Tqim lil Liema Alla?

KONTRA tal-​annimali, aħna l-​bnedmin kapaċi nqimu. Din hija parti minn kif aħna magħmulin mit-​twelid. Għandna wkoll sens morali, kuxjenza li tiggwidana f’dak li hu tajjeb u ħażin. B’diversi modi aħna lkoll nimxu fuq dik il-​kuxjenza, u billi jagħmlu hekk, ħafna jfittxu xi alla jew allat għal gwida.

Matul dan l-​aħħar seklu jew taʼ qablu, xi intellettwali tad-​dinja argumentaw kontra l-​eżistenza taʼ Alla li jistaʼ kollox u Ħallieq. Fl-​1844, Karl Marx iddikjara r-​reliġjon bħala “l-​oppju tan-​nies.” Iktar tard, Charles Darwin ħareġ bit-​teorija tal-​evoluzzjoni. Imbagħad ġiet ir-​rivoluzzjoni Bolxevista. Fl-​Ewropa tal-​Lvant l-​ateiżmu sar il-​politika uffiċċjali tal-​istat, u ġie sostnut li r-​reliġjon kienet se tmut mal-​ġenerazzjoni tal-​1917. Imma dawk l-​atei ma setgħux ibiddlu l-​mod kif inhuma magħmulin il-​bnedmin. Dan jidher ċar mill-​qawmien tar-​reliġjon fl-​Ewropa tal-​Lvant f’dan iż-​żmien.

Madankollu, kif tgħid il-​Bibbja, hemm ħafna li “jissejħu ‘allat,’ kemm fis-​sema jew fuq l-​art, sewwa sew bħalma hemm ħafna ‘allat’ u ħafna ‘mulejiet.’” (1 Korintin 8:5) Matul is-​snin il-​bniedem qiem kotra taʼ allat. Kien hemm allat tal-​fertilità, tal-​imħabba, tal-​gwerra, tal-​inbid u x-​xalar. Fir-​reliġjon tal-​Ħindu biss, allat hemm bil-​miljuni. Trinitajiet taʼ allat iffjorixxew fil-​Babilonja, fl-​Assirja, u fl-​Eġittu, kif ukoll f’artijiet Buddisti. Il-​Kristjaneżmu wkoll għandu t-​Trinità “mqaddsa” tiegħu. L-​Islam, li jirrifjuta t-​Trinità, m’għandu “ebda alla ħlief Allah.” Barra minn hekk, saħansitra dawk li jiddieħku bil-​kunċett taʼ Alla li jistaʼ kollox u inviżibbli għandhom allat, għalihom. Per eżempju, f’​Filippin 3:19, il-​Bibbja titkellem dwar bnedmin li jaqgħu fin-​nassa tal-​ġiri wara affarijiet materjali: “L-​alla tagħhom huwa żaqqhom.”

Il-biċċa l-​kbira tan-​nies iqimu l-​alla jew l-​allat tal-​post jew tas-​soċjetà li fiha ġew imweldin. Dan iqajjem mistoqsijiet. Iwasslu dawn il-​forom kollha taʼ qima lejn l-​istess post—bħal toroq għall-​quċċata taʼ muntanja? Jew it-​toroq mistiċi tar-​reliġjon iwasslu għal gwaj—bħal mogħdijiet lejn preċipizju? Hemm bosta modi xierqa taʼ qima jew hemm biss mod wieħed? Hemm bosta allat li jixirqilhom it-​tifħir jew hemm biss Alla wieħed li Jistaʼ Kollox u li jixraqlu d-​devozzjoni esklussiva u l-​qima tagħna?

Il-​Qawmien taʼ Allat Foloz

Dawn il-​mistoqsijiet t’hawn fuq jixirqilhom li neżaminawhom bir-​reqqa. Għala? Għaliex l-​eqdem awtorità miktuba dwar ir-​reliġjon, il-​Bibbja, tiddeskrivi kif alla falz, billi opera permezz taʼ serp, ħajjar lill-​ewwel antenati tagħna għal korsa diżastruża. Aħna qed nesperjenzaw ir-​riżultati taʼ dwejjaq tal-​istrateġija tiegħu sal-​lum. (Ġenesi 3:1-13, 16-19; Salm 51:5) Ġesù, “l-​Iben t’Alla,” tkellem dwar dan l-​alla ribelluż bħala “l-​ħakkiem taʼ did-dinja.” Wieħed mill-​appostli taʼ Ġesù sejjaħlu “l-​alla taʼ din is-​sistema taʼ affarijiet.” (Ġwann 1:34; 12:31; 16:11; 2 Korintin 4:4) F’​Rivelazzjoni kapitlu 12, vers 9, huwa deskritt bħala “is-​serpent oriġinali, dak imsejjaħ Xitan u Satana, li qed jiżżvija lill-​art abitata kollha.” Imperu dinji taʼ reliġjon falza qiegħed taħt il-​kontroll taʼ Satana.

Satana huwa l-​qarrieq il-​kbir. (1 Timotew 2:14) Hu jabbuża mix-​xewqa li jitwieldu biha l-​bnedmin biex iqimu billi jġib ’il quddiem ħafna tipi differenti taʼ allat—spirti tal-​antenati, idoli, xbihat, Madonnijiet. Hu wkoll jimbotta lejn il-​qima taʼ allat umani bħalma huma ħakkiema setgħana, ġenerali rebbieħa, u stilel taċ-​ċinema u tal-​isport. (Atti 12:21-23) Nagħmlu tajjeb jekk noqogħdu għassa, reżoluti li nfittxu sew u nqimu lill-​uniku veru Alla, li tabilħaqq “mhux bogħod minn kull wieħed minna.”−Atti 17:27.

Min hu, allura, dan Alla uniku li aħna għandna nqimu? Xi 3,000 sena ilu, is-​salmista tal-​Bibbja ddeskrivieh bħala “l-​Iktar Għoli . . ., Dak li Jistaʼ Kollox . . ., Alla tiegħi, li fih se nafda,” u sejjaħlu bl-​isem kbir u distint tiegħu—“Jehovah.” (Salm 91:1, 2) Iktar kmieni, Mosè qal dwaru: “Jehovah Alla tagħna huwa Jehovah wieħed.” (Dewteronomju 6:4) U l-​profeta Isaija kkwota lil Alla nnifsu bħala li qal: “Jiena Jehovah. Dak hu ismi; u lil ħadd ieħor ma se nagħti l-​glorja tiegħi stess, lanqas it-​tifħir tiegħi lil immaġnijiet skolpiti.”−Isaija 42:8.

Alla Jehovah għandu l-​għan li jnaddaf ismu mit-​tmaqdir kollu li l-​alla falz Satana ċappsu bih. Hu wera kif kien se jagħmel dan fis-​sena 1513 Q.E.K., meta uża lill-​profeta Mosè biex jeħles lill-​poplu taʼ Iżrael mill-​oppressjoni Eġizzjana. F’dik l-​okkażjoni, Alla rabat ismu Jehovah mal-​kelmiet: “Jien se nkun Dak li se nkun.” (Eżodu 3:14, 15) Hu kellu jivvindika lilu nnifsu mal-​Farawni tal-​Eġittu, imma l-​ewwel qal lil dak il-​ħakkiem mill-​agħar: “Għal din ir-​raġuni ħallejtek teżisti, bil-​għan li nurik il-​qawwa tiegħi u sabiex ikolli ismi ddikjarat mal-​art kollha.”—Eżodu 9:16.

Is-sitwazzjoni qisha l-​istess illum. Bħal Farawni tal-​qedem, l-​alla taʼ din id-​dinja, Satana, jisfida lil Alla Jehovah u bil-​makakkerija kollha jkompli l-​gwerra spiritwali kontra dawk il-​bnedmin li jħobbu t-​tjieba u l-​verità. (Efesin 6:11, 12, 18) Għal darb’oħra, Alla għandu l-​għan li jigglorifika lil ismu minkejja l-​oppożizzjoni taʼ Satana. Madankollu, qabel ma juri l-​qawwa tiegħu billi jeqred lil Satana u xogħlijietu kollha, Jehovah jibgħat lill-​adoraturi tiegħu biex jiddikjaraw lil Ismu mal-​art kollha. Dan il-​għoti taʼ xiehda għal ismu huwa parti vitali tal-​qima vera.

Kif inhu xieraq, Alla nnifsu qal li dawn l-​adoraturi kellhom ikunu x-​xhieda tiegħu, ix-​Xhieda taʼ Jehovah, “il-​poplu li jien sawwart għalija nnifsi, sabiex għandhom jirrakkontaw it-​tifħir minn tiegħi.” (Isaija 43:10-12, 21) Kif se jirrakkontaw it-​tifħir taʼ Jehovah? Huma jippridkaw u jgħallmu pubblikament u minn dar għal dar, billi jiddikjaraw l-​aħbar tajba li s-​Saltna taʼ Jehovah, immexxija minn Ibnu, Ġesù Kristu, se ġġib barkiet eterni għall-​umanità ubbidjenti fuq din l-​art. B’hekk, huma jqimu ’l Alla “bla waqfien,” kif għamlu Kristjani veri fl-​ewwel seklu. (Atti 5:42; 20:20, 21) Gawdew huma barka divina f’dan? Il-​paġni li ġejjin se jweġbuh dan.