Allat Krudili tal-Bnedmin
ALLAT tal-qedem spiss kienu mpinġijin bħala għatxana għad-demm u b’xenqiet sesswali bla rażan. Biex jikkwitawhom, ġenituri saħansitra ħarqu lil uliedhom ħajjin fin-nirien. (Dewteronomju 12:31) Fl-estrem l-ieħor, filosfi pagani għallmu li Alla kien mingħajr sentimenti bħalma huma r-rabja jew il-ħasra.
Il-veduti mnebbħin mid-demonji taʼ dawn il-filosfi influwenzaw lill-poplu t’Alla taʼ l-isem, il-Lhud. Il-filosfu Lhudi Filo, kontemporanju taʼ Ġesù, sostna li Alla “assolutament m’hu suxxettibbli għal kwalunkwe passjoni.”
Lanqas is-setta stretta Lhudija tal-Fariżej ma skappat l-influwenza tal-filosofija Griega. Huma addottaw it-tagħlim taʼ Plato li l-bniedem hu magħmul minn ruħ immortali maqbuda ġewwa ġisem uman. Iktar minn hekk, skond il-kittieb taʼ l-istorja taʼ l-ewwel seklu Josefus, il-Fariżej emmnu li l-erwieħ tan-nies il-ħżiena “jsofru kastig etern.” Il-Bibbja, madankollu, ma tagħtix bażi għal ħarsa bħal din.—Ġenesi 2:7; 3:19; Ekkleżjasti 9:5; Eżekjel 18:4.
Xi ngħidu għas-segwaċi taʼ Ġesù? Ħallew lilhom infushom jiġu influwenzati minn filosofija pagana? Billi għaraf dan il-periklu, l-appostlu Pawlu wissa lil sħabu l-Kristjani: “Attenti: forsi jistaʼ jkun hemm xi ħadd li se jġorrkom lil hemm bħala l-priża tiegħu permezz tal-filosofija u qerq vojt skond it-tradizzjoni tal-bnedmin, skond l-affarijiet elementari tad-dinja u mhux skond Kristu.”—Kolossin 2:8; ara wkoll 1 Timotew 6:20.
B’niket, numru taʼ indokraturi Kristjani taʼ l-isem tat-tieni u t-tielet seklu injoraw dik it-twissija u għallmu li Alla m’għandux sentimenti. The Encyclopedia of Religion tistqarr: “Fil-maġġor parti, l-attributi t’Alla kienu mifhumin ħafna bħalma kienu misħuqin fil-ħsieb Lhudi u filosofiku taʼ dak iż-żmien . . . L-idea li Alla l-Missier setaʼ jkollu sentimenti bħalma hija l-ħasra . . . kienet ġeneralment meqjusa bħala inaċċettabbli taʼ l-inqas sa tard fis-seklu għoxrin.”
B’hekk, il-Kristjaneżmu addotta t-tagħlim falz taʼ alla krudil li jikkastiga lill-midinbin billi jġegħilhom isofru turment konxju għal dejjem. Min-naħa l-oħra, Alla Jehovah jistqarr b’mod ċar fil-Kelma tiegħu, il-Bibbja, li “l-ħlas li d-dnub iħallas huwa l-mewt,” mhux turment etern konxju.—Rumani 6:23.
[Sors taʼ l-Istampa f’paġna 19]
Fuq: Acropolis Museum, il-Greċja
[Sors taʼ l-Istampi f’paġna 19]
Bil-kortesija taʼ The British Museum