaw Isaija 28:16, li jgħid: “Dan hu dak li qal il-​Mulej Sovran Jehovah: ‘Hawn qed inqiegħed bħala pedament f’Sijon ġebla, ġebla pprovata, ir-​rokna prezzjuża taʼ pedament fiż-​żgur. Ebda wieħed li qed jeżerċita fidi ma se jippanikkja.”ˈ Min hu dan il-​‘ġebla tar-​rokna prezzjuża’? L-​appostlu Pietru kkwota dan il-​kliem u applikah għal Ġesù Kristu. (1 Pietru 2:6) Kieku l-​Kristjaneżmu fittex il-​paċi mas-​Sultan taʼ Jehovah, Ġesù Kristu, kieku kien jevita l-​għarqa ħesrem li ġejja.—Qabbel Luqa 19:42-44.

10. Il-​Kristjaneżmu kkultiva liema involvimenti?

¹⁰ Madankollu, hu m’għamilx hekk. Minflok, fit-​tfittxija tiegħu għal paċi u sigurtà, hu jdeffes lilu nnifsu fil-​favur tal-​mexxejja politiċi tal-​ġnus—dan minkejja t-​twissija tal-​Bibbja li ħbiberija mad-​dinja hija għadwa m’Alla. (Ġakbu 4:4) Iktar minn hekk, fl-​1919 hu qabeż bis-​saħħa għal-​Lega tan-​Nazzjonijiet bħala li hi l-​aħjar tama tal-​bniedem għall-​paċi. Mill-​1945 ’il quddiem hu poġġa t-​tama tiegħu fil-​Ġnus Magħquda. (Qabbel Rivelazzjoni 17:3, 11.) Kemm hu estensiv l-​involviment tiegħu maʼ din l-​organizzazzjoni?

11. Ir-​reliġjon liema rappreżentazzjoni għandha fil-​ĠM?

¹¹ Ktieb li ħareġ dan l-​aħħar jagħti idea meta jistqarr: “Xejn inqas minn erbgħa u għoxrin organizzazzjoni Kattoliċi huma rrappreżentati fil-​ĠM. Diversi mexxejja reliġjużi tad-​dinja żaru lill-​organizzazzjoni internazzjonali. L-​iktar memorabbli kienu ż-​żjajjar tal-​Qdusija Tiegħu Papa Pawlu VI matul l-​Assemblea Ġenerali fl-​1965 u taʼ Papa Ġwanni Pawlu II fl-​1979. Bosta reliġjonijiet għandhom invokazzjonijiet, talb, in-​nijiet u servizzi speċjali għall-​Ġnus Magħquda. L-​iktar ezempji importanti huma dawk tal-​Kattoliċi, tal-​Universalisti Unitarjani tal-​Battisti u tal-​fidi Bahai.”

Tamiet Għalxejn għall-​Paċi

12, 13. Minkejja tamiet imferrxin maʼ kullimkien li l-​paċi qiegħda fuq ix-​xefaq, ix-​Xhieda taʼ Jehovah għala huma fiduċjużi li t-​twissijiet tagħhom huma veri?

¹² Wieħed mill-​mexxejja politiċi l-​iktar setgħana tad-​dinja kien qed jidwi t-​tamiet taʼ ħafna meta qal: “Din il-​ġenerazzjoni taʼ nies fuq l-​art tistaʼ tara b’għajnejha l-​miġja taʼ perijodu rriversibbli taʼ paċi fl-​istorja taċ-​ċivilizzazzjoni.” Qal sewwa? Ifissru l-​iżviluppi taʼ dan l-​aħħar li t-​twissijiet li taw ix-​Xhieda taʼ Jehovah dwar l-​ezekuzzjoni taʼ ġudizzju taʼ Jehovah fuq il-​ġnus m’humiex se jseħħu? Huma x-​Xhieda taʼ Jehovah żballjati?

¹³ Le, m’humiex żballjati. Huma jafu li qed igħidu l-​verità għaliex ipoġġu l-​fiduċja tagħhom f’Jehovah u fil-​Bibbja, li hi l-​Kelma tal-​verità t’Alla nnifsu. Titus 1:2 igħid: “Alla ... ma jistax jigdeb.” Mela għandhom fiduċja sħiħa li meta xi profezija tal-​Bibbja tgħid li t-​tali ħaġa se sseħħ, imbagħad se sseħħ mingħajr ma tfalli. Jehovah innifsu jistqarr: “Hekk il-​kelma tiegħi li toħroġ minn fommi se turi li tkun. Mhux se terġaʼ lura għandi mingħajr riżultati, imma ċertament li se tagħmel dak li fih jien sibt il-​għaxqa.”—Isaija 55:11.

14, 15. (a) Il-​mexxejja taʼ Ġuda liema ħaġa kienu qed jipproklamaw ftit qabel il-​qerda taʼ Ġerusalemm fis-​sena 607 Q.E.K.? (b) Pawlu bassar li kellha tiġi pproklamata liema ħaġa qabel qerda f’daqqa kellha tiġi fuq din id-​dinja? (c) X’nistgħu nistennew fil-​quċċata tal-​proklamazzjoni profetizzata fl-​1 Tessalonkin 5:3?

¹⁴ Fis-​snin taʼ qabel il-​qerda taʼ Ġerusalemm fis-​sena 607 Q.E.K., Ġeremija rrapporta li l-​mexxejja kienu qed jgħajtu, “Hemm il-​paċi! Hemm il-​paċi!” (Ġeremija 8:11) Madankollu, dik kienet gidba. Ġerusalemm ġiet meqruda bi twettieq tat-​twissijiet imnebbħin tal-​profeti veri taʼ Jehovah. L-​appostlu Pawlu wissa li xi ħaġa simili kellha tiġri fi żmienna. Hu qal li rġiel se jkunu qed igħajtu ‘Paċi u sigurtà!” Imma mbagħad, hu qal, “qerda f’daqqa” se tiġi “minnufih fuqhom.”—1 Tessalonkin 5:3.

¹⁵ Hekk kif dħalna fis-​snin disgħin, gazzetti u rivisti kullimkien kienu qed igħidu li l-​Gwerra Bierda għaddiet u li paċi dinjija fl-​aħħar tidher. Imma mbagħad faqqgħet gwerra taʼ sparar fil-​Lvant Nofsani. Madankollu, fl-​aħħar mill-​aħħar is-​sitwazzjoni tad-​dinja se tiżżviluppa sal-​punt meta l-​għajta taʼ “Paċi u sigurtà!” pprofetizzata fl-​1 Tessalonkin 5:2, 3 se tiżdied sakemm tilħaq quċċata. Bit-​tamiet tagħna ankrati sewwa fil-​Kelma t’Alla, aħna nafu li, malli tintlaħaq dik il-​quċċata, il-​ġudizzji t’Alla se jiġu esegwiti bil-​ħeffa u mingħajr żball. Ebda pronunzji mraqqgħin taʼ paċi u sigurtà m’għandhom iġagħluna naħsbu li qerda mbassra minn Alla mhix se tiġi. Il-​gudiżzji taʼ Jehovah huma miktubin bla ma jinbidlu fil-​Kelma tiegħu l-​Bibbja. Il-​Kristjaneżmu, flimkien mar-​reliġjon falza l-​oħra kollha, se jiġi meqrud. U mbagħad il-​ġudizzji taʼ qerda taʼ Jehovah se jiġu espressi kontra l-​bqija tad-​dinja taʼ Satana. (2 Tessalonkin 1:6-8; 2:8; Rivelazzjoni 18:21; 19:19-21) Ladarba x-​Xhieda taʼ Jehovah huma fiduċjużi li Jehovah se jwettaq il-​kelma tiegħu, huma jkomplu joqogħdu għassa taħt il-​gwida tal-​klassi tal-​irsir fidil u diskret u bir-​reqqa josservaw kif se jiżżvolġu l-​ġrajjiet dinjin. (Mattew 24:45-47) Ċertament, ebda sforzi tal-​bniedem biex iġib il-​paċi m’għandhom iġagħluna naħsbu li Jehovah abbanduna l-​iskop tiegħu li jġib għarqa ħesrem taʼ qerda fuq il-​Kristjaneżmu minħabba d-​dnubiet tiegħu.

‘Alla Hu l-​Kenn Tagħna’

16, 17. Ix-​Xhieda taʼ Jehovah kif iwieġbu jekk xi ħadd jieħu għalih bil-​mod kif huma jxandru l-​messaġġ tagħhom bil-​miftuħ?

¹⁶ Xi wliud jistgħu jieħdu għalihom għall-​mod kif ix-​Xhieda taʼ Jehovah jipproklamaw dan bil-​miftuħ. Madankollu, meta huma jgħidu li l-​mexxejja reliġjużi tal-​Kristjaneżmu stkennew f’arranġament giddieb, huma sempliċement qed jirrakkontaw dak li tgħid il-​Bibbja. Meta jgħidu li l-​Kristjaneżmu haqqu kastig għaliex sar parti mid-​dinja, huma sempliċement qed jirrapportaw dak li Alla nnifsu jgħid fil-​Bibbja. (Filippin 3:18, 19) Iktar minn hekk, għaliex il-​Kristjaneżmu poġġa l-​fiduċja tiegħu fl-​iskemi proposti minn din id-​dinja, hu attwalment qed jappoggja lill-​alla taʼ din id-​dinja, Satana x-​Xitan, li Ġesù qal li hu missier il-​gidba. —Ġwann 8:44; 2 Korintin 4:4.

¹⁷ Għalhekk, ix-​Xhieda taʼ Jehovah jiddikjaraw: Inkwantu għalina, ma ninkuraġġux tamiet foloz taʼ paċi dinjija minħabba x-​xena politika li qed tinbidel. Minflok, aħna nlissnu l-​kliem tas-​salmista: “Alla hu kenn għalina....Ulied il-​bniedem tal-​art huma nifs, ulied l-​umanità huma gidba. Meta jitqiegħdu fuq il-​miżien huma lkoll flimkien eħfef minn nifs.” (Salm 62:8, 9) Proċeduri umani biex iġibu ’l quddiem u jippreservaw lill-​Kristjaneżmu u lill-​bqija taʼ din is-​sistema taʼ affarijiet huma ingann, gidba! Ilkoll kemm huma flimkien m’għandhomx iktar qawwa biex jilħqu l-​iskopijiet taʼ Jehovah milli għandu nifs taʼ arja sħuna!

18. Liema twissija tas-​salmista hi xierqa llum?

¹⁸ Ix-​Xhieda taʼ Jehovah jikkwotaw ukoll Salm 33, versi 17 sa 19, li jiddikjara: “Iż-​żiemel [tal-Eġittu, li jissimbolizza l-​gwerra] huwa qerq għas-​salvazzjoni, u bl-​abbundanza tal-​enerġija vitali tiegħu ma jaffordjax ħarba. Ħares! Il-​għajn taʼ Jehovah hija lejn dawk li qed jibżgħu minnu, lejn dawk li qed jistennew il-​qalb tajba bl-​imħabba tiegħu, biex jeħles lir-​ruħ tagħhom mill-​mewt infisha, u biex iżommhom ħajjin fil-​ġuħ.” Illum, Kristjani veri jafdaw f’Jehovah u fis-​Saltna tiegħu tas-​sema, l-​uniku arranġament li jistaʼ jġib paċi permanenti.

Il-​Kristjaneżmu “Post tal-​Irfis”

19. Għala hi illużjoni li wieħed jiddependi fuq organizzazzjonijiet politiċi biex iġib paċi dinjija?

¹⁹ Li tafda lil xi sostitut magħmul mill-​bniedem għas-​Saltna t’Alla jagħmel lil dak is-​sostitut xbiha oġġett taʼ qima. (Rivelazzjoni 13:14, 15) B’hekk, li tinkuraġġixxi l-​fiduċja f’istituzzjonijiet politiċi, bħalma huma l-​Ġnus Magħquda, għal paċi u sigurtà hija illużjoni, gidba. Rigward oġġetti bħal dawn taʼ tamiet foloz, Ġeremija jgħid: “Ix-​xbiha mdewba tiegħu hija qerq, u m’hemm ebda spirtu fihom. Huma frugħa, xogħol taʼ twaqqiegħ għaċ-​ċajt. Fiż-​żmien meta jingħataw attenzjoni huma se jgħibu.” (Ġeremija 10:14,15) Għalhekk, iż-​żwiemel tal-​gwerra tal-​Eġittu antitipiku, jiġifieri, l-​qawwa militari u politika tal-​ġnus illum, mhux se jipproteġu lill-​qasam reliġjuz tal-​Kristjaneżmu fil-​jum tal-​kriżi tiegħu. L-​alleanza tar-​reliġjonijiet tal-​Kristjaneżmu maʼ din id-​dinja żgur li mhux se jirnexxilha tipproteġihom.

20, 21. (a) Xi ġralha l-​Lega tan-​Nazzjonijiet, u l-​Ġnus Magħquda għala mhix se jkollha ritultat aħjar? (b) Isaija kif wera li l-​alleanzi tal-​Kristjaneżmu mad-​dinja m’humiex se jsalvawh?

²⁰ Il-​Kristjaneżmu tefaʼ t-​tamiet tiegħu fil-​Lega tan-​Nazzjonijiet, imma din ġiet megħluba saħansitra mingħajr il-​wasla taʼ Armageddon. Issa hu ttrasferixxa l-​alleanza tiegħu għall-​Ġnus Magħquda. Imma dalwaqt se jkollu jiffaċċja “il-​gwerra tal-​jum il-​kbir t’Alla li Jistaʼ Kollox,” u mhux se jibqaʼ ħaj. (Rivelazzjoni 16:14) Saħansitra ĠM mogħtija l-​ħajja mill-​ġdid qatt ma tistaʼ ġġib paċi u sigurtà. Il-​Kelma profetika t’Alla turi li l-​organizzazzjoni tal-​Ġnus Magħquda flimkien mal-​ġnus membri tagħha “se jitqabdu mal-​Ħaruf [Kristu fil-​qawwa tas-​Saltna], imma, minħabba li hu Mulej tal-​mulejiet u Sultan tas-​slaten, il-​Ħaruf se jikkonkwistahom.”−Rivelazzjoni 17:14.

²¹ Ix-​Xhieda taʼ Jehovah b’fiduċja jgħidu li m’hemmx salvazzjoni għall-​Kristjaneżmu fl-​alleanzi tiegħu mad-​dinja taʼ Satana. U meta jgħidu dan, huma sempliċement qed jippuntaw lejn dak li l-​Bibbja nfisha tgħid. Isaija 28:17,18 jikkwota lil Jehovah bħala li qed igħid: “Se nagħmel lill-​ġustizzja l-​linja taʼ kejl u lit-​tjieba l-​istrument taʼ livellar; u s-​silġ irid jiknes ’il hemm il-​kenn taʼ gidba, u l-​ilmijiet infushom se jgħarrqu lill-​istess post taʼ ħabi. U l-​patt tagħkom mal-​mewt ċertament se jinħall, u dik il-​viżjoni tagħkom maʼ Xeol mhix se tibqaʼ wieqfa. Il-​għarqa ħesrem li qed tfur, meta tgħaddi minn hemm ġew—intom tridu wkoll issiru għaliha post tal-​irfis.”

22. Meta l-​ġustizzja perfetta tiġi applikata għall-​Kristjaneżmu, x’se jirriżulta?

²² Meta d-​deċiżjoni ġudizzjarja taʼ Jehovah tiġi mwettqa, se jkun skond il-​ġustizzja perfetta. U l-​bażi għal fiduċja tal-​Kristjaneżmu, ‘il-​patt tiegħu mal-​Mewt,’ se jkun miknus kompletament bħal li kieku b’għarqa ħesrem. Isaija jissokta jgħid: “Għodwa wara għodwa se tgħaddi minn hemm ġew, matul il-​jum u matul il-​lejl; u ma trid issir xejn ħlief raġuni għal theżhiż biex tagħmel lil oħrajn jifhmu dak li nstemaʼ.” (Isaija 28:19) Kemm se jkun tal-​biżaʼ għal dawk l-​osservaturi li jkunu xhieda tal-​qawwa kollha tal-​ġudizzju taʼ Jehovah! Xi skantament se jkun għall-​kleru tal-​Kristjaneżmu u s-​segwaċi tagħhom li jsibu, tard wisq, li huma poġġew il-​fiduċja tagllhom f’gidba!

L-​Isem taʼ Jehovah “Torri b’Saħħtu”

23, 24. Minflok ma jfitixu s-​sigurtà f’din id-​dinja, ix-​Xhieda taʼ Jehovah x’se jagħmlu?

²³ Imma xi ngħidu għax-​Xhieda taʼ Jehovah? Saħansitra għalkemm iffaċċjati minn mibgħeda u persekuzzjoni internazzjonali, huma jippersistu f’li jibqgħu separati mid-​dinja. Qatt ma jinsew li Ġesù qal dwar is-​segwaċi tiegħu: “Ma huma ebda parti mid-​dinja, sewwa sew bħalma jien ma jien ebda parti mid-​dinja.” (Ġwann 17:16) Matul dawn l-​aħħar jiem, huma poġġew il-​fiduċja tagħhom fis-​Saltna taʼ Jehovah, mhux fi skemi umani. Għalhekk, il-​gwaj tal-​Kristjanezmu mhux se jwerwer lix-​Xhieda taʼ Jehovah. Bħalma bassar Isaija: “Ebda wieħed li qed jeżerċita fidi ma se jippanikkja.”−Isaija 28:16.

²⁴ Proverbji 18:10 igħid: “Isem Jehovah hu torri b’saħħtu. Ġo fih it-​twajjeb jidħol jiġri u jingħata protezzjoni.” Aħna għalhekk nistiednu lill-​persuni kollha bħal ngħaġ biex isibu kenn f’Jehovah u fis-​Saltna tiegħu bi Kristu. Bħala post taʼ moħba, Jehovah ma fih ebda qerq! Is-​Saltna tiegħu bi Kristu mhix gidba! Il-​kenn tal-​Kristjaneżmu huwa gidba, imma l-​kenn taʼ Kristjani veri huwa l-​verità.

Tistaʼ Tispjega?

◻ Ġuda tal-​qedem kif stkenn f’gidba?

◻ Il-​Krisjaneżmu b’liema mod ipprova jaħbi lilu nnifsu fil-​qerq?

◻ Isaija kif wissa lil Ġuda, u x-​Xhieda taʼ Jehovah kif ilissnu twissija simili llum?

◻ Il-​Kristjaneżmu kif se jsib li l-​fiduċja tiegħu hi spostata?

◻ B’kuntrast mal-​Kristjaneżmu, ix-​Xhieda taʼ Jehovah liema waqfa jżommu?

[Kaxxa f’paġna 9]

TAMIET GHOLJIN IMLISSNA GĦALL-​ĠNUS MAGĦQUDA

“Għall-​ewwel darba mit-​II Gwerra Dinjija ’l hawn il-​komunità internazzionali hi magħquda. It-​tmexxija tal-​Ġnus Magħquda, li darba kienet hiss ideal ittamat, qiegħda issa tikkonferma l-​viżjoni tal-​fundaturi tagħha....Id-dinja tistaʼ għalhekk taħtaf din l-​opportunità biex twettaq il-​wegħda li ilha żmien twil taʼ ordni dinjija ġdida.”

—Il-​President Bush tal-​lstati Uniti fil-​messaġġ tiegħu “State of the Union” lin-​nazzjon, 29 taʼ Jannar, 1991