Il-​Vera Sigurtà—Mira Diffiċli

ARNOLD kien tifel li kien iħobb it-​tigra taċ-​ċarruta tiegħu. Kull fejn kien imur, kien ikaxkarha miegħu​—waqt il-​logħob, waqt l-​ikel, u fis-​sodda. Għalih, it-​tigra pprovdiet faraġ, u sigurtà. Jum minnhom, inqalgħet kriżi. It-​tigra għosfrot!

Waqt li Arnold beda jibki, ommu, missieru, u tliet ħutu akbar minnu qalgħu d-​dar kbira tagħhom kollha biex isibu t-​tigra. Wieħed minnhom fl-​aħħar sabha f’kexxun. Mid-​dehra, Arnold kien poġġieha hemmhekk u malajr nesa fejn kienet. It-​tigra ġiet irritornata, u Arnold mesaħ id-​dmugħ tiegħu. Ħassu ferħan u fis-​sigurtà mill-​ġdid.

Kemm ikun sew kieku l-​problemi kollha jistgħu jissolvew daqshekk faċilment​—sempliċement bħal li kieku ssib tigra tal-​logħob f’kexxun! Għall-​biċċa l-​kbira tan-​nies, madankollu, kwistjonijiet taʼ sigurtà huma wisq iktar serji u komplessi minn hekk. Tistaʼ tgħid kullimkien, in-​nies jistaqsu, ‘Tgħid se nsir vittma taʼ xi att kriminali jew vjolenti? Qiegħed f’periklu li nitlef l-​impjieg tiegħi? Żgur li l-​familja tiegħi se jkollha ikel biżżejjed? Sejrin oħrajn jevitawni minħabba r-​reliġjon jew l-​isfond etniku tiegħi?’

In-numru taʼ nies li jsofru min-​nuqqas taʼ sigurtà huwa immens. Skond il-​Ġnus Magħquda, kważi tliet biljuni mhux biss m’għandhomx aċċess għall-​kura taʼ mard komuni imma lanqas għall-​mediċina essenzjali. Iktar minn biljun ruħ jgħixu fl-​ifqar kundizzjonijiet. Kważi biljun, għalkemm jifilħu jaħdmu, m’għandhomx impjieg produttiv. In-​numru taʼ refuġjati qiegħed jiżdied. Sa l-​aħħar taʼ l-​1994, madwar 1 minn kull 115-il ruħ fuq l-​art kienu mġegħlin jaħarbu minn djarhom. Miljuni taʼ ħajjiet huma moħlijin bħala riżultat tan-​negozju internazzjonali fin-​narkotiċi li jlaħħaq il-​$500 biljun fis-​sena, u li jagħti lok għal numru bla għadd t’atti kriminali u vjolenti. Il-​gwerra teqred il-​ħajja taʼ miljuni sħaħ. Matul l-​1993 biss, 42 pajjiż kienu involuti f’konflitti kbar, waqt li 37 oħrajn esperjenzaw vjolenza politika.

Il-gwerra, il-​faqar, il-​kriminalità, u theddidiet oħrajn għas-​sigurtà umana huma marbutin maʼ xulxin, u qegħdin jiżdiedu fin-​numru. M’hemmx soluzzjonijiet bħal tat-​tigra fil-​kexxun għal problemi bħal dawn. Fil-​fatt, il-​bnedmin m’humiex se jsolvuhom affattu.

“La tittamawx fil-​kbarat, għax il-​bniedem ma jsalvakomx,” twissi l-​Kelma t’Alla, il-​Bibbja. F’min, mela, nistgħu nafdaw? Din l-​iskrittura tkompli: “Hieni min f’Alla taʼ Ġakobb isib il-​għajnuna tiegħu, min għandu t-​tama fil-​Mulej, Alla tiegħu, li għamel is-​sema, l-​art, u l-​baħar, u kull ma jinsab fihom.”—Salm 146:3-6.

Għala nistgħu nafdaw f’Jehovah biex iġib is-​sigurtà fuq din l-​art? Huwa possibbli li ngawdu ħajjiet fis-​sigurtà u henjin issa? Alla kif se jneħħi l-​ostakli għas-​sigurtà umana? (w96 5/15)