L-Umanità Tassew Teħtieġ Messija?

“ID-​DINJA TEĦTIEĠ MESSIJA, IGĦID UFFIĊJAL”

Dak il-​headline deher f’The Financial Post taʼ Toronto, il-​Kanada, fl-​1980. L-​uffiċjal li ġie kkwotat kien Aurelio Peccei, president u fundatur taʼ grupp magħruf taʼ speċjalisti li jagħmlu studju intensiv u riċerka msejjaħ il-​Klabb taʼ Ruma. Skond il-​Post, Peccei sostna li “mexxej kariżmatiku—xjentifiku, politiku, jew reliġjuż—kellu jkun għad-​dinja l-​uniku salvazzjoni mit-​taqlib soċjali u ekonomiku li jhedded li jeqred liċ-​ċivilizzazzjoni.” Inti x’taħseb? Hija din id-​dinja tassew fi stat tal-​biżaʼ bħal dan li l-​umanità teħtieġ Messija? Ikkunsidra biss waħda mill-​problemi li d-​dinja tiffaċċja—il-​ġuħ.

DIN il-​pjaneta tipproduċi b’mod kurrenti iktar ikel milli jikkonsmaw il-​bnedmin, u għandha l-​kapaċità li tipproduċi iktar. Iżda, kull minuta, 26 tifel jew tifla jmutu mill-​malnutriment u mill-​mard. Matul dik l-​istess minuta, id-​dinja tonfoq madwar $2,000,000 biex jippreparaw għall-​gwerra. Tistaʼ int timmaġina dak li dawk il-​flus kollha—jew parti minnhom—jistgħu jagħmlu għal dawk is-​26 tifel jew tifla?

B’mod ċar, il-​ġuħ fid-​dinja ma jistax sempliċement jingħad li hu minħabba nuqqas taʼ ikel jew flus. Il-​problema hija iktar fonda. Kif poġġieha Jorge E. Hardoy, professur Arġentin, “id-​dinja għandha inkapaċità kronika biex taqsam faraġ, poter, ħin, riżorsi u għarfien maʼ dawk li l-​iktar jinħtieġu dawn l-​affarijiet.” Iva, il-​problema qiegħda, mhux fir-​riżorsi tal-​bniedem, imma fil-​bniedem innifsu. Ir-​regħba u l-​egoiżmu jidhru li huma forzi dominanti fis-​soċjetà umana. Parti waħda minn ħamsa tal-​popolazzjoni tal-​art li hija l-​iktar għanja tgawdi xi 60 darba iktar affarijiet u servizzi minn dik il-​parti minn ħamsa li hija l-​iktar fqira.

Veru, xi wħud qegħdin jipprovaw sinċerament iwasslu ikel lil dawk bil-​ġuħ, imma ħafna mill-​isforzi tagħhom jiġu mfixklin minn fatturi li m’għandhomx kontroll fuqhom. Il-​ġuħ taʼ spiss jifleġ lil ħafna pajjiżi li huma mgħakksin minħabba gwerra ċivili jew irvell, u taʼ spiss forzi li jopponu ma jħallux provvedimenti taʼ għajnuna jilħqu lil dawk fil-​bżonn. Iż-​żewġ naħat jibżgħu li jekk iħallu ikel jasal għand in-​nies ċivili f’territorju tal-​għadu, huma jkunu qegħdin jitimgħu lill-​għedewwa tagħhom. Il-​gvernijiet infushom m’humiex esklużi milli jużaw il-​ġuħ bħala arma politika.

Ebda Soluzzjoni?

Sfortunatament, il-​problema taʼ miljuni li qegħdin imutu bil-​ġuħ m’hijiex l-​unika kriżi li qed tifleġ lill-​bniedem modern. Il-​qerda u l-​ivvelenar tal-​ambjent li dejjem qegħdin jiżdiedu, il-​pjaga persistenti tal-​gwerra li tiblaʼ miljuni taʼ ħajjiet, l-​epidemiji taʼ delitti vjolenti li jnisslu biżaʼ u nuqqas taʼ fiduċja kullimkien, u l-​klima morali li dejjem qiegħda tispiċċa jidhru li qegħdin fil-​għerq taʼ ħafna minn dan il-​mard—dawn il-​kriżijiet globali kollha jimxu id f’id, biex ingħidu hekk, u jikkonfermaw l-​istess verità iebsa—li l-​bniedem ma jistax jiggverna lilu nnifsu b’suċċess.

Bla dubju dak hu għala ħafna nies qatgħu qalbhom li jaraw xi soluzzjoni għall-​problemi tad-​dinja. Oħrajn iħossuhom kif ħassu Aurelio Peccei, l-​istudjuż Taljan li semmejna fil-​bidu. Jekk għandu jkun hemm xi soluzzjoni, huma jirraġunaw, trid tiġi minn sors straordinarju—forsi saħansitra superuman. B’hekk il-​kunċett taʼ messija għandu appell qawwi. Imma huwa realistiku li tittama f’messija? Jew hija tama bħal din biss xewqa li ma tistax titwettaq?