Ix-​Xibka l-​Kbira u l-​Ħut X’Ifissru Għalik?

“Lilkom hu mogħti li tifhmu s-​sigrieti sagri tas-​saltna tas-​smewwiet.”—MATTEW 13:11.

1, 2. Għala nistgħu nkunu interessati fit-​tixbihat taʼ Ġesù?

TIEĦU gost int tkun taf xi siġriet jew issolvi xi taħbila tal-​moħħ? Xi ngħidu jekk li tagħmel hekk igħinek tara iktar ċar il-​parti tiegħek fil-​għan t’Alla? B’ferħ, int tistaʼ tikseb dehen ipprivileġġat bħal dan permezz taʼ tixbieha li Ġesù ta. Din ħawdet lil ħafna li semgħuha u fixklet lil oħrajn bla għadd minn dak in-​nhar ‘il hawn, imma int tistaʼ tifhimha.

² Innota x’qal Ġesù f’​Mattew kapitlu 13 dwar l-​użu tiegħu taʼ tixbihat. Id-​dixxipli tiegħu staqsew: “Għala hu li tkellimhom bl-​użu tat-​tixbihat?” (Mattew 13:10) Iva, Ġesù għala uża tixbihat li l-​biċċa l-​kbira tan-​nies ma kellhomx jifhmahom? Hu wieġeb fil-​versi 11 sa 13: “Lilkom hu mogħti li tifhmu s-​sigrieti sagri tas-​saltna tas-​smewwiet, imma lil dawk in-​nies mhux mogħti.... Dan hu għala nkellimhom bl-​użu tat-​tixbihat, għaliex, waqt li jħarsu, iħarsu għal xejn, u waqt li jisimgħu, jisimgħu għal xejn, lanqas ma jieħdu s-​sens tiegħu.”

3. Li nifhmu t-​tixbihat taʼ Ġesù kif jistaʼ jġibilna l-​benefiċċJi?

³ Ġesù mbagħad applika Isaija 6:9, 10, li ddeskriva poplu li kienu spiritwalment torox u għamjin. Aħna, iżda, m’għandniex għalfejn inkunu hekk. Jekk nifhmu u naġixxu fuq it-​tixbihat tiegħu, nistgħu nkunu ferħanin ferm—issa u fil-​futur bla tmiem. Ġesù joffrilna din l-​assigurazzjoni kordjali: “Henjin għajnejkom għaliex jilmħu, u widnejkom għaliex jisimgħu.” (Mattew 13:16) Dik l-​assigurazzjoni tkopri t-​tixbihat kollha taʼ Ġesù, imma ejjew niffokaw fuq il-​parabbola qasira tax-​xibka kbira, miktuba f’​Mattew 13:47-50.

Tixbieha b’Tifsira Profonda

4. Ġesù x’irrakkonta bl-​użu taʼ tixbieha, kif insibu f’​Mattew 13:47-50?

⁴ “Is-​saltna tas-​smewwiet hi bħal xibka kbira mitfugħa fil-​baħar u tiġbor ħut taʼ kull xorta. Meta mtliet tellgħuha fuq ix-​xtajta u, waqt li qagħdu bil-​qiegħda, ġabru l-​uħud mill-​aħjar f’reċipjenti, imma dawk li m’humiex tajbin tefgħuhom lil hemm. Hekk se jkun fil-​konklużjoni tas-​sistema taʼ affarijiet: l-​anġli se joħorgu u jifirdu lil uħud mill-​agħar minn fost it-​twajbin u se jixħtuhom fil-​forn tan-​nar. Hemm hu fejn il-​biki tagħhom u t-​theżhiż taʼ snienhom se jkun.”

5. Liema xorta taʼ mistoqsijiet iqumu inkwantu għat-​tifsira tal-​parabbola tax-​xibka l-​kbira?

⁵ Int x’aktarx li rajt nies jistadu b’xibka, tal-​inqas f’xi film jew fuq it-​televiżjoni, u għalhekk il-​parabbola taʼ Ġesù mhix diffiċli biex timmaġinaha. Imma xi ngħidu dwar id-​dettalji u t-​tifsira? Per eżempju, Ġesù qal li din it-​tixbieha hi dwar “is-​saltna tas-​smewwiet.” Madankollu, żgur li ma riedx ifisser li “kull xorta” taʼ persuna, kemm dawk li huma mill-​aħjar u kemm dawk li m’humiex tajbin, jew huma mill-​agħar, se jkunu fis-​Saltna. Ukoll, min huma dawk li jistadu? Dan is-​sajd u tifrid sar fi żmien Ġesù, jew jistaʼ jkun illimitat għal żmienna, “il-​konklużjoni tas-​sistema taʼ affarijiet”? Tara int lilek innifsek f’din il-​parabbola? Kif tistaʼ tevita li tispiċċa fost dawk li jibku u jheżhżu snienhom?

6. (a) Għala għandna nkunu interessati b’mod ħerqan f’li nifhmu l-​parabbola tax-​xibka l-​kbira? (b) Liema ħaġa sservi taʼ muftieħ biex nifhmuha?

⁶ Mistoqsijiet bħal dawn juru li din it-​tixbieha mhix sempliċi wara kollox. Tinsiex, iżda: “Henjin għajnejkom għaliex jilmħu, u widnejkom għaliex jisimgħu.” Ejjew naraw jekk nistgħux nidħlu fil-​fond tat-​tifsir tagħha sabiex widnejna ma jkunux ma jweġbux u għajnejna ma jingħalqux għall-​importanza tagħha. Attwalment, diġà għandna ħjiel vitali biex insiru nafu t-​tifsir tagħha. L-​artiklu taʼ qabel qalilna kif Ġesù stieden lil sajjieda Galilej biex jitilqu dak ix-​xogħol u jaqbdu xogħol spiritwali bħala “sajjieda tal-​bnedmin.” (Mark 1:17) Qalilhom: “Minn issa ’l quddiem int se taqbad nies ħajjin.”−Luqa 5:10.

7. Ġesù x’kien qiegħed juri b’tixbieha meta tkellem dwar il-​ħut?

⁷ Fi qbil maʼ dak, f’din il-​parabbola l-​ħut jirrappreżentaw lill-​bnedmin. Għalhekk, meta vers 49 jitkellem dwar it-​tifrid taʼ dawk li huma mill-​agħar minn dawk li huma twajbin, jirreferi, mhux għal ħlejjaq tal-​baħar twajbin jew mill-​agħar, imma għal nies li huma twajbin jew mill-​agħar. Bl-​istess mod, vers 50 m’għandux iġagħalna naħsbu dwar annimali tal-​baħar li jibku jew jheżhżu snienhom. Le. Din il-​parabbola hija dwar il-​ġbir taʼ bnedmin u t-​tifrid tagħhom taʼ iktar tard, li hu serju ferm, bħalma juri r-​riżultat.

8. (a) X’nistgħu nitgħallmu inkwantu għar-​riżultat għall-​ħut mhux xieraq? (b) Minħabba dak li ntqal dwar ħut mhux xieraq, x’nistgħu nikkonkludu rigward is-​Saltna?

⁸ Innota li l-​ħut mhux tajjeb, jiġifieri, dawk mill-​agħar, se jiġu mitfugħin fil-​forn tan-​nar, fejn se jkollhom ilbku u jheżhżu snienhom. X’imkien ieħor Ġesù rabat biki u theżhiż bħal dan maʼ li wieħed ikun barra mis-​Saltna. (Mattew 8:12; 13:41, 42) F’​Mattew 6:22 u 18:9, hu saħansitra semma “Geħenna tan-​nar,” billi rrefera għal qerda permanenti. Ma jurix dan kemm huwa vitali li nieħdu t-​tifsir taʼ din it-​tixbieha u li naġixxu fuqu? Ilkoll kemm aħna nafu li la hemm u lanqas se jkun hemm uħud mill-​agħar fis-​Saltna t’Alla. Għalhekk, meta Ġesù qal li “s-​saltna tas-​smewwiet hi bħal xibka kbira,” hu bil-​fors li ried ifisser li f’konnessjoni mas-​Saltna t’Alla, hemm karatteristika bħal xibka li titniżżel biex tiġbor diversi kwalitajiet taʼ ħut.

9. L-​anġli kif inhuma involuti fit-​tixbieha tax-​xibka l-​kbira?

⁹ Wara li x-​xibka l-​kbira ġiet imniżżla u l-​ħut inġabar, kellu jkun hemm xogħol taʼ tifrid. Ġesù min qal li kienu involuti? Mattew 13:49 identifika lil dawn is-​sajjieda li jifirdu bħala anġli. Mela Ġesù kien qed igħidilna dwar indokrar anġeliku taʼ strument fuq l-​art li huwa wżat biex jidentifika lin-​nies—xi wħud mill-​aħjar u xierqa għas-​Saltna tas-​sema, oħrajn jagħtu prova li m’humiex xierqa għal dik is-​sejħa.

Is-​Sajd—Meta?

10. B’liema raġunar nistgħu niddeterminaw li s-​sajd estenda fuq perijodu konsiderevoli taʼ żmien?

¹⁰ Il-​kuntest igħinna nsibu dan meta japplika. Eżatt qabel dan, Ġesù ta tixbieha dwar iż-​żrigħ taʼ żerriegħa mill-​aħjar, imma mbagħad ħaxix ħażin ġie miżrugħ fuqha fil-​għalqa, li tagħti stampa tad-​dinja. Hu spjega f’​Mattew 13:38 li ż-​żerriegħa mill-​aħjar kienet tirrappreżenta lil “[u]lied is-​saltna; imma l-​ħaxix ħażin huma wlied il-​wieħed mill-​agħar.” Dawn kibru ħdejn xulxin għal ħafna sekli, sal-​ħsad fil-​konklużjoni tas-​sistema taʼ affarijiet. Imbagħad il-​ħaxix ħażin ġie mifrud u wara ġie maħruq. Billi nqabblu dan mat-​tixbieha tax-​xibka l-​kbira, naraw li d-​dħul taʼ ħlejjaq fix-​xibka kellu jestendi għal perijodu twil taʼ żmien.—Mattew 13:36-43.

11. Ħidma taʼ sajd internazzjonali kif bdiet fl-​ewwel seklu?

¹¹ Skond il-​parabbola taʼ Ġesù, il-​ħut kellu jiġi miġbur mingħajr diskriminazzjoni, jiġifieri, ix-​xibka l-​kbira ġabret kemm ħut mill-​aħjar u kemm ħut mhux tajjeb. Waqt li l-​appostli kienu ħajjin, l-​anġli li ggwidaw is-​sajd użaw l-​organizzazzjoni Kristjana t’Alla biex jaqbdu “ħut” li saru Kristjani midlukin. Tistaʼ tgħid li qabel Pentekoste tas-​sena 33 E.K., is-​sajd taʼ Ġesù għan-​nies ġabar madwar 120 dixxiplu. (Atti 1:15) Imma ladarba l-​kongregazzjoni taʼ Kristjani midlukin kienet stabbilita, is-​sajd bix-​xibka l-​kbira bħala strument beda, u eluf taʼ ħut mill-​aħjar inqabdu. Mis-​sena 36 E.K., is-​sajd infirex b’mod estensiv f’ibħra internazzjonali, hekk kif il-​Ġentili nġibdu lejn il-​Kristjanità u saru membri tal-​kongregazzjoni midluka taʼ Kristu.—Atti 10:1, 2, 23-48.

12. Xi żviluppa wara l-​mewt tal-​appostli?

¹² Fis-​sekli taʼ wara li l-​appostli ħallew ix-​xena, kompla jkun hemm xi Kristjani leali li stinkaw biex isibu u jżommu l-​verità divina. Għall-​inqas xi wħud minn dawn kellhom l-​approvazzjoni t’Alla, u hu dilikhom bi spirtu qaddis. Xorta waħda, il-​mewt tal-​appostli neħħiet influwenza taʼ trażżin, billi ħalliet tiżżviluppa apostasija mxerrda maʼ kullimkien. (2 Tessalonkin 2:7, 8) Kibret organizzazzjoni li mingħajr ma jistħoqqilha stqarret li kienet il-​kongregazzjoni t’Alla. Hi sostniet b’mod falz li kienet il-​ġens qaddis midluk bl-​ispirtu t’Alla biex jaħkem maʼ Ġesù.

13. Għala jistaʼ jingħad li l-​Kristjaneżmu kellu rwol fil-​ħidma tax-​xibka l-​kbira?

¹³ Taħseb int li sostenituri m’humiex leali tal-​Kristjanità kellhom xi parti fit-​tixbieha tax-​xibka l-​kbira? Sewwa, hemm raġuni biex inwieġbu, iva, kellhom. Ix-​xibka l-​kbira simbolika inkludiet lill-​Kristjaneżmu. Veru, għal sekli sħaħ il-​Knisja Kattolika ppruvat iż-​żomm il-​Bibbja milli tkun għand in-​nies komuni. Madankollu, matul is-​sekli membri tal-​Kristjaneżmu kellhom parti kbira f’li jittraduċu, jikkopjaw, u jqassmu l-​Kelma t’Alla. Knejjes iktar tard ifformaw jew appoġġjaw lil soċjetajiet tal-​Bibbja, li ttraduċew il-​Bibbja fil-​lingwi nazzjonali taʼ pajjiżi mbegħdin. Huma wkoll bagħtu missjunarji mediċi u għalliema, li fformaw Kristjani tal-​isem. Dan ġabar numru kbir ħafna taʼ ħut mhux tajjeb, li ma kellhomx l-​approvazzjoni t’Alla. Imma tal-​inqas espona miljuni taʼ wħud li m’humiex Kristjani għall-​Bibbja u għal għamla taʼ Kristjanità, għalkemm korrotta.

14. Is-​sajd għal ħut mill-​aħjar kif kien imgħejjun minn xi xogħol magħmul mill-​knejjes tal-​Kristjaneżmu?

¹⁴ Sadanittant, l-​uħud leali mxerrdin li żammew mal-​Kelma t’Alla stinkaw kemm felħu. Fi kwalunkwe żmien, huma fformaw il-​vera kongregazzjoni midluka t’Alla fuq l-​art. U nistgħu nkunu żguri li huma wkoll kienu qed jaqbdu l-​ħut, jew nies, li ħafna minnhom Alla kellu jqishom bħala mill-​aħjar u kellu jidlikhom bl-​ispirtu tiegħu. (Rumani 8:14-17) Dawn is-​sostenituri mill-​aħjar tal-​Kristjanità kellhom il-​ħila jġibu l-​verità u l-​fehma tal-​Bibbja għand ħafna li kienu saru Kristjani tal-​isem jew li kienu kisbu għarfien limitat tal-​Bibbja mill-​Iskrittura tradotta fil-​lingwi tagħhom minn soċjetajiet Bibliċi tal-​Kristjaneżmu. Veru, il-​ġbir taʼ ħut mill-​aħjar kien qed isir, għalkemm il-​biċċa l-​kbira minn dawk li kienu qed jinġabru mill-​Kristjaneżmu ma kinux tajbin min-​naħa t’Alla.

15. B’mod dirett, x’inhu rrappreżentat mix-​xibka l-​kbira tal-​parabbola?

¹⁵ Mela x-​xibka l-​kbira tirrappreżenta strument dinji li jsostni li hu l-​kongregazzjoni t’Alla u li jiġbor il-​ħut. Inkluda kemm lill-​Kristjaneżmu u kemm lill-​kongregazzjoni taʼ Kristjani midlukin, billi dawn tal-​aħħar komplew jiġbru ħut mill-​aħjar, taħt il-​gwida inviżibbli tal-​anġli, fi qbil maʼ Mattew 13:49.

Iż-​Żmien Tagħna Hu Speċjali

16, 17. Iż-​żmien li ngħixu fih aħna għala hu daqshekk importanti fit-​twettieq tat-​tixbieha taʼ Ġesù dwar ix-​xibka l-​kbira?

¹⁶ Ejjew issa nikkunsidraw l-​element taż-​żmien. Għal sekli sħaħ l-​istrument tax-​xibka l-​kbira ġabar ħut mill-​aħjar kif ukoll ħafna wħud li m’humiex tajbin, jew huma mill-​agħar. Imbagħad ġie ż-​żmien meta l-​anġli ġew involuti f’li jagħmlu xogħol kruċjali taʼ tifrid. Meta? Sewwa, vers 49 igħid b’mod ċar li dan hu matul “il-​konklużjoni tas-​sistema taʼ affarijiet.” Dan jaqbel maʼ dak li Ġesù qal fit-​tixbieha tan-​ngħag u l-​mogħoż: “Meta Bin il-​bniedem jasal fil-​glorja tiegħu, u l-​anġli kollha miegħu, imbagħad se joqgħod bil-​qiegħda fuq it-​tron glorjuż tiegħu. U l-​ġnus kollha se jinġabru quddiemu, u hu se jifred lin-​nies wieħed mill-​ieħor, sewwa sew bħalma ragħaj jifred in-​ngħaġ mill-​mogħoż.”—Mattew 25:31, 32.

¹⁷ Għalhekk, fi qbil maʼ Mattew 13:47-50, xogħol kruċjali taʼ tifrid taħt il-​gwida tal-​anġli ilu sejjer minn mindu l-​“konklużjoni tas-​sistema taʼ affarijiet” bdiet fl-​1914. Dan sar evidenti b’mod partikulari wara l-​1919, meta l-​fdal taʼ wħud midlukin ġew meħlusin minn jasar, jew stat taʼ rsir, temporanju u saru strument iktar effettiv biex iwettqu x-​xogħol taʼ sajd.

18. Il-​ħut mill-​aħjar kif ġie miġbur f’reċipjenti?

¹⁸ X’kellu jiġrilu l-​ħut mill-​aħjar mifrud? Vers 48 igħid li l-​anġli li huma sajjieda u li jagħmlu x-​xogħol taʼ separazzjoni “ġabru l-​[ħut] mill-​aħjar f’reċipjenti, imma dawk li m’humiex tajbin tefgħuhom lil hemm.” Ir-​reċipjenti huma kaxxi protettivi li fihom jitpoġġa l-​ħut mill-​aħjar. Ġara dan fi żmienna? Dażgur li ġara. Hekk kif ħut mill-​aħjar simboliku ġie maqbud ħaj, huma ġew miġburin f’kongregazzjonijiet taʼ Kristjani veri. Dawn il-​kongregazzjonijiet bħal reċipjenti għenu biex jipproteġuhom u jirriservawhom għal servizz divin, ma taqblux intom? Xorta waħda, xi ħadd jistaʼ jaħseb, ‘Kollox sew, imma x’għandha x’taqsam mal-​ħajja preżenti tiegħi u mal-​futur tiegħi?’

19, 20. (a) Għala huwa vitali llum li nieħdu s-​sens taʼ din il-​parabbola? (b) Liema xogħol importanti taʼ sajd sar mill-​1919 ’il hawn?

¹⁹ It-​twettieq taʼ dak li hawn ġie mxebbah ma kienx limitat għas-​sekli taʼ bejn żmien l-​appostli u l-​1914. Matul dak il-​perijodu, l-​istrument tax-​xibka l-​kbira ġabar kemm lil dawk li b’mod falz kienu jgħidu li huma Kristjani u kemm lil dawk li kienu jgħidu dan bil-​verità. Iva, kien qed jiġbor ħut mhux tajjeb u ħut mill-​aħjar. Iktar minn hekk, ix-​xogħol taʼ tifrid li sar mill-​anġli ma spiċċax lura madwar l-​1919. Le, tabilħaqq. F’ċerti aspetti din it-​tixbieha tax-​xibka l-​kbira tapplika dritt sa żmienna. Aħna involuti u hekk hu l-​futur immedjat tagħna. Huwa taʼ bil-​fors għalina li nifhmu kif u għala dak hu hekk jekk irridu li dan il-​kliem jiddeskrivina: “Henjin huma għajnejkom għaliex jilmħu, u widnejkom għaliex jisimgħu” bil-​fehma.—Mattew 13:16.

²⁰ Int x’aktarx taf li wara l-​1919 il-​fdal mid-​lukin tawha b’ruħhom u b’ġisimhom għax-​xogħol taʼ ppridkar f’koperazzjoni mal-​anġli, li komplew jużaw ix-​xibka l-​kbira simbolika biex itellgħu l-​ħut fuq ix-​xatt, biex jifirdu lil dawk mill-​aħjar minn dawk li m’humiex tajbin. Statistiċi minn dak il-​perijodu juru li l-​qabda taʼ ħut mill-​aħjar biex jiġu midlukin bl-​ispirtu t’Alla kompliet hekk kif l-​aħħar uħud mill-​144,000 ġew miġburin mix-​xibka simbolika. (Rivelazzjoni 7:1-4) Imma sa nofs is-​snin tletin, il-​ġbir taʼ ħut mill-​aħjar biex jiġu midlukin bl-​ispirtu qaddis bażikament spiċċa. Kienet il-​kongregazzjoni tal-​fdal midlukin f’dak iż-​żmien se tarmi x-​xibka, bħal li kieku, u huma sempliċement jitgħażżnu, jistennew il-​premju tagħhom fis-​sema? Xejn affattu!

L-​Involviment Tiegħek fis-​Sajd

21. Liema sajd ieħor seħħ fi żmienna? (Luqa 23:43)

²¹ It-​tixbieha taʼ Ġesù dwar ix-​xibka l-​kbira ffokat fuq ħut mill-​aħjar li kellhom jiġu ppremjati b’post fis-​Saltna tas-​smewwiet. Madankollu, minbarra dik it-​tixbieha, hemm sajd simboliku ieħor li qed isir fuq skala vasta, saħansitra bħalma ġie muri fl-​artiklu taʼ qabel. Dan is-​sajd hu, mhux għall-​ħut mill-​aħjar u midluk imsemmi fit-​tixbieha taʼ Ġesù, imma għal ħut simboliku li jrid jinqabad ħaj u jingħata t-​tama meraviljuża taʼ ħajja fuq art magħmula ġenna.—Rivelazzjoni 7:9, 10; qabbel Mattew 25:31-46.

22. Liema riżultat hieni nistgħu nesperjenzaw, u x’inhi l-​alternattiva?

²² Jekk int għandek dik it-​tama, allura tistaʼ tifraħ li Jehovah ippermetta li xogħol taʼ sajd li jsalva l-​ħajja jkompli sejjer s’issa. Dan għamilha possibbli għalik biex tikseb prospett meraviljuż. Prospett? Iva, dik hija l-​kelma xierqa li għandna nużaw, ladarba r-​riżultat se jkun fi qbil mal-​fedeltà kontinwa tagħna lejn il-​Wieħed li qed jidderieġi l-​isforz taʼ sajd li qed isir. (Sofonija 2:3) Ftakar mit-​tixbieha li mhux il-​ħut kollu mtellaʼ mixxibka l-​kbira jġarrab riżultat favorevoli. Ġesù qal li l-​uħud li m’humiex tajbin, jew huma mill-​agħar, se jiġu mifrudin mit-​twajbin. Għal liema għan? F’​Mattew 13:50, Ġesù ddeskriva l-​konsegwenza serja għall-​ħut mhux tajjeb, jew mill-​agħar. Dawn se jiġu mitfugħin fil-​forn tan-​nar, li jfisser qerda għal dejjem.—Rivelazzjoni 21:8.

23. X’inhu li jagħmel lix-​xogħol tas-​sajd illum daqshekk importanti?

²³ Għall-​ħut mill-​aħjar midlukin, kif ukoll għall-​ħut simboliku li jistgħu jgħixu għal dejjem fuq l-​art, hemm futur glorjuż. B’raġuni tajba, allura, l-​anġli qed jaċċertaw ruħhom li eżatt issa ħidma taʼ sajd b’suċċess qed titwettaq madwar il-​globu. U x’qabda qed issir! Tagħmel tajjeb jekk tgħid li fil-​mod tagħha din hija qabda daqstant mirakoluża daqs dik tal-​ħut litterali li gawdew l-​appostli meta tefgħu x-​xbieki tagħhom kif kien qalilhom Ġesù.

24. X’għandna nkunu rridu li nagħmlu dwar is-​sajd spiritwali?

²⁴ Qiegħed int ikollok sehem attiv kemm jistaʼ jkun f’dan ix-​xogħol li jsalva l-​ħajja taʼ sajd spiritwali? Kien kemm kien estensiv is-​sehem individwali tagħna sa dan iż-​żmien, kull wieħed minna jistaʼ jiggwadannja billi jħares lejn dak li qed jiġi mwettaq globalment fix-​xogħol grandjuż taʼ sajd u li jsalva l-​ħajja li qed isir issa. Li nagħmlu dan għandu jistimulana għal żelu saħansitra akbar f’li nitfgħu x-​xbieki għal qabda fil-​jiem li ġejjin!—Qabbel Mattew 13:23; 1 Tessalonkin 4:1.

Tiftakarhom Dawn il-​Punti?

◻ X’inhu rrappreżentat miż-​żewġ tipi taʼ ħut fil-​parabbola taʼ Ġesù dwar ix-​xibka l-​kbira?

◻ Il-​knejjes tal-​Kristianeżmu f’liema sens kienu involuti fil-​ħidma tax-​xibka l-​kbira?

◻ Is-​sajd li qiegħed isir fi żmienna għala hu daqshekk kritiku?

◻ Il-​parabola tax-​xibika l-​kbira għandha tmexxi lil kull wieħed minna biex jagħmel liema xorta taʼ analiżi fuqu nnifsu?