Nirgħu l-Merħla t’Alla bl-Imħabba

“Irgħu l-​merħla t’Alla li hemm fil-​ħarsien tagħkom.”—1 PIETRU 5:2.

1, 2. X’inhija l-​kwalità dominanti taʼ Jehovah, u din kif turi lilha nfisha?

FL-​ISKRITTURA Mqaddsa kollha kemm hi, jintgħamel ċar li l-​imħabba hija l-​kwalità dominanti t’Alla. “Alla hu mħabba,” jistqarr 1 Ġwann 4:8. Ladarba l-​imħabba tiegħu hija espressa f’azzjoni, 1 Pietru 5:7 jgħid li Alla “jimpurtah minnkom.” Fil-​Bibbja l-​mod kif Jehovah jieħu ħsieb tan-​nies tiegħu huwa mxebbah mal-​mod kif ragħaj taʼ mħabba jieħu ħsieb b’tenerezza tan-​ngħaġ tiegħu: “Ħares! Il-​Mulej Sovran Jehovah innifsu . . . se jirgħa lill-​merħla tiegħu stess. Bi driegħu se jiġbor flimkien lill-​ħrief; u fi ħdanu se jġorrhom. Lil dawk li qegħdin ireddgħu se jmexxihom b’attenzjoni.” (Isaija 40:10, 11) Kemm kien imfarraġ David li setaʼ jgħid: “Jehovah hu r-​Ragħaj tiegħi. Ma se jonqosni xejn”!—Salm 23:1.

² Huwa xieraq li l-​Bibbja xxebbah nies li Alla jiffavorixxi maʼ ngħaġ, għax in-​ngħaġ huma paċifiċi, sottomessi, ubbidjenti lejn ir-​ragħaj li jieħu ħsiebhom. Bħala Ragħaj taʼ mħabba, Jehovah jimpurtah b’mod profond min-​nies tiegħu bħal ngħaġ. Hu juri dan billi jipprovdilhom materjalment u spiritwalment u billi jiggwidahom matul “l-​aħħar jiem” diffiċli taʼ din id-​dinja mill-​agħar lejn id-​dinja ġdida taʼ tjieba tiegħu li ġejja.—2 Timotew 3:1-5, 13; Mattew 6:31-34; 10:28-31; 2 Pietru 3:13.

3. Is-​salmista kif iddeskriva l-​mod kif Jehovah jieħu ħsieb in-​ngħaġ tiegħu?

³ Innota l-​attenzjoni taʼ mħabba taʼ Jehovah għan-​ngħaġ tiegħu: “Għajnejn Jehovah huma lejn it-​twajbin, u widnejh huma lejn l-​għajta tagħhom għall-​għajnuna. . . . Huma għajtu, u Jehovah innifsu semaʼ, u mill-​hemmijiet kollha tagħhom ħelishom. Jehovah hu qrib dawk li huma miksurin fil-​qalb; u lil dawk imgħaffġin fl-​ispirtu jsalvahom. Bosta huma l-​gwajiet tat-​twajjeb, imma minnhom kollha jeħilsu Jehovah.” (Salm 34:15-19) X’faraġ kbir jipprovdi r-​Ragħaj Universali għan-​nies tiegħu bħal ngħaġ!

L-​Eżempju Tar-​Ragħaj Mill-​Aħjar

4. X’inhu l-​irwol taʼ Ġesù f’li jieħu ħsieb il-​merħla t’Alla?

⁴ L-​Iben t’Alla, Ġesù, tgħallem sewwa mingħand Missieru, għax il-​Bibbja ssejjaħ lil Ġesù “r-​ragħaj mill-​aħjar.” (Ġwann 10:11-16) Is-​servizz vitali tiegħu għall-​merħla t’Alla huwa nnotat f’​Rivelazzjoni kapitlu 7. Fil-​vers 9, il-​qaddejja t’Alla taʼ żmienna huma msejħin “folla kbira . . . mill-​ġnus u t-​tribujiet u l-​popli u l-​ilsna kollha.” Imbagħad vers 17 jistqarr: “Il-​Ħaruf [Ġesù] . . . se jirgħahom, u se jiggwidahom lejn nixxigħat taʼ ilmijiet taʼ ħajja. U Alla se jimsaħ kull demgħa minn għajnejhom.” Ġesù jiggwida lin-​ngħaġ t’Alla lejn ilmijiet taʼ verità li jwasslu għall-​ħajja taʼ dejjem. (Ġwann 17:3) Innota li Ġesù hu msejjaħ “il-​Ħaruf,” li jindika l-​kwalitajiet tiegħu stess bħal tan-​ngħaġ, billi hu l-​eżempju ewlieni taʼ sottomissjoni lejn Alla.

5. Ġesù kif ħassu dwar in-​nies?

⁵ Fuq l-​art Ġesù għex fost in-​nies u ra l-​kundizzjoni patetika tagħhom. Kif irreaġixxa għas-​sitwazzjoni mwiegħra tagħhom? “Tħassarhom, għaliex kienu mqaxxrin u mitfugħin ’l hawn u ’l hemm bħal ngħaġ mingħajr ragħaj.” (Mattew 9:36) Ngħaġ mingħajr ragħaj ibatu ħafna minn predaturi, bħalma jagħmlu ngħaġ li għandhom ragħajja li ma jimpurtahomx minnhom. Imma Ġesù kien jimpurtah ħafna, għax hu qal: “Ejjew għandi, intom ilkoll li qegħdin taħdmu iebes u mgħobbijin wisq, u jien se nserraħkom. Ħudu l-​madmad tiegħi fuqkom u tgħallmu minni, għax jien kalm u umli fil-​qalb, u intom se ssibu serħan għal erwieħkom. Għax il-​madmad tiegħi ħanin u t-​tagħbija tiegħi ħafifa.”—Mattew 11:28-30.

6. Ġesù liema konsiderazzjoni wera għal dawk li huma mgħaffġin?

⁶ Il-​profezija tal-​Bibbja bassret li Ġesù kien se jittratta b’imħabba man-​nies: “Jehovah dilikni . . . biex norbot lil dawk taʼ qalb maqsuma, . . . biex infarraġ lill-​imnikktin kollha.” (Isaija 61:1, 2; Luqa 4:17-21) Ġesù qatt ma ħares bi stmerrija lejn il-​foqra u l-​iżvinturati. Minflok, hu wettaq Isaija 42:3: “Ebda qasba mgħattna ma se jikser; u inkwantu għal ftila tal-​kittien baxxa, hu mhux se jitfiha.” (Qabbel Mattew 12:17-21.) Uħud milqutin kienu bħal qasab mgħattnin, bħal ftejjel tal-​lampi li waslu biex jintfew minħabba nuqqas taʼ żejt. Billi rrikonoxxa l-​istat tagħhom taʼ ħasra, Ġesù wriehom mogħdrija u mliehom b’saħħa u tama, billi fejjaqhom spiritwalment u fiżikament.—Mattew 4:23.

7. Ġesù fejn idderieġa lin-​nies li wieġbu għalih?

⁷ Nies bħal ngħaġ wieġbu għal Ġesù fi qtajjiet kbar. Tant kien jiġbdek it-​tagħlim tiegħu li uffiċjali li kienu ntbagħtu biex jarrestawh irrapportaw: “Ebda bniedem ieħor ma qatt tkellem hekk.” (Ġwann 7:46) Iva, il-​mexxejja reliġjużi ipokriti lmentaw: “Id-​dinja marret warajh”! (Ġwann 12:19) Imma Ġesù ma riedx unur u glorja għalih innifsu. Idderieġa lin-​nies lejn Missieru. Għallimhom biex jaqdu lil Jehovah imqanqlin mill-​imħabba għall-​kwalitajiet ammirabbli Tiegħu: “Trid tħobb lil Jehovah Alla tiegħek b’qalbek kollha u b’ruħek kollha u b’saħħtek kollha u b’moħħok kollu.”—Luqa 10:27, 28.

8. L-​ubbidjenza li n-​nies t’Alla jagħtu lilu kif inhija differenti minn dik li oħrajn jagħtu lill-​ħakkiema dinjin?

⁸ Jehovah jitgħaxxaq b’li s-​sovranità universali tiegħu hija appoġġjata min-​nies tiegħu bħal ngħaġ, fuq il-​bażi taʼ mħabbithom għalih. Huma minn jeddhom jagħżlu li jaqduh minħabba l-​għarfien tagħhom dwar il-​kwalitajiet tiegħu taʼ min iħobbhom. Kemm huwa differenti dan mill-​mexxejja taʼ did-dinja li s-​sudditi tagħhom jobduhom biss minħabba l-​biżaʼ, jew kontra qalbhom, jew minħabba li għandhom xi motiv ulterjuri! Qatt ma jistaʼ jintqal dwar Jehovah jew dwar Ġesù dak li ntqal dwar papa tal-​Knisja Kattolika Rumana: “Hu kien ammirat minn ħafna, kien jibżaʼ minnu kulħadd, maħbub minn ħadd.”​—Vicars of Christ​—The Dark Side of the Papacy, minn Peter De Rosa.

Ragħajja Krudili F’Iżrael

9, 10. Iddeskrivi lill-​mexxejja taʼ Iżrael tal-​qedem u taʼ l-​ewwel seklu.

⁹ Kuntrarju għal Ġesù, il-​mexxejja reliġjużi taʼ Iżrael fi żmienu ma kellhom ebda mħabba għan-​ngħaġ. Kienu bħall-​ħakkiema iktar bikrin taʼ Iżrael li dwarhom Jehovah kien qal: “Gwaj għar-​ragħajja taʼ Iżrael, li saru wħud li jitimgħu lilhom infushom! M’huwiex lill-​merħla li r-​ragħajja jmisshom jitimgħu? . . . Lil dawk morda ma saħħaħtux, u lill-​waħda muġugħa ma fejjaqtux, u lill-​waħda miksura ma nfaxxajtux, u lill-​waħda mferrxa ma ġibtux lura, u lill-​waħda mitlufa ma fittixtux li ssibu, imma bil-​ħruxija żammejtuhom sottomessi, saħansitra b’tirannija.”—Eżekjel 34:2-4.

¹⁰ Bħal dawk ir-​ragħajja politiċi, il-​mexxejja reliġjużi Lhud taʼ l-​ewwel seklu kienu qalbhom iebsa. (Luqa 11:47-52) Biex jagħti tixbieha taʼ dan, Ġesù qal dwar Lhudi li kien ġie misruq, imsawwat, u mħolli nofsu mejjet fil-​ġenb tat-​triq. Qassis Iżraelit għadda qrib, imma malli ra lil-​Lhudi, hu qasam għan-​naħa l-​oħra tat-​triq. Levita għamel l-​istess. Imbagħad wieħed mhux Iżraelit, Samaritan mistmerr, għadda qrib u tħassar lill-​vittma. Infaxxalu l-​feriti tiegħu, ħadu fuq bhima lejn lukanda, u ħa ħsiebu. Ħallas lil-​lukandier u qallu li kien se jerġaʼ jiġi biex iħallas xi spejjeż oħrajn.—Luqa 10:30-37.

11, 12. (a) Il-​ħażen tal-​mexxejja reliġjużi kif laħaq il-​quċċata tiegħu fi żmien Ġesù? (b) Ir-​Rumani x’għamlulhom finalment lill-​mexxejja reliġjużi?

¹¹ Tant kienu korrotti l-​mexxejja reliġjużi taʼ żmien Ġesù li meta Ġesù rxoxta lil Lażżru mill-​mewt, il-​qassisin ewlenin u l-​Fariżej sejħu lis-​Sinedriju flimkien u qalu: “X’se nagħmlu, għaliex dan ir-​raġel [Ġesù] iwettaq ħafna sinjali? Jekk inħalluh waħdu b’dan il-​mod, huma kollha se jpoġġu fidi fih, u r-​Rumani se jiġu u jeħdulna kemm lil postna u kemm lil ġensna.” (Ġwann 11:47, 48) Ma kienx jimpurtahom dwar il-​ġid li Ġesù kien għamel għall-​benefiċċju tar-​raġel mejjet. Kienu kkonċernati dwar il-​pożizzjonijiet tagħhom. Mela “minn dak in-​nhar ’il quddiem huma ħadu parir li joqtluh [lil Ġesù].”—Ġwann 11:53.

¹² Biex iżidu mal-​ħażen tagħhom, il-​qassisin ewlenin imbagħad “ħadu parir li joqtlu lil Lażżru wkoll, għaliex minħabba fih ħafna mil-​Lhud kienu qegħdin imorru hemm u jpoġġu fidi f’Ġesù.” (Ġwann 12:10, 11) L-​isforzi egoistiċi tagħhom biex jipproteġu l-​pożizzjonijiet tagħhom ma swew għal xejn, għax Ġesù kien qalilhom: “Darkom hija abbandunata lilkom.” (Mattew 23:38) Bi twettieq għal dawk il-​kelmiet, f’dik il-​ġenerazzjoni r-​Rumani ġew u ħadulhom ‘posthom u ġenshom,’ u l-​ħajjiet tagħhom ukoll.

Ragħajja Taʼ Mħabba Fil-​Kongregazzjoni Kristjana

13. Jehovah lil min wiegħed li kien se jibgħat biex jirgħa l-​merħla tiegħu?

¹³ Minflok ir-​ragħajja krudili u egoisti, Jehovah kien se jqajjem lir-​Ragħaj mill-​Aħjar, Ġesù, biex jieħu ħsieb tal-​merħla Tiegħu. Hu wkoll wiegħed li jqajjem sottoragħajja taʼ mħabba biex jieħdu ħsieb tan-​ngħaġ: “Se nqajjem fuqhom ragħajja li attwalment se jirgħuhom; u m’humiex se jibżgħu iktar.” (Ġeremija 23:4) B’hekk, bħal fil-​kongregazzjonijiet Kristjani fl-​ewwel seklu hekk ukoll illum, isiru “ħatriet taʼ rġiel ixjeħ f’belt wara belt.” (Titus 1:5) Dawn l-​irġiel ixjeħ spiritwali li jilħqu l-​kwalifiki mniżżlin fl-​Iskrittura għandhom ‘jirgħu l-​merħla t’Alla.’—1 Pietru 5:2; 1 Timotew 3:1-7; Titus 1:7-9.

14, 15. (a) Id-​dixxipli liema attitudni sabuha iebsa biex jiżżviluppaw? (b) Ġesù x’għamel biex jurihom li l-​anzjani għandhom ikunu qaddejja umlin?

¹⁴ F’li jieħdu ħsieb in-​ngħaġ, l-​anzjani jridu “fuq l-​affarijiet kollha” jkollkom “imħabba intensa” għalihom. (1 Pietru 4:8) Imma d-​dixxipli taʼ Ġesù, billi kienu kkonċernati wisq dwar il-​prestiġju u l-​pożizzjoni, kellhom jitgħallmuh dan. Mela meta omm tnejn mid-​dixxipli qalet lil Ġesù: “Agħti l-​kelma li dawn iż-​żewġ uliedi jistgħu jpoġġu bil-​qiegħda, wieħed fuq l-​id il-​leminija tiegħek u wieħed fuq ix-​xellug tiegħek, fis-​saltna tiegħek,” id-​dixxipli l-​oħrajn imtlew bil-​korla. Ġesù qalilhom: “[I]l-ħakkiema tal-​ġnus jagħmluha taʼ mulejiet fuqhom u n-​nies kbar jaħkmu b’awtorità fuqhom. Dan m’huwiex il-​mod fostkom; imma kulmin irid isir kbir fostkom irid ikun il-​ministru tagħkom, u kulmin irid ikun l-​ewwel fostkom irid ikun l-​irsir tagħkom.”—Mattew 20:20-28.

¹⁵ F’okkażjoni oħra, wara li d-​dixxipli “kienu argumentaw bejniethom min hu akbar,” Ġesù qalilhom: “Jekk xi ħadd irid ikun l-​ewwel, irid ikun l-​aħħar wara kulħadd u ministru taʼ kulħadd.” (Mark 9:34, 35) Umiltà tal-​moħħ u volontà li jaqdu riedu jsiru parti mill-​personalità tagħhom. Madankollu d-​dixxipli baqgħu jkollhom diffikultà b’dawk l-​ideat, għax fl-​istess lejl qabel miet Ġesù, fl-​aħħar ikla taʼ fil-​għaxija tiegħu, “kwistjoni sħuna” qamet bejniethom dwar min kien l-​akbar! Dak seħħ minkejja li Ġesù kien uriehom kif anzjan irid jaqdi l-​merħla; hu kien umilja lilu nnifsu u ħaslilhom saqajhom. Hu qal: “Jekk jien, għalkemm Mulej u Għalliem, ħsilt saqajkom, intom ukoll għandkom taħslu saqajn xulxin. Għax qegħidtilkom ix-​xempju, biex, sewwa sew bħalma għamiltilkom jien, intom għandkom tagħmlu wkoll.”—Luqa 22:24; Ġwann 13:14, 15.

16. Fl-​1899, il-​Watch Tower liema kummenti għamel fuq l-​iktar kwalità importanti taʼ l-​anzjani?

¹⁶ Ix-​Xhieda taʼ Jehovah dejjem għallmu li l-​anzjani għandhom ikunu hekk. Kważi seklu ilu, il-​Watch Tower taʼ l-​1 t’April, 1899, innota l-​kliem taʼ Pawlu fl-​1 Korintin 13:1-8 u mbagħad qal: “L-​Appostlu wera b’mod distint li għarfien u abbiltà li titkellem m’humiex l-​iktar ittestjar vitali, imma li l-​imħabba li tippenetra fil-​qalb u li testendi ’l barra matul il-​korsa kollha tal-​ħajja, u tħaddem u topera l-​iġsma mortali tagħna, hija l-​ittestjar veru​—il-​prova vera tar-​relazzjoni divina tagħna. . . . Il-​karatteristika prinċipali li għandha titfittex f’kull min jiġi aċċettat bħala qaddej tal-​knisja, biex jimministra f’affarijiet qaddisin, għandha tkun l-​ewwel l-​ispirtu taʼ mħabba.” Dan innota li rġiel li ma kinux se jaqdu bl-​umiltà mill-​imħabba “huma għalliema bla sigurtà, u x’aktarx li iktar jagħmlu ħsara milli ġid.”—1 Korintin 8:1.

17. Il-​Bibbja kif tenfasizza l-​kwalitajiet li l-​anzjani għandhom ikollhom?

¹⁷ B’hekk, irġiel ixjeħ ma jridux ‘jagħmluha taʼ mulejiet fuq’ in-​ngħaġ. (1 Pietru 5:3) Minflok, iridu jieħdu t-​tmexxija f’li jkunu ‘qalbhom tajba maʼ xulxin, billi jagħdru b’tenerezza.’ (Efesin 4:32) Pawlu enfasizza: “Tlibbsu bl-​affezzjonijiet teneri taʼ mogħdrija, qalb tajba, umiltà tal-​moħħ, ħlewwa, u sabar fit-​tul. . . . Imma, barra minn dawn l-​affarijiet kollha, tlibbsu bl-​imħabba, għax hija rabta perfetta taʼ unjoni.”—Kolossin 3:12-14.

18. (a) Pawlu liema eżempju mill-​aħjar ta f’li jittratta man-​ngħaġ? (b) L-​anzjani għala m’għandhomx jinjoraw il-​ħtiġijiet tan-​ngħaġ?

¹⁸ Pawlu tgħallem jagħmel dan, billi qal: “Sirna ġentili f’nofskom, bħal meta omm li trabbi tgħożż lit-​tfal tagħha stess. Mela, billi għandna affezzjoni tenera għalikom, ħadna pjaċir sewwa li nwasslulkom, mhux biss l-​aħbar tajba t’Alla, imma wkoll lil erwieħna stess, għaliex sirtu maħbubin għalina.” (1 Tessalonkin 2:7, 8) Fi qbil maʼ dak, hu qal: “Lissnu kliem li jikkonsla lill-​erwieħ dipressi, agħtu appoġġ lid-​dgħajfin, stabru fit-​tul lejn kulħadd.” (1 Tessalonkin 5:14) Huwa x’inhuwa t-​tip taʼ problema li n-​ngħaġ jistgħu jġibulhom, l-​anzjani għandhom jiftakru Proverbji 21:13: “Inkwantu għal kulmin qiegħed isodd widintu mill-​għajta taʼ lment tal-​wieħed baxx, hu nnifsu wkoll se jgħajjat u ma jiġix imwieġeb.”

19. Anzjani taʼ mħabba għala huma barka, u n-​ngħaġ kif iwieġbu għal imħabba bħal din?

¹⁹ Irġiel ixjeħ li b’imħabba jirgħu l-​merħla huma barka għan-​ngħaġ. Isaija 32:2 bassar: “Kull wieħed irid jagħti prova li hu bħal moħba mir-​riħ u post taʼ kenn mill-​maltempata tax-​xita, bħal nixxigħat taʼ ilma f’pajjiż mingħajr ilma, bħad-​dell taʼ blata tqila f’art niexfa.” Aħna henjin li nafu li ħafna mill-​anzjani tagħna llum jaġixxu fi qbil maʼ dik l-​istampa sabiħa taʼ serħan. Huma tgħallmu japplikaw il-​prinċipju li ġej: “Fl-​imħabba taʼ l-​aħwa ħa jkollkom affezzjoni tenera lejn xulxin. F’li turu unur lil xulxin ħudu t-​tmexxija.” (Rumani 12:10) Meta anzjani juru dan it-​tip taʼ mħabba u umiltà, in-​ngħaġ iwieġbu billi jagħtuhom “iktar minn konsiderazzjoni straordinarja fl-​imħabba minħabba x-​xogħol tagħhom.”—1 Tessalonkin 5:12, 13.

Irrispetta L-​Użu Tar-​Rieda Ħielsa

20. L-​anzjani għala jridu jirrispettaw ir-​rieda ħielsa?

²⁰ Jehovah ħalaq lill-​bnedmin b’rieda ħielsa biex jagħmlu d-​deċiżjonijiet tagħhom stess. Fil-​waqt li l-​anzjani għandhom jagħtu pariri u saħansitra dixxiplina, huma m’għandhomx jikkontrollaw il-​ħajja jew il-​fidi taʼ xi ħadd ieħor. Pawlu qal: “Mhux li aħna s-​sidien fuq il-​fidi tagħkom, imma aħna ħaddiema mseħbin għall-​ferħ tagħkom, għax huwa bil-​fidi tagħkom li qegħdin intom bil-​wieqfa.” (2 Korintin 1:24) Iva, “kull wieħed se jġorr it-​tagħbija tiegħu stess.” (Galatin 6:5) Jehovah tana ħafna libertà fil-​limiti tal-​liġijiet u l-​prinċipji tiegħu. B’hekk l-​anzjani għandhom jevitaw li jistabbilixxu regoli fejn ma jinkisrux prinċipji Skritturali. U għandhom jirreżistu kwalunkwe tendenza biex joffru l-​opinjoni persunali tagħhom stess bħala domma jew li jħallu l-​kburija tagħhom tidħol fin-​nofs jekk xi ħadd ma jaqbilx maʼ dawn l-​ideat.—2 Korintin 3:17; 1 Pietru 2:16.

21. X’nistgħu nitgħallmu mill-​attitudni taʼ Pawlu lejn Filemon?

²¹ Innota kif Pawlu, waqt li kien fil-​ħabs f’Ruma, ittratta maʼ Filemon, sid Kristjan taʼ l-​irsiera f’Kolosse fl-​Asja Minuri. L-​irsir taʼ Filemon bl-​isem taʼ Onesimus ħarab lejn Ruma, sar Kristjan, u kien qed jgħin lil Pawlu. Pawlu kiteb lil Filemon: “Kieku nixtieq li nżommu lura għalija nnifsi biex minflokok hu jistaʼ jkompli jimministra lili fl-​irbit tal-​ħabs li qiegħed nissaporti minħabba fl-​aħbar tajba. Imma mingħajr il-​kunsens tiegħek jien ma rrid nagħmel xejn, sabiex l-​att tajjeb tiegħek jistaʼ jkun, mhux bħal li kieku taʼ bil-​fors, imma mir-​rieda ħielsa tiegħek stess.” (Filemon 13, 14) Pawlu rritorna lil Onesimus, billi talab lil Filemon biex jittrattah bħala ħu Kristjan. Pawlu kien jaf li l-​merħla ma kinitx tiegħu; kienet t’Alla. Hu ma kienx is-​sid tagħha imma l-​qaddej tagħha. Pawlu ma ddettax lil Filemon; hu rrispetta r-​rieda ħielsa tiegħu.

22. (a) L-​anzjani x’għandhom jifhmu li hija l-​pożizzjoni tagħhom? (b) Jehovah liema xorta taʼ organizzazzjoni qed jiżżviluppa?

²² Hekk kif tikber l-​organizzazzjoni t’Alla, iktar anzjani jiġu maħturin. Huma, kif ukoll l-​anzjani b’iktar esperjenza, iridu jifhmu li l-​pożizzjoni tagħhom hija waħda taʼ servizz umli. B’dan il-​mod, hekk kif Alla jmexxi l-​organizzazzjoni tiegħu lejn id-​dinja ġdida, din se tkompli tikber kif iridha hu​—organizzata tajjeb imma ma tissagrifikax l-​imħabba u l-​mogħdrija għall-​effiċjenza. B’hekk, l-​organizzazzjoni tiegħu se ssir dejjem iżjed attraenti għal uħud bħal ngħaġ li se jaraw fiha evidenza li “Alla jagħmel ix-​xogħlijiet kollha tiegħu jikkoperaw flimkien għall-​ġid taʼ dawk li jħobbu lil Alla.” Dak għandu jkun mistenni minn organizzazzjoni msejsa fuq l-​imħabba, għaliex “l-​imħabba ma tfalli qatt.”—Rumani 8:28; 1 Korintin 13:8. (w94 10/1)

Kif Twieġeb Int?

◻ Il-​Bibbja kif tiddeskrivi l-​attenzjoni taʼ Jehovah għan-​nies tiegħu?

◻ Ġesù liema rwol għandu f’li jieħu ħsieb il-​merħla t’Alla?

◻ L-​anzjani liema karatteristika ewlenija għandhom ikollhom?

◻ L-​anzjani għala jridu jqisu r-​rieda ħielsa tan-​ngħaġ?

[Stampa f’paġna 28]

Ġesù, ir-​“ragħaj mill-​aħjar,” wera mogħdrija

Stampi f’paġna 29

Il-​mexxejja reliġjużi korrotti kkonfoffaw biex joqtlu lil Ġesù