Huwa l-Faith Healing Approvat Minn Alla?

“RAJNA affarijiet strambi llum!” Iva, l-​osservaturi baqgħu mpressjonati. Bniedem kważi pparalizzat għalkollox ġie mfejjaq quddiem għajnejhom stess. Dak li fejqu qal lir-​raġel: “Qum u erfaʼ s-​sodda żgħira tiegħek u itlaq lejn darek.” U r-​raġel hekk għamel! Hu ma kienx għadu pparalizzat. Mhux taʼ b’xejn li dawk preżenti “bdew jigglorifikaw lil Alla”! (Luqa 5:​18-26) Dan il-​fejqan, imwettaq minn Ġesù Kristu kważi 2,000 sena ilu, jidher b’mod ċar ħafna li kellu l-​approvazzjoni t’Alla.

Xi ngħidu għal-​lum? Għadu fejqan mirakoluż possibiltà tajba għal dawk li ma jistgħu jsibu l-​ebda kura medika? Ġesù wettaq mirakli taʼ fejqan. Il-​faith healers illum isostnu li qegħdin jimitawh. Kif għandna nqisuhom id-​dikjarazzjonijiet tagħhom?

Il-faith healing jiġi definit bħala “metodu li bih jittrattaw mardiet bit-​talb u bl-​eżerċitar taʼ fidi f’Alla.” L-​Encyclopœdia Britannica tafferma: “L-​istorja tal-​faith healing fil-​Kristjanità bdiet bil-​ministeri persunali tal-​għaġeb taʼ Ġesù u l-​appostli.” Iva, Ġesù wettaq atti taʼ fejqan tal-​għaġeb. Iwettqu l-​faith healers tal-​lum mirakli bħalma għamel hu?

Il-​Fidi​—Ħtieġa?

Skond Black’s Bible Dictionary, Ġesù “speċifika [l-fidi] bħala ħtieġa minn qabel għall-​mirakli tiegħu taʼ fejqan.” Imma veru hekk kien? Esiġa Ġesù li l-​marid ikollu l-​fidi qabel ma kien ifejqu? It-​tweġiba hija le. Il-​fidi kienet meħtieġa min-​naħa taʼ dak li jfejjaq imma mhux neċessarjament min-​naħa tal-​marid. Darba minnhom id-​dixxipli taʼ Ġesù ma setgħux ifejqu tifel li kien itih tal-​qamar. Ġesù ma setgħux ifejqu tifel li kien itih tal-​qamar. Ġesù fejjaq lit-​tifel u wara qal lid-​dixxipli għala huma ma kinux kapaċi jfejquh. “Qalilhom: ‘Minħabba l-​fidi ċkejkna tagħhom.’”​—Mattew 17:​14-20.

Skond Mattew 8:​16, 17, Ġesù “fejjaq lil kulmin jinsab ħażin.” Veru, dawn in-​nies ftit jew wisq kienu jemmnu f’Ġesù u dan ġagħalhom jersqu lejh. (Mattew 8:​13; 9:​22, 29) Fil-​biċċa l-​kbira tal-​każi riedu jiġu jitolbuh qabel ma hu fejjaqhom. Madankollu, l-​ebda stqarrija taʼ fidi ma kienet meħtieġa biex jiġi mwettaq il-​miraklu. Darba minnhom Ġesù fejjaq raġel zopp li lanqas biss kien jaf min kien Ġesù. (Ġwann 5:​5-9, 13) Fil-​lejl tal-​arrest tiegħu, Ġesù waħħal il-​widna maqtugħa tal-​qaddej tal-​qassis il-​kbir, għalkemm dan ir-​raġel kien wieħed minn fost il grupp tal-​għedewwa taʼ Ġesù li kienu ġew biex jarrestawh. (Luqa 22:​50, 51) Tabilħaqq, xi kultant, Ġesù saħansitra qajjem il-​mejtin!​—Luqa 8:​54, 55; Ġwann 11:​43, 44.

Ġesù kif setaʼ jwettaq mirakli bħal dawn? Għaliex huwa straħ fuq l-​ispirtu qaddis, jew il-​forza attiva, t’Alla. Dan hu dak li għamel il-​fejqan, mhux il-​fidi tal-​individwu marid. Jekk taqra r-​rakkonti fil-​Vanġeli, inti se tinnota wkoll li l-​atti taʼ fejqan minn Ġesù ma ġewx imwettqin b’ħafna ċerimonji. Ma kien hemm ebda esibizzjoniżmu jew tqanqil taʼ emozzjonijiet. Barra minn hekk, kienet x’kienet il-​marda, Ġesù qatt ma falla. Hu dejjem kellu suċċess, u qatt ma talab miżata.​—Mattew 15:​30, 31.

L-​Atti Moderni taʼ Fejqan bħal Dawk taʼ Ġesù?

Il-​mard huwa problemi terribbli, u meta jolqotna, naturalment aħna nfittxu serħan. Xi ngħidu, iżda, jekk ingħixu f’post fejn “in-​nies, speċjalment dawk li ma tantx jistgħu jħallsu, jiġu ttrattati mill-​professjonisti mediċi bħala affarijiet u mhux bħala bnedmin tad-​demm u l-​laħam”? Dik hija s-​sitwazzjoni li osserva tabib f’pajjiż tal-​Amerka Latina. U xi ngħidu jekk ingħixu f’post fejn, bħal dak l-​istess pajjiż, ‘40 fil-​mija biss tat-​tobba huma kkwalifikati biex jippratikaw il-​professjoni tagħhom’?

Mhux ħaġa tal-​iskantament li ħafna, billi ma jaraw ebda triq oħra, jħarsu lejn il-​faith healing bħala xi ħaġa li taʼ min għall-​inqas jippruvaha. Iżda, l-​atti taʼ fejqan li jsostnu li għamlu l-​faith healers huma kontroversjali. Per eżempju, huwa stmat li 70,000 attendew laqgħa f’São Paulo, fil-​Brażil, fejn żewġ healers ‘rifsu fuq mijiet taʼ nuċċalijiet tal-​vista mitfugħin mill-​udjenza, minn uħud li belgħu l-​wegħda li l-​vista tagħhom kienet se titfejjaq.’ Wieħed mill-​healers ammetta onestament f’intervista: “Jien ma nistax ingħid li dawk il-​morda kollha li nitolbu għalihom se jiġu mfejqin. Jiddependi fuq il-​fidi tagħhom. Jekk wieħed jemmen, se jiġi mfejjaq.” Hu ta t-​tort taʼ xi falliment taʼ fejqan lil nuqqas taʼ fidi min-​naħa tal-​marid. Ftakar iżda, kif rajna qabel, li Ġesù ta t-​tort tal-​falliment taʼ fejqan fuq in-​nuqqas taʼ fidi taʼ dawk li kienu qegħdin ifejqu!

Healer ieħor wiegħed li jikkura l-​kanċer u l-​paraliżi. X’ġara? Skond ir-​rivista Veja, “il-​wegħda, evidentement, ma gietx imwettqa.” U agħti widen għall-​mod kif ir-​raġel ġab ruħu: “Għal kważi sagħtejn, [il-faith healer] żamm l-​attenzjoni tal-​udjenza bi priedki, talb, twerżieq, kant,​—saħansitra daqqiet, bit-​tir biex ikeċċi d-​demonji li kienu jgħammru fl-​iġsma tal-​fidil. Fl-​aħħar, hu waddab l-​ingravata u l-​maktur tiegħu lill-​udjenza miblugħin u għadda plattina biex jiġbor ‘kontribuzzjonijiet volontarji.’” Ġesù u l-​appostli tiegħu qatt ma ħadu sehem f’tijatrini bħal dawn.

Jidher ċar, allura, li faith healers moderni bħal dawn m’humiex qegħdin jagħmlu dak li għamel Ġesù. U huwa iebes biex tara li Alla kien se japprova dak li qegħdin jagħmlu. Japprova hu, iżda, xi fejqan mirakoluż il-​lum? Jew hemm xi mod li bih il-​fidi tagħna tistaʼ tgħinna meta aħna jew il-​maħbubin tagħna nimirdu?