Napprezzaw il-​Għotja Prezzjuża tal-​Ħajja

IL-​ĦAJJA—x’pussess prezzjuż! Mingħajrha ma nistgħu nagħmlu xejn. Ladarba tintilef, ma tistax tinkiseb lura b’xi mezz uman. Jekk ħajjitna tkun fil-​periklu, nagħmlu minn kollox li nistgħu biex nippreservawha. Tabilħaqq, xi wħud saħansitra jfittxu għajnuna superumana meta jkunu fl-​inkwiet!

Niġu mfakkrin fir-​rakkont Bibliku dwar vapur li nqabad f’tempesta qawwija f’nofs taʼ baħar. Meta kien wasal biex jiġġarraf, “[i]l-baħrin bdew jibżgħu u jgħajtu għall-​għajnuna, kull wieħed lill-​alla tiegħu.” Iktar tard, ilkoll kemm huma sejħu lill-​veru Alla: “O, issa, O Jehovah, jalla aħna, jekk jogħġbok, ma ngħibux.” Ir-​rakkont tal-​Bibbja jgħid ukoll: “Baqgħu jixħtu ’l barra l-​oġġetti li kienu fil-​vapur ġol-​baħar, sabiex iħaffuh minnhom.”—Ġona 1:4-6, 14; qabbel Atti 27:18, 19.

Dawk il-​baħħara kienu saħansitra lesti li jissagrifikaw il-​ġid materjali li tant kienu jgħożżu fi sforz biex jippreservaw il-​ħajjiet tagħhom. Il-​ġid materjali nistgħu niksbuh lura—imma l-​ħajja le. U peress li b’mod istintiv ingħozzu l-​ħajjiet tagħna, aħna ninġibdu lura mill-​periklu. Nitimgħu, inlibbsu, u nieħdu ħsieb lil ġisimna. Infittxu kura medika meta nimirdu.

Madankollu, id-​Donatur tal-​ħajja jeħtieġ iktar minna milli sempliċement insegwu l-​istinti tagħna biex nipproteġu lilna nfusna. Wara kollox, il-​ħajja hi għotja imprezzabbli, u tiġi mingħand l-​iktar Persunaġġ importanti fl-​univers kollu kemm hu. Sforz l-​apprezzament sinċier tagħna kemm għad-​Donatur u kemm għall-​għotja, m’għandniex aħna ngħożżuha l-​ħajja? U ma jinkludix dak li jkollna rispett lejn il-​ħajjiet taʼ oħrajn?

Ma għandux jissorprendina, allura, li l-​Liġi li Alla Jehovah ta lill-​ġens taʼ Iżrael inkludiet kmandamenti intiżi biex jipproteġu l-​ħajjiet u s-​saħħa taʼ oħrajn. (Eżodu 21:29; Dewteronomju 22:8) Il-​Kristjani llum għandhom bli-stess mod ikunu konxji tas-​sigurtà. Per eżempju, jekk għandek tfal żgħar f’darek, tħalli int bi traskuraġni żibeġ, labar, jew oġġetti li jaqtgħu f’post li jintlaħqu u li jistgħu jweġġgħu serjament lil tfajjel li b’mod innoċenti jilgħab bihom jew jiblagħhom? Kimiċi perikolużi u mediċini jinħażnu f’post li ma jintlaħaqx mit-​tfal? Jekk jixxerred l-​ilma fl-​art, tgħaġgel int biex timsħu sabiex tevita xi inċident? Tieħu ħsieb immedjatament biex is-​sewwi kull apparat elettriku li jkollu xi difett? Lill-​karozza tiegħek tieħu ħsiebha regolarment? Issuq int bil-​galbu? Jekk int verament tapprezza kemm hi prezzjuża l-​ħajja, se tkun imqanqal biex tieħu prekawzjonijiet raġonevoli f’dawn l-​oqsma u f’oqsma. simili.

Jiddispjaċina ngħidu, iżda, li xi wħud saħansitra jagħmlu lil ħajjithom stess bħala fatta. Per eżempju, min illum ma jafx li t-​tipjip huwa ħażin għal saħħtek? Madankollu, miljuni huma mjassrin bil-​vizzju, waqt li saħħithom teħżien kull darba li jibilgħu d-​duħħan velenuż. Oħrajn jabbużaw mid-​drogi, u jerġaʼ oħrajn mill-​alkoħol, u dawn kollha għad-​detriment tagħhom. L-​AIDS hija marda qattiela li minnha s’issa m’hemmx fejqan. Imma ħafna setgħu evitaw li jieħdu l-​marda kieku stmerrew l-​immoralità sesswali, ċerti tipi taʼ abbuż mid-​drogi, u trasfużjonijiet tad-​demm. X’nuqqas traġiku taʼ apprezzament għall-​ħajja!—Rumani 1:26, 27; 2 Korintin 7:1.

Il-​Bidla Hija Possibbli!

Dawk li japprezzaw lill-​Ħallieq Grandjuż tagħhom, Jehovah, għandhom raġuni qawwija biex iħarsu lejn il-​ħajja bħala prezzjuża. Il-​ħajja hija għotja sagra. Huma għalhekk lesti li jagħmlu kwalunkwe bidla li hemm bżonn biex iqisuha bħala għotja divina. Ikkunsidra l-​esperjenza taʼ Kwaku, għalliem fil-​Għana. Bħala wieħed li kien jixrob bla rażan, hu kien qiegħed jaħli ħajtu.

Kwaku jiftakar: “Ipprovajt inġiegħel lil marti tirrispettani, u dan spiss wassal għal argumenti sħan u ġlied, partikolarment meta kont inkun xurban. Peress li kont nixrob iżżejjed, spiss kont inkun xott mill-​flus, u taʼ spiss kont nonqos li nipprovdi flus biex ingħajjex il-​familja. Bħalma wieħed jistaʼ jifhem, dan irritaha ferm lil marti. Kull meta jispiċċawli l-​fondi (u dan kien jiġri spiss ferm), kont nagħmel minn kollox biex insostni l-​vizzju tiegħi. Darba minnhom saħansitra għamilt użu persunali minn xi flus li kont ġbart mingħand l-​istudenti tiegħi biex nirreġistrahom għal ezami pubbliku. Tajtha għall-​ħala fix-​xorb u ħallast ukoll għal sħabi li kienu jixorbu miegħi. Jum il-​kontijiet malajr laħaqni. Kieku ma kienx għall-​intervent f’waqtu tas-​surmast tiegħi, kont nitlef l-​impjieg li kelli.

“Ħajti kienet tgħaffiġa kbira. Ħassejtni mbarazzat, imma malajr għaddieli. Imbagħad bdejt niżżviluppa ħsibijiet taʼ suwiċidju għaliex ħassejtni li fallejt fil-​ħajja. Xorta waħda, ma stajtx neħles mill-​viŻzju tax-​xorb. Imma meta darba minnhom f’ħanut tax-​xorb sibt rnhi involut fi ġlieda fis-​sakra u qlajt daqqa taʼ sikkina, intbaħt b’mod taʼ wġigħ li mħabbti għax-​xorb kienet xi darba se tiswieli ħajti.

“Sadanittant, ix-​Xhieda taʼ Jehovah kienu perjodikament iżuruna d-​dar, biex jipprovaw jinteressawna fil-​Bibbja. Jien u marti dejjem evitajniehom għaliex konna narawhom fitti. F’okkażjoni minnhom, iżda, iddeċidejt li nismagħhom għax ħassejt għalihom. Studju tal-​Bibbja malajr fetaħli għajnejja għall-​prospett tal-​għaġeb li ngħix għal dejjem fis-​sistema l-​ġdida t’Alla. Iktar ma bdejt nistudja l-​Bibbja bil-​għajnuna tax-​Xhieda taʼ Jehovah, iktar kiber l-​apprezzament tiegħi lejn Jehovah bħala d-​Donatur tal-​Ħajja tagħna u lejn il-​għotja tiegħu tal-​ħajja, u iktar bdejt nibqaʼ impressjonat b’kemm hu prattiku l-​parir tal-​Bibbja. Dan kompla jinkuraġġini biex innaddaf ħajti. Ma kienx faċli, għax kelli l-​ħin kollu nirreżisti l-​qatra [ix-xorb] kif ukoll lil sħabi tal-​antik. Jehovah, Semmiegħ it-​talb, ra d-​determinazzjoni taʼ qalbi u semagħni.a

“Marti, għalkemm mhix waħda mix-​Xhieda taʼ Jehovah, għandha issa stima kbira lejja u lejn ir-​reliġjon tiegħi minħabba din il-​bidla kbira li osservat f’ħajti u fir-​relazzjoni tagħna bħala tnejn miżżewġin. Ma għandhomx iktar għalfejn il-​ġirien tagħna jintervjenu fil-​ġlidiet bejni u bejn marti. Jiena ngħożż il-​paċi tal-​moħħ li ngawdi issa. Żgur illi li wieħed japprezza lil Alla Jehovah bħala d-​Donatur tal-​Ħajja tagħna, li wieħed jaddotta l-​ħarsa tiegħu rigward kemm hi prezzjuża l-​ħajja, u li wieħed jobdi l-​istruzzjonijiet tiegħu dwar kif wieħed igħix huwa l-​uniku mod xieraq taʼ hajja.”

L-​Offerta t’Alla taʼ Ħajja Eterna

Eluf, bħal Kwaku, ġew imgħejjunin mix-​Xhieda taʼ Jehovah biex ‘jilbsu l-​personalità ġdida li kienet maħluqa skond ir-​rieda t’Alla fit-​tjieba vera u l-​lealtà.’ (Efesin 4:24) Ġew li japprezzaw mħux biss il-​ħajja preżenti tagħhom imma wkoll it-​tama taʼ ħajja eterna f’ġenna tal-​art. Il-​Bibbja twiegħed li f’dik il-​Ġenna li se jagħmel Alla, ebda abitant tal-​art ma se jerġaʼ jġarrab il-​weġgħat li jnawru tal-​ġuħ, għax “Jehovah tal-​armati ċertament li se jagħmel għall-​popli kollha . . . bankett taʼ dixxijiet imħawrin tajjeb biż-​żejt.—Isaija 25:6.

Fil-preżent, il-​ħajja, għalkemm hi għotja tal-​għaġeb, hija biss temporanja. Kulħadd jiffaċċja l-​mewt, u x’daqqa taʼ niket kbir hija l-​mewt! Li tara lil xi ħadd li inti tħobb igħib minn fost il-​ħajjin ġewwa s-​skiet taʼ qabar hija haġa verament taʼ għali. Imma taħt is-​Saltna t’Alla, maħkuma minn Kristu, se titwettaq il-​wegħda taʼ Jehovah: ”[I]l-mewt mhix se tkun iżjed, u la l-​għali u la l-​biki u lanqas l-​ugigħ ma jkunu iżjed. L-​affarijiet taʼ qabel għaddew.”−Rivelazzjoni 21:4.

F’dak iż-​żmien il-​għotja tal-​ħajja se tiġi estiża b’mod meraviljuż. Dawk li se jibqgħu ħajjin matul it-​tribulazzjoni finali fuq din l-​art se jkollhom l-​opportunità li jidħlu fil-​milja tal-​ħajja. U mbagħad, permezz tal-​irxoxt, b’qawmien mill-​imwiet lura għall-​ħajja, Alla Jehovah se jagħti lura l-​għotja imprezzabbli tiegħu lil dawk li huma reqdin fil-​mewt. (Ġwann 5:24, 28, 29) Dan se jfisser ir-​ritorn tal-​maħbubin tagħna u taʼ rġiel tal-​qedem li kellhom il-​biżaʼ t’Alla!

Huwa dan kollu sabiħ wisq biex temmnu? Le, għax “maʼ Alla ebda dikjarazzjoni ma se tkun ħaġa impossibbli.”−Luqa 1:37; qabbel Ġob 42:2.

Iktar minn hekk, Alla Jehovah innifsu ta garanzija lill-​bniedem li dan kollu se jiġri. Kif? Billi ssagrifika lill-​iktar wieħed għal qalbu, lil Ibnu l-​maħbub, Ġesù Kristu, biex jifdina mid-​dnub u mill-​mewt. Rumani 8:32 jassigurana: “Hu [Alla Jehovah] li ma ħelishiex saħansitra lil Ibnu stess imma kkunsinnah għalina lkoll, għala mhux se jagħtina wkoll miegħu b’qalb tajba l-​affarijiet l-​oħra kollha?” Il-​Bibbja tgħidilna li dan se jinkludi t-​tindif tal-​bniedem mill-​waqgħa morali u l-​eliminar taʼ kull forma taʼ inġustizzja, kriminalità, u vjolenza. (Isaija 11:9) Il-​ħajja qatt iktar ma se titqies bħala rħisa.

Saħanistra issa, taħt kundizzjonijiet imperfetti, il-​ħajja tistaʼ tkun pjaċevoli ferm. Min ma jiħux pjaċir bir-​rieħa li tħajrek tal-​ikel, b’li jħoss xi buffura ħelwa f’jum sħun, bid-​dehra taʼ muntanja maestuża, b’inżul ix-​xemx mill-​isbaħ, bi xmara tgelbeb bil-​kwiet, bl-​ilwien tal-​fjuri li jaqtgħulek nifsek, bil-​ħoss taʼ mużika ħelwa, jew bil-​għana tal-​għasafar? Ieqaf għal mument. Aħseb, kif tħossok kieku kellek tgawdi affarijiet bħal dawn għall-​eternita?

Jagħmel sens, allura, li twarrab ’il barra l-​privileġġ prezzjuż taʼ li tgħix għal dejjem minħabba xi pjaċir temporanju li korsa tal-​ħajja bla sens u bla rażan tistaʼ toffri? (Qabbel Ebrej 11:25.) Bil-​għerf, il-​Bibbja tħeġġiġna biex ‘ingħixu l-​bqija taʼ ħajjietna, mhux iktar għax-​xewqat tal-​bnedmin, imma għar-​rieda t’Alla.’ (1 Pietru 4:2) Ninkuraġġuk bil-​qalb, iva, inħeġguk, li tagħmel hekk billi tistudja l-​Kelma t’Alla, il-​Bibbja, u billi tpoġġi fil-​prattika l-​affarijiet li titgħallem. (Ġwann 13:17) B’hekk int se tidħol f’relazzjoni tajba maʼ Jehovah, dak Alla li qed ifur bit-​tjubija u bil-​ħniena, li jistaʼ jippremjak b’ħajja eterna!

[Nota taʼ taħt]