L-​Aqwa Bniedem li Qatt Għex

“Int il-​Kristu, l-​Iben t’ Alla l-​ħaj.”—MATTEW 16:16.

1, 2. (a) Il-​kobor taʼ bniedem kif jistaʼ jiġi ddeterminat? (b) Liema rġiel fl-​istorja ġew imsejħin Kbir, u għala?

MIN taħseb li hu l-​aqwa bniedem li qatt għex? Kif tikkalkulah int il-​kobor taʼ bniedem? Bil-​ġenju militari tiegħu? bl-​abbiltajiet mentali u superjuri tiegħu? bis-​saħħa fiżika tiegħu?

² Diversi ħakkiema ġew imsejħin Kbir, bħal per eżempju Ċiru l-​Kbir, Alessandru l-​Kbir, u Karlumanju, li kien mogħti l-​isem “il-​Kbir” saħansitra matul ħajtu stess. Permezz tal-​preżenza formidabbli tagħhom, bnedmin bħal dawn influwenzaw ħafna lil dawk li lilhom kienu jaħkmu.

3. (a) Liema hu test wieħed li bih tkejjel il-​kobor taʼ bniedem? (b) Billi tuża dan it-​test, min hu l-​aqwa bniedem li qatt għex?

³ Taʼ interess, H. G. Wells, kittieb tal-​istorja, iddeskriva t-​test tiegħu biex ikejjel il-​kobor taʼ bniedem. Iktar minn 50 sena ilu, hu kiteb: “Il-​mod kif kittieb tal-​istorja jittestja l-​kobor taʼ individwu hu ‘X’ħalla jikber hu? Ġiegħel hu lin-​nies jibdew jaħsbu fuq linji ġodda b’qawwa u ħeġġa li ppersistew warajh?’ B’dan it-​test,” ikkonkluda Wells, “Ġesù jiġi l-​ewwel.” Saħansitra Napuljun Bonaparte nnota: “Ġesù Kristu influwenza u kkmanda lis-​sudditi Tiegħu mingħajr il-​preżenza viżibbli Tiegħu fil-​ġisem.”

4. (a) Liema fehmiet kontrastanti jeżistu rigward Ġesù? (b) Wieħed kittieb tal-​istorja li mhux Kristjan liema post jagħti lil Ġesù fl-​istorja?

⁴ Izda, xi wħud oġġezzjonaw li Ġesù mhux persuna storika imma huwa ħrafa. Fl-​estrem l-​ieħor, ħafna nies idolizzaw lil Ġesù bħala Alla, billi qalu li Alla ġie fuq l-​art bħala Ġesù. Madankollu, billi bbaża l-​konklużjonijiet tiegħu fuq l-​evidenza storika biss rigward l-​eżistenza taʼ Ġesù bħala bniedem, Wells kiteb: “Huwa taʼ interess u sinjifikanti li kittieb tal-​istorja, mingħajr ebda xaqliba teoloġika hi x’inhi, għandu jsib li ma jistax jagħti stampa tal-​progress tal-​umanità b’mod onest mingħajr ma jagħti post ewlieni lil għalliem taʼ mingħajr sold minn Nazzaret.... Kittieb tal-​istorja bħali nnifsi, li lanqas saħansitra ma jsejjaħ lilu nnifsu Kristjan, isib l-​istampa ċċentrata b’mod irreżistibbli madwar il-​ħajja u l-​karattru taʼ dan il-​bniedem l-​iktar sinjifikanti.”

Tassew li Għex Ġesù?

5, 6. Il-​kittieba tal-​istorja H. G. Wells u Will Durant x’għandhom xi jgħidu dwar kemm Ġesù hu bniedem storiku?

⁵ Imma x’jiġri jekk xi ħadd igħidlek li Ġesù qatt ma għex tassew, li ħu kien, fil-​fatt, ħrafa, invenzjoni taʼ xi rġiel tal-​ewwel seklu? Kif tweġibha kieku din l-​akkuża? Waqt li Wells jirrikonoxxi li “aħna ma nafux dwar [Ġesù] daqskemm kieku nixtiequ li nkunu nafu,” hu madankollu josserva: “L-​erbaʼ Vanġeli . . . jaqblu f’li jagħtuna stampa taʼ personalità definita ferm; huma jġorru konvinzjoni taʼ realtà. Li tassumi li hu qatt ma għex, li r-​rakkonti dwar il-​ħajja tiegħu huma invenzjonijiet, huwa iktar diffiċli u joħloq ferm iktar problemi għall-​kittieb tal-​istorja milli li wieħed jaċċetta l-​elementi essenzjali tal-​istejjer tal-​Vanġelu bħala fatt.”

⁶ Il-​kittieb rispettat tal-​istorja Will Durant argumenta bl-​istess mod, billi spjega: “Li ftit nies sempliċi [li sejħu lilhom infushom Kristjani] f’ġenerazzjoni waħda vvintaw personalità daqshekk qawwija u li tiġbdek, etika daqshekk għolja u viżjoni daqshekk imnebbħa taʼ fratellanza umana, kien ikun miraklu ferm iktar inkredibbli minn kwalunkwe wieħed miktub fil-​Vanġeli.”

7, 8. Ġesù kemm effettwaha bi kbir l-​istorja umana?

⁷ B’hekk, int tistaʼ tirraġuna maʼ wieħed xettiku bħal dan: Setaʼ karattru tal-​ħrejjef—bniedem li qatt ma għex tassew—jeffettwa lill-​istorja umana b’mod daqshekk tal-​għaġeb? Il-​ktieb taʼ referenza The Historians’ History of the World osserva: “Ir-​riżultat storiku tal-​attivitajiet taʼ [Ġesù] kien ferm iktar taʼ importanza, saħansitra minn aspett strettament sekulari, mill-​għemejjel taʼ kwalunkwe karattru ieħor tal-​istorja. Era ġdida, rikonoxxuta miċ-​ċivilizzazzjonijiet ewlenin tad-​dinja, bdiet tgħodd mit-​twelid tiegħu.” Aħseb ftit dwar dan. Saħansitra xi kalendarji llum huma bbażati fuq is-​sena li fiha Ġesù kien maħsub li twieled. “Dati qabel dik is-​sena huma mniżżlin bħala Q.K., jew qabel Kristu,” tis-pjega The World Book Encyclopedia. “Dati wara dik is-​sena huma mniżżlin bħala A.D., jew anno Domini (fis-sena tal-​Mulej tagħna).

⁸ Bit-​tagħlim dinamiku tiegħu u bil-​mod taʼ kif għex ħajtu fi qbil miegħu, Ġesù effettwa b’mod qawwi l-​ħajjiet taʼ kotriet bla għadd taʼ nies għal kważi elfejn sena. Bħalma esprimieha wieħed kittieb b’mod ċar: “L-​armati kollha li qatt immarċjaw, u l-​qawwiet navali kollha li qatt inbnew, u l-​parlamenti kollha li qatt iltaqgħu, is-​slaten kollha li qatt irrenjaw, kollha flimkien m’effettwawx il-​ħajja tal-​bniedem fuq din l-​art b’daqstant qawwa.” Xorta waħda, il-​kritiċi jgħidu: ‘Dak kollu li tassew nafu dwar Ġesù jinstab fil-​Bibbja. Ebda kitbiet oħra taʼ dak iż-​żmien li jikkonċernaw lilu ma jeżistu.’ Biss, huwa veru dan?

9, 10. (a) Kittieba sekulari bikrin tal-​istorja x’qalu dwar Ġesù? (b) Fuq il-​bażi tat-​testimonjanza taʼ kittieba bikrin tal-​istorja, x’tikkonkludi enciklopedija rispettata?

⁹ Għalkemm referenzi għal Ġesù Kristu minn kittieba sekulari u bikrija tal-​istorja huma ftit li xejn, referenzi bħal dawn veru jeżistu. Cornelius Tacitus, kittieb tal-​istorja Ruman irrispettat tal-​ewwel seklu, kiteb li l-​imperatur Ruman Neruni‘tefaʼ l-​ħtija tal-​ħruq taʼ Ruma fuq il-​Kristjani,’ u mbagħad Tacitus spjega: “L-​isem [Kristjan] ġej mil-​lisem Kristu, li lilu l-​prokuratur Ponzju Pilatu kien qatel fir-​renju taʼ Tiberju.” Suetonius u Pliny l-​Iżgħar, kittieba Rumani oħrajn taʼ dak iż-​żmien, ukoll irreferew għal Kristu. Barra minn hekk, Flavius Josephus, kittieb tal-​istorja Lhudi tal-​ewwel seklu, kiteb fil-​ktieb tiegħu Antiquities of the Jews dwar il-​mewt tad-​dixxiplu Kristjan Ġakbu. Ġakbu, qal Josephus biex jispjega, kien “ħu Ġesù, li kien imsejjaħ Kristu.”

¹⁰ The New Encyclopoedia Britannica b’hekk tikkonkludi: “Dawn ir-​rakkonti indipendenti jagħtu prova li fi żminijiet antiki saħansitra dawk li kienu jopponu lill-​Kristjanità qatt ma ddubitaw l-​istoriċita taʼ Ġesù, li ġiet argumentata għall-​ewwel darba u fuq raġunijiet mhux adegwati fit-​tmiem tas-​seklu 18, matul is-​seklu 19, u fil-​bidu tas-​seklu 20.”

Min Tassew Kien Ġesù?

11. (a) Essenzjalment, liema hu l-​uniku sors taʼ informazzjoni dwar Ġesù? (b) Liema mistoqsija kellhom is-​segwaċi stess taʼ Ġesù dwar l-​identità tiegħu?

¹¹ Essenzjalment, iżda, dak kollu li hu magħruf dwar Ġesù kien miktub mis-​segwaċi tiegħu tal-​ewwel seklu. Ir-​rapporti tagħhom ġew miżmumin fil-​Vanġeli—kotba tal-​Bibbja miktubin minn tnejn mill-​appostli tiegħu, Mattew u Ġwanni, u minn tnejn li kienu d-​dixxipli tiegħu, Mark u Luqa. Ir-​rakkonti taʼ dawn l-​irġiel x’jirrivelaw rigward l-​identità taʼ Ġesù? Min verament kien hu? L-​imseħbin taʼ Ġesù tal-​ewwel seklu mmeditaw fuq dik il-​mistoqsija. Meta raw lil Ġesù jikkalma b’ċanfira lill-​baħar imqalleb ħafna minħabba r-​riħ, huma stagħġbu mbellhin: “Dan min tassew hu?” Iktar tard, f’okkażjoni oħra, Ġesù staqsa lill-​appostli tiegħu: “Min tgħidu li jien?”−Mark 4:41; Mattew 16:15.

12. Kif nafu li Ġesù mhux Alla?

¹² Kieku xi ħadd kellu jistaqsik dik il-​mistoqsija, kif kont twieġeb? Min tassew kien Ġesù? M’għandniex xi ngħidu, ħafna fil-​Kristjaneżmu kieku jgħidu li kien Alla li Jistaʼ Kollox f’forma umana, Alla magħmul bniedem. Iżda, l-​imseħbin persunali taʼ Ġesù qatt ma emmnu li hu kien Alla. L-​appostlu Pietru sejjaħlu “l-​Kristu, l-​Iben t’Alla l-​ħaj.” (Mattew 16:16) U tfittex kemm tfittex, qatt ma se taqra li Ġesù sostna li kien Alla. Minflok, hu qal lil-​Lhud li hu kien “l-​Iben t’Alla,” mhux Alla.—Ġwann 10:36.

13. Ġesù kif kien differenti mill-​bnedmin l-​oħrajn kollha?

¹³ Meta Ġesù mexa fuq baħar imqalleb, id-​dixxipli ġew impressjonati mill-​fatt li hu ma kienx bniedem bħal kwalunkwe bniedem ieħor. (Ġwann 6:18-21) Kien persuna speċjali ferm. Dan għaliex hu kien għex qabel bħala persuna spirtu maʼ Alla fis-​sema, iva, bħala anġlu, identifikat fil-​Bibbja bħala l-​arkanġlu. (1 Tessalonkin 4:16; Ġuda 9) Alla kien ħalaq lilu qabel ma Hu kien ħalaq l-​affarijiet l-​oħra kollha. (Kolossin 1:15) B’hekk, għal epoki bla għadd taʼ żmien, qabel ma saħansitra l-​univers fiżiku kien maħluq, Ġesù gawda sħubija intima fis-​sema maʼ Missieru, Alla Jehovah, il-​Ħallieq Grandjuż.—Proverbji 8:22, 27-31; Ekkleżjasti 12:1.

14. Ġesù kif sar bniedem?

¹⁴ Imbagħad, madwar elfejn sena ilu, Alla ttrasferixxa l-​ħajja taʼ Ibnu fil-​ġuf taʼ mara. B’hekk hu ġie li jkun iben uman t’Alla, imwieled bil-​manjiera normali permezz taʼ mara. (Galatin 4:4) Waqt li Ġesù kien qed jiżżviluppa fil-​ġuf taʼ ommu, Marija, u iktar tard meta kien qed jikber bħala tifel, hu kien jiddependi minn dawk li lilhom Alla kien għażel biex ikunu l-​ġenituri tiegħu fuq l-​art. Eventwalment Ġesù sar raġel, u mid-​dehra mbagħad ġie mogħti lilu li jiftakar is-​sħubija li hu kellu qabel maʼ Alla fis-​sema. Dan ġara meta‘s-​smewwiet infetħu għalih’ mal-​magħmudija tiegħu.—Mattew 3:16; Ġwann 8:23; 17:5.

15. Kif nafu li Ġesù kien kollu kemm hu bniedem meta għex fuq l-​art?

¹⁵ Verament, Ġesù kien persuna unika. Hu kien, madankollu, bniedem, l-​ugwali taʼ Adam, il-​bniedem li lilu Alla ħalaq fil-​bidu u poġġa fil-​ġnien taʼ Għeden. L-​appostlu Pawlu spjega: “‘L-​ewwel bniedem Adam sar ruħ ħajja.’ L-​aħħar Adam sar spirtu li jagħti l-​ħajja.” Ġesù huwa msejjaħ “l-​aħħar Adam” għaliex, bħal Adam oriġinali, Ġesù kien bniedem perfett. Imma wara li Ġesù miet, hu ġie rxoxtat, u reġaʼ ssieħeb maʼ Missieru fis-​sema bħala persuna spirtu.—1 Korintin 15:45.

Kif l-​Aħjar li Titgħallem Dwar Alla

16. (a) X’kien li għamel is-​sħubija maʼ Ġesù daqstant privileġġ? (b) Għala setaʼ jingħad illi li tara lil Ġesù kien l-​istess bħal li tara ’l Alla?

¹⁶ Aħseb għal mument dwar il-​privileġġ meraviljuż li xi wħud gawdew bħala mseħbin persunali taʼ Ġesù meta kien fuq l-​art! Immaġina li qed tismaʼ u tara lil, u saħansitra titkellem u taħdem maʼ dak il-​Wieħed li kien qattaʼ forsi biljuni taʼ snin bħala msieħeb intimu taʼ Alla Jehovah fis-​sema! Bħala iben leali, Ġesù kkopja lil Missieru tas-​sema f’kulma għamel. Fil-​fatt, Ġesù imita lil Missieru b’mod tant perfett li setaʼ jgħid lill-​appostli tiegħu ftit qabel ma qatluh: “Dak li ra lili ra lill-​Missier ukoll.” (Ġwann 14:9, 10) Iva, f’kull sitwazzjoni li ltaqaʼ magħha hawn fuq l-​art, Ġesù għamel sewwa sew bħalma Missieru, Alla li Jistaʼ Kollox, kieku kien jagħmel kieku Hu kien hawn. B’hekk, meta nistudjaw il-​ħajja u l-​ministeru taʼ Ġesù Kristu, inkunu, effettivament, qed nitgħallmu sewwa sew liema xorta taʼ persuna Alla hu.

17. Liema għan mill-​aħjar ġie moqdi mis-​serje fil-​Watchtower dwar “Il-​Ħajja u l-​Ministeru taʼ Ġesù”?

¹⁷ Għalhekk, is-​serje “Il-​Ħajja u l-​Ministeru taʼ Ġesù,” li dehret f’harġiet suċċessivi taʼ The Watchtower minn April tal-​1985 sa Ġunju tal-​1991, mhux biss ipprovdiet stampa mill-​aħjar tal-​bniedem Ġesù imma wkoll għallmet ħafna affarijiet dwar Missieru tas-​sema, Alla Jehovah. Wara l-​ewwel żewġ partijiet tagħha, ministru pijunier kiteb lill-​Watch Tower Society b’apprezzament, billi qal: “X’mod aħjar biex nersqu iktar qrib lejn il-​Missier milli li nsiru nafu lill-​Iben aħjar!” Kemm hu veru dak! Il-​ħarsien teneru tal-​Missier u l-​qalb kbira tiegħu lejn in-​nies jidhru iktar kbar fil-​ħajja tal-​Iben.

18. Min hu l-​Awtur tal-​messaġġ tas-​Saltna, u Ġesù kif għaraf dan?

¹⁸ L-​imħabba taʼ Ġesù lejn Missieru, kif murija permezz tas-​sottomissjoni sħiħa tiegħu lejn ir-​rieda taʼ Missieru, hi tabilħaqq sabiħa biex nosservawha. “Ma nagħmel xejn minn jeddi,” Ġesù qal lil-​Lhud li kienu qed ifittxu biex joqtluh, “imma sewwa sew bħalma l-​Missier għallem lili jien nitkellem dawn l-​affarijiet.” (Ġwann 8:28) Mela, allura, Ġesù ma kienx l-​awtur tal-​messaġġ tas-​Saltna li hu ppriedka. Alla Jehovah kien! U Ġesù kemm-il darba ta l-​kredtu lil Missieru. “Jien ma tkellimtx minn jeddi,” hu qal “imma l-​Missier innifsu li bagħatni tani kmandament dwar x’irrid ngħid u x’irrid nitkellem.... Għalhekk l-​affarijiet li ngħid jien, sewwa sew bħalma l-​Missier qalhomli, hekk ingħidhom.”−Ġwann 12:49, 50.

19. (a) Kif nafu li Ġesù għallem bl-​istess mod li jgħallem Jehovah? (b) Ġesù għala kien l-​aqwa bniedem li qatt għex?

¹⁹ Iżda, Ġesù mhux biss tkellem jew għallem kull ħaġa li l-​Missier qallu. Hu għamel ħafna iktar. Hu tkellimha jew għallimha bil-​mod kif il-​Missier kien jitkellimha jew igħallimha. Iktar minn hekk, fl-​attivitajiet u fir-​relazzjonijiet kollha tiegħu, hu ġab ruħu u aġixxa sewwa sew bħalma l-​Missier kien iġib ruħu u jaġixxi taħt l-​istess ċirkostanzi. “L-​Iben ma jistaʼ jagħmel lanqas ħaġa waħda bl-​inizzjattiva tiegħu stess,” spjega Ġesù, “imma dak biss li hu jilmaħ lill-​Missier jagħmel. Għax huma x’inhuma l-​affarijiet li jagħmel Dak, dawn l-​affarijiet l-​Iben ukoll jagħmel bl-​istess manjiera.” (Ġwann 5:19) B’kull mod, Ġesù kien riflessjoni perfetta taʼ Missieru, Alla Jehovah. Mela mhux taʼ b’xejn li Ġesù kien l-​aqwa bniedem li qatt għex! Ċertament, allura, huwa taʼ importanza vitali li nikkunsidraw mill-​qrib lil dan il-​bniedem l-​iktar sinjifikanti!

L-​Imħabba t’Alla Tidher f’Ġesù

20. L-​appostlu Ġwanni kif setaʼ jkun jaf li “Alla hu mħabba”?

²⁰ X’nitgħallmu b’mod speċjali billi nagħmlu studju profond u bir-​reqqa dwar il-​ħajja u l-​ministeru taʼ Ġesù? Sewwa, l-​appostlu Ġwanni rrikonoxxa li “ebda bniedem ma ra lil Alla.” (Ġwann 1:18) Madankollu, Ġwanni kiteb b’fiduċja assoluta fl-​1 Ġwann 4:8:“Alla hu mħabba.” Ġwanni setaʼ jgħid dan għaliex hu kien jafha l-​imħabba t’Alla permezz taʼ dak li hu kien ra f’Ġesù.

21. Liema ħaġa dwar Ġesù għamlitu l-​aqwa bniedem li qatt għex?

²¹ Bħall-​Missier, Ġesù kien jagħder, qalbu tajba, umli, u kien iħalli lil min jersaq lejh. Id-​dgħajfin u l-​imgħaffġin kienu jħossuhom komdi miegħu, bħalma kienu jagħmlu nies taʼ kull xorta—irġiel, nisa, tfal, il-​għonja, il-​foqra, is-​setgħana, u l-​midinbin ukoll. Tabilħaqq, kien b’mod speċjali l-​eżempju li jisboq tal-​imħabba taʼ Ġesù, b’imitażzjoni taʼ Missieru, li għamlu l-​aqwa bniedem li qatt għex. Saħansitra Napuljun Bonaparte huwa rrapportat li qal: “Alessandru, Ċesri, Karlumanju, u jien innifsi sejjisna imperi, imma fuqhiex serraħna l-​kreazzjonijiet tal-​ġenju tagħna? Fuq il-​forza. Ġesù Kristu waħdu sejjes is-​saltna tiegħu fuq l-​imħabba, u f’dan iż-​żmien miljuni taʼ bnedmin huma lesti li jmutu għalih.”

22. X’kien revoluzzjonarju dwar it-​tagħlim taʼ Ġesù?

²² It-​tagħlim taʼ Ġesù kien revoluzzjonarju. “Tirreżisthux lil dak li hu mill-​agħar,” ħeġġeġ Ġesù, “imma kulmin jagħtik bil-​ħarta fuq ħaddejk il-​leminija, dawwarlu l-​oħra wkoll.” “Komplu ħobbu lill-​għedewwa tagħkom u itolbu għal dawk li qed jippersegwitawkom.”‘Agħmlu lill-​oħrajn dak li triduhom jagħmlu lilkom.’ (Mattew 5:39, 44; 7:12) Kemm kienet tkun differenti d-​dinja kieku kulħadd japplika dan it-​tagħlim sublimi!

23. X’għamel Ġesù biex imiss il-​qlub u jqanqal lin-​nies biex jagħmlu t-​tajjeb?

²³ Il-​parabboli, jew tixbihat, taʼ Ġesù messew il-​qlub, billi qanqlu lin-​nies biex jagħmlu t-​tajjeb u biex jevitaw il-​ħażen. Int forsi tiftakar l-​istorja tiegħu magħrufa sewwa taʼ Samaritan iddisprezzat li għen lil raġel imweġġaʼ taʼ razza oħra meta rġiel devoti tar-​razza taʼ dak ir-​raġel stess ma ridux igħinuh. Jew l-​istorja dwar il-​missier li jagħder u li jaħfer u l-​iben prodigu tiegħu. U xi ngħidu dwar dik tas-​sultan li ħafer lil irsir dejn taʼ 60 miljun dinier, u madankollu l-​irsir dar lura u tefaʼ fil-​ħabs lil irsir sieħbu li ma setax iħallas dejn taʼ 100 dinier biss? B’tixbihat sempliċi, Ġesù għamel il-​għemejjel taʼ egoiżmu u regħba jidhru moqżieża u atti taʼ mħabba u ħniena jidhru tant sbieħ!—Mattew 18:23-35; Luqa 10:30-37; 15:11-32.

24. Għala nistgħu ngħidu li Ġesù kien bla ebda dubju l-​aqwa bniedem li qatt għex?

²⁴ Madankollu, dak li b’mod speċjali kien jiġbed lin-​nies lejn Ġesù u influwenzahom biex jagħmlu t-​tajjeb kien li l-​ħajja tiegħu stess kienet taqbel b’mod perfett maʼ dak li għallem. Hu pprattika dak li ppriedka. Hu bil-​paċenzja ssaporta n-​nuqqasijiet taʼ oħrajn. Meta d-​dixxipli tiegħu ħaqquha fuq min kien l-​akbar, hu b’qalb tajba kkorreġiehom minflok ma ċanfarhom b’mod aħrax. Hu mministra b’mod umli għall-​ħtiġijiet tagħhom, saħansitra billi ħaslilhom saqajhom. (Mark 9:30-37; 10:35-45; Luqa 22:24-27; Ġwann 13:5) Fl-​aħħarnett, hu minn rajh sofra mewt taʼ wġigħ, mhux biss għan-​nom tagħhom, imma għan-​nom tal-​umanità kollha! Bla ebda dubju, Ġesù kien l-​aqwa bniedem li qatt għex.

Kif Twieġeb Int?

◻ Liema prova hemm li Ġesù kien persuna attwali fl-​istorja?

◻ Kif nafu li Ġesù kien bniedem, u madankollu kif kien differenti mill-​bnedmin l-​oħrajn kollha?

◻ Li tistudja l-​ħajja taʼ Ġesù għala hu l-​aqwa mod taʼ kif titgħallem dwar Alla?

◻ X’nistgħu nitgħallmu dwar l-​imħabba t’Alla billi nistudjaw dwar Ġesù?

[Stampa f’paġna 9]

L-​appostli taʼ Ġesù tħassbu bi stagħġib: “Dan min tassew hu?”